Read eten iRooma 3 Bible Online

iRooma 3 - eten bible

iRooma 3

¹iKyee ne ɛnyi ne niYahodawa gha phyin ɛnyi gha ne ɛ sang so ɛnyi niYahodawa gha nɛɛ? Hang iyɛnɛng ne hyɛ itee de so ikyee?

²ɛTsak, nikɔn na sonɛ gbom ne ɛnyi niYahodawa gha phyin nɛ wo! niYahodawa na ne ɛTaanggbey ya kɛ tsa ɛ tek nibhɛ ne ibol ɛbhɛ de ndɔ ne iwɔ nibhɛ.

³Wu nidɛng ndɔ nibhɛ wo ne sang ìnang ne itin, iyɔm ne ìnang ne itin nibhɛ de kɛ ne tɔɔrek wu ɛTaanggbey ya ma sang ìnang ne itin bɛ?

⁴Kwa! Sɔng ɛlɛy nang! Sɛɛ kyi yɔng wu ninyi na gbik so ninaa ne irywɛɛk, ɛTaanggbey ya ku so ɛhaa ne itin, te ɛli ne ibol ɛTaanggbey de i bo; “Te seng ncɛncɛng wu ibol mo de so itin nɛ, ɛ sɛ ne ta phoo ninyi na nɛ gbik nɛ nibhɛ sim tɛ nibhɛ sɛ bol lɛ ɛshara gha.”

⁵Wu iyɔm ne icik njwɛɛn de kɛ ne kyii ɛnkiinɛ wo ne yaa seng ɛli ne ɛTaanggbey ya so icik ko, njwɛɛn yaa ne ji yɔng ɛli daa mɛɛ? Njwɛɛn yaa yɔng wu ɛTaanggbey ya sang so icik ne ɛ so njenjek ne njwɛɛn noo? ɛLi ne nzi bol ɛlɛ wo, nzi maa bol icwas ɛten ɛsii.

⁶Kwa! Sɔng ɛlɛy nang! Sɛɛ yɔng ɛlɛy ne iphɛ so wo, ɛTaanggbey ya sɛ ne hyɛ ɛzay ya ɛshara gha ɛlii?

⁷ɛDɛ ɛnyi gha sɛ yɛɛ ne yɔngɔ, “Wu iyɔm ne itin ne ibol nge de yang kyii tɔɔsel itin ne ibol ɛTaanggbey de wɛsɛrɛk ko, iphɛ ta teye ɛkɔn na ne aa te i hante ne nang ɛTaanggbey yegha ne ndiinday de, ikyee iphɛ kɛ ne te i so njenjek ne me wo wu n bok ɛfɔt too?

⁸Wu ɛlɛy yo, ikyee iphɛ yaa ne ring njwɛɛn ne re ɛnu ɛyisɛ ne mɔn ibebhe de te iphɛ teye ɛnkiinɛ ne sɛ iyɛnɛng ngge? Nidɛng ninaa ne bees ivol da daa ne ito mos de i bo, wu ɛlɛy ne njwii bol. Sɛ ne hyɛ nibhɛ ɛshara ne ɛ so cɛcɛɛy ne ɛkɔn na nɛ nibhɛ mɔn no.”

⁹Njwɛɛn ya ne ji taal i yɔng ɛli daa mɛɛ? Njwɛɛn niYahodawa na ne ji phyin ninaa ne hame nibhɛ soye niYahodawa naa? Kwa! Sɔng ɛlɛy yang! Njwi kɛ ku tɔɔl nyini njwi bo niYahodawa na nɛ ninyi na ne hame nibhɛ soye niYahodawa na gbik so ndɔ ɛta ne ɛfɔt.

¹⁰Te ɛli ne kɛ ku haa ndɔ ne ɛWee ɛWɛwɛy yo i bo, “Wɛlɛng ɛnyi ne ɛ so icik, wɛlɛng ɛnyi ɛdaan.

¹¹Wɛlɛng ɛnyi ne ɛ so ntsɛntsɛng. wɛlɛng ɛnyi ne ɛɛ tɔk te ɛ sɛɛ seng ɛTaanggbey ye.

¹²Nibhɛ wo gbik nibhɛ kɛ nang ɛTaanggbey yegha ɛtsim. Sɔng nibhɛ tɔ ɛnu ɛkɔn nang. Wɛlɛng ɛdɛng ne ɛ mɔn ɛkɔn ɛyɛnɛng, wɛlɛng ɛdɛng ɛdaan.

¹³iVol nibhɛ da so ivaa ne phobho ninyi, ilwem nibhɛ da kɛ teye nikɔn ne luk ninyi. iVol nibhɛ da ne so te ncwincway ne ᐩizɔ igywebhe.

¹⁴Ninu nibhɛ na so hyɔrɔ ne ivol raghatak, ne itowos.

¹⁵Nibhɛ so hywarat ne phok ɛnyi ikpom, hywarat ne lok neyi.

¹⁶Gbik ɛlɔ gha nibhɛ kɛ roos, nibhɛ yaa bees ɛnyi, nibhɛ tek irway ishwii.

¹⁷Sɔng nibhɛ yɛɛ ɛnkiinɛ ne shɛɛ ncaang nang.

¹⁸Wɛlɛng ɛnik ɛTaanggbey ndɔ ne irway nibhɛ.”

¹⁹ɛLyilyɛghaa wo, njwi yɛɛ gbik ɛkɔn na ne ɛShara gha i bol lo, ɛ bol daa ninyi na nɛ nibhɛ so ndɔ ɛta ɛShara gha. Kɛ mɔn ɛlɛ wo te ne te ninaa ne tɔk ivol la yaa kɔsɔɔy, te ne ta yɛk ɛzay ya gbik ndɔ ɛta ɛshara ɛTaanggbey.

²⁰Daa ɛli ne sɔng ɛTaanggbey ya sɛ bhɛ say ɛnyi wu ɛ so cik daa ɛli ne ɛ kɛ roos ɛShara gha nang. Kwa! ɛShara gha yang te ɛnyi gha ɛ seng ɛfɔt ɛbhɛ.

²¹ɛLyilyɛghaa wo, ɛTaanggbey ya kɛ ne ji phaal njwɛɛn ɛdɛ nkiinɛ wo ne ɛ sɛ say njwɛɛn nɛ wu njwɛɛn so cik ko. Sɔng i ne sɛ icik kɛdee wo lenɛ ne kɛ roos iMɛmɛ ɛMuusaa nang, gbik ne iphɛ ɛlɛy, ɛMuusaa gha nɛ ninabawa na kaa ne ma ku tɔɔrek wu ɛnkiinɛ yɛwoo wo yaaso.

²²iCik kɛdee wo ne iphɛ le ɛlɔ ɛTaanggbey ya, i sɛ iphɛ lenɛ ne kɛ nang ne itin nɛ ne ɛYɛso ɛKiriti. ɛTaanggbey ya i nang gbik ninaa nɛ nibhɛ kɛ nang ne itin nɛ icik kɛdee wo, sɔng ɛ kasa nang,

²³daa ɛli nɛ ninyi na gbik kɛ mɔn ɛfɔt nibhɛ kɛ ne taasek ndiinday ɛTaanggbey de.

²⁴Kɛ ne lenɛ ne izɛɛng ɛTaanggbey de ne ɛ kɛ nang ngo, kɛ ne say ɛrɔngɔ wu so cik ɛnu ɛyisɛ ɛTaanggbey ya, lenɛ ne isay da ne kɛ say ɛbhɛ ndɔ ɛYɛso ɛKiriti gha.

²⁵ɛTaanggbey ya kɛ tom ɛYɛso yegha te igyol ne hap itsanga, te ne ji lenɛ nɛ neyi ɛbhɛ te han ninyi na ne ɛfɔt nibhɛ wo lenɛ nɛ nibhɛ kɛ nang ne itin nɛ ne ɛbhɛ. ɛTaanggbey ya kɛ mɔn ɛlɛ wo te ɛ tɔɔrek wu ɛ so cik, daa ɛli ne ile de ɛTaanggbey ya kaa bok ɛbɔk daa ne ɛfɔt ninyi wo, sɔng ɛ kaa wɛɛ ibol lɛ nang.

²⁶ɛTaanggbey ya kɛ mɔn ɛlɛ wo te ɛ tɔɔrek wu ɛbhɛ wo ne ito ɛbhɛ ɛ so cik nten nɛdee wo, te ne ɛ ta te gbik ɛnyi gha ne ɛ kɛ nang ne itin nɛ ne ɛYɛso gha ɛ teye ɛnyi ne yaa say ɛbhɛ wu ɛ so cik ɛnu ɛyisɛ ɛTaanggbey ya.

²⁷Njwɛɛn ya ne ji hale ne ɛgyɛy ya daa ne ikyee? Wɛlɛng ɛkɔn! Daa ɛyakɔn ne? Daa ɛli ne njwɛɛn kɛ roos ɛShara ghaa? Kwa! Daa ɛli ne njwɛɛn kɛ yang nang ne itin nɛ.

²⁸Njwit to njwi bo wu ɛTaanggbey ya sɛ bhɛ say ɛnyi gha wu ɛ so cik ko lenɛ ne ɛ kɛ nang ne itin nɛ, sɔng lenɛ ne ɛ kɛ roos ikpii ɛshara nang.

²⁹ɛTaanggbey ya so ɛTaanggbey niYahodawa zɔng naa? Hang ɛ ma sang so ɛTaanggbey ninaa ne hame nibhɛ so niYahodawa na naa? Ɛɛy! Ɛ ma so ɛTaanggbey ninyi na ne hame nibhɛ so niYahodawa na.

³⁰ɛTaanggbey ya so ɛdaan, ɛbhɛ aa ne say ninaa ne hyɛghɛ icwee da wu nibhɛ so cik lenɛ ne itin ne ibol gbik nɛ ninaa ne sang hyɛghɛ icwee da daa ne nang ne itin nɛ.[4]

³¹ìNang ne itin de yaa te njwɛɛn ji hana ɛshara ghaa? Kwa! Njwɛɛn i yang shwaasek ɛshara gha.