Read eten 2 iKɔrɔntos 10 Bible Online

2 iKɔrɔntos 10 - eten bible

2 iKɔrɔntos 10

¹Mee ne ɛBulus so ne ito nge nzi roro ne nyinɛn, mee wo ne i bo wu nzo hywɛɛ wo ne i sɛ nzo nɛ nyinɛn no, ne ji yɔng wu nzo nzaratat to ne i sɛ n sang so ne nyinɛn no. Nzi ne roro ne nyinɛn ndɔ ne irywɛɛk ɛKiriti ne ɛ so ihywɛɛ ɛ ta so lyaak.

²Nzi roro ne nyinɛn, sɔng ɛ te ɛn mɛɛn n boos nyini nzaratat ne sɛ́ sɛ nggɛ yɛɛs so nang, daa ɛli ne nzi yɛɛ nzɛɛ yɛɛ ne tɔɔrek nzaratat nge de daa ninyi nɛ nibhɛ bo wu njwii mɔn ɛtomɛ mos sa ne icwas ɛzay da.

³ɛTsak njwi so ndɔ ɛzay ya, gbik ne iphɛ ɛlɛy sɔng njwii ne hal itsom be tɛ ninaa ɛzay nang.

⁴Daa ɛli ne sɔng nikɔn ne itsom mos sa so ninaa ɛzay ya nang, nibhɛ so ninaa ɛTaanggbey nɛ nibhɛ bok ihwet. Nibhɛ ne njwii mɔn ne ɛtomɛ njwi bunga ne icwas ne irywɛɛk ga ne ifɛ bok ihwet da.

⁵Njwii bunga ishamas ninaa ne hal ɛgyɛy de gbik nɛ nikɔn na nɛ nibhɛ ring ne seng ɛTaanggbey yegha, njwii ne yaak ninyi nɛ nibhɛ kyii ne icwas nibhɛ ndɔ ne roos ibol ɛKiriti de.

⁶ɛTsim mɛ njwi kɛ seng ɛ kɛ tɔɔrek ɛn wu ɛ so ɛn ninaa ne roos ibol ɛKiriti de, njwi kɛ ne ji ryɔng en njwi yaa bak gbik ɛnyi gha ne ɛ kɛ sang roos ibol ɛKiriti de nggbang.

⁷Ɛ wɛɛ ɛn ɛgɔɔ ne izay nikɔn na zɔng![25] Wu ɛdɛ ɛnyi gha hal ɛn ɛgyɛy wu ɛ soye ɛnyi ɛKiriti gha, nzi ne sim te ɛ sɛ seng wu njwi ma soye ninaa ɛKiriti na ne mang.

⁸Wu nggɛ hal ɛgyɛy ya daa ne ihwet da ne ɛDaray ya kɛ nang njwii wu te byinɛ nyini nɛ wo i sang kyii tobhos nyini nɛ wo, sɔng iphɛ ne so ɛkɔn ne ncwa nang.

⁹Sɔng nzi sim te ɛ sɛ yaang ɛn te ɛwee nge wo i baasek nyini ɛnik nang.

¹⁰ɛByin ninyi na bo; “iWee ɛBulus da so nzaratat, ivol lɛ ne ta bok ihwet. I ne sɛ ɛ so ɛlɔ njwɛɛn na, ne ɛ so lyaak, ivol ɛbhɛ da ne so hywɛɛ.”

¹¹Nggbinggbing ihywee ninyi yɛdee nggyɛ wo seng wu ɛkɔn na ne njwii haa nyini nɛ ndɔ ne iwee mos da ne i njwi sɛ njwi sang ngɛ wo, ɛbhɛ ne njwii mɔn ne i sɛ njwi so ne nyinɛn no.

¹²Sɔng njwi yaa tes se niwamang nang. Sɔng njwii sim njwi sɛ so tɛ ninyi na nɛ nibhɛ wɛɛ tɛ nibhɛ phyin ɛbyin nɛ gbik ko nang. Ninyi nɛ nibhɛ ten ito nibhɛ de nɛ ninyi na nɛ nibhɛ ma so tɛ nibhɛ wo, ninyi nɛ nibhɛ ten ito nibhɛ nɛ ninyi na, niwamang ngaa nggyɛy.

¹³Sɔng njwi yaa hal ɛgyɛy ya njwi phee ne igbak nang. Njwi yaa yang hal ɛgyɛy ya cɛcɛɛy ne ɛtomɛ gha ne ɛTaanggbey ya kɛ yɛk njwi nɛ, kaabi ɛtomɛ gha ne ɛ kɛ phyii bhɛ hɔn ɛlɔ mon na.

¹⁴Daa ɛli ne ɛ ma so ɛn ndɔ ninyi na ne ɛTaanggbey ya kɛ tom njwii nɛ wo, sɔng njwi kɛ phee igbak nten de ne njwi kɛ tɔng nyini iBol iYɛnɛng ɛKiriti de nang.

¹⁵Sɔng njwi kɛ phee igbak nten de njwii hal ɛgyɛy ya daa ɛtomɛ gha nɛ nihak ninyi na kɛ mɔn no nang. Njwi kɛ yɛk ne irway te ìnang ne itin mon da sɛɛ hɔn, te njwi hante ne mɔn nitomɛ na gbom ndɔ mon no kancɛng ɛli ne ɛTaanggbey ya kɛ nang njwii wo.

¹⁶ɛLɛ wo ne njwi yaa sanga iBol iYɛnɛng ngge, njwi phee nɛ ɛlɔ mon na, njwi phɛ nɛ ne ihwak ivel. Sɔng njwii sim te njwi sɛ hal ɛgyɛy ya ne ɛtomɛ ne ɛhak ɛnyi kɛ ku mɔn ɛlɔ gha ne kɛ nang ɛbhɛ ne ɛtomɛ ɛbhɛ nang.

¹⁷ɛLi ne ɛWee ne iBol ɛTaanggbey yo i bo wo, “Gbik ɛnyi gha ne ɛ ne sim te aa hal ɛgyɛy ya, te ne ɛ hal ndɔ ɛDaray.”[26]

¹⁸Sɔng ɛnyi gha ne ɛ ton ito ɛbhɛ de ɛbhɛ ne ɛTaanggbey i say nang, yang so ɛnyi gha ne ɛTaanggbey ya ton ɛbhɛ.