Read eten iRooma 11 Bible Online

iRooma 11 - eten bible

iRooma 11

¹Nzi phomos; ɛTaanggbey ya mbaray ninyi ɛbhɛ naa? Kwa! Me wo ne ito nge nzo me ɛnyi niSɛrɛla gha, ɛhaa ne icwaang ɛBaraying ne ijwee ɛBinyami.

²Sɔng ɛTaanggbey ya kɛ mbaray ninyi ɛbhɛ na ne ɛ kaa ku yɛɛ ne ile de nang. Ɛ yɛɛ ɛn ɛkɔn na ne ɛWee ne iBol ɛTaanggbey yo i bol daa ne ito ɛLiya de ɛli ne ɛ kaa phɛ ne ishwin ɛbhɛ da ɛlɔ ɛTaanggbey ya daa ne ito niSɛrɛla de ɛ bo,

³“ɛDaray, nibhɛ kɛ phobho ninabawa mo na, nibhɛ ne ta tobhos niraa ne hap itsanga na gbik. Mee zɔng nggɛ mak, nibhɛ ne ta tɔk ɛli nibhɛ yaa phoo me.”

⁴ɛTaanggbey ya kaa ne kyii ɛbhɛ nɛ ɛ yɔng ɛli woo? Ɛ kaa kyii ɛbhɛ nɛ ɛ yɔngɔ, “Nggɛ ku tek ito ngɛ ninyi na ninom ɛniitaa ne hame nibhɛ kɛ ku te ne ɛkuum nibhɛ re ɛBaal le ntsong.”

⁵ɛLɛy ne iphɛ ne so ɛlyilyɛghaa wo, ɛbyin ninyi na sonɛ ne ɛTaanggbey ya kɛ ku kasa nibhɛ lenɛ ne izɛɛng ɛbhɛ.

⁶iKasa ɛTaanggbey da ne so daa ne izɛɛng ɛbhɛ, sɔng daa ɛtomɛ ne nɛ ninyi yɛ kɛ mɔn nang. Sɛɛ yɔng wu ikasa ɛTaanggbey ba so daa ɛtomɛ gha nɛ ninyi kɛ mɔn no sɔng izɛɛng ɛbhɛ de sɛ ne soye izɛɛng nang.

⁷iPhɛ ne ji so ɛli daa mɛɛ? iPhɛ so ɛlɛ, ninyi niSɛrɛla na kɛ wɔs ɛkɔn na nibhɛ kɛɛ tɔk ko, ɛbyin nɛ bɔbɔk ne ɛTaanggbey ya kɛ kasa nibhɛ bhɛ kɛ sɛ, ɛbyin nɛ kɛ ne teye ninaa ne ito ihet.

⁸Ɛli ne ɛWee ne iBol ɛTaanggbey yo i bo, “ɛTaanggbey ya kɛ te nibhɛ kɛ te nkpuy, nibhɛ bok irwisɛ, sɔng nibhɛ ne yaang nang, nibhɛ bok itoro, sɔng nibhɛ ne phok kang i phyii bhɛ hɔn izenge wo.”

⁹ɛDoda gha kɛ ne ta boote ɛ yɔngɔ: “Te ijwira nibhɛ de teye nibhɛ irwa, ɛkɔn nɛ nibhɛ yaa wumus se nɛ ɛkɔn nɛ nibhɛ yaa kyibhɛse nɛ, te i bak nibhɛ nggbang.

¹⁰Te irwisɛ nibhɛ da te gbyik ɛli ne hame nibhɛ yaa yaang, te ɛgbaang nggbang te nibhɛ te gyubhut.”

¹¹Naa ne ta phom. Ɛli nɛ niYahodawa na kɛ kyibhɛse nibhɛ hoghɛse wo, sɔng nibhɛ aa ne tang yilitsik nang nge? Kwa! Sɔng ɛlɛy yang daa ɛli ne ɛfɔt nibhɛ wo kɛ te ninaa ne hame nibhɛ so niYahodawa na kɛ sɛ iphɔrɔt te ne te niYahodawa na yɛk ɛnkyis nɛ nibhɛ.

¹²Wu ɛfɔt nibhɛ kɛ ne yɛɛs ɛzay ya ne Niwɛng nga, wu itaasek nibhɛ da kɛ ne ta yɛɛs ninaa ne hame nibhɛ so niYahodawa na nɛ Niwɛng nga, Niwɛng ngɛ sɛ ne ji so ɛlii nten de ne kɛ shwaak ɛnu niYahodawa na ne ɛTaanggbey kaa ku yɔngɔ woo?

¹³ɛLyilyɛghaa wo, nyinɛn no ne hame ɛ so ɛn niYahodawa na ne nzi bol lɛ. Te ɛli ne nzo ɛhaa ne tom ɛYɛso gha ne ɛ kɛ tom me ɛlɔ ninyi na ne hame nibhɛ so niYahodawa na, nzi ne hal ɛgyɛy ne ɛtomɛ nge gha.

¹⁴Nzi mɔn ɛlɛ wo, te nzɛ n yaang nigwaa nge niYahodawa na kɛ yɛk ɛnkyis te ne lenɛ ɛlɛy i phɔt nidɛng ndɔ nibhɛ.

¹⁵Kaa sɛ kɛ mbaray nibhɛ wo, iphɛ phaal ɛzay ya ɛnkiinɛ ne ryɔng ne ɛTaanggbey ya, iphɛ sɛ ne ji so ɛli ne sɛ́ sɛ kɛ kyii say nibhɛ woo? iPhɛ sɛ ne so, kɛ ku i seme.

¹⁶Wu kɛ tsa tul ɛTaanggbey yegha ɛco ne ibɛrɛdi gha ɛbyin ne ibɛrɛdi yɛ gbik ne so idee ɛbhɛ, wu kɛ nang ɛTaanggbey yegha iling ɛhon de, ilaak ɛhon nɛ gbik ne soye idee ɛbhɛ dɔng.

¹⁷Kɛ ne hyɛghɛ ɛbyin ne ilaak ɛphaa de ne kɛ tup i ryɔng ne ji bo ilaak ɛphaa ne ɛ kɛ wuru ɛhay i sang ryɔng ɛbhɛ, i byinki ne ɛphaa gha ne kɛ tup po ɛli ne i rop ɛlɛɛmu ɛwɛrɛ. Nyinɛn no ne hame ɛ so ɛn niYahodawa na ne ɛ so ɛn te ilaak ɛphaa ɛhay de, nyinɛn ne kɛ ne byinki ne itin nɛdee nggyɛ wo. Kaabi i bokɛ byinki nyini nɛ niYahodawa na ninaa ne lenɛ nɛ nibhɛ ɛ sɛɛs ɛn Niwɛng ɛTaanggbey ya.

¹⁸iPhɛ ɛlɛy, sɔng ne ɛ hal ɛn ɛgyɛy wu ɛ phyin ɛn ilaak kɛdee nggyɛ wo ne kɛ hyɛghɛ wo nang. Wu aa hal ɛn ɛgyɛy ya, te ne ɛ taate ɛn sɔng itin de iphɛ kɛ phyik ghe daa mon nang, yang so nyinɛn no ɛ kɛ phyik nyini ne itin de.

¹⁹Ɛ sɛ yɛɛ ɛn ne yɔngɔ, “Nzo kɛ hyɛghɛ ilaak ge te sɛ byinki me ne itin de.”

²⁰Ɛlɛy ne phɛ so! Kaa ne hyɛghɛ ilaak ge nɛ ne itin nɛwo daa ne yɔm ne sang nang ne itin nɛ. iGyɛ wo nang, ne lenɛ ne nang itin nɛ ɛ kɛ ne sɛ ɛ shɛɛ ndɔ ne itin de. iPhɛ ɛlɛy, sɔng ne ɛ hal ɛgyɛy ya nang, yang wum ɛnik.

²¹Wu ɛTaanggbey ya kɛ ne sang tek ilaak ge ne iphɛ ku so idee ne itin nɛ wo, igyɛ wo ne mang sɔng aa ne ma tek kɛ nang.

²²ɛBɛ wo ne njwɛɛn i yaang iyɛnɛng ɛTaanggbey de ne njenjek ɛbhɛ. Ɛ kɛ tɔɔrek njenjek ɛbhɛ de daa ninaa nɛ nibhɛ kɛ ho, ne ɛ tɔɔrek kɛ iyɛnɛng ɛbhɛ wu ɛ shɛɛ ndɔ ne iyɛnɛng ɛbhɛ de. Wu ɛ kɛ ne sang mɔn ɛlɛy yaa ne ma tɛmɛ yɛ ndɔ ne itin de.

²³Wu niYahodawa na kɛ ne kɔɔng tang tɔ re ɛyisɛ ne yɔm ne nang ne itin de, yaa ne kyi ta byinki nibhɛ ne itin ɛphaa de, daa ɛli ne ɛTaanggbey ya sɛ yɛɛ ne mɔn ɛlɛy.

²⁴Nyinɛn no ne hame ɛ so ɛn niYahodawa na, ɛ so ɛn te ilaak ɛphaa ɛhay de ne kɛ tɛmɛ wo i ji bhɛ byinki iphɛ ɛli ne i rop ɛlɛɛmu wo ɛwɛrɛ gha ne ɛphaa gha ne kɛ tup po. ɛKɔn kɛgha wo ne kɛ mɔn no sɔng i bo wu ibol ne itson nang. niYahodawa na nibhɛ ne ji so tɛ Niphaa na ne kɛ tubhus so, iphɛ ne so ɛTaanggbey yegha phyonka ɛ kyii ta byinki ilaak kɛdee wo ne kaa tɛmɛ ndɔ ne itin de ne iphɛ kaa ku so idee ne iphɛ de.

²⁵Nigwaa en, nzi sim te ɛ sɛɛ seng ɛn ɛdɛ ɛkɔn na ne ɛ so nyini gying, aa yung yaa tɔɔsek ɛn itso mon gbom. Nidɛng ninyi niYahodawa na bok ito ihet, iphɛ yaa shɛɛ ɛlɛ wo iphɛ hyep nten de ne sɛ shwaak ɛnu ninyi na ne hame nibhɛ so ɛn niYahodawa ɛli ne ɛTaanggbey ya kaa yɔngɔ wo.

²⁶ɛLɛy ne sɛ mɔn i phɔt niSɛrɛla na gbik. Te ɛli ne ɛWee ne iBol ɛTaanggbey yo i bo: “ɛHaa ne phɔt ta sɛ le ne iSihiyɔɔna. Ɛ sɛ ne tul iyɔm ne roos ɛTaanggbey yede ne iphɛ so ndɔ ninɔn ɛYakub na gbik.

²⁷iBol lɛdee wo ne nzɛ ne rop ìtsɛm nɛ nibhɛ, sɛ́ sɛnaa ba ɛfɔt nibhɛ wo.”

²⁸Daa ɛli nɛ niYahodawa na gbom kɛ mbaray ibol iyɛnɛng ngge, nibhɛ kɛ ne teye ninaa ne iphup ɛTaanggbey ya, iphɛ kɛ ne yang kyi phyik nyini ne hame ɛ so ɛn nyini niYahodawa na. Daa ɛli ne ɛTaanggbey ya kɛ ne ku kasa nibhɛ wo, nibhɛ kɛ teye nitaay ɛTaanggbey da lenɛ nɛ nikyɛɛ-nikyɛɛ nibhɛ ɛBaraying ne ɛYakub gbik ne ɛShaaku.

²⁹Sɔng ɛTaanggbey ya i sunu irway ɛbhɛ daa ɛnyi gha ne ɛ kɛ ku kasa ɛ yel-le ɛ sit ɛbhɛ ne ɛwɛng nga nang.

³⁰Ne ile de, nyinɛn no ne hame ɛ so ɛn niYahodawa na, sɔng ɛ kaa ma roos ɛn ibol ɛTaanggbey de nang, ɛlyilyɛghaa wo ɛTaanggbey ya kɛ ne san iyɔm mon, daa ɛli ne sɔng niYahodawa na kɛ roos ibol ɛbhɛ de nang.

³¹ɛLɛy nɛ niYahodawa na ne mang, nibhɛ kɛ teye ninaa ne sang roos ibol de te ne lenɛ ne isan iyɔm be ne ɛTaanggbey ya kɛ nang nyini wo, nibhɛ ma say isan iyɔm be ne mang.

³²ɛTaanggbey ya kɛ bo ninyi na gbik te ninaa ne nyang daa ɛli nɛ nibhɛ kɛ sang roos ibol ɛbhɛ de. Ɛ kɛ mɔn ɛlɛ wo te ɛ sɛ ɛ tɔɔrek san iyɔm ɛbhɛ daa nibhɛ gbik.

³³ɛTsak ntsɛntsɛng ɛTaanggbey de ne ishweng ɛbhɛ da sang ɛgak! iHyɛ ɛshara ɛbhɛ da ne phyin ihwet ne phɛl lɛ! Sɔng sɛɛ yɛɛ ne seng nikɔn na ne ɛ mɔn no nang.[19]

³⁴“ɛHay ɛbhɛ yɛɛ irway ɛTaanggbey daa? ɛHay ɛbhɛ sɛ yɛɛ ne te ɛbhɛ ɛ tɔɔrek ibol lee?[20]

³⁵ɛHay ɛbhɛ kɛ ku nang ɛTaanggbey gha ɛdɛ ɛkɔn, ne iphɛ so nggbinggbing ɛTaanggbey ya tal ɛnyi yɛɛ?”[21]

³⁶Daa ɛli ne ɛTaanggbey ya ɛbhɛ kɛ ryɔng nikɔn na gbik, Nikɔn na gbik ne sonɛ lenɛ ne ɛTaanggbey ya, nibhɛ ne ta sonɛ daa ne phok iyɛnɛng ɛbhɛ. Te ne nang ɛTaanggbey yegha ne ndiinday ishay-ishay! Ɛɛy.[22]