Read eten iRooma 10 Bible Online

iRooma 10 - eten bible

iRooma 10

¹Nigwaa nge, nzi has irway gbom, nzi ne roro ne ɛTaanggbey tɛ ninyi niSɛrɛla na sɛɛ sɛ iphɔrɔt.

²Nzɛ yɛɛ ne tɔɔrek wu nibhɛ has irway ne re ɛTaanggbey yegha ntsong ngga, sɔng nibhɛ ne ji bok ishweng ngɛ nang.

³Ɛli nɛ nibhɛ doo ɛnkiinɛ wo ne ɛTaanggbey ya say ninyi na nɛ wu nibhɛ so cik ko, nibhɛ ne ji kyangase nɛ tɛ nibhɛ tum ɛwoo nibhɛ ɛnkiinɛ ne yaa say nibhɛ nɛ wu nibhɛ so cik ɛnu ɛyisɛ ɛTaanggbey ya. iBol lɛ kɛ ne te nibhɛ sang nang ito nibhɛ ndɔ ne ɛnkiinɛ wo ne ɛTaanggbey ya i say ninyi na nɛ wu nibhɛ so cik ko.

⁴ɛKiriti gha ɛbhɛ shwaak iMɛmɛ ɛMuusaa da te gbik ɛnyi gha ne ɛ kɛ nang ne itin nɛ, te ne say ɛbhɛ wu ɛ so cik ɛnu ɛyisɛ ɛTaanggbey ya.

⁵ɛMuusaa gha kaa haa daa ne ibol ne say ɛnyi gha wu ɛ so icik ko lenɛ ne roos iMɛmɛ ɛMuusaa da, ɛ bo, “Gbik ɛnyi gha ne ɛ kɛ roos iMɛmɛ ɛMuusaa yɛdaa wo, aa ne shɛɛ ɛken lenɛ ne iMɛmɛ da.”

⁶Kɛ ne haa ibol ne say ɛnyi gha wu ɛ so cik ko lenɛ ne ìnang ne itin de ndɔ ne ɛWee ne iBol ɛTaanggbey yo ɛlɛ: “Sɔng ˆɛ yɔng, ndɔ ne irway mo da, ‘ɛHay ɛbhɛ aa wara dak ne irywa wo?’ ” (Te ɛbhɛ bo ɛKiriti yegha ɛ tɔm mɛ ndɔ ne ivel daa.)

⁷“Sɔng ne ˆɛ yɔngɔ, ɛhay ɛbhɛ aa ji phɛ ndɔ ɛta ne ivel laa?” (Wu te ɛbhɛ yiisik ɛKiriti yegha ndɔ ne ivel daa.)

⁸ɛWee ne bol ɛTaanggbey yo i bo: “iBol ɛTaanggbey de so cɛcɛk ne igyɛ, iPhɛ so ndɔ ɛnu mo, ne ndɔ ne irway mo dɔng.” iBol lɛdee wo ne so idee ne nang ne itin nɛ ne ibol de ne njwii sanga wo.

⁹Wu ɛ kɛ boote ne ɛnu mo, ɛ yɔng wu “ɛYɛso so ɛDaray,” ɛ ta nang ne itin nɛ ndɔ ne irway mo wu ɛTaanggbey kɛ yiisik ɛbhɛ tsik ndɔ ne ikpuu, yaa ne phɔt tɛ.

¹⁰Daa ɛli ne ɛɛ nang ne itin de ndɔ ne irway mo ne say yɛ wu ɛ so cik ɛnu ɛyisɛ ɛTaanggbey ya, aa ne ta boote ne ɛnu mo dɔng ɛ sɛ iphɔrɔt da.

¹¹Te ɛli ne ɛWee ne iBol ɛTaanggbey yo bo, “Gbik ɛnyi gha ne ɛ kɛ nang ne itin nɛ ne ɛbhɛ sɔng aa ne sɔ ncwa nang.”[13]

¹²Ɛlɛy, sɔng niYahodawa na ne labhe nɛ ninyi na ne hame nibhɛ soye niYahodawa na nang. ɛDaray ɛdaan nɛghaa wo ɛbhɛ so ɛDaray ninyi na gbik, ɛbhɛ ɛ ne ta sit gbik ɛnyi gha ne ɛ kɛ yel-le ndɔ ne irywɛɛk ɛbhɛ ne ɛwɛng gbom.

¹³Te ɛli ne ɛWee ne iBol ɛTaanggbey yo bo, “Gbik ɛnyi gha ne ɛ kɛ yel-le da ne irywɛɛk ɛDaray yo, yaa ne phɔt ɛbhɛ.”[14]

¹⁴Yaa ne mɔn ɛli nibhɛ yel-le daa ɛnyi gha nɛ nibhɛ kɛ sang nang ne itin nɛ ne ɛbhɛ woo? Yaa ne mɔn ɛli nibhɛ nang ne itin nɛ ne ɛnyi gha nɛ nibhɛ kɛ sang phok ibol ɛbhɛ dee? Yaa ne ta mɔn ɛli nibhɛ phok ko wu ɛnyi kɛ sang bhɛ sanga nibhɛ ibol lɛ woo?

¹⁵Yaa ne ta mɔn ɛli ninaa ne sanga ibol la bhɛ sanga ibol de wu kɛ sang tom nibhɛ woo? Te ɛli ne kɛ haa ndɔ ne ɛWee ne iBol ɛTaanggbey yo i bo, “iYɛɛs ninaa ne sanga ibol iyɛnɛng ngge kɛ jam gbom!”[15]

¹⁶Sɔng ne so gbik ninyi niSɛrɛla na nibhɛ kɛ say iBol iYɛnɛng ngge nang. Te ɛli ne ɛShaa gha kɛ boote ɛ yɔngɔ, “ɛDaray, ɛhay ɛbhɛ kɛ nang ne itin nɛ ne ibol mos dee?”[16]

¹⁷iPhɛ ɛlɛy i ne nang ne itin nɛ wo lenɛ ne kɛ phok ibol de, i ne phok ko lenɛ ne sanga ibol ɛKiriti.

¹⁸Nzi phomos, “Nibhɛ kɛ shɛɛ tang phok ko ɛtsak ghee? Nibhɛ kɛ phok. ɛWee ne iBol ɛTaanggbey yo bo, ‘iZok ne izɔlɔs nibhɛ de kɛ bhɛ hɔn ndɔ ɛzay de gbik, ivol nibhɛ da kɛ bhɛ tuu ɛgak ɛzay yo.’ ”

¹⁹Nzi ne ta phomos, “Wu bo wu hang ninyi niSɛrɛla na tang seng naa?” ɛMuusaa gha kaa yɔngɔ, ɛTaanggbey ya bo, “Naa te nyini ɛ yɛk ɛn ɛnkyis nɛ ninyi na ne hame nibhɛ ma yung hɔn igbagha, yaa ne lenɛ ne igbagha wo ne ifɛ so ɛwamang naa ne te ɛ te ɛn njenjek.”

²⁰ɛShaa gha kɛ boote ne irway nviit ɛ yɔngɔ, ɛTaanggbey ya bo, “Ninyi na ne hame nibhɛ kɛ tɔk me, nibhɛ bhɛ kɛ ne sɛ me, nggɛ ne tɔɔl ito nge ɛlɔ ninyi na ne hame nibhɛ kɛ phom ɛli nɛ nibhɛ yaa sɛ me.”[17]

²¹Daa ne ibol ninyi niSɛrɛla de ɛTaanggbey ya kɛ ne ta yɔngɔ, “Nggɛ phoo iroy gbik, nggɛ phaal ninaa ne sang roos ibol nge de gbik nɛ nisang-phok kɛ na wo ibɔ nge.”[18]