Read eten ɛTomɛ 25 Bible Online

ɛTomɛ 25 - eten bible

ɛTomɛ 25

¹Ne sɛ ɛFɛsitus sa kɛ hɔn nituk itwat ne ɛ kɛ say igbɔm ba ɛlɔ ɛFɛlis sa ne ɛ le ne iKɛsɛriya de ɛ phɛ ne iYɛrushɛlɛm.

²Ne iYɛrushɛlɛm be nindiinday nibo niYahodawa na gbik nɛ nindiinday ya ne bhɛ wuru ɛnu ɛyisɛ ɛbhɛ nibhɛ bungka ikun ɛBulus de.

³Nibhɛ ne bhɛ roo ɛFɛsitus segha wu te ɛ mɔn nibhɛ ɛkɔn na ne ɛyɛnɛng te ɛ yɛk ngɛ i bo ɛBulus segha i kyii yɛɛs ne ɛbhɛ ne iYɛrushɛlɛm de, ɛlɛy nibhɛ kɛ ku yɛk nɛ ninyi nɛ nibhɛ yaa rɛɛ ye nibhɛ phyii ban ɛBulus segha ne nkiinɛ nibhɛ phoo ɛbhɛ.

⁴ɛFɛsitus sa ne kyii nibhɛ nɛ ɛ yɔngɔ, “Kɛ rop ɛBulus segha ne iKɛsɛriya, yaa ne hyep ɛbhɛ ɛnggyɛ wo, mee wo ne ito nge naa ne ma phɛ ne iKɛsɛriya de sɔng naa phyɔngɔle nang.

⁵iPhɛ ɛlɛy tɛ nindiinday mon na ne roos me tɛ nibhɛ bhɛ bungka ikun ɛbhɛ, wu ɛ kɛ mɔn nyini ɛkɔn ɛbebhe.”

⁶Ne sɛ ɛFɛsitus sa kɛ shɛɛ ne iYɛrushɛlɛm be nituk ɛnaras hang nituk ɛnduwubɔ yɔɔ, ne ɛ tɔm ɛ phɛ ndɔ ne iKɛsɛriya de. Ne cwiil ihwɛlɛ yɛ ne ɛ ji yel-le ninaa ne phyik ɛbhɛ ɛshara gha ɛ soos ɛlɔ ne soos ɛ bol ɛshara gha, ne ɛ ji yɛk ngɛ i yɛɛs ne ɛBulus sa ɛnu ɛyisɛ ɛbhɛ.

⁷Ne sɛ ɛBulus sa kɛ yɛɛs, niYahodawa na nɛ nibhɛ le ne iYɛrushɛlɛm be ne yilitsik nibhɛ te ɛbhɛ gyɔɔ, nibhɛ jii yɛɛset ne ivol nibhɛ da daa ne ito ɛBulus de gbom, sɔng nibhɛ ne kyii yɛɛ ne tɔɔrek wu ifɛ so ɛlɛy ɛtsak kang.

⁸ɛBulus sa ne bol ivol ne tul ito ɛbhɛ ɛ yɔngɔ, “Sɔng nggɛ mɔn ɛkɔn ɛkpɛɛ daa ɛShara niYahodawa na nang, sɔng nggɛ ne mɔn ɛkɔn ɛkpɛɛ daa ne iDeng ngge nang, sɔng nggɛ ne mɔn ɛkɔn ɛkpɛɛ daa ɛKɛɛsat ta nang, kɔɔ ncɛt.”

⁹ɛFɛsitus sa ne i sim te ɛ sɛɛ mɔn niYahodawa na ɛkɔn ɛyɛnɛng, iphɛ ɛlɛy ne ɛ yaak ɛBulus segha, “Aa ne sim ɛ phɛ ne iYɛrushɛlɛm be te bhɛ bol lɛ ɛshara gha daa ne ivol lɛdaa wo ɛnu ɛyisɛ nge?”

¹⁰ɛBulus sa ne yɔngɔ, “Nzo ɛlɔ ne bol ɛshara ɛKɛɛsat ɛlyilyɛghaa wo, ɛlɔ gha ne iphɛ kɛ jam mɛ yaa ne bol me ne ɛshara gha. Sɔng nggɛ mɔn niYahodawa na ɛkɔn ɛkpɛɛ nang, igyɛ wo ɛ ma yɛɛ iphɛ ɛlɛy ririk.

¹¹Wu nggɛ mɔn ɛkɔn ɛkpɛɛ ne ɛ kɛ hɔn ɛli ne yaa phoo me, sɔng naa ne mbaray me tang i phoo me wo nang. Wu ivol da nɛ niYahodawa yɛnaa wo ne bol daa mee wo ne sang so itin nɛ sɔng ɛnyi yaa ne yɛɛ ne nang me nɛ nibhɛ wo nang. Nzi roro, te yinɛ ibol nge de i phɛ nɛ ɛlɔ ɛKɛɛsat.”

¹²Ne sɛ ɛFɛsitus sa kɛ boote ne itɔrɔng ɛbhɛ de, ne ɛ kyii nɛ ɛ yɔngɔ; “Ɛ kɛ roo ɛ bo te yinɛ ibol mo de te i phɛ nɛ ɛlɔ ɛKɛɛsat, aa ne phɛ ɛlɔ ɛKɛɛsat ta!”

¹³Ne sɛ kɛ bonɛ nituk ncɛt, ɛGɔm ɛGiripa gbik ne ɛBanis ne yɛɛs ne iKɛsɛriya de nibhɛ yɛɛs ne kyili ɛFɛsitus segha ne ɛ tɔ le ne teye ɛgɔm-na gha.

¹⁴iPhɛ kaa ne so nibhɛ yaa kyi shɛɛ ne iKɛsɛriya de gbom, ɛFɛsitus sa ne mɔng ɛgɔm ma ibol ɛBulus de, ɛ yaak ɛbhɛ, “ɛDɛ ɛnyi gha so ɛbɛ wo ne ɛFɛlis sa kɛ tek me nɛ ndɔ ne ijwee ne nyang.

¹⁵Kaa ne sɛ nggɛ phɛ ne iYɛrushɛlɛm, nindiinday nibo na gbik nɛ ninu ne ikɔɔn niYahodawa na ne bungka ikun ɛbhɛ nibhɛ ji yɔngɔ wu te phoo ɛbhɛ.”

¹⁶“Nggɛ ne yaak nibhɛ wu hang njwɛɛn ninyi ne iRooma na i bol ɛnyi gha ɛshara gha ɛlɛ wo tang kɛ yɛɛs ne ɛbhɛ ɛnu ɛyisɛ ninaa nɛ nibhɛ kɛ bungka ikun ɛbhɛ de. Nggɛ ne ta yaak nibhɛ wu i kyi nang ɛnyi gha ne kɛ bungka ikun ɛbhɛ de nten te ɛ bol ivol ne tul ito ɛbhɛ daa ne ibol de ne kɛ bungka ikun ɛbhɛ de nɛ wo.

¹⁷iPhɛ ɛlɛy, kaa ne sɛ niYahodawa na kɛ yɛɛs ɛbɛ wo, sɔng ngga ne bees nten nang, kaa cwiil ihwɛlɛ yɛ ne n soos ɛlɔ ne soos ne bol ɛshara gha, n yɛk ngɛ i yɛɛs ne ɛnyi yɛghaa nggyɛ wo ɛlɔ ne bol ɛshara gha.

¹⁸Kɛ ne sɛ ninyi na nibhɛ kɛ bungka ikun ɛbhɛ de kɛ yilitsik, sɔng nibhɛ ne kyii bungka ikun ɛbhɛ de daa ɛkɔn ɛkpɛɛ gha ne nggɛ ku i wɛɛ tɛ nibhɛ yaa yɔngɔ wo nang.

¹⁹Nibhɛ kaa ku bok idɛ bol de ne ɛbhɛ daa ne ibol ne re ntsong nibhɛ, ne daa ne ito ɛdɛ ɛnyi gha ne kaa bok ɛbhɛ ɛYɛso ne ɛ kaa ku nɛ ɛBulus sa ne kyii bo wu ɛ so ɛken.

²⁰Nggaa ne te buruburu, sɔng ne n yɛɛ ne phɛl ivol lɛdaa nggyɛ wo nang, ne n yaak ɛBulus segha, wu aa sim i phɛ ne ɛbhɛ ne iYɛrushɛlɛm te bhɛ bol ɛbhɛ ɛshara ne ivol da ne kɛ bungka ikun ɛbhɛ de ɛnggyɛ wo dek.

²¹ɛBulus sa ne yɔng, wu te yinɛ ɛshara ɛbhɛ gha i phɛ nɛ ɛlɔ ne bol ɛshara ɛKɛɛsat, nggɛ ne yɛk ngɛ te tek ɛbhɛ i hyep ɛbhɛ, nzi hyep nten de ne naa tom ɛbhɛ ɛlɔ ɛKɛɛsat ta.”

²²ɛGɔm ɛGiripa gha ne yaak ɛFɛsitus segha, “Nzi ma sim te nzɛɛ tenes ɛnyi yɛghaa wo ne ito nge.” ɛFɛsitus sa ne yɔngɔ, “Ɛ sɛ ne phok ɛbhɛ ne ihwɛlɛ.”

²³Ne cwiil ne ihwɛlɛ, ɛGiripa gha ne ɛBanis sa ne wuru iwuru ne igbɔm, nibhɛ kaa yaak ghe ne itsura ne igbɔm, nibhɛ ji lel ndɔ ne izuk ko nɛ nindiinday nisooja gbik nɛ ninaa ɛgarang nga. ɛFɛsitus sa ne ji yɛk ngɛ bhɛ bo ɛBulus segha i yɛɛs nɛ.

²⁴ɛFɛsitus sa ne ji yɔngɔ, “ɛGɔm ɛGiripa, nɛ nyinɛn gbik nɛ nibhɛ so ɛbɛ wo, ɛnyi yɛghaa nɛ niYahodawa na kɛ bungka ikun ɛbhɛ de ɛlɔ nge gha ne iYɛrushɛlɛm be gbik ne ɛbɛ wo. Nibhɛ ma yung rɛrɛ nibhɛ bo wu hang iphɛ kɛ jam mɛ ɛ shɛɛ ɛken.

²⁵Sɔng nzi ne yaang ɛ kɛ mɔn ɛkɔn na ne ɛ kɛ hɔn sɛɛ phoo ɛbhɛ nang, daa ɛli ne ɛbhɛ wo ne ito ɛbhɛ ɛ bo wu te yinɛ ɛshara ɛbhɛ gha i phɛ nɛ ɛlɔ ɛndiinday ɛKɛɛsat, nzi ne bo naa tom ɛbhɛ ɛlɔ ɛKɛɛsat ta.

²⁶Gbik ne iphɛ ɛlɛy, sɔng ne bok ɛdɛ ɛnting ne ibol lo ne naa haa ɛndiinday ɛgɔm ne iRooma yegha nɛ daa ne ito ɛbhɛ nang. iPhɛ ɛlɛy, nggɛ ne yɛɛs ne ɛbhɛ ɛnu ɛyisɛ mon na, ma ji so igyɛ wo ɛgɔm ɛGiripa, hang yaa yung sɛ njwɛɛn kɛ phɛl ɛbhɛ naa ne sɛ ɛkɔn na ne naa haa yɔɔ.

²⁷Daa ɛli ne mee wo nzi yaang te iphɛ soye iwamang i tom ɛndiinday ya ne ɛnyi gha ne ɛ so ne nyang ngge tang i tɔɔrek ɛkɔn na ne ɛ kɛ mon no.”