Read eten iGalatiya 3 Bible Online

iGalatiya 3 - eten bible

iGalatiya 3

¹Nyinɛn ninyi ne iGalatiya na, ɛ hoghɛ ɛn nisan naa? Hang kɛ mɔn nyini naa? Nggɛ tɔng nyini wɛsɛrɛk ibol ne gangat ɛYɛso ɛKiriti yeghaa daa ne ihon no te ɛli ne ɛ kɛ yaang ɛn ne irwisɛ mon.

²Naa phom nyini ibol idaan. Ɛ kaa say iKabyik ɛTaanggbey de daa ɛli ne ɛ kɛ roos ɛn ɛShara gha gbik ghe? Hang kaa lenɛ ne ibol iyɛnɛng ngge ne ɛ kɛ phok no, ɛ nang ɛn ne itin nɛ wo?

³Aa mɔn ɛn ɛli ɛ te ɛn nyini niwamang nga gbik ɛlɛ woo? Ɛ kɛ tsa ɛn ndɔ ne ikabyik ɛTaanggbey, ɛ ne ji sim ɛn te aa taal ɛn ne ihwet ne ito mon ne?

⁴Nggbang ngga ne ɛ kɛ sɔ ɛn gbik ɛlɛ wo, mpɛ yaa te buu ye? Ɛtsak kɛ nggbang mon da so buu ye?

⁵ɛTaanggbey ya kaa nang nyini iKabyik ɛbhɛ de ɛ ta mɔn nikɔn ne kparat ta ndɔ mon. Ɛ wɛɛ te ɛTaanggbey ya kɛ mɔn ɛlɛ wo daa ɛli ne ɛ roos ɛn ɛShara da gbik ghe? Hang kɛ lenɛ ne ibol iyɛnɛng ngge ne ɛ kɛ phok ɛn ɛ nang ne itin nɛ wo?

⁶Taate ɛn ne bol ɛBaraying ngge, ɛli ne ɛwee wu bo, “ɛBaraying nga kaa nang ne itin nɛ ne ɛTaanggbey ya ɛTaanggbey ya ne bo ɛbhɛ ɛ so ɛnyi ɛcik.”

⁷Ne ɛ seng ɛn, ninaa nɛ nibhɛ kɛ nang ne itin nɛ ne ɛTaanggbey ya, nibhɛ bhɛ ne soye ninɔn ɛBaraying nga.

⁸Ne ile de kaa ku haa ndɔ ne ɛwee ne bol ɛTaanggbey yo wu ɛTaanggbey ya sɛ say ninyi na ne hame nibhɛ soye niYahodawa na wu nibhɛ so cik lenɛ ne itin ne bol nibhɛ. iPhɛ ɛlɛy, kaa ne ku mɔng ɛBaraying ngegha ibol iyɛnɛng ngge, i bo, “Sɛ ne lenɛ ne igyɛ ninyi ɛzay ya ne sɛ ɛwɛng.”

⁹iPhɛ ɛlɛy, gbik ninaa nɛ nibhɛ kɛ ne nang ne itin nɛ wo, sɛ ne ma sit nibhɛ ne ɛwɛng nga gbik ɛBaraying nga ne ɛ soye ɛhaa ne ɛ kɛ nang itin nɛ wo.

¹⁰Ninaa nibhɛ wɛɛ te nibhɛ sɛ bhɛ sɛ phɔrɔt da lenɛ ne roos ɛshara ɛMuusaa gha ne soye ninaa ɛkawɛy, daa ɛli ne ɛWee ne iBol ɛTaanggbey yo bo, “Gbik ɛnyi gha ne ɛ kɛ sang roos nikɔn na ne kɛ haa ndɔ ɛShara gha gbyak, ne ɛ soye ɛhaa ɛkawɛy.”

¹¹iPhɛ ku so ywɛywɛy, sɔng ɛTaanggbey ya sɛ bhɛ say ɛnyi gha wu ɛ so cik ko daa ɛli ne ɛ kɛ roos ɛShara nang. Daa ɛli ne ɛWee ne iBol ɛTaanggbey yo i bo; “ɛNyi ɛcik ka sɛ ne shɛɛ ɛken lenɛ ne ɛ kɛ nang ne itin nɛ.”

¹²iBol ɛShara de lap bhe ne ibol ne ìnang itin de. ɛWee wo i bo, “Gbik ɛnyi gha ne ɛ roos nikɔn na ne kɛ haa ndɔ ne ɛShara gha gbyak, ɛbhɛ aa ne shɛɛ ɛken.”

¹³Njwɛɛn kɛ phɔrɔt ndɔ ɛkawɛy ɛShara ɛMuusaa gha daa ɛli ne ɛKiriti gha kɛ phɔt njwɛɛn ndɔ ɛkawɛy ya lenɛ ne ɛ kɛ teye ɛhaa ɛkawɛy ya ɛlɔ njwɛɛn. Daa ɛli ne kɛ haa i bo: “Gbik ɛnyi gha ne kɛ gangat ɛbhɛ daa ne ihon no, ne ɛ soye ɛhaa ɛkawɛy.”

¹⁴ɛKiriti gha kɛ mɔn ɛlɛ wo te ne lenɛ ne ɛbhɛ ɛYɛso ɛKiriti gha ninaa ne hame nibhɛ soye niYahodawa na ma sɛ ɛwɛng nga ne ɛTaanggbey ya kɛ sit ɛBaraying nge gha nɛ wo, lenɛ ne ìnang ne itin de te iKabyik ge ne ɛTaanggbey ya kaa ku sim-mɛ wo.

¹⁵Nigwaa en, te n tes nyini nɛ nikɔn na ne ɛ mɔn ɛn cɛcɛɛy. I sɛ ninyi ifaa kɛ sime ne ɛkɔn nɛ nibhɛ aa mɔn, nibhɛ rop ɛbhɛ, sɔng ɛnyi ya ne tang yɛɛ ne hobhose nang, sɔng ɛnyi ya ne ta yɛɛ ne hante ne ɛkɔn nang.

¹⁶ɛTaanggbey ya kaa sim-mɛ ne ɛBaraying nga ne ɛngɔn ɛbhɛ. Sɔng ɛWee bo “Ninɔn,” ne i bo ninyi gbarang nang. Ɛbhɛ bo icwaang, te so i bo ɛnyi ɛdaan, ɛbhɛ soye ɛKiriti gha.

¹⁷Te kaa so nzi bol nzi bo, ɛTaanggbey ya kaa ku rop ìtsɛm bɛ ne ɛBaraying nga sɔng aa ne tang biri nang. Sɔng ɛShara gha ne kɛ yɛɛs nɛ ɛtsim ne ishay ikpɔl nwaas ne nzuwubɔ icwat da (430) ya ne yɛɛ ne phoo ìtsɛm be ne ɛTaanggbey ya kɛ ku rop ne ɛBaraying nga nang.

¹⁸Te sɛɛ yɔng ɛwɛng ngɛ gha wo lenɛ ne bol ɛShara, sɔng iphɛ sɛ ne lenɛ daa ne ibol de ne kɛ ku sim-mɛ wo nang. ɛTaanggbey ya kɛ yang ku nang ɛBaraying nge gha izɛɛng lenɛ ne sim-mɛ be ne ɛ kɛ ku sim ɛbhɛ nɛ.

¹⁹iKyee iphɛ kaa ne te i yɛɛs ɛShara ghaa? Kaa hante ɛShara gha te tɔɔl ninyi wu ɛkɔn wu nibhɛ mɔn ɛfɔt. Kaa yɛɛs nɛ te kyi shɛɛ nɛ i hyep nten de ne ɛNgɔn na kɛ sim sim-mɛ ɛBaraying nga yaa tuu. Kaa nang nimalɛka ɛShara gha ne lenɛ ne ɛhaa ɛceree, ɛShara gha ne ji hɔn ɛlɔ ninyi na.

²⁰ɛTaanggbey ya ne so ɛbhɛ ɛdaan zɔng, sɔng ɛShara gha kaa ne ku le daa ɛlɔ ɛbhɛ ɛ yɛɛs ɛlɔ ninyi na nang. Ɛ kaa roos ɛhaa ɛceree ɛ yɛɛs.

²¹Yaa ne ji yɔng wu ɛShara gha bok iphup ne ibol de ne ɛTaanggbey ya kɛ sim-mɛ woo? Kwa! Sɔng ɛlɛy nang. Sɛɛ yɔng i bo ɛShara gha bhɛ nang iken de, ɛrɔngɔ sɛ ne yɛɛ ne teye ɛnyi ɛcik daa ɛli ne ɛ kɛ roos ɛshara gha gbyak.

²²Sɔng ɛlɛy ne iphɛ ne so nang, ɛWee ne bol ɛTaanggbey yo i bo wu ɛfɔt to bok ito da ɛzay ya gbik, te ibol de ne kaa ku sim-mɛ wo, lenɛ ne ìnang ne itin ndɔ ɛYɛso ɛKiriti gha te nang ninaa nɛ nibhɛ kɛ nang ne nang ne itin nɛ wo.

²³Ɛli ne ibol ne ìnang itin de kɛ tang yɛɛs so, ɛShara gha kaa ne rop njwɛɛn tɛ ninyi nibhɛ so ne nyang, nyɛɛn kyi tɔɔrek njwɛɛn ɛnkiinɛ ne ìnang ne itin de.

²⁴ɛShara gha ɛbhɛ kɛ wɛɛ njwɛɛn bhɛ hɔn ne nten ɛKiriti de, te ne ji lenɛ ne ìnang ne itin de i say njwɛɛn wu njwɛɛn so cik ɛlɔ ɛTaanggbey ya.

²⁵Ɛlyilyɛghaa wo ne ìnang ne itin de kɛ ne ji yɛɛs so, sɔng ɛShara gha ne ta tɔ wɛɛ njwɛɛn no nang.

²⁶Gbik mon no ɛ kɛ ne te nyini ninɔn ɛTaanggbey lenɛ ne nang ne itin nɛ ndɔ ɛYɛso ɛKiriti gha.

²⁷Kɛ ne sɛ kɛ yɛk nyini ne ibatisima de, iphɛ ne so te ɛKiriti gha ne ɛ kɛ sɔɔl ɛn nyini te ɛtura ɛphas.

²⁸iPhɛ ɛlɛy ninyi ɛzay ya ne labhe ɛnu ɛyisɛ ɛTaanggbey ya nang. Sɔng niYahodawa na labhe nɛ ninyi na ne hame nibhɛ soye niYahodawa na nang, sɔng ɛkpuru labhe ne ɛngɔn ne ijwee nang, sɔng ɛras labhe ne ɛkuk kang. Gbik mon no ɛ so ɛn nyini nidaan nɛ ndɔ ɛYɛso ɛKiriti gha.

²⁹Wu ɛ soyɛ ɛhaa ɛKiriti gha, ne ɛ so yɛ ɛngɔn ɛBaraying nga, ɛTaanggbey ya sɛ ne nang ngɛ ɛwɛng nga ne ɛ kaa ku sim-mɛ ɛBaraying nge gha nɛ wo.