Read eten ɛTomɛ 26 Bible Online

ɛTomɛ 26 - eten bible

ɛTomɛ 26

¹ɛGiripa gha ne yaak ɛBulus segha, “Kɛ nang ngɛ nten, bol ɛkɔn ne aa tul lɛ.” iPhɛ ɛlɛy, ɛBulus sa ne yinɛ iwɔ dak ɛ tsa ivol ɛbhɛ da, ɛ yɔngɔ:

²“ɛTsak, ɛGɔm ɛGiripa, nzo ɛhaa ɛwɛng ne nggɛ kyinak ɛnu ɛyisɛ mo gha izenge wo naa tul ito nge de ndɔ ne ivol da nɛ niYahodawa na kɛ bol daa me wo.

³“Ma yang ji so igyɛ wo ɛgɔm ɛGiripa, ne ɛɛ ku yɛɛ ikpii niYahodawa da gbik ne ishamas de ne iphɛ sonɛ wo. iPhɛ ɛlɛy, nzi ne roro ne igyɛ bo ɛbɔk te ɛ tenes me.

⁴niYahodawa na gbik, nibhɛ yɛɛ ihywee ne ihywel da ne nggɛ hyel ɛli ne nggɛ tɔ ne ifas nge. Nibhɛ yɛɛ me ɛli ne nggɛ shɛɛ ɛgarang nge gha, nibhɛ ne ta yɛɛ ɛli nggɛ shɛɛ ne iYɛrushɛlɛm be.

⁵Nibhɛ yɛɛ me ne ile ne ile nibhɛ sɛɛ ne yɛɛ ne mɔng ɛkɔn daa me wo, ɛli ne nggɛ hyel ihywel nge ndɔ niFarisawa na, wu nibhɛ kɛ sim. Nibhɛ yɛɛ wu nggaa so ɛdɛng ndɔ ɛguu niFarisawa na nɛ nibhɛ shɛs ne irway ne roos ikpii mos niYahodawa na.[45]

⁶ɛLyilyɛghaa wo nggɛ ne kyinak ɛnu ɛyisɛ mon i bol me ɛshara gha daa ɛli ne nggɛ yɛk ne irway nzi hyep yaa shwaak ɛkɔn na ne ɛTaanggbey kaa ku sim nikyɛɛ-nikyɛɛ mos.

⁷ɛKɔn nɛghaa wo ne kaa ku sim-mɛ wo ne ihywee ɛnduwubɔ ne ihywɛɛ ihywaa de kɛ yɛk ne irway nibhɛ hyep tɛ nibhɛ yaang kɛ shwaak, ɛli nɛ nibhɛ kyangase nɛ ne re ɛTaanggbey yegha ntsong ngga izenge ne ihwɛlɛ wo. iGyɛ ne ɛgɔm, kɛ ne lenɛ ne iyɛk ne irway da nzi hyep te shwaak ibol lɛdee wo nɛ niYahodawa na kɛ yaa yaang iben nge da ɛgɔm ɔɔy!

⁸iKyee iphɛ kɛ te ɛ wɛɛ ɛn te iphɛ so ɛTaanggbey yegha righitik ko ɛ yiisik ninyi na tsik ndɔ ne ikpuu daa?”

⁹“Mee wo ne ito nge, nggaa wɛɛ te naa yɛɛ ne mɔn nikɔn na nɛ nibhɛ yaa ring irywɛɛk ɛYɛso ne iNazarat to ne re ɛnu ɛyisɛ.

¹⁰Nikɔn nɛnaa nggyɛ wo ne nggaa ne mɔn ne iYɛrushɛlɛm de. Nindiinday nibo niYahodawa na kaa ne nang me ɛnkiinɛ, ne wumus ninyi ɛTaanggbey ya gbom n robhos nibhɛ ne ijwee ne inyang, ne i sɛ yaa phobho nibhɛ ne n roos ɛduu yɛ.

¹¹Nggaa ne ta i roos idee ne itɔɔy niYahodawa de gbik nzi baasek nibhɛ nggbang nzi sim te nzɛɛ yɛk nibhɛ ne nggbinggbing nibhɛ toke irywɛɛk ɛYɛso wo. Ngga phok njenjek nibhɛ gbom, iphɛ ne te me n roos nihak nigarang nɛ nibhɛ kaa sonɛ nzi bhɛ baasek nibhɛ nggbang ngga.”[46]

¹²“Kɛ ne so ɛnggyɛ wo, ne sɛ ɛdɛ ɛtuk ka ne n phɛɛs ɛgarang ne iDimaskus ɛtsim mɛ nɛ nindiinday nibo niYahodawa na kɛ nang me ɛnkiinɛ yɛ nibhɛ nang me ɛwee wu te mbɛ nɛ.

¹³ɛGɔm! ɛLɔ yɛ ne so ɛceree ne igbey ne nzo ne nkiinɛ nzi hyel, ne nggu shii yaang ɛdɛ ɛwɛwɛy yo ne ɛbhɛ phyin ɛwɛwɛy ne iroy, ɛbhɛ le dak ne irywa, ɛbhɛ ne tolte ɛbhɛ te me gyɔɔ nɛ ninaa ne ihywel nge na.

¹⁴Ne sɛ njwit to gbik njwi kɛ hoghɛ ne ivel, mee wo ne nzi phok idɛ izɔlɔs ihywɛ bol ne mee ne ndɔ ne ilem ne iHyiburu ihywɛ bo, ‘ɛShawulu! ɛShawulu! iKyee iphɛ kɛ ɛ baasek me nggbang nggaa? Ɛli ne ɛ baasek me nggbang ngga ne so ito mo ne ɛ baasek iphɛ nggbang ngga.’ ”

¹⁵“Ne nzi phom, n yɔngɔ, ‘ɛDaray! iGyɛ ɛhay?’ “ɛDaray ya ne kyii nɛ ɛ yɔngɔ, ‘Mee nzo ɛYɛso gha ne ɛ baasek ɛbhɛ nggbang ngga.

¹⁶Ne ɛ yilitsik ɛ kyinak; nggɛ wuru yɛwo te n yɛk kɛ nɛ ɛ mɔn me ɛtomɛ ɛ ta tɔng ibol nikɔn de ne ɛ kɛ yaang daa mee wo gbik nɛ nikɔn na ne naa tɔɔrek kɛ gɔɔ ɛyisɛ.

¹⁷Naa bhɛ phɔt tɛ ndɔ ne iwɔ ninyi mo niYahodawa na gbik nɛ ninyi na ne hame nibhɛ so niYahodawa na, naa tom mɛ ɛlɔ nibhɛ,

¹⁸te ɛbhɛ phaal nibhɛ irwisɛ tɛ nibhɛ tek igbyik ge nibhɛ yɛɛs ne iwɛwɛy, nibhɛ tek igbɔm ɛShɛtan da nibhɛ yɛɛ ne igbɔm ɛTaanggbey. Te ne hana nibhɛ ne ɛfɔt nibhɛ wo nibhɛ sɛ ɛwɛng nga ne sɛ nang gbik ninaa nɛ nibhɛ kɛ te ne iwɛwɛy ya daa ɛli nɛ nibhɛ kɛ nang ne itin nɛ wo.’ ”[47]

¹⁹“iPhɛ ɛlɛy, igyɛ ne ɛgɔm ɛGiripa, sɔng nggɛ ne mbaray me tang roos ibol ne iyuwa ɛdaa ne irywa de ne nggɛ yaang ngo nang.

²⁰Nggɛ sanga ibol ɛTaanggbey de ne iDimaskus, ne n ji bhɛ sanga ne iYɛrushɛlɛm nɛ nigarang ne iYahudiya, ne n ji bhɛ sanga ɛlɔ ninyi na ne hame nibhɛ so niYahodawa na dɔng. Nggɛ sanga tɛ nibhɛ san ɛbɔk nibhɛ hyereey nibhɛ roos ɛTaanggbey ye, nibhɛ ji mɔn nikɔn na nɛ nibhɛ yaa tɔɔrek wu nibhɛ kɛ san ɛbɔk ka ɛtsak.[48]

²¹iPhɛ phɛ kɛ ne te niYahodawa na kɛ sɛ me ndɔ ɛsaa ne iDeng nga nibhɛ wum me nibhɛ tɔk ɛli nɛ nibhɛ yaa phoo me wo.

²²Gbik ne iphɛ ɛlɛy ɛTaanggbey kɛ ne phyik me nggɛ hɔn izenge wo. iPhɛ ne nggɛ kyinak ɛbɛ wo nzi tɔng igbaang ninyi nɛ nihala yɛ gbik ibol nikɔn de ne nggɛ yaang ngo. Sɔng ihak ibol ne nzi bol nang. Nzi yang bol ibol nikɔn de nɛ ninabawa gbik ne ɛMuusaa kaa ku yɔng wu nibhɛ sɛ tes.

²³Wu iphɛ so nggbinggbing ɛKiriti gha sɛ sɔ nggbang. Wu ɛbhɛ sɛ ne so ɛhaa ɛyisɛ yɛ ne ɛ sɛ yilitsik ndɔ ne ikpuu da. ɛLɔ ne ikpom i shɛɛ nɛ wo, ne lenɛ ɛlɛ wo i yɛɛs niYahodawa na nɛ ninaa ne hame nibhɛ so niYahodawa na ne iwɛwɛy gbik.”[49]

²⁴Ne sɛ ɛBulus sa tɔ ndɔ ne ivol da ɛFɛsitus sa ne tɔɔk izɔlɔs ɛ yɔngɔ, “ɛBulus ɛ bok nisan! Ɛ kɛ tɔng gbom, ishweng ngɛ kɛ ne hyere yɛ ito!”

²⁵ɛBulus sa ne yaak ɛbhɛ, “ɛNdiinday ɛFɛsitus, sɔng n bok nisan nang. iTin nɛ ne nzi tɔng ndɔ ne ihywɛɛ.

²⁶Nzó ɛgɔm ma i yɛɛ nikɔn nɛnaa wo, nzi ne bol ne irway nge tɔrɔk tang ɛnik ɛnu ɛyisɛ ɛbhɛ. Nzi yɛɛ ncɛncɛng, sɔng idɛ bol lɛdee wo kɛ te ɛbhɛ bap nang, daa ɛli sɔng kɛ mɔn nibhɛ gying nang.

²⁷ɛGɔm ɛGiripa, ɛ kɛ nang ne itin nɛ nɛ ninabawa na nang? Nzi yɛɛ ɛ kɛ nang ne itin nɛ.”

²⁸ɛGɔm ɛGiripa gha ne yaak ɛBulus segha, “Ɛ wɛɛ te aa shii hyere me ndɔ ne nten ncɛt tɛdee wo, n te me ɛKirita gha naa?”

²⁹ɛBulus sa ne yɔng, “Hang ndɔ ne nten ncɛt yɔɔ hang ndɔ ne nten gbom yɔɔ nzi roro ne ɛTaanggbey nzi bo sɔng igyɛ wo zɔng nang te byinki nɛ ninyi na nɛ nibhɛ so ɛbɛ wo gbik nibhɛ tenes me izenge wo, kang ne nyang ngɛdee, tɛ nibhɛ sɛ ma tes se nikirita na te me wo.”

³⁰ɛGɔm ɛGiripa gha ne yilitsik, ɛlɛy ne ɛgɔm-na gha ne ɛBanis sa nɛ ninyi na nɛ nibhɛ kɛ sooset nɛ nibhɛ wo.

³¹Ne sɛ nibhɛ kɛ wuru nibhɛ kɛ tek izuk ɛshara wo, nibhɛ ne i bol ndɔ nibhɛ, nibhɛ yɔngɔ, “Sɔng ɛnyi yɛghaa wo kɛ mɔn ɛkɔn na ne ɛ kɛ hɔn sɛɛ phoo ɛbhɛ wo nang, sɔng ɛ kɛ ne hɔn sɛɛ rop ɛbhɛ wo nang.”

³²ɛGɔm ɛGiripa gha ne yaak ɛFɛsitus segha, “Sɛɛ yɔng ɛnyi yɛghaa wo kɛ sang ku yinɛ ɛshara ɛbhɛ gha ɛ phɛ nɛ ɛlɔ ɛKɛɛsat ta nang, sɛ ne tek ɛbhɛ ɛ hyel.”