Read eten iGalatiya 2 Bible Online

iGalatiya 2 - eten bible

iGalatiya 2

¹Kɛ ne sɛ ɛtsim ne ishay ɛnduwubɔ ne ifɛ inwaas ne n roos ɛBanabas se njwii phɛ ne iYɛrushɛlɛm be dɔng ngga ne boos ne ɛTitus se.

²Ngga phɛ ɛnggyɛ wo daa ɛli ne ɛTaanggbey ɛbhɛ kaa ne tɔɔrek me ndɔ ne iyuwa wu te mbɛ ɛnggyɛ wo. Kaa ne sɛ nggɛ phɛ ɛnggyɛ, njwi ne bhɛ sɛme nɛ nidɛng nindiinday ninaa ne roos sa gying, ne n tɔng nibhɛ ɛli ne nzi ku tɔng ninyi na ne hame nibhɛ so niYahodawa na ibol iyɛnɛng ngge. Nggaa mɔn ɛlɛ wo daa ɛli ne nggaa bo ɛnik nibhɛ yaa yung mbaray mee, ɛtomɛ nge gha ji te buu.

³ɛNyi ne ihywel nge ɛTitus sa kaa ne so ɛnyi ne iHelas, gbik ne iphɛ ɛlɛy, sɔng kaa ne yɛk ɛbhɛ nɛ nggbinggbing ɛ hyɛ itee de nang.

⁴Kaa wuru ne ibol ne hyɛghɛ icwee da daa ɛli ne nidɛng nɛ nibhɛ luk wu i so nigwaa na mos kaa lel ndɔ mos so gying nibhɛ tɛ nibhɛ bees iphɔrɔt da ne njwi kɛ sɛ ɛlɔ ɛYɛso ɛKiriti, ɛlɛ wo nibhɛ kyi ta te njwii njwi kyii ta tes en nikpuru.

⁵Sɔng njwi kaa ne roos ibol nibhɛ de nang, daa ɛli ne njwii sim te itin ne bol iyɛnɛng ngge sɛ shɛɛ ndɔ mon.

⁶Sɔng nzi sap ninyi na nɛ nibhɛ wɛɛ tɛ nibhɛ bhɛ soye nindiinday yɛwo nang, daa ɛli ne sɔng ɛTaanggbey ya bok sim ito nang. Sɔng nibhɛ kɛ ne ta hante ne ɛkɔn da ne bol nge de nang.

⁷Nibhɛ kɛ yang kyi seng wu ɛTaanggbey ya ɛbhɛ kɛ nang me ɛtomɛ ne tɔng ninyi na ne hame nibhɛ soye niYahodawa na ibol iyɛnɛng ngge, ɛli ne ɛ kɛ ma nang ɛBiturus segha wu te ɛ tɔng niYahodawa na nɛ wo.

⁸iPhɛ kɛ ɛlɛ wo daa ɛli ne ɛTaanggbey ya ne ɛ kɛ tom ɛBiturus segha ne ibol iyɛnɛng ɛbhɛ de ɛlɔ niYahodawa na, ɛbhɛ kɛ ne ma tom me ɛlɔ ninaa ne hame nibhɛ soye niYahodawa na te mbɛ tɔng nibhɛ ibol idaan nɛ.

⁹ɛYakub pa ne ɛBiturus sa, ne ɛYohana gha ne kaa ku bo nibhɛ tɛ nindiinday ya kaa ne ma seng wu ɛTaanggbey ya kɛ nang me ɛtomɛ yɛghaa wo. Nibhɛ ne sɔ iwɔ ne ìtsɛm ninaa ne roos. Nibhɛ ne sim me nɛ wu te mee wo ne ɛBanabas sa te njwi phɛ ɛlɔ ninyi na ne hame nibhɛ soye niYahodawa na tɛ nibhɛ wo ne ji phɛ ɛlɔ niYahodawa na.

¹⁰Ɛkɔn na nɛ nibhɛ kɛ taate njwii nɛ zɔng, nibhɛ kaa yaak njwii te njwi tas nɛ ninyi nihala, icwas sɛ ne nggaa ne ma ku bok ne irway.

¹¹Kaa sɛ ɛBiturus sa kɛ yɛɛs ne iNtakiya de, nggaa ne ku wuru ɛbhɛ kpas i nep ɛbhɛ daa ɛli ne ɛkɔn na ne ɛ mɔn no ɛ so kpɛɛ.

¹²Nten de nɛ ninyi na ne ɛYakub pa kaa tom mo kaa tɔ tang tuu, ɛBiturus sa kaa ne i re ire de ɛte nɛ ninaa ne hame nibhɛ soye niYahodawa na, ne sɛ ninyi na ne nggyɛ wo kɛɛ tuu, ɛBiturus sa ne yaa tuul le, ɛ mbaray tang tɔ re ire nɛ ninaa ne roos sa ne hame nibhɛ soye niYahodawa na. Daa ɛli ne ɛ kaa bok ɛnik ninyi na nɛ nibhɛ bo te hyɛghɛ ninyi na ne hame nibhɛ soye niYahodawa na icwee da.

¹³Ɛlɛy ne ɛbyin ninaa ne roos sa nɛ nibhɛ soye niYahodawa na ne ma wum ɛnik ko nibhɛ ma yaa mɔn te ɛBiturus sa. Ne lenɛ ne iluk nibhɛ da, ihywɛɛ ɛBanabas se de ne ma yaa hyeeme.

¹⁴Ne sɛ nggɛ yaang ɛli nɛ nibhɛ sang roos itin de, ne nggu wuru ɛBiturus segha kpas ɛnu ɛyisɛ nibhɛ n yaak ɛbhɛ; “Yaang! Ɛ soyɛ ɛdɛng ndɔ niYahodawa na, sɔng ɛ ne mɔn te ɛnyi ne niYahodawa gha nang, aa ne mɔn ɛli ɛ yɛk ninyi na nɛ ne hame nibhɛ soye niYahodawa na nggbinggbing wu tɛ nibhɛ roos ikpii niYahodawa daa?”

¹⁵Njwi so iyɛk niYahodawa, sɔng njwi so ninaa ne ɛfɔt, tɛ ninyi na ne hame nibhɛ soye niYahodawa na nang.

¹⁶Gbik ne iphɛ ɛlɛy, njwi ne yɛɛ wu ɛTaanggbey ya say ɛnyi gha wu ɛ so cik ko ne ɛ kɛ nang ne itin nɛ ne ɛYɛso ɛKiriti zɔng. iPhɛ ɛlɛy sɔng ɛTaanggbey i say ɛnyi gha wu ɛ so cik ko daa ɛli ne ɛ kɛ roos ɛShara gha nang, daa ɛli ne sɔng daa ne iroos ɛShara gha i te i say ɛnyi gha wu ɛ so cik kang.

¹⁷Wu njwi to niYahodawa na ne njwii tɔk te sɛɛ say njwii wu njwi so cik ko ne kyi ta yɔngɔ wu njwi soye ninaa ne ɛfɔt ta, yaa ne ji yɔngɔ ɛKiriti gha ɛbhɛ kɛ te njwii njwi soye ninaa ne ɛfɔt ta i? Kwa! Kɔɔ ncɛt!

¹⁸“Wu nzi ne kyi ta lɔl ɛkɔn na ne nggaa ku tobhos ne ile de, nggɛ ne tɔɔk ito wu nggɛ ben ɛshara gha.

¹⁹Ne ile de kaa sɛ nzɔng te n roos ɛShara gha nɛ gbyak, ɛshara ne kyii tɔɔrek me wu nggɛ ben. iPhɛ ɛlɛy nggɛ ne te te ikom daa ne ibol ɛshara de ne n shɛɛ ishwɛɛ ɛTaanggbey.

²⁰Kɛ gangat me ne daa ne ihon no ne ɛKiriti gha. Sɔng mee ndɔ phɔng nang, ɛKiriti gha ne so ɛken ndɔ mee. Nzi ne shɛɛ ishwɛɛ ne ibek ga ndɔ ɛzay yɛghaa wo lenɛ ìnang ne itin ndɔ ɛNgɔn ɛTaanggbey ya ne ɛ kɛ sim me ɛ nang ito ɛbhɛ ɛlɔ mee.”

²¹Sɔng nggɛ bo izɛɛng ɛTaanggbey de te ɛkɔn ɛbuu nang. Wu ɛTaanggbey ya sɛ ne bhɛ say ɛnyi gha wu ɛ so cik ko, daa ɛli ne ɛ kɛ roos ɛShara da gbik ko, kaa ne so iku ɛKiriti de ne soye buu yɛ.