Read eten ɛTomɛ 19 Bible Online

ɛTomɛ 19 - eten bible

ɛTomɛ 19

¹Nten de ne ɛPolos sa kɛ so ne iKɔrɔntos de ɛBulus sa ne roos ɛnkiinɛ ɛ leesel ndɔ nigarang nga gbik ɛbhɛ hɔn iFisus. ɛNggyɛ wo ne ɛbhɛ sɛ nidɛng ninaa ne roos sa.

²Ne ɛ phom nibhɛ ɛ yɔngɔ, “Nten de ne ɛ kaa nang ne itin nɛ wo, iKabyik ɛTaanggbey de kaa ne lel ndɔ mon ne?” Nibhɛ ne yaak ɛBulus segha, “Sɔng njwi kɛ ma yung ku phok wu iKabyik ɛTaanggbey sonɛ nang.”

³ɛBulus sa ne phom ɛ yaak nibhɛ, “Yaa ihywee ne ibatisima ne kaa yɛk nyini nɛ woo?” Nibhɛ ne yɔngɔ, “iHywee ne ibatisima ɛYohana ne yaak ne kaa yɛk njwii nɛ.”

⁴ɛBulus sa ne yaak nibhɛ, “ɛYohana gha kaa yaak ninyi na nɛ nibhɛ kɛ san ɛbɔk ne ibatisima de. Ne ɛ ji yaak ninyi na wu tɛ nibhɛ nang ne itin nɛ ne ɛdɛ ɛnyi gha ne ɛ yaaso ɛtsim ɛbhɛ, kaabi ɛ bo wu ɛYɛso.”[31]

⁵Ne sɛ ninyi na kɛ phok ɛlɛ wo, ne yɛk nibhɛ ne ibatisima de ndɔ irywɛɛk ɛDaray ɛYɛso wo.

⁶Ne sɛ ɛBulus sa kɛ tek ɛrɔngɔ ne iwɔ daa ne ito, iKabyik ɛTaanggbey de ne yɛɛs nibhɛ, nibhɛ ji yaa bol ne ihwak ilwem, nibhɛ tɔng ibol ɛTaanggbey.

⁷Nibhɛ kaa so ninyi ɛnduwubɔ nɛ ninyi ifaa.

⁸ɛBulus sa ne bo iphɛl itat, ɛ leesel ndɔ ne ijwee ne itɔɔy niYahodawa wo, ɛ bol nɛ nibhɛ ne irway nviit, nibhɛ ne i wɛɛ ibol lɛ ne ɛ jii ɛ sim aa hɔ ihywɛɛ nibhɛ daa ne ibol ne igbɔm ɛTaanggbey de.

⁹Nidɛng ndɔ nibhɛ wo ne tɔɔrek ito ihet nibhɛ ne mbaray tang nang ne itin nɛ nibhɛ bol ivol ne ikpɛɛ daa ne ɛnkiinɛ ɛDaray yo ɛnu ɛyisɛ ninyi na kpas. iPhɛ ɛlɛy ɛBulus sa ne tek nibhɛ, ɛ bo ninaa ne roos sa ɛ phɛ nɛ ne icwam ne iTiranos, ɛnggyɛ wo, ne ɛ yaa bhɛ tɔng nibhɛ ibol ɛDaray de izenge ne ihwɛlɛ.

¹⁰Ne ɛ mɔn ɛlɛ wo ɛ hɔn ishay iphaa, iphɛ ne te niYahodawa gbik nɛ ninyi na ne hame nibhɛ soye niYahodawa ne ivel ne iSiya de phok ibol ɛDaray ɛYɛso de.

¹¹ɛTaanggbey ne mɔn igbaang nikɔn ne kparat lenɛ ne ɛBulus sa,

¹²ɛli kaa i sɛ kɛ bo ɛhangkacif ɛBulus sa, hang ɛdɛ ɛtura wo ne ɛ kɛ ku sɔɔl le yɔɔ, i bhɛ dat nisha na nɛ, nibhɛ yaa ne tes niken, ikpabyik ivebhe ta wuusi ndɔ nibhɛ.

¹³Nidɛng niYahodawa na nɛ nibhɛ kaan nibhɛ tuul ikpabyik ivebhe ndɔ ninyi ne ma yaa sim tɛ nibhɛ sɛɛ mɔn ɛtomɛ ne irywɛɛk ɛYɛso wo daa ninyi na nɛ nibhɛ bok ikpabyik ivebhe da. Nibhɛ ne yɔngɔ, “Ndɔ ne irywɛɛk ɛYɛso wo ne ɛBulus sa tɔng ibol ɛbhɛ de, nzi bok kɛ te ɛ wuru.”

¹⁴Ninɔn niras ɛdɛ ɛndiindy nibo niYahodawa na ne kaa i bok ɛbhɛ ɛSikiba nibhɛ ɛniitaa, kaa mɔn nikɔn nɛnaa wo.

¹⁵Ne sɛ ɛdɛ ɛtuk kɛ, ikabyik ibebhe de ne yaak nibhɛ, “Nzi yɛɛ ɛYɛso yegha, nzi ne ta yɛɛ ibol ɛBulus de, ne ɛ ji soyɛ ɛhay?”

¹⁶Ɛnyi gha ne ikabyik ibebhe de so ndɔ ɛbhɛ wo ne taay ɛ ho ne hal nibhɛ, ne ɛ phyin ihwet nibhɛ gbik, ɛ kpɛɛ itsura nibhɛ, ɛ phok nibhɛ ikpom neyi tel nibhɛ ne wuru nkywankywaang nibhɛ tel.

¹⁷Ne sɛ niYahodawa na nɛ ninaa ne hame nibhɛ soye niYahodawa na nɛ nibhɛ so ne iFisus de kɛ phok ibol lɛ de wo gbik, nibhɛ ne wum ɛnik gbom. Nibhɛ ne ya naas irywɛɛk ɛDaray ɛYɛso wo ne ndiinday.

¹⁸Ninyi na gbom nɛ nibhɛ kɛ nang ne itin nɛ wo ne wuru nibhɛ tɔng nikɔn nibebhe na nɛ nibhɛ kɛ mɔn no kpas.

¹⁹Nidɛng ninaa ne ikyarakyut ta gbom ne yɛɛset ne iwee ne ikyarakyut nibhɛ da, nibhɛ wɔɔse ɛnu ɛyisɛ ninyi na kpas. Ne sɛ kɛ wɛɛ, kɛ tɔng ijam ne iwee yɛdaa nggyɛ wo, ne yaang ihywɛɛ kɛ hɔng ijam gbom. iJam be ne ihywɛ sɛɛ hɔn ɛzurufa nibhɛ na ninom nzuwubɔ iwii.

²⁰Ne lenɛ ɛlɛ wo, ibol ɛDaray de ne shwalat gbarang iphɛ hante ne ihwet.

²¹ɛTsim nikɔn nɛnaa wo, ɛBulus sa ne yaang iphɛ kɛ jam mɛ ɛ phyii roos iMakyidɔniya gbik ne iKaya ɛ phɛ ne iYɛrushɛlɛm. Ne ɛ yɔngɔ, “Yaa sɛ nggɛ bhɛ hɔn ɛnggyɛ wo, iphɛ ne so nggbinggbing mbɛ yaang iRooma.”

²²ɛBulus sa ne tom ɛTimɔti ye ne ɛRasatus nɛ nibhɛ phyighis ɛbhɛ ne ɛtomɛ ne iMakyidɔniya de, ne ɛ kyi phyɔngɔle ne ivel ne iSiya de nyɛɛn.

²³Nten nɛdee nggyɛ wo ne ɛgbaang ne ishisim kaa ne yilitsik ndɔ ne iFisus de lenɛ ne ibol ne ɛNkiinɛ ɛDaray yo.

²⁴ɛDɛ ɛtuu ne ɛzurufa gha kaa sonɛ ne kaa bok ɛbhɛ ɛDɛmɛtiriyus. Ɛ kaa ne bo ɛzurufa gha ɛ ryɔng ne igunkyi ɛdɛ ɛTaanggbey ninyi iGirik ka ne i kaa bok ɛbhɛ ɛTimas, ninaa ɛtomɛ ɛbhɛ na kaa ne i sɛ ijam gbom ndɔ ɛtomɛ yɛghaa nggyɛ. iShisim mɛdee wo kaa ne tsa ne ɛbhɛ.

²⁵ɛDimaturus sa kaa ne yel-le ninaa ɛtomɛ ɛbhɛ na gbik nɛ ninyi na nɛ nibhɛ mɔn ihywee nitomɛ yɛdee nggyɛ wo gbik, ɛ yaak nibhɛ, “Nisaa en, nyinɛn ɛ yɛɛn ɛli ne njwɛɛn sɛ ijam gbom ɛlɔ ɛtomɛ yɛghaa wo.

²⁶Ɛ wɛɛ ɛn ɛ phok ɛn ɛkɔn na ne ɛnyi gha ne i bok ɛbhɛ ɛBulus sa kɛ mɔn no, ɛ kɛ yɛɛn ninyi ne iFisus sa gbik ne ivel ne iSiya da ɛ kɛ hyere nibhɛ gbik! Ɛ bo wu ɛTaanggbey ne ɛten ɛsii kɛ ryɔng wu hang ɛ so ɛTaanggbey ne itin nɛ.

²⁷ɛTomɛ njwɛɛn na so ɛnu ne izɛn. Sɔng yaa tang yaang ɛtomɛ njwɛɛn na te ɛkɔn nang, kang ne iphɛ ɛlɛy, sɔng ninyi na yaa tɔ bok ideng ne ikpii ɛTimas ɛkɔn nang. Ɛbhɛ ɛTimas ne ito ɛbhɛ, sɔng yaa tang nang ɛbhɛ ne ndiinday nang, ɛbhɛ wo nɛ ninyi ne ivel ne iSiya gha gbik ne igbagha ɛzay yo i re ɛbhɛ ntsong ngga.”

²⁸Ne sɛ ninyi na kɛ phok ɛlɛ wo nibhɛ ne te njenjek gbogbom, nibhɛ ne tɔɔk izɔlɔs nibhɛ yɔngɔ, “ɛTimas ne iFisus ɛbhɛ ku shɛs!”

²⁹ɛGarang ngɛ ne te buruburu, ninyi na ne wum ɛGayus se ne ɛRisitakus nɛ nibhɛ sonɛ nibhɛ so ninyi ne iMakyidɔniya, nibhɛ ta soye nitay ɛBulus sa, nibhɛ hɔ nibhɛ, nibhɛ phɛ nɛ ɛhyɛl ne ijɔwɔ nibhɛ.

³⁰ɛBulus sa ne i sim te aa phɛ ɛbhɛ lel ndɔ ɛlɔ ne idira ninyi de ninaa ne roos sa ne ring ɛbhɛ nɛ.

³¹Nidɛng nindiinday ninyi ne ivel ne ɛShiya de nɛ nibhɛ so nitay ɛBulus sa ne tom mɛ, wu te bhɛ roro ne ɛBulus sa i yaak ɛbhɛ wu hang ɛ sim ɛ tɔɔl ito ɛbhɛ ndɔ ɛhyɛl ne ijɔwɔ gha.

³²iDira ninyi de ne te buruburu, nidɛng ne i rɛrɛ ɛnggyɛ nidɛng ne i bol ɛbɛ, ɛrɔngɔ i bol idee ɛbhɛ. Sɔng iday ninyi de ne jung i yɛɛ ɛkɔn na ne ɛ kɛ phɛ nɛ nibhɛ nang.

³³niYahodawa na ne yɛk ɛdɛ ɛnyi gha nɛ ne bok ɛbhɛ ɛLɛzɛnda wu te ɛbhɛ boote nɛ ninyi na, ɛtsim mɛ nɛ nibhɛ kɛ ku tɔng ɛbhɛ ɛkɔn kɛgha ne aa yɔngɔ. ɛLɛzɛnda gha ne te ninyi na iwɔ dɛɛ wu tɛ nibhɛ kunggbyak te ɛ tɔng nibhɛ ɛkɔn na ne ɛ kɛ te.

³⁴Ne sɛ ninyi na kyi seng wu ɛLɛzɛnda gha so ɛdɛng ndɔ niYahodawa na, nibhɛ ne kyi ta hante ne irywɛrɛ da, nibhɛ bo, “ɛTimas ne iFisus ɛbhɛ ku shɛs!” Nibhɛ ne rɛrɛ ɛlɔ wo nibhɛ hɔn ɛwa ɛphaa.

³⁵Ɛhaa ne haa ivol ɛgarang ngɛ ne ji yɛk ninyi na nɛ nibhɛ kunggbyak. Ne ɛ yɔngɔ, “Ninyi ne iFisus, ɛ doo ɛ ɛli ne ɛzay ya i yɛɛ wu ninyi ne iFisus sa nibhɛ wɛɛ ideng ne ikpii ɛndiinday ɛTimas sa gbik ne iKɛɛ ne ikpii iwɛwɛy de ne iphɛ kaa le daa ne irywa wo iphɛ ho woo?

³⁶Sɔng i re ibol lɛdee wo ne ishamas sang, iphɛ ɛlɛy ne ɛ ku ɛn nggbyak, sɔng ne ˆɛ ku shii yɔng ɛn gborok ˆɛ mɔn ɛn ɛkɔn na nang.

³⁷Ɛ kɛ ne yɛɛs ɛn nɛ ninyi yɛnaa wo ɛbɛ wo, sɔng nibhɛ kɛ hyel ɛyi ne ideng ne ikpii ɛTimas sa nang, sɔng nibhɛ bol ivol ne bɛɛs ɛbhɛ nang.

³⁸Wu ɛDɛmɛtiriyus sa nɛ ninaa ɛTomɛ ɛbhɛ na ne bok ibol ne ɛdɛ ɛnyi itam ɛshara ne sonɛ, ninaa ne bol ɛshara yɛ ne sonɛ. Tɛ nibhɛ ne phɛ ne ibol nibhɛ de ɛnggyɛ wo.

³⁹Wu ne ɛ bok ɛn idɛ bol de kang ne ɛ sim ɛn yaa bol ɛn nyini iphɛ, ne roos ɛn ɛnkiinɛ ɛ yɛɛs ne iphɛ ɛlɔ ne itɔrɔng.

⁴⁰Njwɛɛn so ɛnu ne izɛn, yaa yungaa yɔngɔ wu njwɛɛn soyɛ nisang-phok, daa ɛkɔn na ne ɛ kɛ te izenge wo. iPhɛ dee sɔng njwɛɛn sɛɛ ne yɛɛ ne kyii ne ibol daa ne ishishim mɛdee wo nang.”

⁴¹Ne sɛ ɛ kɛ taal ivol lɛdaa wo, ne ɛ yɛk idira ninyi de ne nkiinɛ, nibhɛ ne hyel.