Read eten ɛTomɛ 8 Bible Online

ɛTomɛ 8 - eten bible

ɛTomɛ 8

¹ɛShawulu gha ne sim ɛli ne kɛ phoo ɛSitivin ne gha. ɛTuk kɛghaa nggyɛ wo ɛgbaang nggbang ne sɛ idira ninaa ne roos de nɛ nibhɛ so ne iYɛrushɛlɛm be. Nibhɛ ne tes en shwaa nibhɛ phɛ ne iYahudiya ne iSamariya. Ninɔn ne tom ma zɔng nibhɛ mak ne iYɛrushɛlɛm be.

²Nidɛng ninaa ne re ɛTaanggbey yegha ntsong ne bhɛ rɛɛ ikom ɛSitivin de, nibhɛ ne san ɛbhɛ gbom.

³ɛShawulu gha ne yaa baasek idira ninaa ne roos de nggbang gbogbom. Ɛɛ roos idee-idee ɛ wumus niras sɛ nɛ nikuk kɛ ɛ gangat nibhɛ ne ijwee ne nyang.

⁴Ninyi na ne kɛ ne te nibhɛ shwaa wo ne i sanga ibol iyɛnɛng ngge gbik ɛlɔ gha nɛ nibhɛ kɛ phɛ.

⁵ɛFilibus ne phɛ ɛdɛ ɛgarang ne iSamariya gha ɛbhɛ sanga ibol ɛKiriti de ɛnggyɛ wo.

⁶Kɛ ne sɛ idira ninyi de kɛ phok ibol de ne ɛFilibus sa tɔng nibhɛ wo, nibhɛ ta yaang nyu nikɔn ne kparat de ne ɛɛ mɔn no, nibhɛ ne kyii ne ihywɛɛ nibhɛ daa ɛkɔn na ne ɛ tɔng nibhɛ wo.

⁷iKpabyik ivebhe da ne ifɛ so ndɔ ninyi na ne i tabha ikpun ifɛ wuusi ndɔ ninyi na gbom. Ne i tes nibaghat nɛ nilɔɔm niken gbom.

⁸iPhɛ ɛlɛy, ɛgarang nga ne yɛk irway ihwala gbom.

⁹ɛDɛ ɛnyi gha kaa ne sonɛ ne iSamariya de ne bok ɛbhɛ ɛSimɔn. ɛSimɔn na kaa bok ikyarakyut, ikyarakyut ɛbhɛ de ne te ne ninyi ne iSamariya na wum en zii ne ɛ ma ji hal ne ɛgyɛy wu so ɛgbaang ɛnyi.

¹⁰Ninyi na gbik, ɛhelem ne ɛngɔn, ne kyii ne ihywɛɛ nibhɛ daa ɛbhɛ, nibhɛ yɔngɔ: “ɛNyi yɛghaa wo ɛbhɛ so ndiinday ɛTaanggbey de ne i yeres iphɛ ‘iTo iGbaang ngge.’ ”

¹¹Ninyi na ne ku yaa roos ɛSimɔn negha daa ɛli ne ɛ kɛ bo nten gbom ɛ mɔn ikyarakyut, nibhɛ ne i wɛɛ zii.

¹²Kɛ ne sɛ ninyi na kɛ nang ne itin nɛ ne ibol iyɛnɛng ne igbɔm ɛTaanggbey de gbik ne irywɛɛk ɛYɛso ɛKiriti wo ɛli ne ɛFilibus sa kɛ tɔng nibhɛ wo, ne ɛ yaak nibhɛ ne ibatisima, nikuk kɛ nɛ niras sɛ gbik.

¹³ɛSimɔn na ne ma nang ne itin nɛ ne yɛk ɛbhɛ ne ibatisima de ne mang. Ne ɛ kungus ɛFilibus segha, ɛFilibus sa ne i mɔn igbaang nikɔn ne kparat nɛ nikɔn ne ɛnik, ɛSimɔn na ne i wɛɛ zii.

¹⁴Ne sɛ ninɔn ne tom ne iYɛrushɛlɛm ma kɛ phok ɛli nɛ ninyi ne iSamariya na kɛ say ibol ɛTaanggbey de, nibhɛ ne tom ɛBiturus se ne ɛYohana nibhɛ phɛ ne iSamariya de.

¹⁵Ne sɛ ɛBiturus sa ne ɛYohana gha kɛ bhɛ tuu iSamariya de, nibhɛ ne roo te nang ninaa ne iSamariya na iKabyik ɛTaanggbey de.

¹⁶Daa ɛli ne sɔng kaa ku shii nang ɛdɛ ɛbhɛ iKabyik ɛTaanggbey de nang, kaa yang ku yɛk nibhɛ ne ibatisima de ndɔ ne irywɛɛk ɛDaray ɛYɛso wo.

¹⁷ɛBiturus sa ne ɛYohana gha ne tek nibhɛ ne ibɔ de dak ne ito, ne nibhɛ ne ji say iKabyik ɛTaanggbey de.

¹⁸Kɛ ne sɛ ɛSimɔn na yaang ɛli ne i sɛ ninɔn ne tom ma i tek ɛnyi gha ne iwɔ wo dak ne ito de ɛ sɛ iKabyik ɛTaanggbey de nang, ne ɛ yɔng wu yaa nang nibhɛ ijam.

¹⁹Ɛ kaa yɔngɔ, “Ma nang ɛn mɛɛn ito yɛdee wo, te yaa sɛ ɛhiha ɛnyi ne nggɛ tek ɛbhɛ ne iwɔ nge wo dak ne ito de te ne ɛ ma say iKabyik ɛTaanggbey de.”

²⁰ɛBiturus sa ne yaak ɛSimɔn negha, “iGyɛ wo ne jam mo de ku ɛn! Ɛ wɛɛ te i say izɛɛng ɛTaanggbey de ne ijam naa?

²¹Sɔng ɛ bok ɛkɔn ne aa mɔn ndɔ ɛtomɛ yɛghaa wo nang, daa ɛli ne sɔng irway mo da so cik ɛnu ɛyisɛ ɛTaanggbey ya nang.

²²San ɛbɔk ɛlɔ ne ibebhe yɛdee wo, te ɛ roo ne ɛTaanggbey ya. Hang aa hana yɛ ne icwas ivebhe yɛdaa wo yɔɔ.

²³Nzi yaang ngɛ ɛ so hyɔrɔ ne irway ivebhe, ɛfɔt bok kɛ sii.”

²⁴ɛSimɔn na ne kyii nɛ, ne ɛ yaak nibhɛ, “Roo ɛn mɛɛn ɛTaanggbey yegha ɛli ne hame ɛdɛ ɛkɔn nɛghaa wo ne ɛ bol ɛn no yaa sɛ me.”

²⁵Ne sɛ ɛBiturus sa ne ɛYohana gha kɛ tɔng ninyi na nikɔn na nɛ nibhɛ kɛ yaang ngo, gbik ne ibol ɛDaray de, nibhɛ ne phɛ ne iYɛrushɛlɛm de. Nibhɛ kaa ne roos nigyigyaarang ne iSamariya na gbom nibhɛ sanga ibol iyɛnɛng ngge.

²⁶Kɛ ne so ɛnggyɛ wo, ɛMalɛka ɛDaray ya ne yaak ɛFilibus segha, “Bo nikɔn te ɛ roos ɛnkiinɛ ɛkɔrɔk ko, ne ɛbhɛ le ne iYɛrushɛlɛm be ɛbhɛ kɛ say ndɔ ɛhay de ɛbhɛ phɛɛs ne iGaza de.”

²⁷ɛFilibus sa ne bo nikɔn, ne sɛ ɛ hyel ne ɛ sɛ ɛdɛ ɛnyi ne iTopiya gha nkiinɛ. ɛNyi yɛghaa nggyɛ wo kaa so te isham. Ɛ kaa ne so ɛgbaang ngɛ ndɔ ninaa ne igbɔm ɛKandis, ɛkuk ne ɛbhɛ ɛ bok igbɔm ne iTopiya da. ɛNyi yɛghaa nggyɛ wo ɛbhɛ kaa ne so ɛhaa ne teesek ijam ne ivel ɛkuk kɛghaa nggyɛ wo. Ɛ kaa ne le ne iYɛrushɛlɛm ɛ kɛ bhɛ re ɛTaanggbey ye ntsong.

²⁸Ɛ kaa ne ji soos ndɔ ɛkyɛkyɛ ne inantse ɛbhɛ ɛ hyilis se ne ɛ tɔng ndɔ ne iwee ɛnɛbi ɛShaa.

²⁹iKabyik ge ne yaak ɛFilibus segha, “Cwi cɛcɛk ne ɛkyɛkyɛ ne inantse yɛghaa nggyɛ wo, te ɛbhɛ shɛɛ ne ɛlɔ yɛ.”

³⁰ɛFilibus sa ne zuwa ɛ phɛ cɛcɛk ne ɛkyɛkyɛ ne inantse gha, ne ɛ phok ɛnyi gha tɔng ndɔ ne iwee ɛnɛbi ɛShaa. ɛFilibus sa ne phom ɛbhɛ, ɛ yaak ɛbhɛ, “Ɛ kɛ seng ɛkɔn na ne ɛ tɔng ngoo?”

³¹ɛNyi gha ne yɔngɔ, “Naa mɔn ɛlii n seng tang ɛhak ɛnyi ɛbhɛ ɛ tɔng me nɛ woo?” Ne ɛ ji yaak ɛFilibus segha te ɛ yɛɛs tɛ nibhɛ soos ne ɛbhɛ.

³²ɛNyi gha kaa tɔng ibol de ne kɛ haa ndɔ ne ɛWee ne iBol ɛTaanggbey yo ne ɛ bo, “Ɛ kaa so te ᐩigyol ntsabhak ne phɛɛs ne hyɛ. Ɛ kaa ne so nggbyak te ɛngɔn ne ɛpharak ne i tɛbhɛ itsutsɔ yɛ. Sɔng ɛ kaa ne boote ibol nang.

³³Kaa bɛɛs ɛbhɛ i ring ɛbhɛ ne itin nɛ. Ɛ kɛ ku tang ɛngɔn, daa ɛli ne kɛ bo iken ɛbhɛ ndɔ ɛzay yɛghaa wo.”

³⁴ɛGbaang ɛnyi ne iTopiya gha ne yaak ɛFilibus segha, “Nzi roro ne igyɛ, tɔng me ɛNɛbi gha bol ibol ɛhay lɛɛ? iBol ne ito ne ɛbhɛ? Hang idee ɛhak ɛnyi?”

³⁵ɛFilibus sa ne tɔng ɛbhɛ ivol da; ɛ kaa tsa ɛlɔ gha ne ɛnyi gha i tɔng ngo ne ɛ tɔng ɛbhɛ iBol iYɛnɛng ɛYɛso de.

³⁶Ne sɛ nibhɛ ma tɔɔ hyel lo nibhɛ ne sɛ irong inɛn, ɛgbaang ɛnyi wo ne yɔngɔ, “Yaang, inɛn daa nggyɛ ɛyakɔn ɛbhɛ yaa ne ring ne yɛk me ne ibatisima dee?”

³⁷ɛFilibus sa ne yaak ɛbhɛ, “Wu ɛ kɛ nang ne itin nɛ ne irway mo gbik, yaa ne yɛk kɛ nɛ.” ɛNyi gha ne yɔngɔ, “Nggɛ nang ne itin nɛ ɛYɛso ɛKiriti gha ɛbhɛ so ɛngɔn ɛTaanggbey ya.”[19]

³⁸Ɛnyi gha ne yɛk ɛkyɛkyɛ ne inantse gha nɛ ɛ kyinak, nibhɛ ne tɔm ndɔ inɛn da. ɛFilibus sa ne bhɛ yɛk ɛbhɛ ne ibatisima de.

³⁹Ne sɛ nibhɛ wuusi ndɔ inɛn da, iKabyik ɛDaray de ne shii bo ɛFilibus segha iphɛ hyel lɛ. Sɔng ɛnyi yɛghaa wo ne tang yaang ɛbhɛ nang. Ne ɛ jung bok irway ihwala hyɔrɔ nten de ne ɛ so nkiinɛ wo ɛ hyilis se wo.

⁴⁰ɛFilibus sa ne sɛ ito ɛbhɛ ne iZotus. Ne ɛ roos nigarang nga gbik ɛ sanga ibol iyɛnɛng ngge, ɛ phyin bhɛ hɔn ivel ne iKɛsɛriya.