Read eten iRooma 16 Bible Online

iRooma 16 - eten bible

iRooma 16

¹Nzi bo naa yaak nyini wu ɛgwaa njwɛɛn ɛkuk kɛ ɛFibi gha so ɛkuk ɛyɛnɛng. Ɛ so ɛhaa ne mɔn ɛtomɛ ndɔ ninaa ne iroos ne iKɛnkiriya.

²Say ɛn ɛbhɛ ndɔ ne irywɛɛk ɛDaray yo ɛli ne iphɛ kɛ jam mɛ i say ninyi ɛTaanggbey ya, te ne ɛ phyik ɛn ɛbhɛ ne ɛkɔn na ne ɛ sim ɛlɔ mon na gbik, daa ɛli ne ɛbhɛ wo ne ito ɛbhɛ ɛ kɛ ma phyighis ninyi na gbom gbik ne mee.

³Kyili ɛn mɛɛn ɛPirisila ye ne ɛKyila, nɛ nibhɛ soye nitaay ɛtomɛ nge ndɔ ɛYɛso ɛKiriti.

⁴Nibhɛ kɛ phɔt ɛwɛt nge. N bok irway ihwala nɛ nibhɛ, sɔng nɛ so mee zɔng n bok irway ihwala da nang ninaa ne iroos sa ne hame nibhɛ so niYahodawa na ma bok.

⁵Kyili ɛn mɛɛn ninaa ne iroos sa nɛ nibhɛ tumɛ ɛn ne ijwee nibhɛ wo. Kyili ɛn mɛɛn ɛnyi nge ɛPɛnetus se ne ɛbhɛ ɛ kaa tsa ɛ nang ne itin nɛ ne ɛKiriti gha ne ivel ne iSiya da.

⁶Kyili ɛn mɛɛn ɛMɛri ye ne ɛ kɛ mɔn ɛtomɛ gbom ɛlɔ mon.

⁷Kyili ɛn mɛɛn ɛNdoronikus se ne ɛYuniyas, nɛ nibhɛ so niYahodawa tɛ mee, ne kaa rop njwi ne nyang nɛ nibhɛ. Nibhɛ so ninyi ne yɛɛ nibhɛ gbom ndɔ ninɔn ne tom ma, nibhɛ kaa ne teye ninaa ne roos ɛKiriti yegha ɛyisɛ nge.

⁸Kyili ɛn mɛɛn ɛnyi nge ɛMpiliyatus se ne njwi kɛ mɔn ɛtomɛ ɛDaray ya ne ɛbhɛ.

⁹Kyili ɛn mɛ ɛn, ɛWulubanos se ne ɛ so ɛtaay mos ndɔ ɛtomɛ ɛKiriti gha. Ta kyili mɛɛn ɛnyi nge ɛSitakyi ye.

¹⁰Kyili ɛn mɛɛn ɛPɛlɛs se ne kɛ ku seng ihywel icik ɛbhɛ da gbik ndɔ ne ibol ne roos ɛKiriti yede. Kyili ɛn mɛɛn ninaa ne ijwee ɛRitobulus se.

¹¹Kyili ɛn mɛɛn ɛHyirɔdiyɔn ne ɛ so ɛgwaa nge ndɔ niYahodawa. Kyili ɛn mɛɛn ninaa ne ijwee ɛNasisu nɛ roos ɛDaray ye.

¹²Kyili ɛn mɛɛn, ɛTirifɛna ye gbik ne ɛTirifɔsa, nikuk kɛnaa nggyɛ wo kɛ mɔn ɛtomɛ ɛDaray ya gbom. Nɛ ta kyili ɛn mɛɛn ɛPɛrisis se ɛdɛ ɛkuk ka ne nggɛ sim ɛbhɛ, ɛ kɛ mɔn ɛtomɛ ɛDaray ya gbom.

¹³Kyili ɛn mɛɛn ɛRufus se ne ɛTaanggbey kɛ kasa ɛbhɛ. Nɛ ɛ kyili ɛn mɛɛn ɛgyinɛ ɛbhɛ ne ɛ kaa ma ku bo me te ɛngɔn ɛbhɛ.

¹⁴Kyili ɛn mɛɛn ɛSinkiritus se, ne ɛFilagɔn, ne ɛHɛrimes, ne ɛPatorobas, ne ɛHɛrimas gbik nɛ nigwaa na ndɔ ɛDaray ya.

¹⁵Kyili ɛn mɛɛn, ɛFilologos se, ne ɛYuliya, ne ɛNɛrɛyus ne ɛgwaa ɛbhɛ ɛkuk kɛ, ne ɛWɔlimpas gbik nɛ ninyi ɛTaanggbey ya nɛ nibhɛ sonɛ nibhɛ wo.

¹⁶Te ɛrɔngɔ ne wum ɛgwaa ɛbhɛ hap ɛ kyili ɛgwaa ɛbhɛ ikyili ninaa ne roos. iDira ninaa ne roos ɛKiriti de gbik i kyiisi nyini.

¹⁷Nigwaa ɛn, nzi bok nyini te ɛ wɛɛ ɛn nyini yɛnɛng ɛlɔ ninyi na nɛ nibhɛ te nyini ɛ hosop ɛn nyini wo, nibhɛ yɛɛset ne imɛmɛ ifas ne ifɛ soye nikɔn kyibhɛ nɛ nibhɛ labhe nɛ nikɔn na ne kɛ ku mɛmɛ nyini nɛ wo. Shɛɛ ɛn kyakyak nɛ nibhɛ!

¹⁸Daa ɛli ne sɔng ihywee ninyi yɛdee nggyɛ wo i mɔn ɛDaray ɛKiriti ye ɛtomɛ nang, iphul nibhɛ zɔng nɛ nibhɛ tɔk iphɛ nɛ. I lenɛ ne ɛnu ɛbel nibhɛ gbik ne iluk, nibhɛ ne luk ninyi na ne icwas nibhɛ sang so kyukyum.

¹⁹Gbik ninyi kɛ ku phok ɛli ne ɛ roos ɛn ibol iyɛnɛng ngge, iphɛ ɛlɛy ne n bok irway ihwala daa ne ibol mon de. Gbik ne iphɛ ɛlɛy, nzi ne sim te ɛ sɛɛ te ɛn ntsɛntsɛng daa ɛkɔn na ne ɛ so ɛyɛnɛng ngɛ, tɛ nyini ninaa nɛ nibhɛ sang sim nibhɛ sɛɛ yaang ibebhe.

²⁰ɛTaanggbey ne nang irway ne laal da yaa yungaa phɔsɔm ɛShɛtan negha ɛ tek ɛbhɛ ndɔ ɛta mon. Te izɛɛng ɛDaray njwɛɛn ɛYɛso ɛKiriti shɛɛ ne nyinɛn.

²¹ɛTimɔti gha ne ɛ so ɛtaay ɛtomɛ nge gha i kyisi nyini, ɛlɛy ne ɛLushiyɔs ne ɛYason ne ɛSɔsipata nɛ nibhɛ ma so niYahodawa.[31]

²²Mee ɛTɛrishɔs, ne nggɛ haa ɛkɔn na ne ɛBulus sa kɛ bol ndɔ ne ɛwee yɛwoo wo nzi kyiisi nyini ndɔ ne irywɛɛk ɛDaray.

²³ɛGayus ne ɛ kɛ say me ne ijwee ɛbhɛ wo, ɛ ta saasel ninaa ne roos ne ijwee ɛbhɛ wo i kyiisi nyini. ɛRasatus ne ɛ so ɛhaa ne wɛɛ ijam ne ivel ɛgarang ne iRooma i kyiisi nyini. ɛGwaa njwɛɛn ɛKwaratus sa ne ma kyiisi nyini.

²⁴Te izɛɛng ɛDaray njwɛɛn ɛYɛso ɛKiriti shɛɛ ne nyinɛn gbik. Ɛɛy.[32]

²⁵Te ne nang ɛTaanggbey yegha ne ndiinday cɛcɛɛy. Aa yɛɛ ne te nyini ɛ kyinak ɛn gɛgɛy ndɔ ne ìnang ne itin mon de lenɛ ne iBol iYɛnɛng ɛYɛso ɛKiriti de ne nzi sanga wo. iShay de kɛ ne hɔn maa ne kaa rɛɛ iBol iYɛnɛng ngɛdee wo,

²⁶ɛlyilyɛghaa wo nang, kɛ ne ji phaal iphɛ, iphɛ kɛ te wɛsɛrɛk lenɛ ne ibol de nɛ ninabawa na kaa ku i haa. Kɛ ne lenɛ ne ibol ɛTaanggbey ne inat de ne ɛ kɛ yɛk ngɛ ne phaal igbagha wo nɛ gbik tɛ nibhɛ nang ne itin nɛ nibhɛ ta roos.

²⁷Te nang ɛTaanggbey ye ne ndiinday lenɛ ne ɛYɛso ɛKiriti gha, ɛbhɛ zɔng ɛbhɛ bok ntsɛntsɛng! Ɛɛy.