Read eten 2 iKɔrɔntos 1 Bible Online

2 iKɔrɔntos 1 - eten bible

2 iKɔrɔntos 1

¹ɛWee yɛwoo wo le ɛlɔ ɛBulus ne ɛ so ɛngɔn ne tom ɛYɛso ɛKiriti, lenɛ ne icwas ɛTaanggbey, ne ɛgwaa njwɛɛn ɛTimɔti. Nzi haa idira ninaa ne roos ɛTaanggbey ye nɛ nibhɛ so ne iKɔrɔntos gbik ne ninyi ɛTaanggbey ya nɛ nibhɛ so ne ivel ne iKaya.[1]

²Te ɛTaanggbey ya ne ɛ so ɛKyɛɛ njwɛɛn na, ne ɛDaray ɛYɛso ɛKiriti gha nang nyini izɛɛng ne irway ne laal.

³Te dɛp ɛTaanggbey ye ne ɛ so ɛKyɛɛ ɛDaray ɛYɛso ɛKiriti njwɛɛn, ɛbhɛ so ɛTaa gha ne ɛ so hyɔrɔ ne san iyɔm, ne ɛTaanggbey ne wɔrɔp irway gbik.

⁴ɛTaanggbey ɛbhɛ wɔrɔp njwii nten de njwi so ndɔ ne nggbang, te njwi ma sɛ njwi wɔrɔp ninaa nɛ nibhɛ sɔ nggbang ngga ne ihywee ne iwɔrɔp ba ne njwii sɛ ɛlɔ ɛTaanggbey ya.

⁵ɛLi ne njwɛɛn i sɔ nggbang ga ɛli ne ɛKiriti gha ne ito ɛbhɛ de kɛ sɔ wo, ɛlɛy ne yaa ne ma ta lenɛ ne ɛDaray ya njwɛɛn sɛ iwɔrɔp ɛTaanggbey da.

⁶Wu njwii ne sɔ nggbang ngga, njwii ne sɔ te ɛ sɛ ɛn iphɔrɔt gbik ne iwɔrɔp. Wu kɛ ne wɔrɔp njwii, te ne ɛ ma sɛ ɛn iwɔrɔp ba ɛli ne aa bo ɛn ɛbɔk ɛ rop ɛn iku daa ne nggbang ngga ne ɛ sɔ ɛn no ɛli ne njwii ma sɔ wo.

⁷Sɔng njwii to irway ne nyinɛn nang, daa ɛli ne njwii yɛɛ ihywee ne nggbang mos da ne ɛ sɔ ɛn, ɛlɛy ne aa ne ma sɛ ɛn ihywee ne iwɔrɔp ba ne kɛ wɔrɔp njwii nɛ wo.

⁸Nigwaa en, sɔng njwii sim te ɛ sɛ doo ɛn ihywee ne nggbang ngga ne njwi kɛ sɔ ne iSiya de nang, nggbang mos da ne iSiya de kaa kat, mpɛ phyin ihwet mos, njwi ne yaa wɛɛ te njwi aa kus.[2]

⁹Nggbang ngga kaa te njwi ku yaa phok ndɔ ne irway mos da te kɛ hyɛ njwii ɛshara ne iku. Nggbang ngga kaa ne sɛ njwii ɛlɛ wo ɛlɔ ne njwii aa yung yaa wɛɛ te njwii mɔn ɛtomɛ ne ihwet mos, mpɛ kaa ne te ɛlɛ wo te njwi yang wɛɛ ɛTaanggbey ye ne ɛbhɛ ɛ so ɛhaa ne yiisik ninaa ne ikpuu na tsik ko.

¹⁰ɛTaanggbey ya kaa phɔt njwi ɛnu ne iku ibebhe[3] yɛdee wo. Aa ne phɔt njwii. Njwi kɛ ne sit ɛbhɛ ne irwisɛ daa ɛli ne ɛ sɛ ta phɔt njwii dɔng.

¹¹Phyik ɛn njwii ne boote ne ɛTaanggbey. Yaa ne lenɛ ɛlɛ wo ninyi na gbom yaa ne tɔɔrek ɛTaanggbey ye irway ihwala daa ne ito mos, lenɛ ne ɛwɛng nga ne kɛ nang njwii daa ɛli ne ɛTaanggbey ya kɛ say ɛroo gha nɛ ninyi na gbom kɛ roro njwii nɛ wo.

¹²Njwii lɛng ɛgyɛy daa ɛli ne icwas ne irway mos kɛ tɔɔrek wu njwi kɛ shɛɛ ishwɛɛ kang, ne irway mos ijwaan ndɔ ɛzay ya. Yang ji so ndɔ ne ishwɛɛ da ne njwi kɛ shɛɛ ne nyinɛn no. Naa yɔng njwi kɛ mɔn ɛlɛ wo ndɔ ne itin nɛ te ɛTaanggbey lenɛ ne izɛɛng ɛTaanggbey de, sɔng ne ntsɛntsɛng ɛzay yɛdee nang.

¹³Njwii haa nyini ɛkɔn na ne aa tɔng ɛ seng ɛn. Gbik ne iphɛ ɛlɛy, ɛ kɛ ne seng ɛn ɛbyin ne ivol mos sa ncɛt, nggɛ ne yɛk ne irway yɛ nzi ne bo te sɛɛ yɔng aa seng ɛn ifɛ gbik,

¹⁴wu ɛ kɛ ne ma yung sang seng njwii ɛlyilyɛghaa wo, sɛ ne sɛ igbey yo ne ɛDaray njwɛɛn ɛYɛso gha sɛ bhɛ kyii wo, ɛ sɛ ne lɛng ɛn ɛgyɛy ne njwit ɛli ne njwii ma lɛng ne nyinɛn no.

¹⁵Nzi ku yɛɛ iphɛ ɛlɛ wo, iphɛ phɛ kɛ te nggɛ ku i sim na tsa kyiisi nge da ɛlɔ mon na, te ɛ sɛ ɛn ɛwɛng ne ikyili nge da ɛte ɛphaa.

¹⁶Nggɛ ryɔng me te n phyii roos ɛlɔ mon na mbɛ ne iMakyidɔniya, sɛ ne sɛ nggɛ bhɛ kyii, ne n da phyii roos ɛlɔ mon na dɔng. Te ne ɛ ji phyik ɛn mɛɛn ndɔ ne ihywel nge da ne naa phɛ iYahudiya de.[4]

¹⁷Ɛ wɛɛ ɛn te nggɛ ryɔng me nzi doo ɛkɔn na ne nzi mɔn naa? Hang ɛ wɛɛ ɛn te nggɛ ryɔng me ne icwas ɛten ɛsii, ne naa yɔng “Ɛɛy,” nggyi ta yɔng “Kwa naa?”

¹⁸ɛTsak, ɛli ne ɛTaanggbey ya so sɛ kyinak daa ne ibol ɛbhɛ de, ɛlɛy sɔng ibol mos de ne so “Ɛɛy” ne “Kwa” nang.

¹⁹Daa ɛli ne ɛYɛso ɛKiriti gha ne ɛ so ɛNgɔn ɛTaanggbey ya, ne nggaa tɔng nyini ibol ɛbhɛ de, ɛSila[5] gha, gbik ne ɛTimɔti gha ma tɔng nyini wo, sɔng ɛ so ɛnyi ne so “Ɛɛy” ne “Kwa” nang. Ɛbhɛ yang so “Ɛɛy” ɛTaanggbey.[6]

²⁰Daa ɛli ne kɛ lenɛ ne ɛbhɛ ɛTaanggbey ya shwaak nikɔn na ne ɛ kɛ sim-mɛ wo gbik. iPhɛ phɛ kɛ te i lenɛ ne ɛYɛso ɛKiriti gha njwɛɛn i yɔng “Ɛɛy” yo, te nang ɛTaanggbey yegha ne ndiinday.

²¹ɛTaanggbey ya ɛbhɛ kɛ te njwit to ne nyinɛn no kɛ kyinak gɛgɛy ndɔ ɛKiriti gha. Ɛbhɛ kɛ ne ta kasa njwɛɛn ndɔ ɛtomɛ yɛghaa wo.

²²ɛTaanggbey ya kɛ yɛk njwɛɛn ne ɛlamba ne aa tɔɔrek wu njwɛɛn soye ninaa ɛbhɛ. Ɛ kɛ ne nang njwɛɛn iKabyik ɛbhɛ ndɔ ne irway njwɛɛn, te njwɛɛn seng ncɛncɛng wu ɛ sɛ shwaak ɛkɔn na ne ɛ kɛ ku sim njwɛɛn nɛ wo.

²³ɛTaanggbey ɛbhɛ ɛ so ɛshɛɛda nge wu nggɛ sang yɛɛs ne iKɔrɔntos de ɛlɔ ne naa yung hante nyini ne irighitik.

²⁴Sɔng njwii bo njwi yaa tɔɔrek nyini ndiinday daa ne ìnang ne itin mon de nang, kwa, njwɛɛn i mɔn ɛtomɛ gha ɛte, te ɛ sɛ ɛn irway ihwala daa ɛli ne ɛ kɛ kyinak ɛn ne ihwet ndɔ ne ìnang ne itin mon de.