Read eten iRooma 8 Bible Online

iRooma 8 - eten bible

iRooma 8

¹iPhɛ ɛlɛy, sɔng yaa ne tang hyɛ ninyi na nɛ nibhɛ kɛ byinki ishwɛɛ da ne ɛYɛso ɛKiriti gha ɛshara ne iku nang.

²Daa ɛli ne kɛ lenɛ ne ɛYɛso ɛKiriti ihwet iKabyik ne iphɛ nang iken de kɛ ne sɔnɔ me[8] ndɔ ne ihwet ne ɛfɔt to ne ɛbhɛ yɛɛs ne iku de.

³ɛKɔn na ne iMɛmɛ ɛMuusaa da kɛ sang yɛɛ ne mɔn nɛ daa ɛli ne ɛten ɛsii gha kɛ taasek, ɛTaanggbey ya kɛ ne mɔn. ɛTaanggbey ya kɛ phoo ihwet ne ɛfɔt to ndɔ ne ibek ɛten ɛsii de lenɛ ne ɛ kɛ tom ɛNgɔn ɛbhɛ ndɔ ne ibek ɛten ɛsii ne iphɛ so cɛcɛɛy idee ne ɛfɔt, te ɛ bunga ɛfɔt to.

⁴ɛTaanggbey ya kɛ mɔn ɛlɛ wo, te shwaak icik ge ne iMɛmɛ ɛMuusaa da bo te i mɔn ndɔ njwɛɛn, njwɛɛn no ne njwɛɛn i sang shɛɛ ɛli ne icwas ne irway ɛten ɛsii da bo wo, yang kyii shɛɛ ɛli ne iKabyik ge i bo wo.

⁵Ninyi na nibhɛ shɛɛ ndɔ ne icwas ne irway ɛten ɛsii da, ihywɛɛ nibhɛ ne so daa nikɔn na ne icwas ne irway ɛten ɛsii da i sim, ninaa nibhɛ ne ma shɛɛ ishwɛɛ ne iKabyik ga, ihywɛɛ nibhɛ de ne ma so daa nikɔn na ne iKabyik ge i sim.

⁶iKyii ne ihywɛɛ de daa ɛkɔn na ne ibek ge i sim mo i yɛɛs ne iku, ikyii ne ihywɛɛ de daa ɛkɔn na ne iKabyik ge i sim mo i yɛɛs ne iken ne irway ne laal.

⁷Gbik ɛnyi gha ne ɛ kɛ nang ihywɛɛ ɛbhɛ de daa nikɔn na ne icwas ne irway ɛten ɛsii da i sim mo ɛ kɛ ne teye ɛhaa ne iphup ɛTaanggbey ya, daa ɛli ne sɔng ɛ roos iMɛmɛ ɛTaanggbey da nang, sɔng aa ne ma yɛɛ nɛ nang.

⁸Ninyi na nɛ nibhɛ roos nikɔn na ne icwas ne irway ɛten ɛsii da i sim mo sɔng nibhɛ yaa ne yɛɛ ne laasek ɛTaanggbey yegha irway nang.

⁹Nyinɛn no wu ikabyik ɛTaanggbey de ne shɛɛ ndɔ mon, sɔng icwas ne irway ɛten ɛsii da ifɛ ne hyel ne nyinɛn nang, iKabyik ɛTaanggbey iphɛ hyel ne nyinɛn. Gbik ɛnyi gha ne ɛ sang bok iKabyik ɛKiriti de, sɔng ne ɛ soye ɛhaa ɛKiriti gha nang.

¹⁰Wu ɛKiriti gha ne shɛɛ ndɔ mon no, gbik ɛli ne ibek mon de ne so ne nkiinɛ ne iku wo lenɛ ne ɛfɔt to, iKabyik ɛTaanggbey de ne naas nyini iken daa ɛli ne ɛTaanggbey ya kɛ say nyini wu ɛ so ɛn cik.

¹¹Wu iKabyik ɛTaanggbey de, ne iphɛ kaa yiisik ɛYɛso yegha tsik ne ikpuu da, i shɛɛ ndɔ ne irway mon da, ɛnyi gha ne ɛ kaa yiisik ɛKiriti yegha tsik ne ikpuu da sɛ ne ma nang ibek mon de ne iphɛ soye idee ne iku de iken de, lenɛ ne iKabyik ɛbhɛ de ne iphɛ shɛɛ ndɔ ne irway mon da.

¹²iPhɛ ɛlɛy nigwaa ɛn, njwɛɛn ne bok ɛkɔn ne iphɛ so nggbinggbing i mɔn, sɔng ɛkɔn nɛ yaa ne te njwɛɛn shɛɛ ɛli ne icwas ne irway ɛten ɛsii da i sim mo nang.

¹³Wu ˆɛ kɛ ne shɛɛ ɛn ɛli ne icwas ne irway ɛten ɛsii da i sim mo ˆaa ne kus ɛn. Wu ˆɛ kɛ ne yang phoo ɛn icwas nikɔn na nɛ nibhɛ te nyini ˆɛ mɔn ɛn ɛfɔt to lenɛ ne ihwet ne iKabyik ga ˆaa ne shɛɛ ɛn niken.

¹⁴Ninyi na ne iKabyik ɛTaanggbey de i hyel nɛ nibhɛ wo, ne soye ninɔn ɛTaanggbey.

¹⁵Daa ɛli ne iKabyik ge ne ɛTaanggbey ya kɛ nang nyini wo sɔng iphɛ soye dee ne aa te ɛn nyini nikpuru ɛ yɛk ɛn ɛnik nang. Kwa! iKabyik kɛdee wo kɛ yang te nyini ɛ te ɛn nyini ninɔn ɛTaanggbey, i ne lenɛ ne iphɛ wo, njwɛɛn ne yel-le ɛTaanggbey yegha i yɔngɔ: “Abba! ɛTaa nge.”[9]

¹⁶iKabyik ɛTaanggbey de ne ito ne iphɛ gbik ne idee njwɛɛn de kɛ tɔɔrek wu njwɛɛn soye ninɔn ɛTaanggbey ya.

¹⁷ɛLyilyɛghaa wo, wu njwɛɛn ne soye ninɔn ɛTaanggbey ya, njwɛɛn sɛ ne ma sɛ Niwɛng nga ne ɛ sɛ nang ninyi ɛbhɛ na, njwɛɛn sɛ ne ma ta sɛ Niwɛng nga ne ɛTaanggbey ya kɛ tek ɛKiriti yegha nɛ wo. Wu njwɛɛn kɛ sɔ nggbang ngga gbik ne ɛKiriti gha, sɛ ne ma ta bak njwɛɛn ndiinday ɛbhɛ de.

¹⁸Nggɛ wɛɛ nggɛ ne seng sɔng ya ten nggbang ngga ne njwɛɛn i sɔ ɛlyilyɛghaa wo ne ndiinday de ne sɛ tɔɔrek njwɛɛn no nang.

¹⁹Gbik nikɔn na ne kɛ ryɔng ngo i has irway nibhɛ hyep ɛli ne ɛTaanggbey ya yaa tɔɔrek ninɔn ɛbhɛ na wɛsɛrɛk ɛzay ya.

²⁰Sɔng nikɔn na ne kɛ ryɔng ngo kɛ yɛɛ ne shwaak ɛkɔn na ne ɛ kɛ te i ryɔng nibhɛ wo nang, sɔng daa ne ishwim nibhɛ nang, ɛTaanggbey ya ɛbhɛ kɛ sim ɛlɛy. Kɛ mɔn ɛlɛ wo ne iyɛk ne irway,

²¹iyɛk ne irway yɛ ne so, sɛ sɔnɔ nikɔn na ne kɛ ryɔng ngo nɛ nibhɛ so ndɔ ne nyang ngge te ɛkpuru gha ne kɛ rop po ndɔ ne iku ne sa de i byinki nibhɛ ndɔ ne ndiinday de ɛli ne kɛ sɔnɔ ninɔn ɛTaanggbey ya.

²²Njwi yɛɛ ɛlyilyɛghaa wo ɛlɛ, nikɔn na gbik ne kɛ ryɔng ngo jung tum te ɛkuk ne ɛngɔn i rɔ ɛbhɛ.

²³Sɔng nikɔn na ne kɛ ryɔng ngo zɔng nibhɛ tum mo nang, gbik ne njwɛɛn ne mang. Njwɛɛn no ne njwɛɛn kɛ ku sɛ iKabyik ɛTaanggbey de ne iphɛ so ɛkɔn ɛyisɛ yɛ ndɔ nikɔn na ne kɛ nang njwɛɛn no, njwɛɛn i tum ndɔ ne irway njwɛɛn, njwɛɛn i has irway i hyep te ɛTaanggbey bo njwɛɛn i teye ninɔn ɛbhɛ, ɛ ta phɔt ibek njwɛɛn nɛdee wo.

²⁴Ɛlɛy, daa ne yɛk ne irway yɛdaa wo ne kɛ phɔt njwɛɛn nɛ. Wu njwɛɛn kɛ ne yaang ɛkɔn ne njwɛɛn kɛ yɛk ne irway da, sɔng iphɛ ne ta tɔye iyɛk ne irway nang. Ɛhay ɛbhɛ yɛk ne irway da daa ɛkɔn na ne ɛɛ yaang ngoo?

²⁵Wu njwɛɛn kɛ yɛk ne irway da daa ɛkɔn na ne sang yaang ɛbhɛ, njwɛɛn ne i bo ɛbɔk i hyep ɛbhɛ.

²⁶Ɛlɛy ne iKabyik ge ne phyighis njwɛɛn ndɔ ne taasek njwɛɛn da. Sɔng njwɛɛn ne yɛɛ ɛli ne yaa ma yung boote ne ɛTaanggbey ya nang, iKabyik ge ne ito mpɛ, iphɛ ne bol njwɛɛn ne ɛTaanggbey ya ndɔ, iphɛ tum ndɔ ne ivol da ne hame i yɛɛ ne bol.

²⁷ɛTaanggbey ya ne ɛ wɛɛ ndɔ irway njwɛɛn da ɛbhɛ yɛɛ irway njwɛɛn da, ɛ ne ku yɛɛ icwas ne iKabyik ga, daa ɛli ne iKabyik ge iphɛ bol ne ɛTaanggbey ya ɛlɔ ninyi niwɛwɛy ɛbhɛ na ɛli ne ɛ sim.

²⁸Njwii yɛɛ ndɔ nikɔn na gbik ɛTaanggbey ya mɔn ninyi na nibhɛ sim ɛbhɛ nikɔn niyɛnɛng, ninyi na ne kɛ yel-le tɛ nibhɛ shwaak nikɔn na nɛ nibhɛ kɛ te i yel-le nibhɛ wo.

²⁹Ninyi na ne ɛTaanggbey ya kaa ku yɛɛ ne ile de ɛ kaa ku kasa nibhɛ tɛ nibhɛ te tɛ ɛNgɔn ɛbhɛ, te ɛNgɔn na ɛbhɛ ji teye ɛngɔn ɛkɔɔn nɛ ndɔ nigwaa ɛbhɛ na nɛ nibhɛ so gbom mo.

³⁰Daa ɛli nɛ ninyi na ne ɛTaanggbey ya kɛ ku kasa wo, nibhɛ ne ɛ kɛ yel-le. Ninaa ne ɛ kɛ yel-le wo, nibhɛ ne ɛ kɛ ne say nibhɛ wu nibhɛ so cik, ninaa ne ɛ kɛ ne say nibhɛ wu nibhɛ so cik ko, nibhɛ ne ɛ kɛ nang nibhɛ ne ndiinday.

³¹Njwɛɛn yaa ne ji ta yɔng ɛli daa ne ibol lɛdee woo? Wu ɛTaanggbey ya ne so ɛduu njwɛɛn na, ɛhay ɛbhɛ yaa ne ta bok iphup be ne njwɛɛn noo? Wɛlɛng ɛnyi!

³²Ɛbhɛ ɛTaanggbey ya ne kɛ ring njwɛɛn ne ɛNgɔn ɛbhɛ gha, ɛ yang kyii nang ɛbhɛ ɛlɔ njwɛɛn na gbik ko. Wu ɛ kɛ ne mɔn ɛlɛ wo ɛ sɛɛ ne mɔn ɛli ɛ sang nang njwɛɛn nikɔn na gbik ne irway ijwaan daa?

³³ɛHay ɛbhɛ aa ne yɔng bok ibol nɛ ninyi na ne ɛTaanggbey ya kɛ kasa wo? Wɛlɛng ɛnyi! Daa ɛli ɛTaanggbey ya ne ito ɛbhɛ ɛbhɛ kɛ say nibhɛ wu nibhɛ so cik.

³⁴ɛHay ɛbhɛ ɛ kɛ hɔn ɛ sɛ yɛɛ ne hyɛ ɛnyi gha ɛshara ne iku ghaa? Wɛlɛng ɛnyi! ɛYɛso ɛKiriti gha ne ɛ kɛ ku, iphɛ phyinti ɛlɛy, ɛ kɛ ne yilitsik ne ikpuu da, ɛ so ne iwɔ ne irwye ɛTaanggbey yo ɛɛ bol ne ɛTaanggbey ya ɛlɔ njwɛɛn.

³⁵ɛHay ɛbhɛ aa ne ji yɛɛ ne hosop njwɛɛn ne ishwim ɛKiriti daa? Nggbang nge? iTak iyɔm mee? iBaasek nggbang nge? iKpyak ghe? iYɔm me? iYɔm ne ɛtura? Hang iku?

³⁶Te ɛli ne kɛ haa ndɔ ne ɛwee ne ibol ɛTaanggbey yo bo: “ɛLɔ nggyɛ ne njwi yaang iku cɛcɛɛy kɛ bo njwii te ᐩigyol ntsabhak ne yaa hyɛghɛ.”

³⁷Kwa! Ndɔ nikɔn nɛ na wo gbik, njwɛɛn ma yung phyin ɛli ne yaa yaak njwɛɛn irom lenɛ ne ɛnyi gha ne ɛ sim njwɛɛn!

³⁸Daa ɛli ne nzi yɛɛ ncɛncɛng, sɔng ɛkɔn sonɛ ne aa yɛɛ ne hosop njwɛɛn ne ishwim ɛKiriti da nang. Sɔng iku yaa yɛɛ nɛ nang. Sɔng iken yaa yɛɛ nɛ nang. Sɔng nimalɛka yaa ne ma yung yɛɛ nɛ nang, sɔng ikpabyik niphoo yaa ne yɛɛ nɛ nang. Sɔng nikɔn ɛlyilyɛghaa nɛ ninaa nɛ nibhɛ sɛ yaaso yaa ne yɛɛ nɛ nang.

³⁹Sɔng ndaalang yaa ne yɛɛ nɛ nang. Sɔng ikyukyum yaa ne yɛɛ nɛ nang. Sɔng ɛkɔn sonɛ ndɔ nikɔn na ne kɛ ryɔng ngo gbik ko yaa yɛɛ ne hosop njwɛɛn ne ishwim ɛTaanggbey da ne ɛɛ sim njwɛɛn lenɛ ne ɛDaray njwɛɛn ɛYɛso ɛKiriti gha nang.