Read eten iGalatiya 5 Bible Online

iGalatiya 5 - eten bible

iGalatiya 5

¹ɛKiriti ɛbhɛ kɛ phɔt njwɛɛn, sɔng njwɛɛn ne tɔ nikpuru nang. iPhɛ ɛlɛy, ne ɛ kyinak ɛn nting sɔng ɛ ta sim ɛn ta rop nyini ne nyang ngge tɛ nikpuru na nang.

²Phok ɛn ibol nge de, mee ne ɛBulus so nzi bok nyini, Wu ɛ kɛ sim ɛn i hyɛghɛ nyini icwee da, kaabi sɔng ɛKiriti gha kɛ mɔn ɛkɔn nang ne aa phyik nyini nang.

³Naa ne hante nɛ n yɔngɔ, gbik gha ɛnyi gha ne ɛ kɛ sim wu te i hyɛ ye itee de, iphɛ so nggbinggbing ɛ roos ɛShara gha gbyak.

⁴Nyinɛn no ne ɛ sim ɛn te sɛɛ say nyini wu ɛ so ɛn cik ko ɛnu ɛyisɛ ɛTaanggbey ya lenɛ ne roos ɛShara gha, ɛ kɛ ne ku balat ɛn ndɔ ɛKiriti gha, ɛ kɛ tek ɛn izɛɛng ɛTaanggbey de.

⁵Njwit to ne njwi shɛɛ ishwɛɛ ne iKabyik ga, njwi kɛ yɛk ne irway sɛ lenɛ ne ìnang ne itin ndɔ ɛKiriti gha; ɛTaanggbey ya say njwii wu njwi so cik ɛli ne ɛ kaa ku sim-mɛ wo.

⁶Daa ɛli ne ndɔ ɛYɛso ɛKiriti gha, sɔng ibol ne hyɛghɛ icwee da ne idee ne sang hyɛghɛ wo iphɛ soye ɛkɔn nang. Ɛkɔn na ne i sim, te ɛnyi gha nang ne itin nɛ ne ɛDaray ya, te ne ɛ tɔɔl iphɛ daa ne ishwim nigwaa.

⁷Ɛ kaa tsa ɛ hyel ɛn yɛnɛng, ɛhay ɛbhɛ kɛ ne yaa ring nyini ne roos itin dee?

⁸Sɔng iluk kɛdaa wo le da ɛlɔ ɛTaanggbey ya ne ɛbhɛ kɛ yel-le nyini wo nang.

⁹Kɛ ten ibol ne hal irywɛɛk kɛdaa so te iYis ne iphɛ so ncɛt iphɛ ne wara inuk gbom.

¹⁰Nggɛ nang ne irway nge gbik daa ɛDaray, sɔng aa roos ɛn ibol ɛhak ɛnyi kang ne ideeng ngge nang. Gbik ɛnyi gha ne ɛ ne suruk nyini wo, ɛTaanggbey ya sɛ ne bak ɛbhɛ nggbang, sɔng ɛ sɛ sap ihywee ɛnyi de ne ɛ so nang.

¹¹Nigwaa en, nzi bol nzi bo wu hang iphɛ so wu nggbinggbing ninaa nɛ nibhɛ kɛ nang ne itin hyɛghɛ icwee, i ne baasek ne me nggbang. Sɛɛ yɔngɔ nzi bo wu tɛ ninaa ne nang ne itin na hyɛghɛ icwee da, n tek ibol ne iku ɛKiriti de daa ne ihon no, sɔng nibhɛ sɛɛ ne sɛ ɛkɔn nɛ nibhɛ yaa baasek me ne nggbang ngga nang.

¹²Ninyi yɛnaa wo nɛ nibhɛ suruk ihywɛɛ mon de daa ne ibol ne hyɛghɛ icwee da, nzi ne bo tɛ nibhɛ sɛɛ ma yung tuul ivaa nibhɛ gbik.

¹³Nyinɛn nigwaa en no, sɔng kɛ yel-le nyini te ɛ shɛɛ tɛ nikpuru nang. Sɔng ishwɛɛ yɛdaa nggyɛ wo ne te nyini ɛ yaa mɔn ɛn nikɔn na ne ɛ sim ɛn nang. Te ishwɛɛ yɛ yang te ɛ te ɛn nyini nikpuru nigwaa mon lenɛ ne ishwim.

¹⁴Kɛ byinki ɛShara gha da ne ikɛn ne bol idaan, i bo, “Sim ɛgwaa mo gha ɛli ne ɛ ma sim ito mo.”

¹⁵Wu ɛ kɛ ne yaa lɛng ɛn nyini te inyam ɛhay de, ne ɛ wɛɛ ɛn nyini yɛnɛng, ɛlɔ ne aa bees ɛn nyini.

¹⁶Nzi ne bok nyini, hyel ɛn ɛli ne ikabyik ɛTaanggbey de kɛ tɔɔrek nyinɛn, sɔng ɛ roos ɛn nikɔn ne ɛfɔt ta ne ibek ge sim mo nang.

¹⁷Daa ɛli nɛ nikɔn ne ɛfɔt ta ne ibek ge i sim mo, sɔng nibhɛ ne iKabyik ɛTaanggbey de ne sim mang. Nikɔn na ne iKabyik ɛTaanggbey ne ma sim mo, sɔng nibhɛ nɛ nikɔn ne ɛfɔt ta ne ma sim mang. Nikɔn ne ɛfɔt ta ne ibek ge i sim mo ne bok iphup iKabyik ɛTaanggbey de, iphɛ ne ring nyini ne mɔn ɛkɔn na ne ɛ sim aa mɔn ɛn no nang.

¹⁸Wu ɛ kɛ ne hyel ɛn ɛli ne iKabyik ge kɛ tɔɔrek nyini wo, sɔng aa ne to ɛn nyini nikpuru ɛShara gha nang.

¹⁹Nikɔn ne ɛfɔt ta ne ibek ge sim mo ku so kpas. Nibhɛ naa ɛlɛ: re ɛhay ne icwa, ne nzangas, ne ihyop ne phok yɛnɛng nikɔn ne yɔm ncwa,

²⁰ne re nikɔn nɛ nibhɛ sang iken ntsong, ne re nkut, ne mbray nigwaa, hɔ irywen, ne waa irway, ne njenjek, ne sim ito, ne ishishim, ne ihosobhe,

²¹ne ɛnkyis, ishwɛɛ ziizii, ne sim ijwira ne sɔ igbuut, nɛ ɛbyin nɛ. Nzi kpɛng nyini ɛlyilyɛghaa wo, ɛli ne nggɛ ta ku kpɛng nyini wo. Nzi bo, ninyi na nibhɛ mɔn nikɔn nɛnaa nggyɛ wo, sɔng nibhɛ sɛ ne bhɛ sɛ ɛwɛng ne igbɔm ɛTaanggbey da nang.

²²Nikɔn na ne iKabyik ɛTaanggbey de ne yaak ko nibhɛ naa lɛ: ishwim, irway ihwala, irway ne laal, ɛbɔk, iyɛnɛng, irway ne phyik nigwaa, ìnang ne itin,

²³ilyaak, gbik ne wum ito. Sɔng ɛShara gha so daa nikɔn nɛ na wo nang.

²⁴Ninyi na nɛ nibhɛ soye ninaa ɛYɛso ɛKiriti na, nibhɛ kɛ ne ku phoo ihyop ne bek nibhɛ de daa nikɔn ne ɛfɔt ta ne ibek ge sim mo gbik.

²⁵iKabyik ɛTaanggbey de iphɛ kɛ nang njwɛɛn iken de, iphɛ ɛlɛy te njwɛɛn roos ɛkɔn na ne iKabyik ge kɛ tɔɔrek njwɛɛn no gbik.

²⁶Sɔng njwɛɛn tɔɔk ito nang, sɔng njwɛɛn sim hɔ irywen nang, sɔng njwɛɛn ta boos ɛnkyis sa nɛ nigwaa na nang.