Read eten 1 iKɔrɔntos 6 Bible Online

1 iKɔrɔntos 6 - eten bible

1 iKɔrɔntos 6

¹Wu ɛdɛ mon bok ibol ne ɛgwaa ɛbhɛ ɛhaa ne roos aa ne mɔn ɛlii ɛ phɛ ne ɛbhɛ ɛshara gha ɛlɔ ninyi na ne hame nibhɛ so ninaa ne roos sa, ɛ sang kyii phɛ nɛ ɛlɔ ninaa ne roos saa?

²Ɛ doo ɛn tɛ ninyi ɛTaanggbey ya bhɛ sɛ bol ɛzay ya ɛshara gha naa? Wu nyinɛn no ɛ sɛ ne bol ɛn ɛzay ya ɛshara gha, ibol ncɛt de iphɛ aa ne ji bɛ nyini woo?

³Ɛ doo ɛn te njwɛɛn njwɛɛn sɛ bol nimalɛka na ɛshara gha naa? iPhɛ nɛ ivol ndɔ ɛzay yɛdaa wo yaa ji bɛ njwɛɛn noo?

⁴Wu ɛ bok ɛn ihywee ivol ndɔ ɛzay yɛdaa wo, ikyee iphɛ yaa ne te ɛ phɛ ɛn nɛ ɛlɔ ninyi na ne hame ninaa ne roos sa i yɛɛ nibhɛ woo?

⁵Nggɛ boote ibol lɛdee wo te ɛ wum ɛn ncwa. Wɛlɛng ɛdɛng ndɔ mon no ne ɛ bok ntsɛntsɛng ne ɛ sɛ yɛɛ ne ryɔng nigwaa na ivol daa?

⁶ɛHaa ne roos sa yaa ne yang ji kyi bo ɛgwaa ɛbhɛ ɛhaa ne roos ɛ phɛ nɛ ne icwam ɛshara, ɛlɔ ninaa ne hame nibhɛ ma yung soye ninaa ne roos!

⁷Ɛli ne aa ma yung phɛ ɛn nɛ nigwaa mon na ɛshara gha, iphɛ kɛ tɔɔrek wu ɛ kɛ ku taasek en. iKyee iphɛ yaa te ɛ sang bo ɛn ɛbɔk kaa? Kɛ sim ma yung luk nyini i ta ring nyini ne ɛkɔn na ne ɛ so ɛhaa mon.

⁸Nyinɛn no ne ito mon ɛ ne mɔn ɛn ibebhe, ɛ phɔrɔt ɛn nikɔn ninyi ɛ phyii byingis ɛn nɛ nikɔn nigwaa ninaa ne roos sa gbik.

⁹Ɛ doo ɛn ɛli nɛ ninaa ne sang so cik ko sɛ sang bhɛ lel dak ne igbɔm ɛTaanggbey da naa? Sɔng ˆɛ luk ɛn itso mon nang. Daa ɛli nɛ ninaa ne ra nzangas sa, nɛ ninaa ne re igunkyi de ntsong ngga, nɛ ninaa ne sang kyinak yak ko, ne nkpilik ga, nɛ ninaa ne tɔk nkpilik ga.

¹⁰Nɛ ninaa ɛyi na, nɛ ninaa ne idɔphiri na, nɛ ninaa ne sɔ nibhɛ tes ziizii wo. Nɛ ninaa ne towos ninyi na, nɛ ninaa ne luk ninyi nibhɛ phɔrɔt nikɔn nibhɛ na gbik. Sɔng ɛdɛ ɛbhɛ sɛ bhɛ lel ne igbɔm ɛTaanggbey da nang.

¹¹ɛLɛy nɛ nidɛng ndɔ mon ka ne ma so ne ile de, ɛlyilyɛghaa wo kɛ ne kuus nyini, i tek nyini ɛ so ɛn ninaa ɛTaanggbey, kɛ ne say nyini wu ɛ so ɛn cik ɛnu ɛyisɛ ɛTaanggbey ndɔ ne irywɛɛk ɛDaray ɛYɛso ɛKiriti, gbik ne ikabyik ɛTaanggbey njwɛɛn.

¹²“Kɛ sim me nɛ wu te n mɔn nikɔn na gbik,” gbik ne iphɛ ɛlɛy sɔng gbik nikɔn na ne bok iphyik nang. “Kɛ sim me nɛ wu te mɔn nikɔn na gbik,” gbik ne iphɛ ɛlɛy, sɔng naa ne te me ɛkpuru ɛdɛ ɛkɔn na nang.[24]

¹³“Kɛ ryɔng ire de ɛlɔ ne iphul, kɛ ne ma ryɔng iphul de ɛlɔ ne re,” ɛTaanggbey ya sɛ ne bunga iphul de ne ire de gbik. Sɔng kɛ ne ryɔng ibek ge ɛlɔ ne nzangas sang, kɛ ryɔng ibek ge te iphɛ nang ɛDaray ye ne ndiinday, ɛDaray ya ɛbhɛ ne hyep ibek ge.

¹⁴ɛTaanggbey ya kaa yiisik ɛDaray yegha tsik ndɔ ne ikpuu, ɛ sɛ ne ma yiisik njwɛɛn tsik ndɔ ne ikpuu ba lenɛ ne ihwet ɛbhɛ.

¹⁵Ɛ doo ɛn ɛli ne ibek mon de soye nilɔ ne ibek ɛKiriti gha naa? Naa ne ji bo ɛlɔ ne bek ɛKiriti wo n byinki ne ibek ɛkuk ne re shwaa ghaa? Wɛlɛng!

¹⁶Ɛ doo ɛn ɛli ne i sɛ ɛnyi gha kɛ byinki ibek ɛbhɛ de ne ɛkuk ne re shwaa gha nibhɛ ne teye ibek idaan dee? Kɛ ku haa ndɔ ne ɛWee ne iBol ɛTaanggbey yo i bo, “Nibhɛ ifaa da yaa ne teye ibek idaan.”

¹⁷Gbik ɛnyi gha ne ɛ kɛ ne byinki ito ɛbhɛ de ne ɛDaray ya, nibhɛ kɛ ne teye nidaan nɛ ndɔ ne ikabyik.

¹⁸Tel ɛn nzangas de! Gbik ɛfɔt to ne ɛnyi gha i mɔn no, sɔng ɛbhɛ dat ibek ɛbhɛ nang. ɛHaa ne ra nzangas sa ne mɔn ibek ɛbhɛ de ɛfɔt.

¹⁹Ɛ doo ɛn te ibek mon de so ideng ne iKabyik ɛTaanggbey de ne iphɛ shɛɛ ndɔ mon no, ne iphɛ le ɛlɔ ɛTaanggbey ya naa? Sɔng nyinɛn ne ɛ bok ɛn ito mon nang ɛTaanggbey ɛbhɛ bok nyini.[25]

²⁰Kɛ say nyini i tal. iPhɛ ɛlɛy ne ɛ nang ɛn ɛTaanggbey ye ne ndiinday ne ibek mon de.