Read eten iRooma 12 Bible Online

iRooma 12 - eten bible

iRooma 12

¹iPhɛ ɛlɛy nigwaa en, daa ɛli ne ɛTaanggbey ya kɛ san iyɔm mon de gbom mo, nzi ne roro ne nyinɛn gbom: nang ɛn ɛTaanggbey yegha ibek mon gbik, te ɛkɔn ne kɛ hap ɛbhɛ ne itsanga, ɛ so ɛken, kɛ tul kang, ɛ kɛ jam ɛbhɛ. ɛNggyɛ wo ɛbhɛ so re ntsong ne itin da ne aa nang ɛbhɛ wo.

²Sɔng ɛ tek ɛn icwas mon da te ɛli icwas ninaa ɛzay yɛnaa wo so wo nang, yang tek ɛn te ɛTaanggbey yegha sunu icwas mon da gbik, ɛ te icwas mon da teye ifas sɛ, aa ne ji yɛɛ ne seng ɛn ɛkɔn na ne ɛTaanggbey ya i sim mo, ne ɛkɔn na so ɛyɛnɛng ngɛ wo ne ɛhaa ne ɛ so hyɔrɔ wo.

³Daa ne izɛɛng ɛTaanggbey de ne ɛ kɛ nang me wo, nzi ne bok nyini wu hang ɛdɛ mon bo ito ɛbhɛ de ɛ phyin ɛli ne ɛ sɛɛ bo wo nang. Te ɛrɔngɔ yang laasek ito ɛbhɛ, te ɛ tek ito ɛbhɛ de cɛcɛɛy ne ìnang ne itin de ne ɛTaanggbey ya kɛ nang ɛbhɛ.

⁴Njwɛɛn bok nilɔ na gbom ndɔ ne ibek idaan, ɛhiha ɛlɔ ne bok ɛtomɛ ɛbhɛ kang.

⁵Ɛlɛy ndɔ ɛKiriti gha, njwɛɛn no ne njwɛɛn so gbom mo ne so ibek idaan, kɛ ne byingis njwɛɛn tɛ nilɔ kang-ka-kang ndɔ ne ibek idaan de.

⁶iPhɛ ɛlɛy, te njwɛɛn ne mɔn ɛtomɛ nɛ nikɔn ne izɛɛng kang-ka-kang nga ne ɛTaanggbey ya kɛ nang njwɛɛn lenɛ ne izɛɛng ɛbhɛ de. Wu izɛɛng ɛnyi de so izee ne tɔng ibol ɛTaanggbey, te ne ɛ tɔng ibol ɛTaanggbey de cɛcɛɛy ne ìnang ne itin ɛbhɛ.

⁷Wu izɛɛng ngɛ ne so izee ne mɔn ɛtomɛ ne phyik, te ne ɛ mɔn ɛtomɛ ne phyik ga byirik, wu ihywɛ ne so izee ne mɛmɛ nɛ, te ne ɛ mɛmɛ nɛ byirik.

⁸Wu izɛɛng ngɛ so izee ne tes ninyi itsɔngɔl gɛgɛy te ne ɛ tes itsɔngɔl de gɛgɛy yo, wu izɛɛng ngɛ ne so izee ne nang ɛkɔn, te ne ɛ nang ne irway walala, wu izɛɛng ngɛ ne so izee ne igbɔm, te ne ɛ boos ninyi na byirik, wu izɛɛng ngɛ ne so izee ne san iyɔm, te ne ɛ san iyɔm be ndɔ ne izinɛ ne ishwɛ.[23]

⁹Te ishwim mon da teye ivaa ne itin nɛ. Mbaray ɛn nyini ɛkɔn na ne ɛ so ɛbebhe te ɛ wum ɛn ɛkɔn na ne ɛ kɛ jam gɛgɛy.

¹⁰Te ɛrɔngɔ sim ɛrɔngɔ ne ihywee ne ishwim ba ne ifɛ so ivaa ninaa ne roos. Te ɛrɔngɔ nang ɛrɔngɔ ne ndiinday ɛ phyin ito ɛbhɛ.

¹¹Sɔng ɛ yɛk ɛn itek ne mɔn ɛTaanggbey yegha ɛtomɛ gha nang, yang nang ɛn irway mon ɛ mɔn ɛn ɛTaanggbey yegha ɛtomɛ.

¹²Yɛk ɛn irway ihwala ndɔ ne iyɛk ne irway mon da, bo ɛn ɛbɔk ndɔ ne nggbang ngga, te ne ɛ bol ɛn ne ɛTaanggbey ya cɛcɛɛy.

¹³Hosop ɛn nikɔn mon na nɛ ninyi ɛTaanggbey ya nɛ nibhɛ so nitaasek. Say ɛn ninaa ne kpoo na ne izinɛ ne ishwɛ.

¹⁴Sit ɛn ninyi na nibhɛ baasek nyini nggbang ngga ne ɛwɛng, ɛɛy sit ɛn nibhɛ ne ɛwɛng, sɔng ɛ yaak ɛn ɛTaanggbey yegha te ɛ te nibhɛ teye ninaa ɛkawɛy ya nang.[24]

¹⁵Yɛk ɛn irway ihwala ɛte nɛ ninyi na nibhɛ bok irway ihwala da, yɛk ɛn irway ishwii ɛte nɛ ninyi na nibhɛ bok irway ishwii da.

¹⁶Shɛɛ ɛn ncaang ndɔ mon no. Sɔng ɛ tɔɔsek ɛn ito nang yang sim ɛn ɛ shɛɛ ɛn nɛ ninyi na nɛ nibhɛ soye nitaasek. Sɔng ɛ wɛɛ ɛn te ɛ phyin ɛn ɛbyin ninyi na ne ntsɛntsɛng ge nang.

¹⁷Wu ɛnyi gha kɛ mɔn nɛ ibebhe, sɔng ɛ tal ɛbhɛ nɛ ne ibebhe ɛbhɛ de nang. Wɛɛ nyini hywɛɛ te ɛ mɔn ɛn ɛkɔn na nɛ ninyi na gbik i yaang ɛ kɛ jam.

¹⁸Mɔn ɛn ɛkɔn na ne aa yɛɛ ne mɔn ɛn te ɛ shɛɛ ɛn ncaang nɛ ninyi na gbik.

¹⁹Nigwaa en, sɔng ɛ tal ɛn irwyen da nang, yang tek ɛn ɛTaanggbey ye nɛ ɛbhɛ tal nyini nɛ te ɛli ne kɛ ku haa i bo; “ɛDaray ya i bo, ‘Mee nzo ɛhaa ne tal irywen da, ɛDaray ya bo, me na tal lɛ nɛ.’ ”

²⁰Yang mɔn ɛli ne ɛWee ne iBol ɛTaanggbey yo i bo, “Wu ɛhaa ne iphup mo gha so ikpyak, nang ɛbhɛ ire. Wu irway ɛbhɛ i has, nang ɛbhɛ inɛn ne sɔ. Wu ɛ kɛ mɔn ɛbhɛ ɛlɛ wo, iphɛ so te ɛ hanas ɛbhɛ ne itseeng ne igboo daa ne ito ɛbhɛ.”

²¹Sɔng ɛ sim ɛn ibebhe de phyin ihwet mon da nang, te iyɛnɛng mon de yang phyin ibebhe de ne ihwet.