Read eten 1 iKɔrɔntos 12 Bible Online

1 iKɔrɔntos 12 - eten bible

1 iKɔrɔntos 12

¹Nigwaa en nzi sim te ɛ sɛ seng ɛn ɛkɔn daa nikɔn na ne iKabyik ɛTaanggbey de i nang ngo, sɔng nzi sim ɛ sɛɛ tɔ doo ɛn nang.

²Ɛ yɛɛn nten de ne ɛ kɛ tang te ɛn nyini ninaa ne roos sa, kaa ne luk nyini ɛ yaa re ɛn igunkyi ne iphɛ sang iken ntsong.

³iPhɛ ɛlɛy, nzi ne sim te ɛ sɛ seng ɛn, sɔng ɛnyi gha ne iKabyik ɛTaanggbey de so ndɔ ɛbhɛ wo sɛ kyii ta yɔngɔ, “ɛYɛso, te ɛkawɛy roos sɛ,” nang! Sɔng ɛnyi sɛ yɛɛ ne yɔngɔ, “ɛYɛso gha ɛbhɛ ɛ so ɛDaray ya,” tang iKabyik ɛTaanggbey de iphɛ hyel ne ɛbhɛ nang.

⁴Nikɔn na ne ikabyik ge i naas so sonɛ ihywee-ihywee, ne so iKabyik idaan nɛ iphɛ nang.

⁵Nkpiinɛ ne mɔn ɛDaray yegha ɛtomɛ gha sonɛ kang-ka-kang, ne so ɛDaray ɛdaan nɛ ne i mɔn ɛbhɛ nɛ.

⁶Nitomɛ na sonɛ ihywee-ihywee, ne so ɛTaanggbey ɛdaan nɛ ɛbhɛ nang ɛrɔngɔ ito ne mɔn nibhɛ gbik.

⁷ɛTaanggbey ya ne tɔɔsel inyu ne iKabyik Ɛbhɛ de so ndɔ ɛrɔngɔ, ɛli ne aa phyik ninaa ne roos sa gbik.

⁸iKabyik ɛTaanggbey de kɛ nang ɛdɛng ivol ne ntsɛntsɛng, iKabyik idaan nɛ ne ma ta nang ɛdɛng ishweng.

⁹iKabyik ɛTaanggbey idaan nɛ ne nang ɛdɛng izɛɛng ihwet ne ìnang ne itin, iphɛ ne nang ɛdɛng izɛɛng ne tes nisha niken.

¹⁰iKabyik ge kɛ ne nang ɛdɛng izɛɛng ne mɔn nikɔn ne kparat, iphɛ ne nang ɛdɛng izɛɛng ne tɔng ibol ɛTaanggbey, iphɛ ne nang ɛdɛng ishweng ne hosop ikpabyik, iphɛ ne nang ɛdɛng izɛɛng ne bol ne ilwem kang-ka-kang, iphɛ ne nang ɛdɛng izɛɛng ne kpɛl ɛkɔn ne kɛ bol ndɔ ne ilwem ba.

¹¹Gbik nikɔn nɛnaa wo iKabyik idaan nɛ iphɛ mɔn, iphɛ ne ta hosop iphɛ nang ɛrɔngɔ ɛli ne iphɛ sim.[41]

¹²Te ɛli ne ibek ge so iphɛ idaan de, iphɛ ne bok nilɔ na gbom, ɛli nɛ nilɔ yɛ ne so gbom mo, nibhɛ ne so ne ibek idaan. ɛLɛy ne phɛ ne so ɛlɔ ɛKiriti gha.[42]

¹³Daa ɛli ne gbik njwɛɛn no, hang ɛYahodawa yɔɔ, hang ma sang so ɛYahodawa yɔɔ, hang nikpuru yɔɔ, hang ninɔn ne ijwee yɔɔ, kɛ yɛk njwɛɛn ne ibatisima idaan ne ikabyik idaan, njwɛɛn kɛ teye ibek idaan. Kɛ ne ta nang njwɛɛn iKabyik idaan ndɔ ne irway njwɛɛn.

¹⁴Sɔng ibek ge so ɛlɔ ɛdaan nang, iphɛ bok nilɔ na gbom.

¹⁵Wu icwa wo sɛ ne yɔngɔ, “Daa ɛli ne n sang so iwɔ wo, sɔng ne nzo me ɛdɛ ɛlɔ ne ibek ka nang.” Sɔng iphɛ yaa ne ring ifɛ ne teye ɛdɛ ɛlɔ ne ibek ka nang.

¹⁶Ɛlɛy ne mang, wu itsoro wo sɛ ne ma yɔngɔ, “Sɔng nzo me irisɛ nang, iphɛ ɛlɛy sɔng ne nzo me ɛdɛ ɛlɔ ne ibek ka nang.” Sɔng iphɛ yaa ne ring ifɛ ne teye ɛdɛ ɛlɔ ne ibek ka nang.

¹⁷Sɛ yɔng ibek ge gbik so irisɛ, sɛ ne phok ne ikyee? Sɛ ne yɔng ibek ge gbik so itsoro wo, sɛ ne ji phok ngkɔp ɛkɔn ne kyee?

¹⁸ɛTaanggbey ya kɛ ryɔng nilɔ ne ibek ka ɛli ne ɛ kɛ sim.

¹⁹Sɛ yɔng ibek ge ku so ɛlɔ ɛdaan zɔng, ibek ge sɛ ne ji so ɛli daa mɛɛ?

²⁰ɛLi ne iphɛ ne so wo, nilɔ ne ibek ka ne so gbom, ibek ge ne so idaan.

²¹Sɔng irisɛ de sɛ yɛɛ ne yaak iwɔ wo, “Sɔng nzi sim-mɛ nang.” Sɔng ito de sɛ ne ma yɛɛ ne yaak icwa wo, “Sɔng nzi sim-mɛ nang.”

²²ɛTsak, nidɛng nilɔ ne ibek ka ne i wɛɛ tɛ nibhɛ sang so ɛkɔn na, nibhɛ bhɛ ne ji soye ɛkɔn.

²³Nilɔ ne ibek ka ne njwɛɛn kɛ sang ji bo te ɛkɔn na, nibhɛ ne njwɛɛn i ji kyii nang nibhɛ ne ndiinday. ɛLɛ wo nɛ nilɔ ne ibek ka nɛ nibhɛ kɛ sang jam sɛ yaang ngo, i ne ji hante nibhɛ ne iyɛnɛng.

²⁴Nilɔ ne ibek njwɛɛn na nɛ nibhɛ kɛ jam wɛɛ ba, sɔng sɛ kɛ ta mɔn nibhɛ ɛkɔn nang. ɛLɛy ne ɛTaanggbey ya kɛ ne ryɔng ibek ge, ɛ kɛ phyin nang ɛlɔ gha ne kɛ sang bo ɛbhɛ te ɛkɔn na ne ndiinday,

²⁵iphɛ ɛlɛy, nilɔ ne ibek ka kɛ ne byinkit nibhɛ teye nidaan nɛ ɛli ne ɛrɔngɔ yaa phyik ɛtaay.

²⁶iPhɛ ɛlɛy, wu ɛdɛ ɛlɔ ne bek ka kɛ ne phok ikpom, ibek kɛ gbik yaa ne phok iku, wu i ne dɛp ɛdɛ ɛlɔ ne ibek ka, gbik nilɔ yɛ yaa ne bok irway ihwala.

²⁷Gbik mon no ne ɛ sɔ ɛn nyini ibek ɛKiriti, ɛrɔngɔ ne soye ɛdɛ ɛlɔ ne ibek kɛ.

²⁸Ndɔ idira ninaa ne roos de, ɛTaanggbey ya kɛ nang ɛrɔngɔ ɛtomɛ ɛbhɛ. Ninaa ɛyisɛ yɛ ne so ninɔn ne tom, ne ji kungus nɛ ninabawa, ne kungus nɛ nikyɛɛ ne icwam, ne kungus nɛ ninaa ne mɔn nikɔn ne kparat. Sɛ ninaa ne tes nisha niken, nɛ ninaa ne iphyik, nɛ ninaa ne wɛɛ ɛtomɛ ne idira ninaa ne roos, nɛ ninaa ne bol ne ilwem kang-ka-kang.[43]

²⁹Sɔng gbik nibhɛ nibhɛ soye ninɔn ne tom ma nang, sɔng gbik nibhɛ nibhɛ ne soye ninabawa na nang, sɔng gbik nibhɛ nibhɛ ne soye nikyɛɛ ne icwam ma nang. Sɔng gbik nibhɛ nibhɛ ta soye ninaa ne mɔn nikɔn ne kparat ta nang.

³⁰Sɔng gbik nibhɛ nibhɛ soye ninaa ne tes nisha niken na nang, sɔng gbik nibhɛ nibhɛ soye ninaa ne bol ne ihwak ilwem ba nang, sɔng gbik nibhɛ nibhɛ soye ninaa ne kpɛl ivol ne ilwem ba nang.

³¹Ne ɛ yɛk ɛn irway, ɛ tɔk ɛn izɛɛng ngge ne ihywɛ so izee ɛyisɛ de. Naa ne ta tɔɔrek nyini ɛnkiinɛ wo ne ɛbhɛ kɛ jam ɛbhɛ shɛs.