Read eten 1 iKɔrɔntos 13 Bible Online

1 iKɔrɔntos 13 - eten bible

1 iKɔrɔntos 13

¹Nzɛ kyii yɛɛ ne bol ilwem ninyi ɛzay da ne ivaa ne nimalɛka, wu ne n sang ishwim, nggɛ ne te te irak ne iphɛ rɛrɛ zɔng, hang igin ne iphɛ ma rɛrɛ yɔɔ.

²Nzɛ kyi bok izɛɛng ne bol te ɛnɛbi, n da yɛɛ ne seng ɛkɔn na ne ɛ so gying, n da bok ishweng nikɔn na gbik, n da bok ìnang ne itin ne iphɛ bok ihwet ne iphɛ sɛ yɛɛ ne shoom ivarang, wu ne n sang bok ishwim ba, sɔng ne nzo ɛkɔn nang.

³Nzɛ kyi nang ɛkɔn na ne n bok gbik, n da nang ibek nge te wɔɔ, wu ne n sang bok ishwim ba, sɔng iphɛ yaa ne nang me ɛkɔn nang.

⁴iShwim ba i yɛɛs ne ɛbɔk, ne iyɛnɛng; sɔng ishwim ba bok ɛnkyis nang, sɔng ifɛ bok hal ɛggyɛy nang, sɔng ifɛ ne bok ibɛɛs nang,

⁵sɔng ifɛ bok tɔɔk ito nang, sɔng ifɛ sobho irway nang, sɔng ifɛ bok sim ito nang, sɔng ifɛ bok icɔk irway nang, sɔng ifɛ boos ivol icwɛl nang.

⁶Sɔng ishwim ba i phok iyɛnɛng ne ɛfɔt nang, ifɛ yang phok iyɛnɛng ne itin ne bol.

⁷iShwim ba i yɛɛs ne ɛbɔk ndɔ nikɔn na gbik, ifɛ ne yɛɛs ne ìnang ne itin ndɔ nikɔn na gbik, ifɛ ne yɛɛs ne iyɛk ne irway ndɔ nikɔn na gbik, ifɛ ne yɛɛs ne rop iku ndɔ nikɔn na gbik.

⁸Sɔng ishwim ba bok ɛgak nang. Nzi tɔng nyini izɛɛng ne bol ɛnɛbi de sɛ taal le, ibol ne ilwem ba sɛ birit, ishweng ngga sɛ ne taal le.

⁹0 Tsak sɔng ishweng njwɛɛn da so hyɔrɔ nang, sɔng izɛɛng ne bol te ɛnɛbi gha ne so hyɔrɔ nang.

¹⁰Sɛ́ ne sɛ nikɔn ihyɔrɔ na kɛ yɛɛs, ninaa nɛ nibhɛ sang so hyɔrɔ wo sɛ ne phee.

¹¹ɛLi ne nggɛ so ɛngɔn, nggaa ne i bol ivol te ɛngɔn, nzi tas icwas te ɛngɔn, ne n bok nincincɛk ne ivol te ɛngɔn. Kɛ ne sɛ ɛli ne nggɛ hɔn no, nggɛ ne tek ishwɛɛ ɛngɔn da.

¹²ɛLyilyɛghaa wo, njwɛɛn i wɛɛ ɛTaanggbey yegha mbirim te izazurum, ɛtuk kɛghaa nggyɛ wo, njwɛɛn sɛ ne ji yaang ɛbhɛ nkpɔɔng. Sɔng ishweng nge da so hyɔrɔ ɛlyilyɛghaa wo nang, ɛtuk kɛghaa nggyɛ wo nang, nzɛ ne ji seng hyɔrɔ-hyɔrɔ ɛli ɛTaanggbey ya kɛ seng me.

¹³Nikɔn itwat tɛnaa wo ku sonɛ. Nibhɛ naa lɛ, ìnang ne itin nɛ, iyɛk ne irway, ne ishwim; ɛgbaang ngɛ gbik ndɔ nibhɛ wo ne soye ishwim ba.