Read eten iRooma 4 Bible Online

iRooma 4 - eten bible

iRooma 4

¹Njwɛɛn na ne yɔng ɛli daa ɛkɔn na ne ɛkyɛɛ-nikyɛɛ njwɛɛn ɛBaraying ndɔ ne ibek ge kɛ seng daa ne ibol lɛ de woo?

²Wu ɛTaanggbey ya kɛ ne say ɛBaraying nge gha wu ɛ so cik ko lenɛ ne ɛtomɛ ɛbhɛ ne ɛ kɛ mɔn, ɛBaraying nga ne bok ɛkɔn ne ɛ sɛ yɛɛ ne hale ne ɛgyɛy, sɔng ne so ɛnu ɛyisɛ ɛTaanggbey nang.

³ɛWee ɛTaanggbey yo bo, “ɛBaraying nga kaa nang ne itin nɛ ne ɛTaanggbey ya, daa ne ìnang ne itin ne ibol ɛbhɛ de, ɛTaanggbey ya ne bo ɛbhɛ wu ɛ so cik.”

⁴iJam be ne kɛ tal ɛnyi gha ne ɛ kɛ mɔn ɛtomɛ gha, sɔng kɛ nang ɛbhɛ buu nang, ilong ɛbhɛ.

⁵ɛNyi gha ne ɛ kɛ ne sang hal ɛgyɛy ne ɛtomɛ ɛbhɛ gha, ɛ yang nang ne itin nɛ ne ɛTaanggbey ya ne ɛbhɛ ɛ say nibebhe ninyi na wu nibhɛ so cik ko, sɛ ne bo ìnang ne itin ɛnyi yɛdee nggyɛ wo i say ɛbhɛ wu ɛ so cik.

⁶iCwas sɛdaa wo ne ɛDoda gha kaa bok nten de ne ɛ kaa bol daa ɛwɛng nga ne sɛ nang ɛnyi gha ne ɛTaanggbey ya kɛ say ɛbhɛ wu ɛ so cik ko, sɔng ibol ɛtomɛ nang, ne ɛ kaa yɔngɔ,

⁷“ɛHaa ɛwɛng ngaa nggyɛy ne ɛTaanggbey ya kɛ hana ɛbhɛ ne ɛfɔt ɛbhɛ wo, ne kɛ cwaal ibebhe ɛbhɛ de.

⁸ɛHaa ɛwɛng ngaa nggyɛy ne ɛTaanggbey ya kɛ sang haa ɛbhɛ ɛfɔt ɛbhɛ wo.”

⁹ɛWɛng ngɛghaa wo so ɛhaa ninaa ne kɛ hyɛghɛ nibhɛ icwee zɔng nge? Hang gbik nɛ ninaa ne kɛ sang hyɛghɛ nibhɛ icwee? ɛKɔn na ne njwɛɛn i bol lo, njwɛɛn i bo: “ɛTaanggbey ya kɛ ne bo ɛBaraying nge gha wu ɛ so cik ko daa ɛli ne ɛBaraying nga kɛ nang ne itin nɛ ne ɛbhɛ.”

¹⁰iYa nten ne kaa ne bo ɛBaraying nge gha nɛ wu ɛ so cik koo? Kɛ tang hyɛ ɛbhɛ itee dee? Hang ɛtsim mɛ ne kɛ hyɛ ɛbhɛ nɛ? Sɔng ɛtsim mɛ nang.

¹¹Ɛ kɛ ne say nyu ne hyɛ itee de, nyu yɛdee wo kɛ ne tɔɔrek icik ge ne ɛ bok lenɛ ne ìnang ne itin nɛ ɛbhɛ nten de ne kɛ tang hyɛ ɛbhɛ itee de. iPhɛ ɛlɛy ne ɛ kɛ ne teye ɛkyɛɛ ninaa nibhɛ kɛ nang ne itin nɛ wo gbik te ne ma bo nibhɛ wu nibhɛ so cik, sɔng iphɛ so ngbingbing nibhɛ hyɛghɛ icwee nang.

¹²iPhɛ ɛlɛy, ɛBaraying nga ne ɛ so ɛkyɛɛ ninaa ne kɛ hyɛghɛ nibhɛ icwee da, sɔng ne so ninaa ne kɛ hyɛghɛ nibhɛ ihuhu ne icwee zɔng nang, ninaa nɛ nibhɛ hyel ndɔ ne ɛnkiinɛ ne ìnang ne itin de ɛli ne ɛ kaa hyel lɛ wo nten de ne kɛ tang hyɛ ɛbhɛ itee de.

¹³ɛTaanggbey ya kɛ rop ìtsɛm ne ɛBaraying nga gbik ne icwaang ɛbhɛ wu sɛ nang ɛbhɛ ɛzay, sɔng daa ɛli ne ɛ kɛ roos ibol ɛshara nang, iphɛ kaa yang le daa ne ìnang ne itin nɛ ne ɛbhɛ ɛTaanggbey ya kɛ bo ɛbhɛ wu ɛ so cik.

¹⁴Wu ninaa nɛ nibhɛ roos ɛshara gha ne sɛ nang nibhɛ ɛzay ya ɛli ne ìtsɛm be bo wo, ìnang ne itin de ne so buu, ìtsɛm be ne ma ta so buu.

¹⁵iMɛmɛ ɛMuusaa da i yɛɛs ne njenjek ɛTaanggbey, ɛlɔ gha ne ɛshara gha ne sang ngɛ wo nang, sɔng ya ne ben ɛshara gha nɛ nang.

¹⁶iPhɛ ɛlɛy, ìtsɛm mɛdee wo kɛ kyinak daa ìnang ne itin nɛ, te iphɛ ne kyinak daa ne izɛɛng ɛTaanggbey, te ne ta sang to irway wu icwaang ɛBaraying ngo gbik sɛ say ìtsɛm be. Sɔng iphɛ so daa ninaa ne roos iMɛmɛ ɛMuusaa zɔng nang, iphɛ ma so daa ninaa nibhɛ kɛ nang ne ihywee ne itin ɛBaraying ngge, ne ɛ so ɛkyɛɛ njwɛɛn na gbik ko.

¹⁷Kɛ haa i bo, “Nggɛ yɛk kɛ nɛ ɛ teyɛ ɛkyɛɛ ne igbagha ɛzay yo gbom.” ɛBaraying nga so ɛkyɛɛ njwɛɛn ɛnu ɛyisɛ ɛTaanggbey ya. ɛTaanggbey ya ne ɛBaraying nga kɛ nang ne itin nɛ ne ɛbhɛ wo, ɛTaanggbey ya ne ɛ nang ninyi na nibhɛ kɛ kus so iken de, ɛ ta yɛk ne ɛkɔn na ne ɛ kɛ sang ku sonɛ wo ɛ te wo.[5]

¹⁸ɛBaraying nga kaa nang ne itin nɛ ne ɛ yɛk ne irway ɛbhɛ daa ɛkɔn na ne hame ɛ yaang, gbik ɛli ne sɔng ɛkɔn kaa ne ma yung sonɛ ne aa yɛk ne irway ne ɛdak kɛ nang. Ɛ kaa ne nang ne itin nɛ wo ɛ phyii bhɛ teye ɛkyɛɛ ne igbagha ɛzay yo gbom. iBol lɛdee wo ne so daa ne ìtsɛm be ne ɛTaanggbey ya kɛ rop ne ɛbhɛ, ɛ bo, “iCwaang mo wo sɛ te gbarang tɛ niyuyɔrɔ.”

¹⁹Nten nɛdee nggyɛ wo, ɛBaraying nga kaa bok ishay de ikɔl idaan, sɔng ìnang ne itin ɛbhɛ de ne te kyɔkyɔt gbik ɛli ne ɛ kɛ yaang ibek ɛbhɛ de kɛ te te iphɛ kɛ ku wo, ɛSaratu gha kɛ ne ma ku ta phee nten ne iyɛk ge.[6]

²⁰Sɔng ɛBaraying nga kaa ne to irway daa ne ìtsɛm be ne ɛTaanggbey ya kɛ rop ne ɛbhɛ wo nang. ìNang ne itin ɛbhɛ de ne kyi yang hante ne ihwet, ɛ naas ɛTaanggbey yegha ne ndiinday.

²¹Ɛ yɛɛ ncɛncɛng ɛTaanggbey ya bok ito ne shwaak ìtsɛm be ne ɛ kɛ rop po ne ɛbhɛ wo.

²²iPhɛ phɛ kɛ te, “ɛTaanggbey ya kaa bo ɛbhɛ wu ɛ so cik ko.”

²³iBol de ne i bo, “Kɛ bo ɛbhɛ wu ɛ so cik,” sɔng kaa haa daa ne ito ɛbhɛ zɔng nang.

²⁴Kɛ ma haa daa njwɛɛn, sɛ bo njwɛɛn wu njwɛɛn so ninyi nicik, njwɛɛn no ne njwɛɛn kɛ nang ne itin nɛ ne ɛTaanggbey ya ne ɛ kɛ yiisik ɛDaray njwɛɛn ɛYɛso yegha ndɔ ne ikpuu da.

²⁵ɛTaanggbey ya kaa nang ɛYɛso yegha te ɛ ku ɛlɔ ne ɛfɔt njwɛɛn, kɛ ne yiisik ɛbhɛ tsik ndɔ ne ikpuu da te ɛ te i say njwɛɛn wu so cik ɛnu ɛyisɛ ɛTaanggbey ya.[7]