Read eten ɛTomɛ 9 Bible Online

ɛTomɛ 9 - eten bible

ɛTomɛ 9

¹ɛShawulu gha kaa ma tɔ baasek ninaa ne roos sa nggbang ngga ɛ sim ɛli ne aa phobho nibhɛ. Ne ɛ phɛ ɛlɔ ɛgɔm nibo gha,

²ɛbhɛ phom ɛbhɛ ɛ yaak ɛbhɛ te ɛhaa ye ɛwee te i phɛ nɛ ne idee ne itɔɔy niYahodawa de ndɔ ne ivel ne iDimaskus. Te yaa sɛ ɛ kɛ bhɛ sɛ idɛ idira ninaa ne roos de ɛnggyɛ wo, hang nikuk kɛ yɔɔ, hang niras sɛ yɔɔ, te ɛ wum nibhɛ ɛ yɛɛs nɛ nibhɛ ne iYɛrushɛlɛm be.

³Kɛ ne sɛ ɛ so ne ihywel da ɛ yek cɛcɛk ne iDimaskus de, idɛ wɛwɛy de ne shii le dak ne irywa, iphɛ tolte iphɛ te ɛbhɛ gyɔɔ.

⁴Ne ɛ hɔ ne ivel, ne ɛ ji phok izɔlɔs ihywɛ bok ɛbhɛ, “ɛShawulu! ɛShawulu! iKyee iphɛ kɛ te ɛ baasek me nggbang nggaa?”

⁵ɛShawulu gha ne kyii nɛ ɛ yɔngɔ, “ɛDaray, igyɛ ɛhay?” “iZɔlɔs de ne kyii nɛ ihywɛ yɔngɔ, ‘Me n so ɛYɛso gha ne ɛ baasek me nggbang ngga.

⁶Yilitsik te ɛ phɛ ndɔ ɛgarang ne iDimaskus de, yaa ne bhɛ tɔng ngɛ ɛkɔn na ne iphɛ so nggbinggbing ɛ mɔn.’ ”

⁷Ninyi na nɛ nibhɛ kaa sonɛ ɛShawulu gha ne kyinasek nggbyak. Daa ɛli nɛ nibhɛ kɛ phok izɔlɔs de sɔng nibhɛ ne kyi yaang ɛnyi nang.

⁸ɛShawulu gha ne yilitsik ne ivel da, ne sɛ ɛ kɛ phaal irwisɛ sɔng ne ɛ yaang ɛlɔ nang. Ninyi na ne wum ɛbhɛ iwɔ nibhɛ phɛ nɛ ndɔ ne iDimaskus de.

⁹Ne ɛ shɛɛ nituk itwat, sɔng ɛ yaang nang, sɔng ne ɛ re ɛkɔn nang, sɔng ɛ ta sɔ ɛkɔn nang.

¹⁰Ɛdɛ ɛhaa ne roos sa kaa ne so ne iDimaskus de ne kaa bok ɛbhɛ ɛHananiya. ɛDaray ya ne ji boote ne ɛbhɛ ndɔ ne iyuwa, ɛ yɔngɔ, “ɛHananiya!” ɛHananiya gha ne kyii nɛ ɛ yɔngɔ, “ɛDaray, mee woo.”

¹¹ɛDaray ya ne yaak ɛbhɛ, “Cwi ne ijwee ɛYahuza ndɔ ɛgarang nga, ne ɛwɛɛl lo ne i bok ɛbhɛ ɛWɛɛl ɛCik ko. Te ɛbhɛ phom ɛdɛ ɛnyi ne iTaasus sa ne i bok ɛbhɛ ɛShawulu. Ɛ so ɛnggyɛ wo ɛ bol ne ɛTaanggbey.

¹²Nggɛ ku tɔɔrek ɛbhɛ ndɔ ne iyuwa wu ɛdɛ ɛnyi gha ne i bok ɛbhɛ ɛHananiya kɛ tek ɛbhɛ ne iwɔ da ne ito ɛ ta yaa wɛɛ dɔng.”

¹³ɛHananiya gha ne kyii nɛ ɛ yɔngɔ, “ɛDaray, ninyi na gbom kɛ ku tɔng me ibol ɛnyi yɛdee nggyɛ wo, ɛli ne ɛ baasek ninyi mo na nggbang ngga ne iYɛrushɛlɛm be.

¹⁴iPhɛ dee ɛ kɛ ne yɛɛs ɛbɛ wo daa ne igbɔm nindiinday nibo na wu te ɛ wumus gbik ninyi na nɛ nibhɛ yeres daa ne irywɛɛk mo wo nɛ ɛbɛ wo.”

¹⁵ɛDaray ya ne jung yaak ɛbhɛ, “Cwi, nggɛ ku kasa ɛShawulu yegha te ɛ mɔn me ɛtomɛ. Ɛbhɛ aa bhɛ tɔng ninyi na ne hame nibhɛ so niYahodawa na nɛ nigɔm gbik nɛ niSɛrɛla na ibol nge de.

¹⁶Na tɔɔrek ɛbhɛ nggbang ngga ne iphɛ so ngbingbing ɛ sɔ mpɛ ɛlɔ me wo.”

¹⁷ɛHananiya gha ne bo nikɔn ɛ phɛ ne ijwee ɛYahuza wo. Ne ɛ bo iwɔ ɛbhɛ ɛ tek ɛShawulu yegha nɛ dak ne ito. Ne ɛ ji yaak ɛbhɛ, “Ɛgwaa nge ɛShawulu, ɛDaray ɛYɛso gha ne ɛ kɛ wuru yɛ ne nkiinɛ wo ɛbhɛ kɛ tom me te lenɛ ɛlɛy ɛ yaa wɛɛ dɔng ne ta yɛk kɛ ne iKabyik ɛTaanggbey hyɔrɔ.”

¹⁸Nɛ ne nten nɛ ɛdɛ ɛkɔn na ne ɛ so te ikpikpang ne izing ne le ndɔ ne irwisɛ ɛShawulu da ɛ ho. ɛShawulu gha ne ya wɛɛ dɔng! Ne ɛ ji yilitsik i yɛk ɛbhɛ ne ibatisima.

¹⁹Ne sɛ ɛ kɛ re ire, ne ɛ ji sɛ ihwet. ɛShawulu gha ne ji bonɛ nituk gbom nibhɛ shɛɛ nɛ ninaa ne roos ne iDimaskus sa.

²⁰Ne phyɔngɔle ncɛt, ɛShawulu gha ne yaa sanga ibol ɛYɛso de ndɔ ne idee ne itɔɔy niYahodawa de wu ɛYɛso gha so ɛngɔn ɛTaanggbey.

²¹Gbik ninyi na nɛ nibhɛ kɛ phok ibol ɛbhɛ de ne wum en zii, nibhɛ ne yaa bol nibhɛ bo, “Sɔng ɛnyi yɛghaa wo ɛbhɛ kaa baasek ninyi na nɛ nibhɛ yeres irywɛɛk kɛwoo wo ne iYɛrushɛlɛm be nggbang ngga nang nge? Sɔng ɛbhɛ ɛ kɛ ne ta yɛɛs ɛbɛ wo te ɛ wumus nibhɛ ɛbhɛ nang nindiinday nibo na ne iYɛrushɛlɛm be nang nge?”

²²ɛShawulu gha ne hante ne ihwet ne sanga ibol ɛTaanggbey de, ne ɛ tɔng niYahodawa na nɛ nibhɛ so ne iDimaskus de itin nɛ wu ɛYɛso gha ɛbhɛ ɛ soye ɛKiriti gha ɛli ne hame nibhɛ aa re ɛbhɛ ne ishamas.

²³Ne sɛ kɛ phyɔngɔle, niYahodawa na ne rop ɛnu ɛli nɛ nibhɛ yaa phoo ɛShawulu yegha.

²⁴ɛShawulu gha ne tɛrɛk ɛ seng ihwarap nibhɛ da. Nibhɛ kaa yaa ra ɛbhɛ ɛnu ne izuk ɛgarang nga ne igbey ne ɛtuk te nibhɛ sɛ nibhɛ phoo ɛbhɛ.

²⁵Ne sɛ ɛtuk ninɔn ne icwam ɛShawulu gha ne bo ɛbhɛ nibhɛ cwaak ndɔ ne ishwap, nibhɛ ji yɛɛn ikɛk ne iwabha de ne kɛ gan ne ɛgarang nga nibhɛ tɔmɔsek ɛbhɛ nɛ.

²⁶Kɛ ne sɛ ɛShawulu gha kɛ yɛɛs ne iYɛrushɛlɛm be, ne ɛ sim ɛli ne aa lel ndɔ ninɔn ne icwam ɛYɛso na, nibhɛ ne wum ɛnik ɛbhɛ, daa ɛli sɔng nibhɛ kɛ jung nang ne itin nɛ wu ɛ kɛ teye ɛhaa ne roos sa nang.

²⁷ɛBanabas ɛbhɛ ne ɛ bo ɛShawulu yegha ɛ phɛ nɛ ɛlɔ ninɔn ne tom ma. ɛBanabas sa ne tɔng nibhɛ ɛli ne ɛShawulu gha kɛ yaang ɛDaray yegha ne nkiinɛ wo, ɛli ne ɛDaray ya kɛ bol ne ɛShawulu gha. Ne ɛ tɔng nibhɛ ɛli ne ɛShawulu gha kɛ sanga ibol iyɛnɛng ngge tɔrɔk ko ndɔ ne irywɛɛk ɛYɛso wo ne iDimaskus de.

²⁸ɛShawulu gha ne yaa shɛɛ nɛ nibhɛ ndɔ ne iYɛrushɛlɛm be, ɛ ibol ne irway nviit ndɔ ne irywɛɛk ɛDaray yo.

²⁹Ne ɛ bol nibhɛ ne i sini ne ivol da nɛ niYahodawa na nɛ nibhɛ bol ilem ne iGirik ge, nibhɛ ne yaa tɔk ɛli nɛ nibhɛ sɛɛ phoo ɛbhɛ.

³⁰Ne sɛ ninaa ne roos sa kɛ tɛrɛk nibhɛ seng ibol lɛ, nibhɛ bo ɛShawulu yegha nibhɛ phɛ ne ɛbhɛ ne iKɛsɛriya, ne ɛ ji bhɛ le ɛnggyɛ wo nibhɛ tom ɛbhɛ ne iTaasus.

³¹iDira ninaa ne roos de nɛ nibhɛ so ne iYahudiya de, ne iGalili de, ne iSamariya de ne sɛ irway ne laal. Nibhɛ ne yɛk ihwet, iKabyik ɛTaanggbey de ne i tes nibhɛ itsɔngɔl gɛgɛy, nibhɛ te gbom, ihywel nibhɛ da ndɔ ne ɛnik ɛDaray yo ne hantey yɛ.

³²ɛBiturus sa kaa hyel ɛ roos nilɔ na gbik, nɛ ɛ phɛ ɛbhɛ kyili ninyi ɛTaanggbey ya nɛ nibhɛ so ne iLida.

³³ɛNggyɛ wo, ɛBiturus sa ne bhɛ sɛ ɛdɛ ɛnyi gha ne ɛ kɛ baghat ne i bok ɛbhɛ ɛNiyas. Ɛ bok ishay ɛnaras ɛlɔ ne laal la ne ishwa de.

³⁴ɛBiturus sa ne yaak ɛbhɛ, “ɛNiyas, ɛYɛso ɛKiriti kɛ teyɛ ɛken. Yilitsik te ɛ harap iphuurang mo de.” ɛNiyas sa ne shii yilitsik.

³⁵Gbik ninyi ne iLida na nɛ ninaa ne iSharon ne yaang ɛNiyas segha. Nibhɛ ne yaa roos ɛDaray yegha.

³⁶ɛDɛ ɛhaa ne roos sa kaa ne sonɛ ne iYopa ne kaa bok ɛbhɛ ɛTabita, ne ta yeres ɛbhɛ ɛDokas ne ilem ne iGirik. ɛTabita gha kaa mɔn nikɔn niyɛnɛng cɛcɛɛy, ɛ ta phyighis ninyi nihala.

³⁷Nten nɛdee nggyɛ wo, ɛTabita gha ne te shwa ɛ ku. Ne kuus ikom mɛ bhɛ tek dak ne ijwee ne irywa.

³⁸iLida de kaa so cɛcɛk ne iYopa de. Kɛ ne sɛ ninaa ne roos sa kɛ phok ɛli ne ɛBiturus sa so ne iLida de, nibhɛ ne tom ninyi ifaa ɛlɔ ɛbhɛ wu tɛ nibhɛ ne bhɛ yaak ɛbhɛ, “Nzi roro ne igyɛ, yɔng ɛhywarat te ɛ yɛɛs ɛlɔ mos sa!”

³⁹ɛBiturus sa ne shii bo nikɔn ne ɛ roos nibhɛ. Ne sɛ ɛ kɛ bhɛ tuu nibhɛ ne phɛ ne ɛbhɛ dak ne ijwee ne irywa wo. ɛBiturus sa ne bhɛ sɛ nikusang ne ɛdak kɛ gbom. Nibhɛ ne te ɛBiturus segha gyɔɔ nibhɛ san nibhɛ tɔɔsel ɛbhɛ itsura ne igbaang ne itsura ne ɛDokas sa ne i ta bok ɛbhɛ ɛTabita gha kaa lɔl nibhɛ nɛ ɛli ne ɛ kɛ tɔ ɛken na.

⁴⁰ɛBiturus sa ne tuul nibhɛ gbik ne izay, ɛ ji cwi ne irwa-nggburuk ɛ boote ne ɛTaanggbey. Ne ɛ ji hyereey ɛlɔ ne ikom ma ne ɛ yɔngɔ, “ɛTabita, yilitsik.” ɛTabita gha ne phaal irwisɛ, ne sɛ ɛ kɛ yaang ɛBiturus segha ne ɛ yilitsik ɛ soos.

⁴¹ɛBiturus sa ne wum ɛbhɛ iwɔ te ɛ phyik ɛbhɛ ɛ yilitsik. ɛBiturus sa ne ji yel-le ninaa ne roos sa gbik nɛ nikusang nga ɛ ji nang nibhɛ ɛTabita yegha ɛken nɛ.

⁴²iBol lɛ ne shwalat ne iYopa de gbik. Ninyi na gbom ne nang ne itin nɛ ne ɛDaray ya.

⁴³ɛBiturus sa ne bonɛ nituk gbom ɛ shɛɛ ne iYopa de ne ijwee ɛdɛ ɛnyi gha ne bok ɛbhɛ ɛSimɔn ne ɛ kaa so ɛhaa ne ryɔng ihuhu.