Read eten 2 iKɔrɔntos 13 Bible Online

2 iKɔrɔntos 13 - eten bible

2 iKɔrɔntos 13

¹iYɛɛs sɛdaa wo yaa teme iyɛɛs ne itwat tɛ ɛlɔ mon na. ɛLi ne ɛWee ne iBol ɛTaanggbey yo i bo, “iPhɛ ne so ngbingbing i taal ibol de daa ne ibol nishɛɛda ifaa hang itwat yɔɔ.”

²Nten de ne nggaa yɛɛs iyɛɛs ne ifaa nge da, nggaa ne kpɛngke ninyi na nɛ nibhɛ kaa mɔn ɛfɔt to ɛyisɛ gha gbik ne ɛbyin ninyi na. Nzi ne ta tiil ikpɛng ngɛdaa wo ɛlyilyɛghaa wo ne n sang so ɛlɔ mon na. Sɛ ne sɛ nggɛ yɛɛs so sɔng nzɛ ne tek nibhɛ yɔyɔk nang.

³Wu ɛ sim ɛn te ɛ sɛ seng ɛn ncɛncɛng wu ɛKiriti gha i mɔn ɛtomɛ gha ne mee wo, ne ɛ seng ɛn iphɛ ɛlɛ, sɔng ɛKiriti gha i bol ne nyinɛn yɔyɔk nang, ɛ yang bol ne nyinɛn ne ihwet.

⁴Gbik ɛli ne kaa gangat ɛKiriti yegha ndɔ ne kyɔkyɔt de, ne ɛ so ɛken lenɛ ne ihwet ne ndiinday ɛTaanggbey. Njwi ne ma so kyɔkyɔt ndɔ ɛKiriti gha, gbik ne iphɛ ɛlɛy, njwi ne so niken lenɛ ne ihwet ne ndiinday ɛTaanggbey te njwi mɔn ɛtomɛ gha ne njwi yaa mɔn ndɔ mon no.

⁵Tɛɛsek ɛn itso mon, ɛ phom ɛn itso mon te ɛ seng ɛn hang ɛɛ shɛɛ ɛn ndɔ ne ìnang ne itin da yɔɔ. Ɛ doo ɛn ɛli ne ɛYɛso ɛKiriti gha so ndɔ mon no naa? Wu ɛ doo ɛn ɛli ne ɛKiriti gha so ndɔ mon no, kaabi sɔng ɛ bok ɛn ɛbhɛ nang.

⁶Nzi ne sim te ɛ sɛ seng ɛn wu njwi kɛ tɔɔrek itso mos wu njwi so ninɔn ne tom ɛtsak.

⁷Njwii bol ne ɛTaanggbey ɛli ne aa yung mɔn ɛn ɛkɔn ne ɛ sang so ɛyɛnɛng ngɛ. Sɔng njwii ne bo wu njwi kɛ ku taal yɛnɛng nang, njwii yang sim te ɛ sɛ mɔn ɛn ɛkɔn ɛyɛnɛng, gbik ɛli ɛbyin ninyi na i wɛɛ te njwi taasek ko.

⁸Sɔng njwi aa mɔn ɛdɛ ɛkɔn na ne ɛ bok itsobhok ne itin de nang, itin de zɔng ne njwi yaa ku i roos.

⁹Njwii bok irway ihwala ne i sɛ njwi so kyɔkyɔt to ɛ ji bok ɛn ihwet da. iPhɛ ɛlɛy njwii bol ne ɛTaanggbey te ɛ te ɛn hyɔrɔ.

¹⁰iPhɛ phɛ kɛ te nzi haa nyini nikɔn nɛnaa wo nten de ne n sang so ne nyinɛn no, ɛlɔ ne sɛ́ sɛ nggɛ yɛɛs so, sɔng ne n bol ne nyinɛn nzɔwɔkɔk ne igbɔm ba ne ɛDaray ya kɛ nang me wo nang. iGbɔm ɛDaray da so ivaa ne byinɛ nyini, sɔng ivaa ne tobhos nyini nang.

¹¹ɛTsim mɛ nigwaa nge, te n tek nyini ncaang. See ɛn ito te ɛ tɔk ɛn ihyɔrɔ, phok ɛn ibol de ne nggɛ roo nyini wu te ɛ roos ɛn no, te icwas mon teye ijwaan nɛ, shɛɛ ɛn ne irway ne laal. ɛLɛ wo ne ɛTaanggbey ya ne ɛbhɛ ɛ so ɛTaanggbey ne ishwim ba ne irway ne laal da yaa shɛɛ ne nyinɛn.

¹²Kyiisi ɛn nyini ne ishwim ninaa ne roos.

¹³Gbik ninyi ɛTaanggbey ya nɛ nibhɛ so ɛbɛ wo i kyiisi nyini.

¹⁴Te izɛɛng ɛDaray njwɛɛn ɛYɛso ɛKiriti, ne ishwim ɛTaanggbey ne gbik ìtsɛm ne iKabyik ɛTaanggbey shɛɛ ne nyinɛn gbik. Ɛɛy.