Read eten 1 iKɔrɔntos 8 Bible Online

1 iKɔrɔntos 8 - eten bible

1 iKɔrɔntos 8

¹Daa ne ibol ne ire de ne kɛ nang igunkyi de nang, njwɛɛn i yɛɛ ncɛncɛng wu gbik njwɛɛn no bok ishweng. iShweng ngga ne ito ne ifɛ, ifɛ ne yɛɛs ne itɔɔsek ito, ishwim ifɛ ne lɔl ɛnyi gha.

²Gbik ɛnyi gha ne ɛ wɛɛ te ɛ yɛɛ ɛkɔn na, sɔng ɛ ne yɛɛ ɛkɔn na ne iphɛ kɛ jam mɛ ɛ ma yung yɛɛ wo nang.

³ɛNyi gha ne ɛ ne sim ɛTaanggbey yegha nang, ɛTaanggbey ya ne yɛɛ ɛbhɛ.

⁴Daa ne bol ne ire de ne kɛ nang igunkyi de nang, njwɛɛn i yɛɛ sɔng idɛ igunkyi ɛzay yɛdee wo bok iken nang. Njwɛɛn i ta yɛɛ wu ɛTaanggbey ya so ɛdaan zɔng wɛlɛng ɛdɛng dɔng.

⁵Nikɔn na sonɛ daa ne irywa ne ndɔ ɛzay ne i yeres nibhɛ, “nitaanggbey ya,” ɛbyin ninyi na ne ma sonɛ nɛ nibhɛ re nitaanggbey maa nɛ nidaray maa ntsong ngga,

⁶gbik ne iphɛ ɛlɛy, ɛlɔ njwɛɛn na, ɛTaanggbey ya ne so ɛdaan. Ɛbhɛ ɛ so, ɛTaa gha ne ɛ kɛ ryɔng nikɔn na gbik, ɛhaa ne ishwɛɛ njwɛɛn da lenɛ ne ɛbhɛ, ɛDaray ya ta so ɛdaan, ɛbhɛ ɛ so ɛYɛso ɛKiriti gha ne kɛ lenɛ ne ɛbhɛ i ryɔng nikɔn na gbik, i ta lenɛ ne ɛbhɛ njwɛɛn sonɛ wo.

⁷Gbik ne iphɛ ɛlɛy, sɔng gbik ninyi na ne bok ishweng ne itin ne ibol lɛdee wo nang. Lenɛ ne ibol ne ire de nɛ nibhɛ naas igunkyi de nang, i ne sɛ nibhɛ kɛ re ihywee ne ire yɛdee nggyɛ wo, nibhɛ ne jung i wɛɛ te ire igunkyi de nɛ nibhɛ kɛ re, daa ɛli ne izɔlɔs ne irway nibhɛ i jung to, daa ɛli nɛ nibhɛ kyi tɔ kyɔkyɔt, nibhɛ ne yaa wɛɛ tɛ nibhɛ kɛ te kpɛɛ.

⁸Sɔng ire de iphɛ yɛɛs ne njwɛɛn cɛcɛk ne ɛTaanggbey ya nang. Wu njwɛɛn kɛ sang re, sɔng njwɛɛn yaa ne tɛ ye nang, wu njwɛɛn kɛ ne re, sɔng njwɛɛn yaa ne hantey yɛ nang.

⁹Ne ɛ wɛɛ ɛn nyini yɛnɛng ɛlɔ ne aa yung le ɛn ne sɔnɔ da ne kɛ sɔnɔ nyini wo ɛ te ɛn nyini ikɛɛ ne kyibhɛ ninaa nɛ nibhɛ so kyɔkyɔt to.

¹⁰Wu ninaa nɛ nibhɛ so kyɔkyɔt to kɛ yaang ngɛ, igyɛ wo ne ɛ bok ishweng ne itin ne ibol lɛdee nggyɛ wo, ɛ re ire de ndɔ ne icwam ne igunkyi de, sɔng iphɛ yaa ne hante ɛnyi ɛkyɔkyɔt ta ne ihwet ɛli ne aa ji bhɛ re ire igunkyi de nang nge?

¹¹ɛLɛy ne ishweng mo da yaa ne ji kyi te ɛdɛ ɛgwaa mon na ne ɛKiriti gha kɛ ku ɛlɔ ɛbhɛ gha ɛ ho.

¹²Ɛ mɔn ɛn nigwaa mɔn ɛfɔt daa ɛli ne ɛ subhus ɛn izɔlɔs ne irway nibhɛ ne ihywɛ kyi tɔ kyɔkyɔt, nibhɛ sang yɛɛ iyɛnɛng ne ibebhe, ɛlɛy ɛKiriti ne ɛɛ ne mɔn ɛn ɛbhɛ nɛ.

¹³iPhɛ ɛlɛy, wu ire de iphɛ ne te ɛgwaa gha ne ɛ so ɛhaa ne roos sa mɔn ɛfɔt to, sɔng na ne tang re inwam nang, ɛlɔ ne naa yung te ɛdɛ ɛgwaa gha ne ɛ so ɛhaa ne roos sa mɔn ɛfɔt.