Read eten 1 iKɔrɔntos 9 Bible Online

1 iKɔrɔntos 9 - eten bible

1 iKɔrɔntos 9

¹Nzo ne ishwɛɛ ne ito nge. Hang ma n sang some ɛngɔn ne tom ɛYɛso gha naa? Hang nggɛ ma sang yaang ɛDaray ɛYɛso yegha naa? Hang kɛ ma sang lenɛ ne ɛtomɛ nge ɛ say ɛn ɛDaray yegha naa?

²Wu n sang some ɛngɔn ne tom ma ɛYɛso gha ɛlɔ nidɛng, ne nzo me nɛ ɛlɔ mon daa ɛli ne nyinɛn no ɛ so ɛn ninyi na ne iphɛ kɛ tɔɔrek wu nzo me ɛngɔn ne tom ɛDaray ya.

³iBol lɛdee wo ne nzi kyii nɛ ɛlɔ ninaa nɛ nibhɛ phɛl me wo.

⁴Hang iphɛ ma sang so kancɛng i nang njwii ire de ne inɛn ne sɔ da naa?

⁵Hang iphɛ ma sang so kancɛng njwi boos nikuk mos sa ne ɛ so ɛgwaa ɛhaa ne roos, ne ihywel mos da ɛli ne ɛbyin ninɔn ne tom ma, nɛ nigwaa ɛDaray ya, nɛ niKyɛfas se na i mɔn no naa?

⁶Hang yung so mee wo ne ɛBanabas sa zɔng ne iphɛ so ngbingbing njwi mɔn ɛtomɛ gha ne njwi aa re ne ito mos dee?

⁷ɛYa ɛsooja ɛbhɛ ɛ re ne ito ɛbhɛ dee? ɛHay ɛbhɛ aa tubhus itson ɛnap be ɛ sang re ikpam mɛ woo? ɛHay ɛbhɛ sɛ i hyep ᐩigyol de ɛ kyii shɛɛ tang sɔ mben nɛ woo?

⁸Nzi bol ibol lɛ de wo ne icwas ɛten ɛsii naa? Hang iMɛmɛ ɛMuusaa da kɛ ma sang bol ɛlɛy naa?

⁹Daa ɛli ne kɛ haa ndɔ ne iMɛmɛ ɛMuusaa da i bo, “Sɔng ɛ sɔɔl ɛrandɔng ne hap ihwap po iziring ɛnu nten de ne ɛbhɛ sɔɔn nzaa de nang.” ɛRandɔng ngo zɔng ne ɛTaanggbey ya ne wɛɛ ɛbhɛ naa?[27]

¹⁰Nzi bo ɛɛ bol ibol lɛdee wo ririk daa ne ito njwɛɛn nang? ɛTsak kɛ haa ibol lɛdee wo daa ne ito njwɛɛn, daa ɛli ne i sɛ ɛhaa ne hap pa i hap po, ɛhaa ne sɔɔn na ne maa sɔɔn no, nibhɛ ne yɛk ne irway wu nibhɛ yaa sɛ ihop nibhɛ daa ɛkɔn na ne kɛ hap po.

¹¹Wu njwi kɛ tubhus ihywee ne ikabyik ge ndɔ ne irway mon da, iphɛ ne ji soye ɛdɛ ɛgbaang ɛkɔn no ne njwi yaa pha ire ne ibek ge ɛlɔ mon naa?[28]

¹²Wu iphɛ ne so kancɛng ɛbyin ninyi na sɛ ɛkɔn na ɛlɔ mon na, iphɛ sɛ ne ji sang so kancɛng ɛlɔ mos sa iphɛ phyin ne i? Gbik ne iphɛ ɛlɛy, sɔng njwi kɛ ne mɔn ɛtomɛ ne ibol lɛdee nggyɛ wo nang, njwi kɛ ne yang rop iku ndɔ nikɔn na gbik daa ɛli ne njwi yaa yung ring ɛtomɛ ne sanga iBol iYɛnɛng ɛKiriti de ne re ɛnu ɛyisɛ.

¹³Ɛ yɛɛ ɛn ncɛncɛng ɛli nɛ ninyi na nɛ nibhɛ mɔn ɛtomɛ gha ndɔ ne iDeng ngge i sɛ ire nibhɛ de nɛ ne ndɔ yɛwo. Ɛ ta yɛɛ ɛn ɛli nɛ ninaa nibhɛ ma mɔn ɛtomɛ gha ɛlɔ ɛraa ne hap itsanga gha i ma sɛ ire nibhɛ de ndɔ ɛkɔn na ne kɛ nang te hap ne itsanga de.[29]

¹⁴Ne ma so ɛlɛy ne mang, ɛTaanggbey ya kɛ yɛk ngɛ, ɛ bo wu ninyi na nɛ nibhɛ sanga ibol iyɛnɛng ngge nibhɛ aa ne ma sɛ ire nibhɛ de nɛ ne ndɔ yɛ.

¹⁵Gbik ne iphɛ ɛlɛy, sɔng nggɛ ne yɔng nggbinggbing te mɔn me ɛlɛy nang. Sɔng nzi ne haa ɛwee yɛwoo wo nzi bo te mɔn me ɛlɛy yang. Nduk te ne n ku ne yaa ring me ne hal ɛgyɛy ya daa ne ibol iyɛnɛng ngge ne nzi sanga tang tal me wo.

¹⁶Sɔng nzi ne hal ɛgyɛy ya daa ɛli ne nzi sanga ibol iyɛnɛng ngge nang, daa ɛli ne iphɛ some nggbinggbing mɔn ɛlɛy. Ɛɛy! iPhɛ ne some ɛkɔn ne ɛnik, wu nggɛ sang sanga ibol iyɛnɛng ngge.

¹⁷Te sɛ yɔng nzi mɔn ɛtomɛ nge gha daa ne kasa nge, sɛ ne mɔn me iyɛnɛng. Daa ɛli ne naa ne sang yɛɛ ne kasa wo nang, nzi ne mɔn ɛtomɛ gha ne ɛTaanggbey kɛ tek me nɛ ndɔ ne iwɔ nge.

¹⁸iKyee ne yaa ne ji tal mee? Yaa tal me ɛlɛ: wu naa sanga iBol iYɛnɛng ngge, te ne mɔn ɛlɛy tang i tal me, sɔng ne n yɔng wu nggbinggbing te nang me ɛkɔn na ne ɛ so yaa nang ninaa ne sanga wo nang.

¹⁹Nzo ne ishwɛɛ ne ito nge, sɔng nzo me ɛkpuru ɛnyi nang, gbik ne iphɛ ɛlɛy, nggɛ ne bo ito nge te ɛkpuru ninyi na gbik te nzɛ n hɔ ninyi gbom.

²⁰I sɛ nzo ɛlɔ niYahodawa na, ne ma n te te ɛdɛ ɛYahodawa gha te nzɛ n hɔ niYahodawa na. Ne sɛ nzo ɛlɔ ninaa ne iphɛ so nibhɛ nggbinggbing nibhɛ roos ikpii ne iMɛmɛ ɛMuusaa da ne ma n te tɛ nibhɛ te nzɛ n hɔ ninaa ne roos ikpii ne iMɛmɛ ɛMuusaa da, gbik ne iphɛ ɛlɛy sɔng ikpii ne iMɛmɛ ɛMuusaa da ne jung bok ito daa mee nang.

²¹I ne sɛ nzo ɛlɔ ninaa nɛ nibhɛ sang so niYahodawa na, ne iMɛmɛ ɛMuusaa da sang bok ito de daa nibhɛ wo, ne ma n te tɛ nibhɛ te nzɛ n hɔ ninaa ne iMɛmɛ ɛMuusaa da sang bok ito de daa nibhɛ wo. Gbik ne iphɛ ɛlɛy sɔng i bo wu hang nzi roos ikpii ɛTaanggbey ba nang, kwa, nzo me ɛhaa ne roos ikpii ɛKiriti da ririk.

²²I ne sɛ nzo ɛlɔ ninaa ne ìnang ne itin nibhɛ da so kyɔkyɔt to, ne ma n te te ɛhaa ne ìnang ne itin ɛbhɛ so kyɔkyɔt te nzɛ n hɔ nibhɛ. Nggɛ tes me nikɔn na gbik ɛlɔ ninyi na gbik, te n yaang nggɛ phɔt ɛbyin nɛ.

²³Nggɛ mɔn ɛlɛ wo gbik ɛlɔ ne bol iyɛnɛng ngge, te nzɛ ɛhaa nge ɛwɛng ndɔ ne sanga ibol iyɛnɛng ngge.

²⁴Ɛ yɛɛ ɛn ncɛncɛng, ninaa ne mat ishwaa da i so gbom, ɛnyi ɛdaan zɔng ɛbhɛ ne tel ɛbhɛ re ito yɛ. iPhɛ ɛlɛy ne ɛ see ɛn ito ɛli ne aa bhɛ re ɛn ito de.

²⁵Ninaa ne tel nggbiy da ne bo nten nibhɛ gbaat ibek nibhɛ gbom. Nibhɛ mɔn ɛlɛ wo daa ɛli ne ɛrɔngɔ i tɔk te ɛbhɛ ne sɛ re ito yɛ ne ji tal ɛbhɛ ne ɛkɔn ne aa phyɔngɔle ɛ bees se, njwɛɛn no nang, sɛ ne tal njwɛɛn ne ɛkɔn ne so ɛhaa ne inat.

²⁶iPhɛ ɛlɛy sɔng nzi ne tel nggbiy ɛbuu nang, sɔng nzi hal irywen ɛbuu nang.

²⁷Nzi ne gbaat ibek nge de gbom, nggɛ bo iphɛ te ɛkpuru nge, ɛlɔ ne yaa yung sɛ ɛtsim mɛ ne nggɛ sanga nidɛng ibol iyɛnɛng ngge, ji kyi bhɛ ring me ne say ilong nge.