Read eten ɛTomɛ 2 Bible Online

ɛTomɛ 2 - eten bible

ɛTomɛ 2

¹Kaa ne sɛ ɛtuk kɛ ne idira niYahodawa na nɛ nibhɛ bok iphɛ iPɛntakos de kɛ tuu, idira ninaa ne roos sa gbik kaa ne so ɛlɔ ɛdaan.

²iDɛ izok ge ne shii le dak ne irywa, te ɛgbaang ne igbil ihywɛ yɛɛs ndɔ ne ijwee wo hyɔrɔ nɛ nibhɛ kɛɛ sonɛ wo.

³Nidɛng nikɔn na nɛ nibhɛ so te ilwem ne igboo ne wuusi nibhɛ hobhose en nibhɛ sooset dak ne ito nibhɛ.

⁴iKabyik ɛTaanggbey de ne yɛɛs ndɔ ɛrɔngɔ nɛ hyɔrɔ, nibhɛ ne yaa bol ne ihwak ilwem ɛli ne iKabyik ge kɛ nang ɛrɔngɔ.

⁵Nidɛng niYahodawa na nɛ nibhɛ bok ɛnik ɛTaanggbey kaa ne so ne iYɛrushɛlɛm de. Nibhɛ kaa les nigarang ɛzay ya gbik.

⁶Ne sɛ ninyi yɛnaa nggyɛ wo kɛ phok izok ge, idira ninyi de ne tumareey. Nibhɛ ne wum ɛnu zii daa ɛli ne ɛrɔngɔ phok ninaa ne roos sa kɛ yaa bol ne ilwem ɛgarang nibhɛ da.

⁷Nibhɛ ne wum en zii gbom, nibhɛ bal ninu, nibhɛ ji yɔngɔ, “Nzo gbik ninyi yɛnaa wo nɛ nibhɛ bol lo so ninaa ne iGalili nang?

⁸Kɛ ne mɔn ɛli ɛrɔngɔ kyi phok nibhɛ bol ne ilwem ɛgarang ɛbhɛ dee?”

⁹Njwɛɛn ne so ninaa ne ivel da kang-ka-kang, ivel ne iPatiya, iMɛdiya, iLama. ɛByin nɛ ne le ne iMɛsopotamiya, ne iYahudiya, iKapadosiya, iPantus, ne iSiya,

¹⁰nidɛng ne le ne iFirijiya, iPamifiliya, ne iMasad, ne iwap ne iSɛrene ne ifɛ ne ivel ne iLibya, gbik nɛ ninaa ne kpoo nɛ nibhɛ le ne iRooma.

¹¹Njwɛɛn kɛ byingis en ɛbɛ wo ilwem ba gbom, niYahodawa nɛ ninaa ne hame nibhɛ so niYahodawa; nɛ ninyi ne iKɛrɛt, nɛ ninaa ne iRabiya, gbik ne iphɛ ɛlɛy njwɛɛn i phok nibhɛ bol ilwem nigarang njwɛɛn, daa nikɔn ne kparat ta ne ɛTaanggbey ya kɛ mɔn no.

¹²Nibhɛ ne wum en zii, nibhɛ te buruburu, nibhɛ ne yaa phomos en nibhɛ bo, “Ji ta so kyee wo woo?”

¹³Nidɛng ne ya kyoon nɛ, nibhɛ bo; “Ninyi yɛ na wo kɛ sɔ iguut gbom, nibhɛ kɛ ne tes ziizii.”

¹⁴ɛBiturus sa nɛ ninyi ɛnduwubɔ nɛ ɛbhɛ ɛdaan na ne yilitsik, ne ɛ boote ne izɔlɔs nziinzay, ɛ yɔngɔ, “Nyinɛn nigwaa nge niYahodawa gbik nɛ ninaa ne nibhɛ shɛɛ ne iYɛrushɛlɛm be, tenes ɛn ncɛncɛng ɛkɔn na ne na tɔng nyini wo.

¹⁵Sɔng ninyi yɛnaa so ziizii ɛli ne ɛ tas ɛn no nang, nten de so igyɔs ɛnduwujɛng izee ne ihwɛlɛ zɔng.

¹⁶iBol lɛdee wo iphɛ so ɛkɔn na ne ɛTaanggbey ya kaa boote ɛnu ɛNɛbi ɛYɔwɛl ɛ yɔngɔ,

¹⁷‘Sɛ́ ne sɛ nituk ne taal ɛzay ya kɛ tuu, nzɛ ne sit iKabyik nge daa ninyi na gbik. Ninɔn mon na, niras sɛ nɛ nikuk kɛ sɛ ne tɔng ibol ɛTaanggbey. Ninɔn niphas mon na sɛ ne yaang iyuwa, nibok se ne re ninu nikɔɔn mon na.

¹⁸Ndɔ nituk kɛnaa nggyɛ wo, nzɛ ne ma sit iKabyik nge de daa nikpuru nge na, niras sɛ nɛ nikuk kɛ. Nibhɛ sɛ ne tɔng ibol ɛTaanggbey de.

¹⁹Nzɛ ne mɔn nikɔn ne kparat daa ne irywa, ne n tɔɔrek nyu nikɔn ne kparat nɛ nikɔn ne ɛnik ndɔ ne ivel. Sɛ yaang neyi ne igboo gbik ne ɛguu ngkoy.

²⁰iRoy de sɛ te gbyighilik, ifɛl lo ne seng zurutut tɛ neyi, nyɛɛn ɛgbaang ɛtuk ne ito-ndiinday ɛTaanggbey yo ne kyi tuu.

²¹Gbik ɛhiha ɛnyi ne ɛ sɛ ne yel-le daa ne irywɛɛk ɛDaray yo, ɛbhɛ ɛ sɛ ne phɔrɔt.’ ”[10]

²²“Nyinɛn niSɛrɛla wo, tenes ɛn ibol lɛdee wo. ɛYɛso ne iNazarat ta so ɛnyi ne ɛTaanggbey ya kaa ku tɔɔl nyini wu iyee kɛ tom ɛbhɛ. ɛTaanggbey ya kaa tɔɔl nyini ndɔ ne igbaang nitomɛ da nɛ nikɔn ne kparat ta gbik ne nyu nikɔn ne ɛnik ge ne ɛ kaa mɔn ndɔ mon no lenɛ ne ɛYɛso gha. Nyinɛn no ɛ yɛɛn iphɛ ɛlɛy.

²³ɛTaanggbey ya kaa ku lɔl lɛ, ne ɛ ku i yɛɛ iphɛ ɛlɛy. Ɛ kaa nang ɛn ɛYɛso yeghaa wo ndɔ ne iwɔ nibebhe ninyi, nibhɛ ne phoo ɛbhɛ dak ne ihon.[11]

²⁴Gbik ne phɛ ɛlɛy, ɛTaanggbey ya ne yiisik ɛYɛso yegha tsik ndɔ ne ikpuu da. Ɛ kaa sɔ nggbang ndɔ ne iku de, sɔng ɛTaanggbey ya ne sim ɛ shɛɛ ndɔ ne iku de nang, daa ɛli ne sɔng ikpuu da yaa yɛɛ ne boos ɛbhɛ nang.

²⁵ɛDoda gha kaa boote da ne ito ɛYɛso de ɛ yɔngɔ; ‘Nzi wɛɛ ɛDaray yegha ɛnu ɛyisɛ nge cɛcɛɛy, ɛ so ne iwɔ ne irywe nge, sɔng naa ne kpaate nang.

²⁶iPhɛ ɛlɛy n bok irywa ihwala. Nzi ne yaak ne iywel ne irway ihwala da, ibek nge yaa ne i shɛɛ ndɔ ne yɛk irway, daa ɛli ne sɔng nzɛ bhɛ shɛɛ ndɔ ne ikpuu da nang.

²⁷Sɔng ɛTaanggbey ya sɛ tek iken nge de ndɔ ne ikpuu da nang. N so ɛnyi ne nzi roos ɛbhɛ ne irway nge gbik. Sɔng ɛ sɛ ne tek ibek nge de iphɛ sa nang.

²⁸Ɛ kɛ ku tɔɔrek me ɛnkiinɛ ne iken no, ɛɛ ne naas me irway ihwala daa ɛli ne ɛ so cɛcɛk ne me.’ ”[12]

²⁹“Nigwaa nge niSɛrɛla, nzɛ yɛɛ ne tɔng nyini ivol ɛgaay njwɛɛn ɛDoda gha tang to ne irway. ɛDoda gha kaa ne ku i rɛɛ ɛbhɛ, njwɛɛn yɛɛ ikpuu ɛbhɛ da izenge ɛlɛ.

³⁰ɛDoda gha kaa so ɛNɛbi, ɛ kaa ne ku i yɛɛ ɛTaanggbey ya kɛ sim-mɛ, ɛ lɛlɛm ihywa wu ɛdɛ ɛhaa ne icwaang ɛDoda gha sɛ re igbɔm ɛbhɛ da.

³¹ɛDoda gha kaa ne ku i yɛɛ ɛlɛ wo, iphɛ phɛ ne te ɛDoda yegha ɛ bol ibol ne yilitsik ne ikpuu ɛKiriti da, ɛ yɔngɔ wu hang ɛ kɛ bol ɛ yɔngɔ, ɛTaanggbey ya sɛ tek ibek ɛbhɛ de ɛtata ɛlɔ ne ikpom ba, wu hang iphɛ sɛ sa wo.

³²ɛTaanggbey ya kaa yiisik ɛYɛso yɛghaa wo tsik ndɔ ne ikpuu da, gbik mos so njwi kaa yaang ɛlɛy ɛtsak.

³³Kɛ nang ɛYɛso yegha ne ndiinday, ɛbhɛ so ne iwɔ ne irwye ɛTaanggbey. Ɛ kɛ ne say iKabyik ɛTaanggbey de ne ɛlɔ ɛKyɛɛ gha ɛli ne ku sim-mɛ wo, iphɛ ne ɛ kɛ ne ji sit daa ninyi yɛnaa wo ne ɛ yaang ɛn no, ɛ ta phok ɛn no.

³⁴“Yaang ɛn! Sɔng ɛDoda gha ɛbhɛ kaa wara dak ne irywa wo nang, Ɛbhɛ kaa yang yɔngɔ, ‘ɛDaray ya kaa yaak ɛDaray nge gha, soos ne iwɔ ne irwye nge,

³⁵te nggyi yɛk ninaa ne iphup mo na nɛ nibhɛ teye ɛkɔn ne tek ita mo.’ ”

³⁶“iPhɛ ɛlɛy, tɛ niSɛrɛla na gbik ne seng ncɛncɛng, ɛTaanggbey ya kɛ yɛk ɛYɛso yɛghaa wo nɛ ne ɛ kaa gangat ɛn no ɛbhɛ teye ɛDaray ya ne ɛKiriti gha.”

³⁷Ne sɛ ninyi na kɛ phok ibol lɛdee wo, iphɛ ne dat nibhɛ irway, nibhɛ ne phom ɛBiturus segha nɛ ɛbyin ninɔn ne tom ma, nibhɛ yɔngɔ: “Nigwaa en, njwi yaa ne ji mɔn ɛli?”

³⁸ɛBiturus sa ne yaak nibhɛ, “Te ɛrɔngɔ ndɔ mon no san ɛbɔk, te yɛk ɛbhɛ ne ibatisima ndɔ ne irywɛɛk ɛYɛso ɛKiriti wo. Yaa ne lenɛ ɛlɛy ɛTaanggbey ya ne hana nyini ne ɛfɔt mon no, i nang nyini izɛɛng ne iKabyik ɛTaanggbey de.

³⁹ɛKɔn ne ɛTaanggbey ya kaa ku sim-mɛ wo kaa so ɛhaa mon, nɛ ninɔn mon, ne gbik ne ɛhiha ɛnyi ne ɛ kaa so kyakyak; kaabi i bo ɛhaa ne ɛDaray ɛTaanggbey nyɛɛn kyi yel-le ɛbhɛ ɛ kɛ teye ɛhaa ɛbhɛ.”

⁴⁰iBol lɛdee wo ne ɛBiturus sa kaa ne bo nten gbom ɛɛ tɔng ninyi na, ɛ bok nibhɛ, “Phɔt ɛn ito mon daa nggbang ngga ne mpɛ sɛ́ sɛ nibebhe ninyi yɛghaa wo.”

⁴¹Ninyi na gbom ne say ibol de ne ɛBiturus sa kɛ tɔng ngo, ne yɛk nibhɛ ne ibatisima. Ninyi ninom itwat ne hante yɛ ndɔ ninaa ne roos sa ɛtuk kɛghaa nggyɛ wo.

⁴²Nibhɛ ne nang irway nibhɛ gbigbik daa nikɔn na ne ninɔn ne tom ma mɛmɛ nibhɛ nɛ wo, nibhɛ ne i byingis ìtsɛm, nibhɛ re ire ɛlɔ ɛdaan, nibhɛ ne jii roro.

⁴³Ninyi na gbik ne wum ɛnik, daa ne ihywee nikɔn ne kparat ta ne nyu nikɔn ne ɛnik ge ne kaa mɔn lenɛ nɛ ninɔn ne tom ma.

⁴⁴Gbigbik ninaa ne nang ne itin na ne i shɛɛ ɛlɔ ɛdaan, nikɔn nibhɛ so ɛte.[13]

⁴⁵Nibhɛ ne lɛbhɛl nikɔn nibhɛ, ne ihap nibhɛ, nibhɛ hosop ijam mɛ ndɔ nibhɛ, ne i nang ɛrɔngɔ ɛli ne ihywɛ aa hɔn ɛbhɛ.

⁴⁶iZenge ne ihwɛlɛ, nibhɛ ne i tumɛ ɛn ndɔ ɛsaa ne iDeng nga, nibhɛ ne i roos idee-idee nibhɛ re en ire ndɔ ne izinɛ ne ishwɛ ne irway ilyaak.

⁴⁷Nibhɛ ne i dɛp ɛTaanggbey ye. Ninyi na gbik ne yaa sim nibhɛ. ɛDaray ya ne ma hanas nibhɛ nɛ ninaa ne i phɔrɔt to.