Read eten iFisus 2 Bible Online

iFisus 2 - eten bible

iFisus 2

¹Ne ile de, ˆɛ kaa so ɛn ikpom ndɔ ne ikabyik lenɛ ne ˆɛ kɛ ben ɛn ikpii ɛTaanggbey da nɛ ɛ mɔn ɛn ɛfɔt.

²Nten nɛdee nggyɛ wo ˆɛ kaa ne i roos ɛn icwas ɛzay yɛdaa wo nɛ, ˆɛ roos ɛn ɛShɛtan ne ne ɛ re igbɔm daa ikpabyik ɛzay ne i sang yaang. Ɛbhɛ ɛ soye ikabyik kɛdee nggyɛ wo ne iphɛ mɔn ɛtomɛ gha ndɔ ne irway nisang-phok.

³Njwɛɛn gbik kaa tsa so tɛ nibhɛ wo. Njwɛɛn kaa i roos ihyop igywebhe ne ibek njwɛɛn nɛ, i roos ɛkɔn na ne ibek ge ne irway i shɔk njwɛɛn te mɔn zɔng. Njwɛɛn kaa ne teye ɛkɔn ne baasek ɛTaanggbey ye njenjek, iphɛ ne te nggbinggbing njenjek ɛTaanggbey de ho daa njwɛɛn te ɛbyin ninyi ɛzay ya.

⁴Gbik ne iphɛ ɛlɛy, ɛTaanggbey ya ne soye ɛhaa ne san iyɔm gbom, ishwim ɛbhɛ da daa njwɛɛn no ne so gbogbom.

⁵Nten de ne njwɛɛn kaa so te ikpom ba lenɛ ne ɛfɔt njwɛɛn no, ɛTaanggbey ya yiisik njwɛɛn niken nɛ ndɔ ɛKiriti gha. Kaa lenɛ ne izɛɛng ɛbhɛ i phɔt nyini wo.[4]

⁶Ndɔ ne ìtsɛm njwɛɛn de ne ɛYɛso ɛKiriti gha, ɛTaanggbey ya kɛ ne yiisik njwɛɛn gbik ɛKiriti gha, ɛ nang njwɛɛn ɛcuruu ne igbɔm ɛzay ɛdaa ne irywa ne ɛKiriti gha.

⁷ɛTaanggbey ya kɛ ne mɔn ɛlɛ wo te ɛ sɛ ne tɔɔrek izɛɛng walala ɛbhɛ de ne i sang ten ne ɛkɔn na ɛzay ya ne ɛ yaaso wo. iZɛɛng ɛbhɛ yɛdee wo ne ɛ kɛ tɔɔrek njwɛɛn ndɔ ɛYɛso ɛKiriti gha.

⁸Nzo kɛ lenɛ ne izɛɛng ɛTaanggbey de i phɔt nyini lenɛ ne ìnang ne itin. Sɔng kɛ phɔt nyini daa ɛdɛ ɛkɔn ɛyɛnɛng nga ne ɛ kɛ mɔn ɛn nang, iphɛ so ìnang ɛbhɛ.

⁹Sɔng iphɛ ne lenɛ daa ɛtomɛ ne ɛ kɛ mɔn ɛn nang, ɛlɔ ne ɛdɛ mon yaa yung yaa hal ɛgyɛy.

¹⁰Njwɛɛn no ne ito njwɛɛn, njwɛɛn soye ɛtomɛ ne iwɔ ɛTaanggbey ya. Ɛ kɛ ryɔng njwɛɛn ndɔ ɛYɛso ɛKiriti gha te njwɛɛn mɔn nitomɛ niyɛnɛng ninaa ne ɛTaanggbey ya kaa ku ryɔng njwɛɛn nɛ.

¹¹iPhɛ ɛlɛy ne ˆɛ taate ɛn ɛli ne ˆɛ kɛ so ɛn ne ile de. Sɔng ˆɛ kaa so ɛn iyɛk niYahodawa da nang. niYahodawa na nɛ nibhɛ kaa i yeres itso nibhɛ ninaa ne hyɛghɛ icwee da kaa i yeres nyini ninaa ne sang hyɛghɛ icwee. Nzo ihyɛghɛ icwee yɛdaa wo ne so idee ne ibek ne i hyɛghɛ ne ibɔ.

¹²Taate ɛn nɛ, nten nɛdee nggyɛ wo, ˆɛ kaa hosop ɛn nyini ne ɛKiriti gha. Sɔng ˆɛ kaa bok ɛn ihop ɛkɔn ndɔ niSɛrɛla na nang. ˆƐ kaa so ɛn tɛ ninaa ne kpoo daa ne ibol ne rop ìtsɛm be ne ɛTaanggbey ya kɛ sim-mɛ wo. Sɔng ɛ kaa bo ɛn ɛkɔn ne ˆɛ kɛ sit ɛn ne irwisɛ nang, sɔng ɛ bok ɛn ɛTaanggbey ye ndɔ ɛzay yeghaa wo nang.

¹³ɛLyilyɛghaa wo nang, ne ˆɛ so ɛn ndɔ ɛYɛso ɛKiriti gha. Nyinɛn no ne ˆɛ kaa so ɛn kyakyak ko, kɛ ne yɛɛs ne nyinɛn cɛcɛk lenɛ nɛ neyi ɛKiriti.

¹⁴Nzo ɛKiriti gha ɛbhɛ soye irway ne laal njwɛɛn. Ɛ kɛ byinki niYahodawa na nɛ ninaa nɛ nibhɛ sang so niYahodawa na nibhɛ teye nidaan nɛ. Ɛ kɛ ne bunga iwabha ne ifɛ kaa hosop niYahodawa na nɛ ninaa nɛ nibhɛ sang so niYahodawa na, kaabi iwabha ishishim be ne iphɛ kaa so ɛceree nibhɛ gha.

¹⁵Ɛ kɛ tek iMɛmɛ ɛMuusaa da ne ikpii yɛ gbik nɛ nikabhak kɛ gɔɔ, lenɛ ne iku ɛbhɛ, te ɛ kyii ryɔng icwaang ifas ndɔ itaang iphaa yɛdee nggyɛ wo. ɛLɛ wo ne ɛ kɛ ne yɛɛs ne irway ne laal ndɔ nibhɛ wo.[5]

¹⁶Kɛ ne lenɛ ne iku ɛKiriti de daa ne ihon ne gangat to, yɛɛs ne irway ne laal ndɔ ninyi ifaa yɛnaa nggyɛ wo ne ɛTaanggbey ya. ɛLɛ wo ne ɛ kɛ ne bunga ishishim be ne iphɛ so ndɔ nibhɛ wo, nibhɛ teye ibek idaan nɛ.[6]

¹⁷Ɛ kaa yɛɛs ɛ tɔng ibol iYɛnɛng ne irway ne laal ndɔ mon no ne ˆɛ sang so ɛn niYahodawa na, nyinɛn no ne ˆɛ kaa so ɛn kyakyak ne ɛTaanggbey ya. Ɛ kaa ne ma ta tɔng ibol idaan nɛdee wo ndɔ niYahodawa na nɛ nibhɛ kaa so cɛcɛk ne ɛbhɛ wo.[7]

¹⁸Daa ɛli ne i lenɛ ne ɛKiriti gha njwɛɛn itaang ifaa de, niYahodawa na nɛ ninaa nɛ nibhɛ sang so niYahodawa na i yɛɛ ne lel ɛnu ɛyisɛ ɛTaanggbey ya ne ɛ so ɛTaa gha ne ɛnkiinɛ ɛdaan nɛ, kaabi iKabyik ge.

¹⁹iPhɛ ɛlɛy yang, nyinɛn no ne ˆɛ sang so ɛn niYahodawa na, sɔng ne ˆɛ tɔ ɛn kyakyak tɛ ninaa ne kpoo nang, sɔng ne ˆɛ sang ihop daa ɛkɔn ninaa ɛTaanggbey ya nang. ˆƐ kɛ yang te ɛn nyini nidaan nɛ ne ninyi ɛTaanggbey ya, ninaa ne ijwee ɛTaanggbey ya.

²⁰Kɛ lɔl nyini daa ne ɛtum nɛ ninabawa gbik nɛ ninɔn ne tom ma kaa see, ɛtum mo ne ɛYɛso ɛKiriti gha ne ito ɛbhɛ ɛ soye ɛkangashi yɛ.

²¹Ndɔ ɛKiriti gha ne kɛ wum ijwee wo gbik ɛlɔ ɛdaan, ndɔ ɛbhɛ ne ijwee wo kɛ ne hɔn ifɛ teye ideng ne kɛ tul ɛDaray ye nɛ kang.

²²Kɛ ne ta lenɛ ne ìtsɛm be ne ˆɛ bok ɛn ne ɛKiriti gha, ne lɔl nyini nɛ ɛbyin ninyi na ˆɛ te ɛn nyini ijwee ne ɛTaanggbey i shɛɛ nɛ lenɛ ne iKabyik ɛbhɛ.