Read eten ɛTomɛ 21 Bible Online

ɛTomɛ 21 - eten bible

ɛTomɛ 21

¹Ne sɛ njwi kɛ hobhoset nɛ nibhɛ, njwi ne lel ɛgyirigyi inɛn njwi hyel tsik njwi phɛ ne idɛ ikop be ne i bok iphɛ iKɔs. Ne cwiil ihwɛlɛ yɛ, njwi ne phɛ ikop ne iRodɛs, njwi ne ji le ne iRodɛs de njwi phɛ ɛgarang ne iPatara.

²Njwi ne bhɛ sɛ ɛdɛ ɛgyirigyi inɛn na ne ɛ phɛɛs ne iFinikiya njwi ne lel njwi hyel.

³Ne sɛ njwi kɛ bhɛ tuu ɛdɛ ɛlɔ gha ne shɛɛ i wɛɛ ikop ne iKuburus, njwi ne tek iSupurus de ne iwɔ ne itsan mos, njwi roos iwɔ ɛkɔrɔk njwi hyel njwi bhɛ hɔn ɛgarang ne iTaya ne ɛ so ne ivel ne iSiriya. Njwi ne kyinak ne iTaya de daa ɛli ne ɛnggyɛ wo ne yaa tul nɛ nikɔn na nɛ nibhɛ so ndɔ ɛgyirigyi inɛn na.

⁴Ne sɛ njwi kɛ bhɛ tuu iTaya de njwi ne tɔk ninaa ne roos sa nɛ nibhɛ so ɛnggyɛ wo, nɛ sɛ njwi kɛ sɛ nibhɛ njwi ne shɛɛ nɛ nibhɛ nituk ɛniitaa. Ne lenɛ ne iKabyik ɛTaanggbey de ninaa ne roos sa ne yaak ɛBulus segha wu hang ɛ phɛ ne iYɛrushɛlɛm be.

⁵Ne sɛ nituk mos sa ɛnggyɛ wo kɛ phee njwi ne bo nikɔn njwi re ɛnu ɛyisɛ ne ihywel da. Gbik ninaa ne roos sa, nɛ nikuk nibhɛ, nɛ ninɔn nibhɛ ne bhɛ hyeeng njwii ɛtsim ɛgarang nga. Gbik mos so njwi ne bhɛ cwi irwa-nggburuk ɛnu ɛling nga njwi boote ne ɛTaanggbey.

⁶ɛTsim mɛ njwi kɛ yɛk en ne nkiinɛ, njwi ne lel ndɔ ɛgyirigyi inɛn na, ninaa ne roos sa ne ji kyii nibhɛ hyil en.

⁷Njwi ne re ɛnu ɛyisɛ ne ihywel mos da, njwi le ɛgarang ne iTaya njwi bhɛ tuu iTɔlɛmayis, ɛlɔ gha ne njwi kɛ bhɛ kyili ninaa ne roos sa nɛ, njwi ne shɛɛ nɛ nibhɛ ɛtuk ɛdaan.

⁸Ne cwiil ne ihwɛlɛ yɛ, njwi ne tek iTɔlɛmayis de njwi phɛ ne iKɛsɛriya. ɛNggyɛ wo, njwi ne bhɛ shɛɛ ndɔ ne ijwee ɛFilibus, ɛhaa ne sanga ibol ɛTaanggbey, ne ɛ kaa so ɛdaan ndɔ ninyi ɛniitaa na ne kaa kasa wu tɛ nibhɛ wɛɛ ibol ne ire de ne iYɛrushɛlɛm be.[33]

⁹ɛFilibus sa kaa ne bok ninɔn nilyilyap nibhɛ nwaas ne hame nibhɛ bok niras. Nibhɛ kaa ne soye ninabawa.

¹⁰Ne sɛ njwi kɛ bonɛ nituk njwi so ɛnggyɛ wo ɛdɛ ɛnɛbi gha ne kaa bok ɛbhɛ ɛGabus ne le ne iYahudiya ɛ yɛɛs ne iKɛsɛriya de.[34]

¹¹ɛGabus sa ne yɛɛs ɛlɔ mos ne ɛ bo ɛgagha ɛBulus so ɛ rop ne ibɔ ɛbhɛ gbik ne ita ɛbhɛ, ɛ ji yɔngɔ, “iKabyik ɛTaanggbey de i bo wu ɛlɛy nɛ nindiinday niYahodawa ne iYɛrushɛlɛm na yaa bhɛ rop ɛnyi ne ɛgagha yɛghaa wo, nibhɛ ji nang ɛbhɛ nɛ ninyi ne hame nibhɛ so niYahodawa.”

¹²Ne sɛ njwi kɛ phok ɛlɛ wo, njwit to nɛ ninyi na nɛ nibhɛ so ɛnggyɛ wo ne roro ne ɛBulus sa wu hang ɛ phɛ ne iYɛrushɛlɛm be.

¹³ɛBulus sa ne kyii nɛ ne ɛ yaak njwii, “iKyee iphɛ kɛ te ɛ san ɛn ɛ bees ɛn mɛɛn irway daa? Nzi tɔng nyini nggɛ ku yɛk ne irway yɛ, sɔng ma yung yɔng wu irop ne yaa bhɛ rop me ne iYɛrushɛlɛm be zɔng nang, te ma yung yɔng yaa bhɛ phoo me daa ne ibol ne nang irywɛɛk ɛDaray ɛYɛso wo ne ndiinday.”

¹⁴Ne sɛ njwi kɛ yaang ɛli ne yaa sang sunu ɛbhɛ irway da, njwi ne kunggbyak njwii yɔngɔ, “Te ɛDaray ya mɔn ɛkɔn na ne ɛ yaang ɛ kɛ jam ɛbhɛ.”

¹⁵ɛTsim mɛ ɛlɛy, njwi ne ryɔng nge njwi ne ji phɛ ne iYɛrushɛlɛm be.

¹⁶Nidɛng ninaa ne roos ne iKɛsɛriya na ne bhɛ nibhɛ hyeeng njwii nibhɛ bhɛ hɔn ne njwit ne ijwee ɛNason, ɛlɔ gha ne njwi yaa shɛɛ nɛ. ɛManason na kaa ne so ɛnyi ne iKuburus, ne ɛ so ɛ ninyi ne ɛ kaa ku so ɛhaa ne roos sa.

¹⁷Ne sɛ njwi kɛ bhɛ tuu iYɛrushɛlɛm be, ninaa ne roos sa ne say njwii ne ibɔ iphaa.

¹⁸Ne cwiil ne ihwɛlɛ yɛ, ɛBulus sa ne ɛbyin mos njwi ne phɛ njwi bhɛ kyili ɛYakub bhe. Gbik ninu ne ikɔɔn ninaa ne roos sa kaa ne sonɛ.

¹⁹ɛBulus sa ne kyili nibhɛ, ɛ tɔng nibhɛ gbik nikɔn na ne ɛTaanggbey ya kɛ mɔn ndɔ ninyi na ne hame nibhɛ so niYahodawa na lenɛ ne ɛtomɛ ɛbhɛ gha.

²⁰Ne sɛ nibhɛ kɛ phok ɛlɛ wo, nibhɛ ne nang ɛTaanggbey ye ne ndiinday. Nibhɛ ne ji yaak ɛBulus segha, “ɛGwaa ɛBulus, yung yaang ɛli nɛ nidɛng gbom ndɔ niYahodawa na kɛ tes se ninaa ne roos sa gbik nibhɛ wo ne bok irway ne roos ibol ɛShara ɛMuusaa de gɛgɛy.

²¹Kɛ tɔng nibhɛ ibol mo de i bok nibhɛ wu ɛ mɛmɛ niYahodawa na nɛ nibhɛ so ndɔ ninyi na ne hame nibhɛ so niYahodawa na ɛ bok nibhɛ wu hang nibhɛ roos ibol ɛShara ɛMuusaa. Wu ɛ bok nibhɛ wu hang nibhɛ hyɛghɛ ninɔn nibhɛ icwee, wu hang nibhɛ ne ta roos ɛbyin ne ikpii niYahodawa da.

²²Yaa ne ji mɔn ɛli daa mɛɛ? iPhɛ so nggbinggbing nibhɛ yaa phok ɛli ne ɛ kɛ yɛɛs so.

²³iPhɛ ɛlɛy, mɔn ɛkɔn na ne njwii bok kɛ wu te ɛ mɔn. Ninyi nwaas so ɛbɛ wo nɛ nibhɛ kɛ ku lɛlɛm ihywa ɛnu ɛyisɛ ɛTaanggbey.

²⁴Bo ninyi yɛnaa wo te ɛ byinki nyini ɛbhɛ ryɔng ɛn ikpii ne te ɛnyi da iwɛwɛy yo, tɛ ne ɛbhɛ tal ijam ne hon ito nibhɛ. ɛLɛy ninyi na gbik yaa ne ji seng wu ivol da ne phok daa ne ito mo de so irywɛɛk. Nibhɛ yaa ne yaang wu ɛ hyep ikpii ɛShara ɛMuusaa.

²⁵Daa ne ibol ninaa ne roos sa ne hame nibhɛ so niYahodawa na nang, njwi kɛ ku haa nibhɛ nɛ, njwi bok nibhɛ wu hang nibhɛ re ire ne kɛ mɔn ne ikpii, wu hang nibhɛ ne re neyi ɛkɔn gbik ne ɛkɔn na ne kɛ sang hyɛ. Njwi ne ta yaak nibhɛ wu hang nibhɛ ra nzangas.”

²⁶Ne cwiil ihwɛlɛ yɛ, ɛBulus sa ne bo ninyi na, gbik nibhɛ wo ne bhɛ ryɔng ikpii ne te ɛnyi gha iwɛwɛy yo. ɛBulus sa ne phɛ ndɔ ne ideng ngge, aa bhɛ mɔng ɛtuk ne sɛ taal i ryɔng ikpii ne te nibhɛ iwɛwɛy yo, ɛtuk ka ne sɛ nang nikɔn na ne sɛ hap ne itsanga de.

²⁷Ne sɛ nituk ɛniitaa na yungaa taal le, nidɛng niYahodawa na nɛ nibhɛ kaa le ne ivel ne iSiya ne yaang ɛBulus segha ndɔ ne iDeng ngge. Nibhɛ ne shɔk idira ninyi de, ninyi na ne wum ɛBulus segha.

²⁸Nibhɛ ne yinɛ izɔlɔs nibhɛ bo: “Ninyi niSɛrɛla, phyik ɛn njwii! ɛNyi yɛghaa wo ɛbhɛ so ɛnyi gha ne ɛ roos nilɔ na gbik ɛ mɛmɛ ninyi na nɛ, ɛ bo tɛ nibhɛ mbaray ninyi njwɛɛn na, ne ɛShara njwɛɛn na, gbik ne iDeng njwɛɛn de. Ɛbhɛ ghaa kɛ ne ji bo ninyi na ne hame nibhɛ soye niYahodawa ɛ lel lɛ ndɔ ne iDeng ngge, ɛ kɛ bees ɛlɔ kang ngɛgha wo.”

²⁹Nibhɛ kɛ bol ɛlɛ wo daa ɛli nɛ nibhɛ kɛɛ yaang ɛTorofimos se ne ɛ so ɛnyi ne iFisus ndɔ ɛgarang nga nibhɛ so ne ɛBulus sa, nibhɛ ne yaa wɛɛ te ɛBulus sa kɛ bo ɛbhɛ ɛ phɛ nɛ ndɔ ne iDeng.[35]

³⁰ɛGarang nga ne te buruburu gbik, ninyi na gbik ne yel-le ne nggbiy nibhɛ wum ɛBulus segha, nibhɛ tul ɛbhɛ ndɔ ne iDeng ngge, ne shii roos nibhɛ cwamas ninu ne izuk kɛ.

³¹iDira ninyi de ne yaa sim tɛ nibhɛ sɛɛ phoo ɛBulus segha, ibol lɛ ne bhɛ hɔn ɛlɔ ɛndiinday ɛguu nisooja ne iRooma na wu ɛgarang ne iYɛrushɛlɛm be kɛ te buruburu.

³²Ne ɛ shii bo nidɛng nindiinday nisooja na nibhɛ tel nibhɛ phɛ ɛlɔ gha ne idira ninyi de sonɛ wo. Ne sɛ idira ninyi de kɛ seng ɛndiinday nisooja na nɛ nisooja na, nibhɛ ne kɔɔng hal ɛBulus segha.

³³Ɛndiinday ya ne yɛɛs ɛ wum ɛBulus segha, ɛ yɛk ngɛ rop ɛbhɛ ne inyang ihywɛɛ ihywaa. Nɛ ji phom ɛBulus segha ɛ yaak ɛbhɛ. “I bok kɛ ɛhay? Kyee ne ɛ kɛ mɔn no?”

³⁴iDira ninyi de ne i bol ivol da gbom, nidɛng ne i bol idee nibhɛ kang, nidɛng ne ma ta i bol idee nibhɛ kang. Ne sɛ ɛndiinday nisooja na kɛ sang seng ibol lɛ yɛnɛng daa ɛli ne ɛlɔ yɛ kɛ te buruburu wo, ne ɛ yɛk ngɛ i bo ɛBulus segha i phɛ nɛ ne ibarakyi.

³⁵Ne sɛ ɛBulus sa kɛ bhɛ tuu nikabhak ne waase ne ijwee nisooja wo, ishisim ninyi de hantey yɛ iphɛ te gbom ɛli nɛ nisooja kɛ yinɛ ɛBulus segha.

³⁶iDira ninyi de ne jung ngee kungus, nibhɛ rɛrɛ, nibhɛ bo: “Te phoo ɛbhɛ! Te phoo ɛbhɛ!”

³⁷Ne sɛ nisooja na phɛɛs ne lel ne ɛBulus sa ndɔ ne ibarakyi de, ɛBulus sa ne phom ne ɛndiinday nibhɛ gha ɛ yaak ɛbhɛ, “Aa sim me nɛ n boote ne igyɛ bɛ?” Ɛnyi gha ne kyii ɛBulus segha nɛ ɛ yaak ɛbhɛ, “Ɛ kaa yɛɛ ne bol ilem ninyi ne iGirik naa?

³⁸Nzi bo igyɛ ɛ so ɛnyi ne iMasad ta ne ɛ kaa te ninyi na nibhɛ bɛɛs igbɔm ba ne ira ɛtsim ba, ɛ ta bo ninaa ne phobho ninyi na nɛ nibhɛ kaa hɔn ninom nwaas sa ɛ phɛ nɛ ndɔ ɛhay ya nang.”

³⁹ɛBulus sa ne kyii nɛ ɛ yaak ɛbhɛ, “Nzo ɛnyi niYahodawa, ɛhaa ne iTaasus ɛgarang ne hal ne ɛgyɛy ne ɛ so ivel ne iSilisiya. Nzi roro ne igyɛ, tek me te n boote nɛ ninyi na.”

⁴⁰ɛNdiinday nisooja na ne sim wu te ɛBulus sa boote nɛ ninyi na. ɛBulus sa ne kyinak ɛkabhak ka ɛ te ninyi iwɔ dɛɛ wu tɛ nibhɛ kunggbyak. Ne sɛ nibhɛ kɛ kunggbyak, ɛBulus sa ne boote nɛ nibhɛ ndɔ ne ilem ne iHyiburu.