Read eten 1 iKɔrɔntos 11 Bible Online

1 iKɔrɔntos 11 - eten bible

1 iKɔrɔntos 11

¹Ne ɛ roos ɛn ngkɔɔl nge da ɛli ne nzi ma roos ngkɔɔl ɛKiriti da.[36]

²Nzi dɛp nyini daa ɛli ne ɛ tas ɛn ne mee ndɔ nikɔn na gbik, ɛ ta boos ɛn ikpii ne imɛmɛ nge da byirik, kancɛng ɛli ne nggɛ nang nyini wo.

³ɛLyilyɛghaa wo, nzi ne sim te ɛ sɛ seng ɛn wu ɛKiriti gha ɛbhɛ ɛ so ɛndiinday ninyi na gbik, ɛras sa ɛbhɛ ne ɛ ma so ɛndiinday ɛkuk ɛbhɛ, ɛTaanggbey ɛbhɛ ne ɛ ma ji so ɛndiinday ɛKiriti gha.

⁴Gbik ɛras sa ne ɛ kɛ ne cwaal ito ɛbhɛ de ɛ bol ne ɛTaanggbey ya, ɛ ta tɔng ibol ɛTaanggbey de, ɛ bɛɛs ɛndiinday[37] ɛbhɛ gha.

⁵Gbik ɛkuk ka ne ɛ kɛ sang cwaal ito ɛbhɛ de ɛ bol ne ɛTaanggbey ya, ɛ ta tɔng ibol ɛTaanggbey de, ɛ kɛ ne bɛɛs ɛndiinday ɛbhɛ gha. Sɔng iphɛ ne lap bhe ne kɛ hon ɛbhɛ ito te bak ɛbhɛ ncwa nang.

⁶Wu ɛkuk ka yaa sang cwaal ito ɛbhɛ de te nɛ hon iphɛ. ɛLi ne iphɛ ne so ɛkɔn ncwa gha ɛkuk ka hon ito ɛbhɛ de nang, te ne ɛ cwaal iphɛ.[38]

⁷Sɔng ɛras sa ne cwaal ito ɛbhɛ de nang, daa ɛli ne ɛbhɛ ɛ soye izazurum ɛTaanggbey de te ɛ tɔɔsel ito-ndiinday ɛTaanggbey de, ɛkuk ka ne ma ji tɔɔsel ndiinday ɛras de.[39]

⁸Sɔng ɛras sa kaa le ndɔ ɛkuk ka nang, kaa yang bo itsan ɛras de i ryɔng ne ɛkuk ka.[40]

⁹Sɔng kaa ne ryɔng ɛras sa i nang ɛkuk ka nang, ɛkuk ka ne kaa yang ryɔng i nang ɛras sa.

¹⁰Daa ɛli ne kɛ ryɔng ɛkuk i nang ɛras sa, nimalɛka na i wɛɛ njwɛɛn no, iphɛ ne so nggbinggbing ɛkuk ka cwaal ito ɛbhɛ de te iphɛ tɔɔrek wu igbɔm sonɛ.

¹¹Gbik ne phɛ ɛlɛy, ndɔ ne ibol ne roos ɛDaray yede, sɔng ɛkuk ka ne so kang nɛ ɛras sa nang, sɔng ɛras sa ne ma so kang nɛ ɛkuk ka nang.

¹²ɛLi ne ɛkuk ka le ndɔ ɛras sa, ɛlɛy ne ɛkuk ka ɛbhɛ kɛ ne kyi ta yɛk ɛras sa, nikɔn na gbik ne ji le ɛlɔ ɛTaanggbey.

¹³Yung wɛɛ ɛn ne ito mon, iphɛ kɛ jam mɛ ɛkuk ka boote ne ɛTaanggbey ya tang cwaal ito ɛbhɛ dee?

¹⁴Wu ɛ kɛ wɛɛ ɛn ɛli nɛ nikɔn na so wo, aa ne seng ɛn wu iphɛ so ɛkɔn ncwa ɛras sa boos ito ɛbhɛ de tang hon no.

¹⁵Wu ɛkuk ka ne bok itsutsɔ ne ito da ndaalang, ifɛ ne so izel ɛlɔ ɛbhɛ gha, daa ɛli ne kɛ nang ɛbhɛ te ifɛ cwaal ɛbhɛ ito de.

¹⁶Wu ɛdɛng i ne sim te aa re ne ishamas daa ne ibol lɛdee wo, njwit to sɔng njwi ne yɛɛ idɛ ikpii ne roos da ndɔ ne itumɛ ninaa ne roos ɛTaanggbey yegha nang.

¹⁷Daa ne ibol lɛdee wo, sɔng naa dɛp nyini nang, daa ɛli ne sɔng itumɛ mon i mɔn ɛkɔn ne ɛ kɛ jam nang, iphɛ yang mɔn ɛkɔn ne ɛ kɛ sang jam.

¹⁸iDee ɛyisɛ yɛ, nzi phok wu i sɛ ˆɛ kɛ sɛm ɛn nyini ndɔ ne idira ninaa ne roos ɛTaanggbey de, ihosop en ne kyii lel, nggɛ ne ma nang ne itin nɛ ne ɛbyin ne ivol lɛ.

¹⁹iPhɛ so ngbingbing i sɛ ihosop en da ndɔ mon no te sɛ seng ninyi na nɛ nibhɛ kɛ hɔn sɛɛ kyinak daa ne ibol nibhɛ ndɔ mon no.

²⁰Kaabi i sɛ ɛ kɛ tum ɛn nyini ɛlɔ ɛdaan na, sɔng ndɔ ɛkyee ɛDaray ya ne ɛ re ɛn nɛ nang.

²¹Daa ɛli ne ɛlɔ ne re ire gha sɔng ɛɛ hyep nyini nang, ɛrɔngɔ ku kyii ne ihywɛɛ ɛbhɛ daa ne ire ɛbhɛ ɛ re, ji tek ɛdɛng kpyak, ɛdɛng ji sɔ ɛ te ziizii.

²²Ɛ sang ɛn idee ne aa re ɛn ɛ sɔ ɛn nɛ ne ndɔ yɛwo naa? Hang ɛ kɛ bɛɛs ɛn idira ninaa ne roos ɛTaanggbey yegha, ne ɛ mɔn ɛn ninaa nɛ nibhɛ sang ɛkɔn na kang ngo naa? Naa ne yaak nyini ɛli? Naa ne dɛp nyini daa ɛkɔn nɛghaa woo? Kwa! Sɔng na dɛp nyini nang.

²³ɛKɔn nɛghaa wo ne nggɛ mɛmɛ nɛ ɛlɔ ɛDaray, ɛbhɛ ne nzi ne ma tɔng nyini; wu ɛtuk ka ne kaa nang ɛDaray ɛYɛso yegha ndɔ ne iwɔ ninaa ne iphup po, ɛ kaa bo ibɛrɛdi,

²⁴ɛtsim mɛ ne ɛ kɛ tɔɔrek ɛTaanggbey ye irway ihwala, ne ɛ kpɛl iphɛ ɛ yɔngɔ, “iBek ngedee wo, idee ne kɛ nang ɛlɔ mon. Ne ɛ ku i mɔn ɛn ɛlɛ wo te ɛ tas ɛn ne mee.”

²⁵ɛLɛy dɔng ɛtsim ne ire gha, ne ɛ ta bo ɛhyihyangas sa, ɛ yɔngɔ, “ɛHyihyangas sɛghaa wo so ìtsɛm ihywas ne kɛ rop nɛ neyi nge. Gbik nten de ne ɛɛ sɔ ɛn te ne ɛ tas ɛn ne mee.”

²⁶Kaabi gbik nten de ne ɛ re ɛn ibɛrɛdi yɛdee wo, ɛ ta sɔ ɛn ɛhyihyangas sɛghaa wo, iphɛ ne so ɛ sanga ɛn ibol ne iku ɛDaray de ɛ phyii bhɛ kyii.

²⁷iPhɛ ɛlɛy, gbik ɛnyi gha ne ɛ kɛ ne re ibɛrɛdi yɛdee wo, ɛ ta sɔ ɛhyihyangas ɛDaray ya ne irway ivebhe, ɛ kɛ ne mɔn ibek ɛDaray de nɛ neyi ɛbhɛ na ɛfɔt.

²⁸Te ɛrɔngɔ ne phɛl ito ɛbhɛ yɛnɛng nyɛɛn ɛ kyi re ibɛrɛdi de ɛ ta sɔ ɛhyihyangas sa.

²⁹Gbik ɛnyi gha ne ɛ kɛ ne re ibɛrɛdi de ɛ ta sɔ ɛhyihyangas sa, tang ɛ seng wu ibek ɛDaray de nɛ neyi ɛbhɛ na ne ɛ re wo ɛ ta i sɔ wo, ɛɛ ne hɔ ito ɛbhɛ ɛshara daa ne ire da gbik ne isɔ da.

³⁰iPhɛ phɛ kɛ te nidɛng gbom ndɔ mon no so shwa, nibhɛ so kyɔkyɔt, nidɛng kɛ ne ta kus.

³¹Wu njwɛɛn kɛ ne tsa phɛl irway njwɛɛn da, sɔng ɛTaanggbey ya sɛ ne ta hyɛ njwɛɛn ɛshara gha nang.

³²ɛDaray ya ɛbhɛ ɛ ne bol njwɛɛn ɛshara gha, ɛ gbaat njwɛɛn ɛlɔ ne sɛ yung byinki njwɛɛn ne ɛzay ya hyɛ njwɛɛn ɛshara gha.

³³iPhɛ ɛlɛy nigwaa en, yaa sɛ nten de ne ɛ kɛ tum ɛn nyini ɛlɔ ɛdaan na aa re ɛn ndɔ ɛkyee ɛDaray ya, te ne ɛ hyep ɛn nyini.

³⁴Wu ɛnyi gha ne ɛ so kpyak, te nɛ ɛ re ire de ne ijwee ɛbhɛ ɛlɔ ne itumɛ mon da ya yung hɔ nyini ɛshara. Daa ɛbyin nikɔn na nang, sɛ sɛ̀ nggɛ yɛɛs nzɛ ne kyi tɔng nyini.