Read eten 1 iKɔrɔntos 4 Bible Online

1 iKɔrɔntos 4 - eten bible

1 iKɔrɔntos 4

¹iPhɛ ɛlɛy, bo ɛn njwii njwi soye nikpuru ɛKiriti, ninaa ne ɛTaanggbey ya kɛ tek ɛtomɛ ne kpɛl itin ne ibol igying ɛbhɛ ndɔ ne iwɔ mos.

²ɛKɔn na ne i sim ɛlɔ nikpuru na ne kɛ tek nibhɛ ne ɛtomɛ gha ndɔ ne iwɔ nibhɛ wo so ɛlɛ, tɛ nibhɛ so ninyi ne sɛ kyinak daa ne ibol nibhɛ.

³Sɔng iphɛ some ɛgbaang ɛkɔn ne aa teesek ɛn ɛtomɛ nge gha ɛli ne ɛten ɛsii gha i teesek ko nang. Sɔng nzi ma yung teesek ito nge nang.

⁴iRway nge so bɛs, sɔng nzi ne bo wu hang n bok ɛfɔt tang. ɛDaray ɛbhɛ teesek me.

⁵iPhɛ ɛlɛy sɔng ne ɛ hyɛ ɛn ɛshara gha nten nɛ tɔ wo nang, hyep ɛn te ɛDaray ya kyi bhɛ kyii nyɛɛn. Ɛbhɛ sɛ phaal nikɔn na nɛ ninyi na kɛ rɛɛ ndɔ gbyik ka, ɛ ta te i seng icwas ne irway ninyi na. Nten nɛdee nggyɛ wo ɛrɔngɔ sɛ ne ji say idɛp ɛTaanggbey da cɛcɛɛy ne ɛtomɛ ɛbhɛ.

⁶Nigwaa en, nggɛ mɔn nikɔn nɛnaa wo daa ne ito nge de ne ɛPolos sa te ɛ mɛmɛ ɛn ne ɛkɔn daa mos, te ɛ seng ɛn ibol de ne kɛ ku haa ndɔ ne ɛWee ne iBol ɛTaanggbey yo i bo, “Sɔng ɛ phee ɛn ɛkɔn na ne kɛ haa wo nang.” ɛLɔ ne ɛdɛ mon hal ɛgyɛy ne ɛkyɛɛ ne icwam ɛbhɛ ɛ mbaray ɛdɛng nang.

⁷ɛHay ɛbhɛ ɛ bok kɛ wu ɛ phyin ɛbyin niten nisii naa? iKyee ne ɛ bok ne hame ɛTaanggbey ɛbhɛ kɛ nang ngɛɛ? Wu iphɛ ne so ɛlɛ wo ikyee iphɛ kɛ ne te ɛ hal ɛgyɛy ya te hame kɛ nang woo?

⁸Ɛ kɛ ku sɛ ɛn nikɔn na ne ɛ sim ɛn no gbik! Ɛ kɛ ku tes ɛn nyini ninaa ne iryat! Ɛ kɛ tes ɛn tɛ nigɔm, sɔng njwi ne ji so ɛkɔn nang! Te sɛ ma yung yɔng ɛ so ɛn nyini nigɔm ma ɛtsak, njwɛɛn sɛ ne re igbɔm ba ne nyinɛn.

⁹Nzi wɛɛ te ɛTaanggbey ya kɛ tɔɔrek ncɛncɛng wu njwit, ninɔn ne tom ma, njwi soye ninaa ɛtsim mɛ gbik tɛ ninyi ne kɛ hyɛ nibhɛ ɛshara ne iku, daa ɛli ne njwi kɛ teye ɛkɔn na ne ɛzay ya gbik, nɛ nimalɛka, nɛ niten nisii yaa sit njwii ne irwisɛ.

¹⁰Njwi kɛ tes se niwamang te sɛ i nang ɛKiriti ye ne ndiinday, ne ɛ ji so ɛn ninaa ne ntsɛntsɛng ndɔ ɛKiriti gha! Sɔng njwi bok ihwet nang, ne ɛ bok ɛn ihwet! I naas nyini ne ndiinday, ne i bɛɛs njwii!

¹¹ɛLyilyɛghaa wo, njwi so kpyak, irway mos i has, sɔng njwi bok itsura iywɛnɛng nang, i lɛng njwii, sɔng njwi bok ijwee nang.

¹²Njwi kyangase ne ɛtomɛ gha ne ibɔ mos. I sɛ kɛ toke njwii, njwi ne sit nibhɛ ne ɛwɛng. Ne sɛ i baasek njwii nggbang, njwi ne rop iku.[19]

¹³I sɛ kɛ bees njwii nɛ, njwi ne kyii nɛ lyaak. Njwi kɛ te te ifum ne i sirit ne ivebhe ndɔ ɛzay yɛghaa wo, ɛkɔn nɛ ninyi i phok ishis sɛ. iZenge yɛwoo lɛ, ɛlɛy ne njwi so.

¹⁴Sɔng nggɛ haa nyini nɛ te n bak nyini ncwa nang, nzi yang kpɛng nyini daa ɛli ne ɛ so ɛn nyini ninɔn nge ninaa ne nzi sim.

¹⁵Ɛ sɛ kyi bok ɛn nikyɛɛ ne icwam ma ninom ɛnduwubɔ nɛ nibhɛ kɛ tɔɔrek nyini ibol ne roos ɛKiriti yede, sɔng ne ɛ bok ɛn nikyɛɛ na maa nang. Nggɛ te me ɛkyɛɛ mon ndɔ ɛYɛso ɛKiriti gha, lenɛ ne iBol iYɛnɛng ngge ne nggɛ yɛɛs nyini nɛ wo.

¹⁶iPhɛ ɛlɛy, nzi ne roro ne nyinɛn, mɛmɛ ɛn nɛ ne mee.[20]

¹⁷iPhɛ ɛlɛy nggɛ ne tom nyini ne ɛTimɔti ne ɛ soye ɛngɔn nge ndɔ ɛDaray ne nzi sim ɛbhɛ, ɛnyi ne sɛ kyinak daa ne ibol ɛbhɛ. Aa ne taate nyini ne ihywee ne ihywel da ne nggɛ hyel ndɔ ɛYɛso ɛKiriti gha ne ifɛ so kancɛng ne ɛkɔn na ne nzi tɔng nilɔ na gbik ndɔ ne idira ninaa ne roos sa.

¹⁸ɛByin mon kɛ yaa wɛɛ te hame na tang ta bhɛ kyii ɛlɔ mon na dɔng, nibhɛ kɛ ne ma yung yaa tɔɔsek ito.

¹⁹Wu ɛTaanggbey kɛ ne sim, naa ne yungaa yɛɛs ɛlɔ mon na; sɔng nzɛ ne phɛl ihywee ne ivol ninaa ne tɔɔsek itso yɛdaa nggyɛ wo zɔng nang, nzɛ ne i seng ihywee ne ihwet da nɛ nibhɛ bok.

²⁰Daa ɛli ne sɔng igbɔm ɛTaanggbey da so daa ne ivol ɛnu nang, ifɛ so daa ne ihwet.

²¹ɛYa ɛkɔn ne ɛ kɛ kasa ɛn ne, n yɛɛs ɛlɔ mon na ne ihon tsasarak ghe, hang n yɛɛs ndɔ ne ishwim te n boos nyini hywɛɛ?