Read eten iRooma 6 Bible Online

iRooma 6 - eten bible

iRooma 6

¹Njwɛɛn yaa ne yɔng ɛli daa mɛɛ? Njwɛɛn yaa ne ku see ito ne mɔn ɛfɔt to te izɛɛng ɛTaanggbey de hantey yɛɛ?

²Kwa! Kɛ hosop njwɛɛn ne ɛfɔt to te ɛli ne kɛ hosop ikom ne iken, yaa ne ta mɔn ɛli njwɛɛn tɔɔ shɛɛ niken na nɛ ndɔ yɛwoo?

³Ɛ doo ɛn ɛli ne gbik njwɛɛn no ne kaa yɛk njwɛɛn ne ibatisima de ndɔ ɛYɛso ɛKiriti gha, kaa ma ku yɛk njwɛɛn ne ibatisima ne iku ɛbhɛ de naa?

⁴Kaa ne Lenɛ ne ibatisima njwɛɛn de, ne rɛɛ njwɛɛn ne ɛYɛso gha ndɔ ne iku ɛbhɛ de te lenɛ ɛli ne kaa yiisik ɛKiriti yegha tsik ndɔ ne ikpuu da ndɔ ne ito-ndiinday ɛTaanggbey de, te njwɛɛn ma yaa shɛɛ ishwɛɛ ne iken iphas.

⁵Wu kɛ byinki njwɛɛn ne ɛbhɛ ndɔ ne iku ɛbhɛ de, iphɛ ne so nggbinggbing sɛ ma byinki njwɛɛn ne ɛbhɛ ndɔ ne yilitsik ne ikpuu ɛbhɛ da.

⁶Njwɛɛn i yɛɛ kɛ gangat irway ne ile njwɛɛn da ne ɛYɛso gha daa ne ihon no te phoo ihwet ne ɛfɔt da ne ɛbhɛ so ndɔ ne ibek njwɛɛn de. Kɛ mɔn ɛlɛ wo te njwɛɛn sang tɔye nikpuru ne ɛfɔt ta.

⁷I sɛ ɛnyi gha kɛ ku wo ɛ kɛ ne sɔrɔt ndɔ ne iwɔ ne ɛfɔt to.

⁸Te ɛli ne njwɛɛn kɛ ne ku nɛ ɛKiriti gha, njwɛɛn kɛ ne nang ne itin nɛ njwɛɛn sɛ shɛɛ niken ne ɛbhɛ dɔng.

⁹Njwɛɛn i yɛɛ ɛli ne kɛ yiisik ɛKiriti yegha ne ikpuu da, sɔng ɛ sɛ ne tang ta ku dɔng nang. Sɔng iku de ne ta bok ito daa ɛbhɛ nang.

¹⁰iKu de ne ɛ kɛ ku wo, ɛ kɛ ku ɛdaan zɔng te ɛ phoo ihwet ne ɛfɔt; ishwɛɛ da ne ɛ shɛɛ wo, ɛ shɛɛ ishwɛɛ ɛTaanggbey.

¹¹ɛLɛy ne mang, nɛ ma bo ɛn ito mon de te ikom ne kɛ hosop iphɛ ne iken daa ne ihwet ne ɛfɔt da, kaabi ɛlɛy ne ɛ so ɛn niken ndɔ ɛTaanggbey lenɛ ne ɛYɛso ɛKiriti.

¹²iPhɛ ɛlɛy, sɔng ne ɛ sim ɛn ɛfɔt to tɔ re igbɔm ne ibek mon nɛdee wo ne iphɛ sɛ ku wo, ɛ roos ɛn nikɔn nibebhe na ne iphɛ sim mo nang.

¹³Sɔng ɛ nang ɛn nilɔ ne ibek mon na ndɔ ne ɛfɔt to nibhɛ teye nikɔn ne mɔn ibebhe de nang. Yang nang ɛn ɛTaanggbey yegha ito mon gbik tɛ ninyi ne kɛ tul nibhɛ ndɔ ne iku i phɛ nɛ ndɔ ne iken. Nang ɛn ɛTaanggbey ye nilɔ ne ibek mon na tɛ nibhɛ teye nikɔn nitomɛ nicik.

¹⁴Mɔn ɛn ɛlɛ wo daa ɛli ne sɔng ɛfɔt to bok igbɔm daa mon nang. Sɔng ɛ tɔ ɛn nikpuru ne iMɛmɛ ɛMuusaa da nang, ɛ so ɛn ndɔ ne izɛɛng ɛTaanggbey.

¹⁵iPhɛ ne ji so ɛlii daa mɛɛ? Njwɛɛn yaa ne mɔn ɛfɔt to daa ɛli ne hame njwɛɛn so ndɔ ne iMɛmɛ ɛMuusaa da, wu njwɛɛn so ndɔ ne izɛɛng ɛTaanggbey dee? Kwa! Sɔng ɛlɛ nang!

¹⁶Ɛ doo ɛn ɛli ne ɛnyi gha i teye ɛkpuru ɛkɔn na ne ɛ kɛ ku kasa aa roos ibol ɛbhɛ dee? Ɛ ɛnyi gha sɛɛ yɛɛ ne teye ɛkpuru ne ɛfɔt ta ne ɛbhɛ yɛɛs ne iku, ɛnyi gha ne ta yee ne teye ɛkpuru ne roos ibol ɛTaanggbey ne iphɛ yɛɛs ne ihywel icik.

¹⁷N bok irway ihwala ne ɛTaanggbey, ɛ kaa so ɛn nyini ne nikpuru ne ɛfɔt, ɛlyilyɛghaa wo, ɛ kɛ ne yaa roos ɛn itin de ne kɛ tɔɔrek nyini ndɔ ne imɛmɛ da ne kɛ mɛmɛ nyini nɛ wo ne irway mon gbik.

¹⁸Kɛ tul nyini ndɔ ne ɛfɔt to, ɛ kɛ te ɛn nyini nikpuru nicik.

¹⁹Nzi bol ne nyinɛn te ɛli ne ɛten ɛsii i bol, daa ɛli ne ɛ so ɛn niten nisii, icwas mon da kɛ ne taasek. Ne ile de ɛ kaa nang ɛn nilɔ ne ibek mon na nibhɛ teye nikpuru nikɔn ne ishis gbik ne ibebhe ne iphɛ hanas se nɛ. ɛLyilyɛghaa wo, iphɛ ne so nggbinggbing, ɛ nang nilɔ ne ibek mon na nibhɛ teye nikpuru nitomɛ nicik, nɛ nibhɛ te ɛ shɛɛ iwɛwɛy.

²⁰Nten de ne ɛ kaa so ɛn nyini ne nikpuru ne ɛfɔt ta, sɔng ɛkɔn kaa ne byinki nyini ne ihywel icik ga nang.

²¹iKyee ne ɛ kɛ ne sɛ ɛn daa nikɔn nɛnaa nggyɛ wo nɛ nibhɛ kɛ teye nikɔn ncwa na ɛlyilyɛghaa woo? Nikɔn nɛnaa wo i yɛɛs ne iku zɔng.

²²ɛLyilyɛghaa wo, kɛ ne tul nyini ndɔ ne ɛfɔt to, ɛ kɛ te ɛn nyini ne nikpuru ɛTaanggbey. ɛWɛng nga ne ɛ sɛ ɛn ndɔ ne ishwɛɛ yɛdaa daa wo ne i te ɛ shɛɛ ɛn iwɛwɛy, iphɛ sɛ ne ta nang nyini iken ne inat.

²³I tal ɛfɔt to nɛ ne iku, izɛɛng ɛTaanggbey de ne so iken ne inat lenɛ ne ɛDaray njwɛɛn ɛYɛso ɛKiriti.