Read eten 1 iKɔrɔntos 3 Bible Online

1 iKɔrɔntos 3 - eten bible

1 iKɔrɔntos 3

¹Nigwaa en, sɔng nggaa yɛɛ ne bol ne nyinɛn tɛ ninyi nɛ nibhɛ bok iKabyik nang, nggaa yang bol ne nyinɛn tɛ ninyi nɛ nibhɛ roos icwas ne irway ɛten ɛsii nɛ, tɛ ninyi nɛ nibhɛ tɔ ninɔn ndɔ ne roos ɛKiriti yegha.

²Nggaa ne sunga nyini ne mbalas, sɔng ire gɛgɛy yang, daa ɛli ne sɔng ɛ kaa ku hɔn ɛn ɛli ne aa re ɛn ire gɛgɛy de nang. ɛLyilyɛghaa ɛlɛ, sɔng ɛ kɛ ma yung hɔn ɛn ɛ sɛ ire gɛgɛy de nang,[14]

³daa ɛli ne ɛ tɔ shɛɛ ɛn tɛ ninyi nɛ nibhɛ roos icwas ɛten ɛsii nɛ. Wu ɛnkyis sa ne ishisim be tɔ ndɔ mon no, iphɛ kɛ ne tɔɔrek wu ɛ tɔ roos ɛn icwas ɛten ɛsii nɛ, ɛ shɛɛ ɛn ɛli ne ɛzay ya sim.

⁴Wu ɛdɛng i ne bo, “Nzi roos ɛBulus se.” ɛDɛng ne yɔngɔ, “Nzi roos ɛPolos se.” Sɔng iphɛ kɛ tɔɔrek wu ɛ mɔn ɛn tɛ ninyi nɛ nibhɛ tɔ roos icwas ɛten ɛsii nɛ nang nge?[15]

⁵ɛPolos sa so ɛhay? ɛBulus sa ne so ɛhay? Nzi bo nibhɛ so ninaa ɛtomɛ zɔng ne ɛ kɛ nang ɛn ne itin nɛ lenɛ ne ibol nɛ nibhɛ kɛ tɔng nyini. Nibhɛ wo, ɛrɔngɔ i ne mɔn ɛtomɛ gha ɛli ne ɛDaray kɛ nang ɛbhɛ.

⁶Mee nggɛ tubhus, ɛPolos sa ne ramas, ɛTaanggbey ɛbhɛ ne yɛk ngɛ ɛkɔn na ne kɛ tup po raras.[16]

⁷iPhɛ ɛlɛy, ɛhaa ne ɛ kɛ tubhus so ne ɛhaa ne ɛ kɛ ramas so, sɔng nibhɛ so ɛnu ɛkɔn nang. ɛTaanggbey ya zɔng ɛbhɛ bok ito ne yɛk ngɛ ɛkɔn na raras so.

⁸Sɔng ɛhaa ne tubhus sa labhe ne ɛhaa ne ramas sa nang, ɛTaanggbey ya sɛ bhɛ mɔn ɛrɔngɔ iyɛnɛng ngge kancɛng ne ɛtomɛ gha ne ɛ kɛ mɔn.

⁹Njwi so nitaay ndɔ ɛtomɛ ɛTaanggbey ya, nyinɛn no ne ɛ ji so ɛn te ihwap ɛTaanggbey da, ɛ ta so ɛn te ijwee ne ɛTaanggbey ya i lɔl dɔng.

¹⁰Lenɛ ne izɛɛng ne ɛTaanggbey ya kɛ nang me, nggɛ ne tum ɛtum ne ijwee wo, daa ɛli ne nzo ɛhaa ne yɛɛ ne ijwee. ɛHak ɛnyi yaa ne ji lɔl daa ne ɛtum mɛwoo wo. iPhɛ ne so nggbinggbing ɛrɔngɔ wɛɛ ye yɛnɛng ɛli ne aa lɔl ijwee wo da ne ɛtum mɛwoo wo,

¹¹daa ɛli ne sɔng ɛnyi ma yung sonɛ ne aa ta yɛɛ ne see ɛhak ɛtum kang ne ɛwoo ne kɛ ku see wo nang, kaabi ɛtum mo ne ɛbhɛ soye ɛYɛso ɛKiriti gha.

¹²Wu ɛnyi gha kɛ bo izinariya, hang ɛzurufa yɔɔ, hang ikpɛɛ ne ifɛ kɛ ne ijam yɔɔ, hang itson yɔɔ, hang inzang yɔɔ, hang irwirwaat yɔɔ ɛ lɔl daa ne ɛtum mo,

¹³sɛ ne seng ihywee ɛtomɛ de ne ɛrɔngɔ kɛ mɔn ɛtuk ɛDaray ya. Daa ɛli ne ɛtuk kɛghaa nggyɛ wo, sɛ bo igboo i tɛɛsek ne ɛtomɛ ɛrɔngɔ, igboo wo ifɛ sɛ ne te i seng ihywee ɛkɔn de ne ɛrɔngɔ kɛ lɔl lɛ.

¹⁴Sɛ ne sɛ igboo wo kɛ sang re ɛkɔn ne kɛ lɔl daa ne ɛtum mo, ne mɔn ɛhaa ne lɔl la iyɛnɛng.

¹⁵Wu igboo wo kɛ ne re ɛtomɛ gha, ɛnyi ne lɔl la ne wɔs, ɛbhɛ wo ne ito ɛbhɛ sɛ ne phɔrɔt, iphɔrɔt tɛ sɛ ne so te ɛnyi ne kɛ phɔt ɛbhɛ ndɔ ne igboo.

¹⁶Ɛ doo ɛn ɛli ne nyinɛn no ne ito mon de ɛ so ɛn ideng ɛTaanggbey de ne iKabyik ɛTaanggbey de i shɛɛ ndɔ mon no naa?[17]

¹⁷Gbik ɛnyi gha ne ɛ kɛ bees ideng ɛTaanggbey de, ɛTaanggbey ya yaa ne ma bees ɛbhɛ, daa ɛli ne ideng ɛTaanggbey de so kang. Nyinɛn no gbik ne ɛ so ɛn ideng ɛbhɛ de.

¹⁸Sɔng ɛluk ɛn ito mon de nang. Wu ɛdɛ mon i wɛɛ te ɛ bok ntsɛntsɛng ɛli ne ɛzay ya kɛ bo ntsɛntsɛng ngge, te ne ɛ yang kyi teye ɛwamang, aa ne ji teye ɛhaa ne ntsɛntsɛng ne itin na.

¹⁹Daa ɛli ne ntsɛntsɛng ɛzay yɛdee wo soye iwamang ɛlɔ ɛTaanggbey ya, ɛli ne kɛ ku haa ndɔ ne ɛWee ne iBol ɛTaanggbey yo i bo: “ɛTaanggbey ya i wumus ninaa ne ntsɛntsɛng nga ndɔ ne nggyuk nibhɛ de.”[18]

²⁰Kɛ ne ta haa ndɔ ne ɛWee ne iBol ɛTaanggbey yo i bo, “ɛDaray ya yɛɛ ɛli ne icwas ne ihywee ninaa ne ntsɛntsɛng ngɛnaa wo so icwas ɛbuu.”

²¹iPhɛ ɛlɛy, sɔng ɛnyi ne hal ɛgyɛy ne ɛten ɛsii nang! Daa ɛli nɛ nikɔn na gbik so ninaa mon,

²²hang ɛBulus yɔɔ, hang ɛPolos yɔɔ, hang ɛKyɛfas yɔɔ, hang ɛzay yɛghaa wo yɔɔ, hang iken yɔɔ, hang iku yɔɔ, hang nikɔn ɛlyilyɛghaa yɔɔ, hang ninaa ɛgɔɔ ɛyisɛ yɔɔ, gbik nibhɛ soye ninaa mon.

²³Nyinɛn no, ne ɛ so ɛn nyini ninaa ɛKiriti, ɛKiriti gha ne ma ji soye ɛhaa ɛTaanggbey.