Read eten iGalatiya 4 Bible Online

iGalatiya 4 - eten bible

iGalatiya 4

¹Nzi bol nzi bo: I sɛ ɛngɔn na tɔ ncɛt to, aa ne so te ɛkpuru daa ɛli ne sɔng ɛ ku shii bok ihwet daa ne nikɔn ɛkyɛɛ na nang, gbik ne iphɛ ɛlɛy, nikɔn ɛkyɛɛ na ne so ninaa ɛbhɛ gbik.

²Ɛ shɛɛ ne iwɔ ɛlɛ, gbik ne ɛnyi ne ɛkyɛɛ gha kɛ yɛk ngɛ te ɛ wɛɛ ɛbhɛ nyɛɛn kyi bhɛ hɔn nten de ne ɛKyɛɛ gha kɛ yɛk ngɛ wo.

³Ɛlɛy ne iphɛ ne so ne njwɛɛn no, ɛli ne njwɛɛn kɛ tɔ tɛ ninɔn na, njwɛɛn kaa so nikpuru daa ne igbɔm ne ikpabyik ɛzay da.

⁴Kaa ne ji sɛ nten de ne ɛTaanggbey ya kɛ yɛk ngɛ wo kɛ shwaak ghe, ɛTaanggbey ya ne tom ɛNgɔn ɛbhɛ, ɛkuk yɛk ɛbhɛ. Ne ɛ ma shɛɛ ndɔ ikpii ɛShara da.

⁵Te ɛ sɛ ɛ phɔt ninyi na nɛ nibhɛ so ndɔ ɛShara gha te ɛ te njwɛɛn tes en ninɔn ɛTaanggbey.

⁶ɛLyilyɛghaa wo ne njwɛɛn kɛ tes en ninɔn ɛTaanggbey ya, ɛTaanggbey ya kɛ ne tom iKabyik ɛNgɔn ɛbhɛ ndɔ ne irway njwɛɛn. iKabyik kɛdee wo i ne te njwɛɛn yɔngɔ, “Abba, ɛTaa nge.”

⁷iPhɛ ɛlɛy, sɔng ne ɛ ta tɔ ɛkpuru nang, ɛ so nyini ninɔn ɛTaanggbey. Sɛ ne nang nyini ɛwɛng nga ne ɛTaanggbey ya kɛ ku sim-mɛ ɛ sɛ nang ninɔn ɛbhɛ na.

⁸Ne ile de, sɔng ɛ ka yɛɛ ɛn ɛTaanggbey yegha nang. Ɛ ka so ɛn nikpuru nihak nitaanggbey ne sɔng nibhɛ ma yung so ɛkɔn nang.

⁹ɛLyilyɛghaa wo ne ɛ kɛ ji seng ɛn ɛTaanggbey ririk, hang naa yɔng ɛTaanggbey ya kɛ seng nyini ririk yɔɔ. iKyee iphɛ kɛ ne te ɛ sim ɛn aa ta kyii ɛn ɛlɔ nigɔm ne ikpabyik ɛzay yɛghaa wo nɛ nibhɛ so buu wo nibhɛ sang kyi ta so ɛkɔn naa? iKyee phɛ te ɛ sim ɛn aa ta tes nyini nikpuru nibhɛ naa?

¹⁰Ɛ kɛ ɛn nang irway mon da gbom daa ne hyep ikpii nituk ne iphɛl, ne nten, ne ishay.

¹¹iBol mon de tak me iyɔm. Sɛ tɛrɛk ya bo wu ɛtomɛ nge gha ne nggɛ mɔn no ndɔ mɔn yaa te buu ye?

¹²Nigwaa en, nzi roro ne nyinɛn, te ɛn te mee wo, te ɛli ne nggɛ ma te tɛ nyinɛn no. Sɔng ɛ kaa mɔn ɛn mɛɛn ɛkɔn ɛkpɛɛ nang.

¹³Ɛ yɛɛ ɛn wu isha ihywɛ kɛ te me n sang n tɔng nyini ibol iyɛnɛng ngge.

¹⁴iSha nge de ka ne teye nyini ɛgbaang ɛkɔn ne tak iyɔm, gbik ne iphɛ ɛlɛy, sɔng ɛ kaa ne bɛɛs ɛn me nang, sɔng ɛ kaa mbaray ɛn nyini mɛɛn nang. Ɛ kaa ne yang say ɛn mɛɛn te ɛmalɛka ne ɛ le daa ne irywa. Ɛ kaa say ɛn mɛɛn te ɛli ne ɛ sɛɛ say ɛYɛso ɛKiriti gha ne ito ɛbhɛ.

¹⁵Ɛ kaa bok ɛn irway ihwala nten nɛ de nggyɛ wo, irway ihwala mon da ne ji so ɛbii ɛlyilyɛghaa woo? Nggɛ nang ne itin nɛ, saa yaak nyini te ɛ tuul ɛn irwisɛ mon ˆɛ naas ɛn mɛɛn, ɛ sa tuul ɛn.

¹⁶Nggɛ kyi te me ɛhaa ne iphup mon daa ɛli ne nggɛ tɔng nyini itin nɛ wo naa?

¹⁷Ninyi na nɛ nibhɛ tɔng nyini ivol lɛdaa bok ihywɛɛ nibhɛ daa mon gbom, sɔng icwas nibhɛ da kɛ ne jam nang. Nibhɛ sim tɛ nibhɛ yaa hosop nyini ne mee, te hywɛɛ mon kyii daa nibhɛ gbik.

¹⁸iPhɛ kɛ jam mɛ ɛnyi gha kyii ne ihywɛɛ ɛbhɛ de daa ɛkɔn na, wu ɛkɔn nɛ kɛ jam. Te ne mɔn ɛlɛy cɛcɛɛy, sɔng sɛ nzo nɛ nang.

¹⁹Ninɔn nge! iBol mon de rɔ me te ɛli ne ɛngɔn i rɔ ɛkuk. Naa ne maa sɔ nggbang ngɛdaa wo bhɛ hɔn nten de ne yaa yaang ɛKiriti ndɔ mon no.

²⁰Nzi sim te sɛ yɔng njwɛɛn so ne nyinɛn ɛlyilyɛghaa wo. Nzɛ ne sunu izɔlɔs ne nyinɛn no. iBol mon de kɛ tak me iyɔm gbom.

²¹Mɔng ɛn mɛɛn, nyinɛn no ne ɛ sim ɛn te aa roos ɛn ɛShara gha. Ɛ kɛ seng ɛn ɛkɔn na ne ɛShara gha bol ririk ghee?

²²Kɛ haa i bo wu ɛBaraying nga kaa bok ninɔn niras ifaa. ɛGyinɛ ɛdɛng kaa soye ɛkpuru, sɔng ɛgyinɛ ɛdɛng ne soye ɛkpuru nang.

²³ɛBaraying nga kaa yɛk ɛngɔn ɛkuk ka ne ɛ soye ɛkpuru gha ɛli ne ku yaak ninɔn na, ne ɛ ji yɛk ɛhaa ɛkuk ka ne hame ɛ soye ɛkpuru gha lenɛ ne sim-mɛ ne ɛTaanggbey kɛ ku isim-mɛ.

²⁴iBol lɛdee wo ne so idee ne kɛ ten-nɛ, nikuk ifaa na so te ìtsɛm ihywaa ne ɛTaanggbey ya kaa rop. Kaa ne i bok ɛhaa ɛyisɛ yɛ ɛHaga, ɛbhɛ ne ɛ so te ìtsɛm be ne kɛ rop ne ɛWarang ne iSinay yo, ɛbhɛ yaak ninɔn na nɛ nibhɛ soye nikpuru na.

²⁵ɛHaga gha ɛbhɛ so te ɛWarang ne iSinay yo ne ɛbhɛ so ne ivel ne iRabiya de. Ɛbhɛ so te iYɛrushɛlɛm nten nɛdee wo daa ɛli ne ɛbhɛ wo nɛ ninɔn ɛbhɛ gbik nibhɛ soye nikpuru.

²⁶Kaa ne i bok ɛhaa ne ifaa yɛ ɛSaratu, sɔng ɛ kaa ne so ɛkpuru nang, ne ɛ so te iYɛrushɛlɛm ɛdaa ne irywa da. Ɛbhɛ so ɛgyinɛ ninaa ne nang ne itin na.

²⁷Kɛ ku haa i bo, “Yɛk irway ihwala igyɛ nikuk ɛkuru! Yɛk ne ikpiil ne irway ihwala igyɛ wo ne hame ɛngɔn na kɛ ku rɔ yɛwo! Daa ɛli nɛ ninɔn ɛkuk ka ne ɛras sa kɛ tek ɛbhɛ wo so gbom, nibhɛ phyin ninɔn ɛkuk ka ne ɛ bok ɛras sa.”

²⁸Nyinɛn nigwaa nge wo, ɛ so ɛn nyini ninɔn ne ɛTaanggbey kɛ ku sim-mɛ te ɛShaaku.

²⁹Nten nɛdee nggyɛ wo, ɛngɔn na ne kaa yɛk ɛbhɛ ɛli ne ku yaak ninɔn na kaa baasek ɛhaa ne kɛ yɛk ɛbhɛ lenɛ ne ito-ndiinday ne iKabyik ɛTaanggbey de nggbang. ɛLɛy ne iphɛ ne ma so ɛlyilyɛghaa wo.

³⁰ɛWee ne iBol ɛTaanggbey yo ne bo ɛlii? Ɛbhɛ bo, “Kasa ɛkuk ka ne ɛ soye ɛkpuru gha ne ɛngɔn ɛbhɛ gha, sɔng ɛngɔn ɛkuk ka ne ɛ soye ɛkpuru gha sɛ hosop ɛwɛng nga ne kɛ ku sim-mɛ wo ne ɛngɔn ɛkuk ka ne ɛ hame ɛ soye ɛkpuru gha nang.”

³¹iPhɛ ɛlɛy nigwaa en, sɔng njwɛɛn ne soye ninɔn ɛkuk ka ne ɛ soye ɛkpuru gha nang; njwɛɛn yang soye ninɔn ɛkuk ka ne hame ɛ soye ɛkpuru gha.