Read eten ɛTomɛ 7 Bible Online

ɛTomɛ 7 - eten bible

ɛTomɛ 7

¹ɛGɔm nibo ɛTaanggbey ya ne yaak ɛSitivin ne gha, “iVol lɛdaa wo so itin nɛɛ?”

²ɛSitivin na ne yɔngɔ, “Nigwaa nge nɛ nikyɛɛ nge, phok ɛn mɛɛn. ɛTaanggbey ne ndiinday ya kaa bhɛ wuru ɛkyɛɛ njwɛɛn ɛBaraying nge gha ne ivel ne iMɛsopotamiya ɛli ne ɛbhɛ ɛBaraying kaa tɔ tang phɛ ne iHaran de.

³Ne ɛ yaak ɛBaraying nge gha, ‘Tek ɛgarang mo gha nɛ nigwaa mo na te ɛ phɛ ne ivel da ne na tɔɔrek kɛ.’

⁴iPhɛ ɛlɛy, ɛBaraying nga ne tek ivel ne iKaladiyawa da ɛ phɛ ne ivel ne iHaran. ɛTsim mɛ ne ɛkyɛɛ ɛbhɛ kɛ ku, ɛTaanggbey ya ne bo ɛBaraying nge gha ɛ yɛɛs nɛ ne ivel da ne ɛ so ɛn nɛ ɛlyilyɛghaa wo.

⁵Nten nɛdee nggyɛ wo, sɔng ɛTaanggbey ya kaa ne nang ɛBaraying nge gha isha ndɔ ne ivel lɛ nang. Sɔng ɛ kaa ma yung nang ɛbhɛ itsang nang. ɛTaanggbey ya kaa yang ku sim-mɛ wu ivel da sɛ teye ivaa ɛBaraying ngga nɛ ninɔn ɛbhɛ, ɛlɛy sɔng ɛBaraying nga kaa bok ɛngɔn nɛ nten nɛ nang.

⁶ɛTaanggbey ya kaa ne yaak ɛBaraying nge gha, ‘Ninɔn mo na sɛ bhɛ tes se ninaa ne kpoo ne ivel ne hame ifɛ so ivaa nibhɛ. Nibhɛ sɛ ne bhɛ tes se nikpuru nibhɛ sɔ nggbang ishay ikpɔl nwaas.’

⁷ɛTaanggbey ya ne ta yɔngɔ, ‘Nzɛ ne ma bak ivel da ne ifɛ kɛ yɛk ninɔn mon na nɛ nibhɛ tes se nikpuru na nggbang. ɛTsim mɛ ninɔn mon na sɛ ji wuru nibhɛ yɛɛs nibhɛ re me ntsong ne ivel lɛdaa wo ne ɛ sɔ ɛn nɛ wo.’

⁸ɛTaanggbey ya kaa rop ìtsɛm ne ɛBaraying nga, ne ɛ yɛk ngɛ wu te ɛBaraying nga yaa i hyɛghɛ ninɔn niras ɛbhɛ na icwee. iHyɛghɛ icwee yɛdaa iphɛ kaa ne so nyu ne ibol ne rop ìtsɛm be. iPhɛ ɛlɛy kaa sɛ ɛBaraying nga kɛ yɛk ɛShaaku ye, ne ɛ hyɛ ɛbhɛ itee de ɛtuk ɛnaras sɛ. ɛShaaku gha kaa ne yɛk ɛYakub bhe, ɛYakub pa ne yɛk nikyɛɛ ne ihywee ɛnduwubɔ ne iphɛ iphaa de.”

⁹“Ninɔn ɛYakub pa, nɛ nibhɛ so nikyɛɛ njwɛɛn, kaa ne kyii waa irway ne ɛgwaa nibhɛ ɛYisifu nibhɛ ne rɛp ɛbhɛ ne ivel ne iMasad ɛbhɛ teye ɛkpuru. Gbik ne iphɛ ɛlɛy ɛTaanggbey ya kaa ne sonɛ ɛYisifu gha,

¹⁰ne ɛ phyik ɛbhɛ ndɔ ne nggbang ɛbhɛ da gbik. ɛTaanggbey ya ne nang ɛYisifu yegha ntsɛntsɛng gbom, ɛHyiridus sa ne ɛ kaa soye ɛgɔm ne iMasad ta ne yaa sim ɛbhɛ ɛ yɛk ngɛ ɛbhɛ teye ɛhaa ne ifaa yɛ ne igbɔm iMasad da, nikɔn ne ijwee ɛgɔm ma gbik nibhɛ kyii ne iwɔ ɛbhɛ.”

¹¹“Kaa ne so ɛnggyɛ wo, iyɔm ne lel ndɔ ne ivel ne iMasad da gbik ne ivel ne iKaana, ninyi na ne sɔ nggbang gbom. niKyɛɛ-niKyɛɛ njwɛɛn na ne tɔk ɛkɔn na nɛ nibhɛ yaa re nzeet.

¹²Ne sɛ ɛYakub pa kɛ phok ɛli ne ire de so ndɔ ne ivel ne iMasad da, ne ɛ tom ninɔn ɛbhɛ na nɛ nibhɛ so nikyɛɛ-nikyɛɛ njwɛɛn na ne iMasad de tɛ nibhɛ bhɛ say ire de.

¹³Kaa ne sɛ ninɔn ɛYakub pa kɛ ta phɛ ne iMasad de ɛhaa ne ifaa yɛ, ɛYisifu gha ne bhɛ mɔng nigwaa ɛbhɛ na ɛli ne ɛbhɛ soye ɛgwaa nibhɛ gha; ne lenɛ ɛlɛy wo ɛgɔm ne iMasad ta ne ma seng nigwaa ɛYisifu na.

¹⁴ɛYisifu gha ne tom mɛ i bhɛ yel-le ɛbhɛ ɛkyɛɛ ɛbhɛ ɛYakub pa nɛ ninaa ne ijwee ɛbhɛ gbik ne iMasad de. Ninyi na kaa ne so nzuwubɔ ɛniitaa nɛ ninyi iwii.

¹⁵ɛYakub pa ne phɛ ndɔ ne imasad de. ɛNggyɛ wo ne ɛ kaa ne bhɛ ku nɛ gbik nɛ ninɔn ɛbhɛ na nɛ nibhɛ bhɛ so nikyɛɛ-nikyɛɛ njwɛɛn na,

¹⁶Kaa ne i kyii ikom ɛrɔngɔ i rɛɛ ne iShɛkɛm, ɛlɔ gha ne ɛBaraying nga kaa say ne ijam ne kɛ ryɔng ne ɛzurufa ne iwɔ ninɔn ɛHamot.”

¹⁷“Kaa ne sɛ ɛli ne nten nɛ yek cɛcɛk ne ɛTaanggbey ya yaa shwaak ibol de ne ɛ kaa ku sim-mɛ ne ɛBaraying nge gha nɛ wo, ninyi njwɛɛn na nɛ nibhɛ so ndɔ ne iMasad de ne hɔn gbogbom.

¹⁸ɛTsim mɛ ɛlɛy, ɛdɛ ɛgɔm ma ne hame ɛ yɛɛ ɛYisifu yegha ɛbhɛ ne ɛ ji teye ɛgɔm ne iMasad ta.”

¹⁹“Ɛgɔm mɛghaa wo ne luk nikyɛɛ-nikyɛɛ njwɛɛn na, ɛ mɔn nibhɛ ne ɛfɔt. Ɛ yɛk ngɛ i yaa han ninɔn nishesheng nibhɛ te nibhɛ kus.

²⁰Nten nɛdee nggyɛ wo ne kaa ne yɛk ɛMuusaa ye, ɛngɔn na kaa ne jam byirik. Ne sunga ɛbhɛ ne ijwee ɛkyɛɛ wo iphɛl itat.

²¹Kaa ne sɛ kɛ bhɛ rɛɛ ɛMuusaa yegha, ɛlap ɛHyiridus sa ne bhɛ bo ɛbhɛ ɛ te tɛ ɛngɔn ɛbhɛ.

²²Ne mɛmɛ ɛMuusaa yegha ne ishweng ne ninyi ne iMasad da gbik ɛ seng ngɛ. Ne ɛ teye ɛgbaang ɛnyi daa ne ivol ɛbhɛ, nɛ nitomɛ ɛbhɛ.

²³Kaa ne sɛ ɛMuusaa gha kɛ hɔn ishay nzuwubɔ nwaas, ne ɛ yaang iphɛ kɛ jam mɛ, ɛ wɛɛ ibol nigwaa ɛbhɛ niSɛrɛla na.

²⁴Ne sɛ ɛdɛ ɛtuk kɛ, ɛMuusaa gha ne yaang ɛdɛ ɛnyi ne iMasad ta hal ɛdɛ ɛnyi niSɛrɛla gha, ɛMuusaa gha ne bhɛ phɔt ɛnyi gha ɛ tal ɛbhɛ nɛ, ne ɛ hale ɛnyi ne iMasad ta ɛ phoo.

²⁵ɛMuusaa gha kaa wɛɛ tɛ nigwaa ɛbhɛ na yaa seng ɛli ne ɛTaanggbey ya yaa mɔn ɛtomɛ ne ɛbhɛ ɛ phɔt nibhɛ, sɔng nibhɛ ne seng nang.

²⁶Ne cwiil ihwɛlɛ yɛ, ɛMuusaa gha ne sɛ nidɛng nigwaa ɛbhɛ na nibhɛ ifaa nibhɛ hal en, ɛMuusaa gha ne i tɔk ɛli ne aa hobhose nibhɛ. Ne ɛ yaak nibhɛ, ‘Nisaa en, ɛ so ɛn nigwaa, ikyee iphɛ kɛ te ɛ lɛng ɛn nyini woo?’

²⁷ɛNyi gha ne ɛ kaa ne tsa ɛgwaa ɛbhɛ gha ne irywen da ne top ɛMuusaa yegha gɔɔ, ɛ yaak ɛbhɛ, ‘ɛHay bhɛ kɛ yɛk kɛ nɛ ɛ teyɛ ɛgɔm mos sa ne ɛhaa ne bol njwi ɛshara ghaa?

²⁸Ɛɛ sim tɛ aa ta phoo me ɛli ne ɛ kɛ phoo ɛnyi ne iMasad ta ne ɛryɛ ghaa?’

²⁹Ne sɛ ɛMuusaa gha kɛ phok ɛlɛ wo, ne ɛ tel ɛ phɛ ne ivel ne iMadayana. Ne ɛbhɛ teye ɛhaa ne kpoo ɛnggyɛ wo ɛ yɛk ninɔn niras nibhɛ ifaa.”

³⁰“Ɛtsim ne ishay nzuwubɔ nwaas, ɛmalɛka ɛTaanggbey ne bhɛ wuru ɛMuusaa yegha ndɔ ne ilem ne igboo ne ifɛ re ihon ndɔ ɛhay cɛcɛk ne iGol ne iSinay.

³¹ɛMuusaa gha kaa yaang ɛkɔn ne kparat daa ɛli ne sɔng igboo wo kaa kyii re ivee ɛhyohyon na nang. Kɛ ne sɛ ɛ kɛ shompeey cɛcɛk te ɛ yɛɛn yɛnɛng, izɔlɔs ɛDaray ne yel-le ndɔ ne igboo wo, ihywɛ yɔngɔ,

³²‘Mee nzo ɛTaanggbey nikyɛɛ-nikyɛɛ mo gha, ɛTaanggbey ɛBaraying, ne ɛShaaku, ne ɛYakub.’ ɛMuusaa gha ne wum ɛnik ɛ yaa kparat, sɔng ne ɛ yɛɛ ne yɛɛn nang.”

³³“ɛDaray ya ne yaak ɛMuusaa yegha, ‘Tul ikpikpangat mo da, daa ɛli ne ɛlɔ gha ne ɛ kɛ kyinak ngɛ wo, ɛ so ɛlɔ ne kɛ tul kang.

³⁴iPhɛ so ɛtsak nzi yaang nggbang ninyi nge da ne i baasek nibhɛ ne iMasad de. Nzi ne ta phok ishwin nibhɛ, nggɛ ne tɔm n yɛɛs ne phɔt nibhɛ. Ne ɛ ryɔng ngɛ naa ne tom mɛ ne iMasad de.’ ”

³⁵“ɛMuusaa yɛghaa wo, ɛbhɛ so ɛMuusaa ɛdaan nɛ nɛ niSɛrɛla na kaa mbaray ɛbhɛ, nibhɛ bok ɛbhɛ, ‘Ɛhay ɛbhɛ kɛ yɛk kɛ nɛ ɛ teyɛ ɛgɔm mos sa, ne ɛhaa ne bol njwi ɛshara ghaa?’ ɛMuusaa ɛdaan nɛghaa wo ne ɛTaanggbey ya kɛ ne tom ɛbhɛ te ɛbhɛ teye ɛndiinday nibhɛ, ne ɛhaa ne aa bhɛ tul nibhɛ lenɛ ne ɛmalɛka ɛTaanggbey ya ne kɛ bhɛ wuru ɛbhɛ ndɔ ne ilem ne igboo wo ne ifɛ re ihon no.

³⁶ɛMuusaa yɛghaa wo kaa ne bhɛ mɔn nyu nikɔn ne kparat nɛ nikɔn ne ɛnik ne iMasad de, ɛ ta mɔn ɛLing Nding[17] nga gbik ne ndɔ ɛhay ya ishay de nzuwubɔ nwaas.

³⁷Ne ta so ɛMuusaa ɛdaan kɛgha wo ne ɛ kaa yaak ninyi niSɛrɛla na, ‘ɛTaanggbey ya sɛ tom nyini ne ɛdɛ ɛNɛbi gha te mee wo, ɛ sɛ ne so ɛdɛ ɛnyi mon na.

³⁸ɛMuusaa yɛghaa wo ɛbhɛ kaa ne sonɛ ninyi niSɛrɛla na ndɔ ɛhay ya. Ɛbhɛ ne ɛmalɛka ɛTaanggbey ya kaa ne ta bol ne ɛbhɛ dak ne iGol ne iSinay de nɛ nikyɛɛ-nikyɛɛ njwɛɛn na, i nang ɛbhɛ ibol ne iken de te ɛ nang njwɛɛn.

³⁹Sɔng nikyɛɛ-nikyɛɛ njwɛɛn na kaa ne roos ibol ɛMuusaa de nang. Nibhɛ kaa mbaray tang phok ɛbhɛ, irway nibhɛ da ne kyi ta kyii ne iMasad de.’ ”

⁴⁰“Nibhɛ ne yaak ɛHaruna yegha, ‘Ryɔng njwi nidɛng nikɔn na tɛ nibhɛ teye nitaanggbey mos, ninaa nɛ nibhɛ yaa i ho ɛyisɛ mos, njwi ne i kungus. ɛMuusaa yɛghaa wo ne ɛ kɛ bhɛ tul njwi ndɔ ne iMasad de, sɔng njwi yɛɛ ɛkɔn na ne ɛ kɛ bhɛ sɛ ɛbhɛ nang.’

⁴¹Ninyi na ne ryɔng idɛ igunkyi[18] de te ɛNgɔn ne ɛrandɔng, nibhɛ ne jii hap ɛbhɛ itsanga, nibhɛ ne ra ijɔwɔ ne irway ihwala daa ɛkɔn na nɛ nibhɛ bhɛ kɛ ryɔng ngo.”

⁴²“iPhɛ ɛlɛy, ɛTaanggbey ya ne hyereey ɛ nang nibhɛ ɛtsim. Ɛ tek nibhɛ tɛ nibhɛ re iroy de gbik nɛ niyuyɔrɔ ɛdaa ne irywa na ntsong ngga. Aa tek nibhɛ ɛli nɛ ninabawa na kɛ haa ndɔ ne ɛWee ne iBol ɛTaanggbey yo nibhɛ bo, ‘Ninyi niSɛrɛla, mee ne ˆɛ kaa hap ɛn mɛɛn itsanga de, ˆɛɛ naas ɛn mɛɛn izɛɛng ngge ndɔ ɛhay ya ishay nzuwubɔ nwaas da naa?’

⁴³Ɛ kaa bo ɛn ipho ɛMɔlɛk ne ɛ hyeles ɛn nɛ, ne ɛyuyɔrɔ ɛRɛfan, ɛKɔn mon na ne ɛ kaa ryɔng ɛn no ɛ re ɛn ɛbhɛ ntsong ngga. iPhɛ ɛlɛy, naa ne yɛk ngɛ i bo nyini n phɛ nɛ kyakyak ɛbhɛ phee ɛn ivel ne iBabila.”

⁴⁴“niKyɛɛ-niKyɛɛ njwɛɛn na kaa ne bok ipho ne iphɛ kɛ tɔɔrek wu ɛTaanggbey sonɛ nibhɛ ndɔ ɛhay ya. iPho yɛdee nggyɛ wo ne ɛTaanggbey ya kaa yɛk ɛMuusaa yegha nɛ wu te ɛ ryɔng ngo. ɛMuusaa gha kaa ne ryɔng cɛcɛɛy ɛli ne ɛTaanggbey ya kɛ tɔɔrek ɛbhɛ wo.

⁴⁵iPho yɛdee nggyɛ wo kaa ne tek nikyɛɛ-nikyɛɛ njwɛɛn na nɛ, nibhɛ ne bok iphɛ nten ɛYɛsuwa. Nibhɛ kaa ne boos nibhɛ bhɛ phɔt ne ivel da ne ɛTaanggbey ya kaa roos nibhɛ ninaa ne ivel lɛ ɛnu ɛyisɛ nibhɛ gha. iPho yɛdee nggyɛ wo kaa ne so ne ivel nibhɛ phyii bhɛ hɔn nten ɛDoda.

⁴⁶ɛDoda gha kaa te ɛTaanggbey yɛk irway ihwala ne ɛbhɛ, ne ɛ roo wu yaa lɔl ɛTaanggbey ɛYakub bhe ijwee ne aa yaa shɛɛ nɛ.

⁴⁷ɛSɔlɔmɔn ɛbhɛ kaa ne ji kyii lɔl ijwee ɛTaanggbey yo.”

⁴⁸“Gbik ne phɛ ɛlɛy, sɔng ɛTaanggbey ɛdaa ne nyu ne irywa gha ne shɛɛ ndɔ ne idee nɛ niten nisii kɛ lɔl nang. Ɛli ne ɛnɛbi gha kɛ boote ɛ yɔngɔ,

⁴⁹‘ɛDaray ya bo, ɛdaa ne irywa wo so ɛcuruu ne igbɔm nge, ndɔ ne ivel lo ne so ɛlɔ ne tek ne ita nge. Ya ihywee ne ijwee ne ˆaa ne ji lɔl ɛn mɛɛn nɛɛ? Hang ɛya ɛlɔ ɛbhɛ ɛ so ɛlɔ ne phɔng ngeghaa?

⁵⁰Hang ma sang so mee nggɛ ryɔng nikɔn nɛnaa wo gbik ne iwɔ nge wo naa?’ ”

⁵¹ɛSitivin na ne ma re ɛnu ɛyisɛ ne ivol da, ɛ yɔngɔ, “Nyinɛn no ne ɛ so ɛn ninaa ne ito ihet ta, ne ɛ bok ɛn irway da gɛgɛy yo, ɛ ta so ɛn nisang-phok ka, ɛ mbaray nyini tang roos ɛn ibol ne iKabyik ɛTaanggbey de ɛli nɛ nikyɛɛ-nikyɛɛ mon na kaa mɔn no.

⁵²ɛDɛ ɛnɛbi gha sonɛ ne hame nikyɛɛ-nikyɛɛ mon na kaa sang baasek ɛbhɛ nggbang ngga? Nibhɛ kaa phobho ninaa nɛ nibhɛ kɛ tɔng ibol ne yɛɛs ɛNyi ɛCik ge ne ˆɛ kɛ mbaray ɛn nyini ɛbhɛ ˆɛ phoo ɛn no.

⁵³Nyinɛn ɛ kɛ ne say ɛn ɛShara ɛTaanggbey ya ne iwɔ nimalɛka wo, sɔng ɛ kɛ ne kyi ta roos ɛn nang!”

⁵⁴Kɛ ne sɛ nibhɛ kɛ phok ɛlɛ wo, nibhɛ ne te njenjek gbom nibhɛ yaa tɛnɛ ikɛn.

⁵⁵ɛSitivin na ne ɛ kaa so hyɔrɔ ne iKabyik ɛTaanggbey de ne kyii yɛɛn ɛdaa ne irywa, ne ɛ yaang ndiinday ɛTaanggbey ne ɛYɛso ɛ kɛ kyinak ne iwɔ ne irwye ɛTaanggbey yo.

⁵⁶ɛSitivin na ne yɔngɔ, “Yaang ɛn! Nzi yaang ɛdaa ne irywa wo so phere, ɛNgɔn ɛNyi gha kɛ ne kyinak ne iwɔ ne irwye ɛTaanggbey.”

⁵⁷Nten idaan, nibhɛ ne wungare, nibhɛ babha itoro, nibhɛ ji bhɛ ho ɛbhɛ.

⁵⁸Nibhɛ hɔ ɛbhɛ nibhɛ ne wuru ne ɛbhɛ ɛtsim ɛgarang, nibhɛ bhɛ phengɛ ɛbhɛ ne ikpɛɛ. Ninaa nɛ nibhɛ so ne ɛlɔ yɛwo ne teesek itsura nibhɛ da ɛlɔ ɛdɛ ɛngɔn ɛphas sa ne i bok ɛbhɛ ɛShawulu.

⁵⁹Kɛ ne sɛ nibhɛ phengɛ ɛSitivin ne gha, ne ɛ roo ɛ yɔngɔ, “ɛDaray ɛYɛso, say iken nge.”

⁶⁰Ne ɛ cwi ne irway nggburuk ɛ tɔɔk izɔlɔs ɛ yɔngɔ, “ɛDaray ɛTaanggbey, hana nibhɛ ne ɛfɔt tɛ woo wo.” Ne sɛ ɛ kɛ boote ɛlɛ wo ne ɛ wum nwa.