Read eten 2 iKɔrɔntos 12 Bible Online

2 iKɔrɔntos 12 - eten bible

2 iKɔrɔntos 12

¹iPhɛ so nggbinggbing nggu i hal ɛggyɛy ya, nzi ne yɛɛ sɔng iphɛ yaa phyik ne ɛkɔn nang. ɛLyilyɛghaa wo, naa ne bol daa nikɔn na ne ɛDaray ya kɛ phaal me nɛ ndɔ nibok ne iyuwa.

²Nzi yɛɛ ɛdɛ ɛhaa ne roos ɛKiriti yegha, ɛhaa ne izenge ɛlɛ ishay yɛ kɛ hɔn ɛnduwubɔ ne iphɛ nwaas, ne kaa bo ɛbhɛ i phɛ nɛ daa ɛnyu ne irywa. Hang ɛ kaa so ndɔ ne ibek yɔɔ, hang ibol ne iyuwa yɔɔ, sɔng nzi yɛɛ nang, ɛTaanggbey zɔng ɛbhɛ ɛ yɛɛ.

³Nzi yɛɛ ɛnyi yɛghaa nggyɛ wo, hang ɛ kaa so ndɔ ne ibek yɔɔ, hang ɛ kaa ma sang so ndɔ ne ibek yɔɔ, sɔng nzi yɛɛ nang, ɛTaanggbey zɔng ɛbhɛ ɛ yɛɛ.

⁴Kaa ne bo ɛbhɛ i phɛ nɛ daa ne ɛnyu ne irywa wo ɛbhɛ tenes ivol da ne hame ɛnyi sɛɛ yɛɛ ne tɔng ngɛ, ivol da ne kɛ ring ɛten ɛsii ne tɔng ngɛ.

⁵Na ne hal ɛgyɛy ne ɛnyi yɛghaa nggyɛ wo, sɔng na hal ɛgyɛy ya ne ito nge nang, naa yang wɛɛ itaasek nge.

⁶Wu naa ma yung hal ɛgyɛy ya, sɔng na ne te me ɛwamang nang, daa ɛli ne naa tɔng itin nɛ. Sɔng naa ne hal ɛgyɛy ya nang, daa ɛli ne sɔng nzi sim te ɛdɛ ɛnyi gha sɛɛ bo me te n phyin ɛli ne nzo daa ɛkɔn na ne nzi mɔn ne ɛhaa ne nzi bol lo nang.

⁷Gbik ɛli ne kɛ phaal me nikɔn ne kparat ta gbom ndɔ ne iyuwa de, kɛ ne tom me ne ɛdɛ ɛkɔn na ne ɛ le ɛlɔ ɛShɛtan te ɛ tak me iyɔm, ɛ ne to me ibek te itsutsɔ te ɛ ring me ne hal ɛgyɛy ya.

⁸Nggɛ boote ne ɛDaray ya n te ɛtat wu te ɛ tul me ɛkɔn nɛghaa wo.

⁹Ɛ kɛ ne yaak me, “iZɛɛng nge de kɛ hɔn nɛ nɛ, daa ɛli ne i lenɛ ne itaasek ga ne yaang ndiinday nge.” iPhɛ ɛlɛy naa ne hante ne hal ɛgyɛy ya ndɔ ne itaasek nge da ne irway ihwala te ihwet ne ndiinday ɛKiriti de shɛɛ ndɔ mee.

¹⁰Daa ɛli ne nzo ɛhaa ɛKiriti gha, iphɛ kɛ ne te me n bok irway ihwala ndɔ ne ikyɔkyɔt de, ne itowos da, ne ɛmpyep pa, ne nggbang ngga gbik ne icɔk irway da. Daa ɛli ne i sɛ nzo kyɔkyɔt to nang nten nɛ ne nzi ne ji bok ihwet.

¹¹Nggɛ ne te me te ɛwamang, nyinɛn ɛ kɛ ne te ɛn mɛɛn n te me ɛwamang nga. iPhɛ kɛ jam mɛ sɛɛ yɔng nyinɛn no ɛɛ dɛp ɛn mɛɛn. Gbik ɛli ne nggyi sang so ɛkɔn na, sɔng iphɛ kɛ ne tɔɔrek wu “igbaang ninɔn ne tom” mon na ne phyin me nang.

¹²Kaa mɔn nikɔn ne kparat ndɔ mon no lenɛ ne mee nten de ne nggaa mɔn ɛtomɛ gha ndɔ mon no ne ɛbɔk. Nikɔn ne kparat tɛnaa wo kaa ne tɔɔrek wu nzo me ɛngɔn ne tom ntin nɛ.

¹³ɛYa nkiinɛ ne ˆɛ lap ɛn nyini ne ɛbyin ninaa ne roos saa? Yaa yɔng ɛli ne nggaa sang sim ɛ phyik ɛn mɛɛn ne ijam bee? Ne ɛ hana ɛn mɛ ɛn nɛ!

¹⁴Ɛlyilyɛghaa wo nzi sim te naa yɛɛs ɛlɔ mon na iyɛɛs ne itwat tɛ. Sɔng nzi ne bo aa tɔɔk ɛn irighitik nge nang, daa ɛli ne nyinɛn ne nzi sim sɔng nikɔn mon nang. Sɔng ninɔn na bhɛ tek ɛkɔn na nibhɛ wɛɛ nɛ niKyɛɛ nang, nikyɛɛ na bhɛ yang tek ɛkɔn na nibhɛ wɛɛ nɛ ninɔn nibhɛ.

¹⁵iPhɛ ɛlɛy naa ne phoo gbik ɛkɔn na ne n bok daa mon no ne irway ihwala, naa ma yung nang ito nge. Wu nzi ne sim nyini gbom ɛlɛ wo aa ne ji sim ɛn mɛɛn ncɛt bɛ?

¹⁶Te ɛli ne ɛ yɛɛ ɛn ɛli ne nggaa sang nang nyini irighitik ge, ɛdɛng sɛɛ ne wɛɛ te nggɛ dyɛɛl nyini, nggɛ luk nyini ne irywɛɛk.

¹⁷Hang nggaa yung luk nyini lenɛ ne ɛdɛng ndɔ ninaa ne nggaa tom nibhɛ ɛlɔ mon na naa?

¹⁸Nggaa roo ɛTitus se te ɛ yɛɛs, nggaa ne byinki nibhɛ ne ɛdɛ ɛgwaa gha nibhɛ yɛɛs. Hang ɛTitus sa kaa yung i luk nyini naa? Kwa! ˆƐɛ ma yɛɛ ɛn ɛli ne njwit to ne ɛTitus sa njwi bok iKabyik idaan nɛ, njwii mɔn nikɔn na nidaan nɛ.

¹⁹Sɔng ɛ yung wɛɛ ɛn te njwii mɔn nikɔn na te njwi kyɛngɛse itso mos ɛlɔ mon na nang. ɛTaanggbey ɛbhɛ ɛ so ɛshɛɛda mos wu itin nɛ ne njwii tɔng ɛli ne ɛKiriti sɛɛ tɔng, te njwi byinɛ nyini ne njwii sim.

²⁰N bok ɛnik ɛlɔ ne ya sɛ nggɛ yɛɛs so sɔng na ne sɛ nyini ɛ so ɛn ɛli ne nzi sim nang, sɔng naa ne ma so nyini ɛli ne ɛ sim ɛn nang. N bok ɛnik ɛli ne naa yung i sɛ nidɛng ndɔ mon no nɛ nibhɛ bok ishamas, ne ɛnkyis, ne njenjek, ne sim ito, ne bees ivol, ne ivol mumuk, ne ito ihet, ne ihywel shwalala.

²¹N bok ɛnik ɛlɔ ne yaa yung sɛ nggɛ ta yɛɛs ɛlɔ mon na, ne n sɔ ncwa ɛnu ɛyisɛ ɛTaanggbey ya ne nzi re ɛbhɛ ntsong ngga. N bok ɛnik ko ɛli ne nzɛ yung yɛk irway ishwii, daa ɛli ne ɛbyin mon tɔ mɔn ɛfɔt to nɛ nibhɛ kaa ku i mɔn no, ninaa nɛ nibhɛ kɛ sang san ɛbɔk daa ne ɛfɔt ne re ɛhay ne icwa, ne nzangas, ne ihyop ne phok yɛnɛng nikɔn ne yɔm ncwa.