Read eten 1 iKɔrɔntos 1 Bible Online

1 iKɔrɔntos 1 - eten bible

1 iKɔrɔntos 1

¹ɛWee yɛwoo wo le ɛlɔ ɛBulus, ne kɛ yel-le ɛbhɛ lenɛ ne icwas ɛTaanggbey te ɛ teye ɛngɔn ne tom ɛYɛso ɛKiriti. Njwi ne so ne ɛgwaa njwɛɛn ɛSɔtɛnes.

²Ɛbhɛ phɛɛs ɛlɔ ninaa ne roos ɛgarang iKɔrɔntos, ne ɛlɔ ninyi ne kɛ tek ɛTaanggbey ye nɛ ndɔ ɛYɛso ɛKiriti. Ne ɛlɔ ninyi ne kɛ yel-le nibhɛ tɛ nibhɛ teye ninaa ɛTaanggbey gbik nɛ ninyi nilɔ na kang-ka-kang nɛ nibhɛ yeres daa ne irywɛɛk ɛDaray ɛYɛso ɛKiriti ne ɛ so ɛDaray nibhɛ gha gbik ne ɛhaa njwɛɛn na.[1]

³Te ɛTaanggbey ne ɛ so ɛTaa njwɛɛn ne ɛDaray ɛYɛso ɛKiriti nang nyini izɛɛng gbik ne irway ne laal.

⁴Nzi ku tɔɔsel ɛTaanggbey nge irway ihwala cɛcɛɛy daa mon daa ne izɛɛng ngge ne ɛ kɛ nang nyini lenɛ ne ɛYɛso ɛKiriti gha.

⁵Daa ɛli ne ndɔ ɛKiriti gha ne kɛ nang nyini iryat daa nikɔn na gbik, iryat ne ivol gbik ne ishweng.

⁶iPhɛ kɛ ne tɔɔrek wu ibol ɛKiriti de ne nggɛ tɔng nyini wo kɛ see iling ndɔ mon gbom.

⁷iPhɛ ɛlɛy, sɔng ɛ kɛ ne wɔs ɛn ɛdɛ ɛwɛng ne ikabyik ka ɛli ne ɛ kɛ sit ɛn irwisɛ ɛ hyep ɛn ibhɛ kyii ɛDaray njwɛɛn ɛYɛso ɛKiriti yegha nang.

⁸ɛYɛso gha ya ne boos nyini gɛgɛy ndɔ ne ìnang ne itin de ɛli ne hame sɛ́ sɛ nyini ne ɛkɔn ne rip ɛtuk ka ne ɛDaray njwɛɛn ɛYɛso ɛKiriti gha sɛ bhɛ kyii wo.

⁹ɛTaanggbey ya so ɛhaa ne sɛ kyinak daa ne ibol ɛbhɛ, ɛ kɛ yel-le nyini te ɛ rop ɛn ìtsɛm ne ɛNgɔn ɛbhɛ ɛDaray njwɛɛn ɛYɛso ɛKiriti.

¹⁰Nigwaa en, nzi roro ne nyinɛn ndɔ ne irywɛɛk ɛDaray njwɛɛn ɛYɛso ɛKiriti, nzi bo te ɛnu mon teye ɛdaan nɛ. Sɔng ɛ hosop ɛn nyini wo nang, yang byinki ɛn nyini te icwas mon te ijwaan nɛ, ivol mon ta te ijwaan nɛ.

¹¹Nigwaa en, nidɛng ndɔ ne ijwee ɛKulu kɛ tɔng me nibhɛ bo wu ishisim so ndɔ mon.

¹²ɛKɔn na ne nzi bol ɛbhɛ ghaa lɛ: ɛ bok ɛn ivol mon kang-ka-kang. ɛDɛng i bo, “Nzi roos ɛBulus se.” ɛDɛng ne yɔngɔ, “Nzi roos ɛPolos se.” ɛDɛng ne yɔngɔ, “Nzi roos ɛKyɛfas se.[2] ɛDɛng ne yɔngɔ, ‘Nzi roos ɛKiriti ye.’[3]

¹³ɛKiriti gha kɛ hosop bhee?” ɛBulus sa ne kɛ gangat ɛbhɛ daa ne ihon no ɛlɔ mon naa? Hang kaa yɛk nyini ne ibatisima de ndɔ ne irywɛɛk ɛBulus soo?

¹⁴N bok irway ihwala ne ɛTaanggbey ne hame mee nggɛ yɛk ɛdɛ mon ne ibatisima de kang ne ɛKiribus gbik ne ɛGayus.[4]

¹⁵iPhɛ ɛlɛy, sɔng ɛnyi ne sonɛ ne ɛ sɛɛ yɔng wu kɛ i yɛk ghe ne ibatisima de ndɔ ne irywɛɛk nge nang.

¹⁶Ɛɛy, nggɛ ta taate wu mee nggaa yɛk ninaa ne ijwee ɛTifanos ne ibatisima de. Kang ne ɛlɛy, sɔng nzi ne ta yɛɛ ɛdɛ ɛnyi gha ne nzɛ yɔng wu mee nggɛ yɛk ɛbhɛ ne ibatisima de nang.[5]

¹⁷Phok ɛn, sɔng ɛKiriti gha kɛ tom me wu te n yaak ninyi ne ibatisima nang, ɛ kɛ yang tom me te n sanga ibol iyɛnɛng ngge, sɔng ndɔ ne ntsɛntsɛng ɛten ɛsii nang, daa ɛli ne ibol ne iku ɛKiriti de daa ne ihon no yaa yung te buu.

¹⁸Ninyi na nɛ nibhɛ so nkiinɛ ne iku wo i wɛɛ ibol ne gangat ɛYɛso yede daa ne ihon no te iwamang, njwɛɛn no ne njwɛɛn ne so ne nkiinɛ ne phɔrɔt to ne yaang ɛli ne igbom ɛTaanggbey da so.

¹⁹Kɛ ku haa ndɔ ne ɛWee ne iBol ɛTaanggbey yo i bo: “Naa bunga ntsɛntsɛng ninyi de, nɛ nibhɛ wɛɛ te nibhɛ bok ntsɛntsɛng ngge. Naa ne ta bees ishweng ninyi na nɛ nibhɛ wɛɛ te nibhɛ bok ishweng ngga nibhɛ te buruburu.”[6]

²⁰Ninaa ne ntsɛntsɛng nga so ɛbi? Ninaa ne kpɛl iMɛmɛ ɛMuusaa ba ne so ɛbii? Ninaa nɛ nibhɛ wɛɛ te nibhɛ yɛɛ nikɔn na gbik ko ne so ɛbii? ɛTaanggbey ya kɛ ku tɔɔrek wu ntsɛntsɛng ɛzay yɛdaa wo so iwamang.[7]

²¹ɛTaanggbey ya ndɔ ne ntsɛntsɛng ɛbhɛ de ɛ kɛ ring ninyi ɛzay ya ne seng ɛbhɛ lenɛ ne ntsɛntsɛng nibhɛ. ɛTaanggbey ya kɛ yang mɔn ɛtomɛ ne ibol de nɛ ninyi na i bok iphɛ, “iBol iwamang ngge,” ne njwii sanga wo, ɛ phɔt ninaa nɛ nibhɛ kɛ nang ne itin nɛ ne iphɛ.

²²niYahodawa na sim te sɛ tɔɔrek nibhɛ nyu nikɔn ne kparat, niHɛlɛnawa na ne i tɔk ntsɛntsɛng.

²³Njwit to, njwi ne tɔng ibol ɛKiriti ne kɛ gangat daa ne ihon. iBol lɛ kɛ teye ɛkɔn ne kyibhɛ niYahodawa na, iphɛ ne kyi ta teye iwamang ɛlɔ ninyi na ne hame nibhɛ so niYahodawa na.

²⁴Ɛlɔ ninyi na ne ɛTaanggbey ya kɛ yel-le wo inang, niYahodawa na gbik nɛ ninyi ne hame nibhɛ soye niYahodawa na, ibol lɛdee wo ne soye ɛKiriti ne ɛ so igbom ne ntsɛntsɛng ɛTaanggbey.

²⁵Daa ɛli ne iwamang ɛTaanggbey de phyin ntsɛntsɛng ɛten ɛsii de, ikyɔkyɔt ɛTaanggbey de ne ta phyin ihwet ɛten ɛsii da.

²⁶Nigwaa en, taate ɛn nɛ ɛli ne ɛ kaa so ɛn nten de ne ɛTaanggbey ya kaa yel-le nyini wo. Ncɛt tɛ ndɔ mon no zɔng nibhɛ kaa bok ntsɛntsɛng ɛli ne ɛzay ya kɛ bo ntsɛntsɛng ngge, ncɛt tɛ zɔng nibhɛ kaa bok iryat ɛli ne ɛzay ya kɛ bo iryat de, ncɛt tɛ zɔng nibhɛ kaa ne ta so ninɔn ne igbaang ninyi.

²⁷ɛTaanggbey ya kɛ kasa nikɔn niwamang ɛzay ya te ɛ bak ninaa ne ntsɛntsɛng nga ncwa; ɛTaanggbey ya kɛ ne ta kasa nikɔn nikyɔkyɔt ɛzay ya te ɛ bak ninaa ne ihwet ta ncwa.

²⁸ɛTaanggbey ya kɛ kasa nikɔn na nɛ nibhɛ kɛ taasek, nɛ nikɔn na ne kɛ bɛɛs, nɛ ninaa ne hame nibhɛ so ɛnu ɛkɔn ndɔ ɛzay ya te ɛ sɛ ɛ bunga nɛ nikɔn na nɛ ninaa ɛzay ya i wɛɛ tɛ nibhɛ bhɛ kɛ jam nibhɛ shɛs.

²⁹ɛTaanggbey ya kɛ mɔn ɛlɛ wo te ɛ ring ɛten ɛsii gha ne hale ɛgyɛy ɛnu ɛyisɛ ɛTaanggbey ya.

³⁰ɛTaanggbey ya ɛbhɛ kɛ te ɛ so ɛn ndɔ ɛYɛso ɛKiriti gha, ɛbhɛ ta te ɛKiriti gha teye ntsɛntsɛng njwɛɛn. Kɛ ne lenɛ ne ɛKiriti gha ɛTaanggbey ya say njwɛɛn wu njwɛɛn so cik ɛnu ɛyisɛ ɛbhɛ, njwɛɛn ta teye ninyi ne wɛwɛy ɛTaanggbey ya, njwɛɛn ta teye ninyi ne kɛ phɔt.

³¹iPhɛ ɛlɛy, te ɛli ne kɛ ne ku haa ndɔ ne ɛWee ne iBol ɛTaanggbey yo i bo, “Gbik ɛnyi gha ne ɛ sim te aa hale ɛgyɛy ya, te ne ɛ hale ɛgyɛy ya ne ɛDaray.”[8]