Read eten iFisus 5 Bible Online

iFisus 5 - eten bible

iFisus 5

¹Daa ɛli ne ˆɛ so ɛn ninɔn ɛTaanggbey ya ne ɛɛ sim nyini gbom mo, ne ˆɛ roos ngkɔɔl ɛTaanggbey da.

²Shɛɛ ishwɛɛ ne ishwim ɛli ne ɛKiriti gha kɛ sim njwɛɛn no, ɛ phyii nang ito ɛbhɛ de ɛlɔ njwɛɛn na te ɛkɔn ne hap itsanga gha ne ɛ bok ɛnkyinkyɔp ɛyɛnɛng nga ne kɛ hap ɛTaanggbey yegha ne itsanga de.[17]

³Sɔng ne i phok ngka ne nzangas ndɔ nang, sɔng ne phok ngka ɛkɔn ne ishis, ne irisɛ ndɔ mon no nang, daa ɛli ne sɔng nikɔn nɛnaa wo so kancɛng ne ishwɛɛ ninaa ɛTaanggbey da nang.

⁴Sɔng ne ta phok ivol ikpɛɛ, ne iwamang gbik ne iyɔm ncwa ndɔ mon no nang, daa ɛli ne sɔng nikɔn nɛnaa wo so kancɛng ne ishwɛɛ ninaa ɛTaanggbey da nang. Yang i tɔɔsel ɛn ɛTaanggbey yegha irway ihwala.

⁵Seng ɛn iphɛ ncɛncɛng ɛlɛ, ɛhaa ne nzangas sa, ne ɛhaa ne roos ihyop igywebhe ne ibek ge nɛ wo, ne ɛhaa ne irisɛ gha, ne iphɛ soye ɛkɔn ɛdaan nɛ ne ire igunkyi de ntsong ngga, sɔng ɛdɛ ɛbhɛ bok ihop ndɔ ne isha ne igbɔm ɛKiriti da gbik ne ɛTaanggbey ya nang.

⁶Sɔng ɛdɛ ɛnyi gha luk nyini ne ivol ɛbuu da nang. Nzo ihywee nikɔn nɛnaa wo bhɛ hɔ njenjek ɛTaanggbey de daa nisang-phok ka.

⁷iPhɛ ɛlɛy, sɔng ˆɛ byinki ɛn ito ne ihywee ninyi yɛdee nggyɛ wo nang.

⁸Ne ile de ˆɛ kaa tsa ˆɛ so ɛn ndɔ gbyik, ɛlyilyɛghaa wo, ˆɛ kɛ ne sɛ ɛn iwɛwɛy lenɛ ne ɛDaray ya. iPhɛ ɛlɛy, ne ˆɛ shɛɛ ɛn ishwɛɛ ninaa ne iwɛwɛy da.

⁹Daa ɛli ne iwɛwɛy de iphɛ i yɛɛs nɛ nikɔn niyɛnɛng, ne ishwɛɛ cik, gbik ne itin ne ibol.

¹⁰Mɔn ɛn gbik ɛkɔn na ne ˆaa mɔn ɛn, te ˆɛ mɛmɛ ɛn ne ɛkɔn na ne aa nang ɛDaray yegha irway ihwala.

¹¹Hosop ɛn nyini nɛ nitomɛ ndɔ gbyik ka nɛ nibhɛ i sang yɛk ikpam ba. Yang phaal ɛn nibhɛ kpas.

¹²Daa ɛli ne iphɛ so ɛkɔn ncwa, i tɔng nikɔn na nɛ nisang-phok ka i mɔn gying ngo.

¹³Wu kɛ yɛɛs nɛ nikɔn ne igbyik ka ɛlɔ ɛwɛwɛy ya, yaa ne seng ɛli nɛ nibhɛ so ririk.

¹⁴Daa ɛli ne iwɛwɛy de iphɛ tɔɔsel nikɔn na gbik a ɛli nɛ nibhɛ so. iPhɛ phɛ kɛ te kɛ haa i bo, “Seme! iGyɛ wo ne ˆɛ so inwa da! Yilitsik ɛlɔ ne ikpom ba! ɛKiriti gha yaa ne tol lɛ.”

¹⁵iPhɛ ɛlɛy, wɛɛ ɛn ihywel mon da yɛnɛng. Sɔng ˆɛ hyel ɛn tɛ niwamang nga nang, yang hyel ɛn tɛ ninaa ne ntsɛntsɛng.

¹⁶Mɔn ɛn ɛtomɛ ɛyɛnɛng ne gbik nten de ne ˆɛ kɛ sɛ ɛn, daa ɛli nɛ nituk kɛnaa wo so nibebhe yɛ.[18]

¹⁷iPhɛ ɛlɛy, sɔng ˆɛ te ɛn nyini niwamang nang, yang seng ɛn ɛkɔn na ne ɛ so icwas ɛDaray da.

¹⁸Sɔng ˆɛ te ɛn ziizii ne sɔ inɛn ɛnap ba, ne iphɛ hɔ ninyi na iphɛ phɛ nɛ ne ihyop igywebhe ne ibek ge ne iphɛ sang ncwa da nang. Yang te ɛn hyɔrɔ ne iKabyik.

¹⁹Bol ɛn ndɔ mon ndɔ ne ighel, ne ighel ne dɛp ɛTaanggbey ye gbik ne ighel ikabyik. Yaak ɛn ne ighel te ˆɛ dɛp ɛn ɛTaanggbey ye ndɔ ne irway mon.

²⁰Tɔɔsel ɛn ɛTaanggbey ye ne ɛ so ɛTaa irway ihwala cɛcɛɛy, daa nikɔn na gbik ndɔ ne irywɛɛk ɛDaray njwɛɛn ɛYɛso ɛKiriti.[19]

²¹Te ˆɛ ɛrɔngɔ nang ɛrɔngɔ ne ndiinday daa ɛli ne ˆɛ kɛ nang ɛ ɛKiriti yegha ne ndiinday de.[20]

²²Nyinɛn nikuk ko, nang ɛn ito mon daa ne niras mon na, ɛli ne ˆɛ kɛ nang ɛn ito mon de daa ɛDaray ya.[21]

²³Daa ɛli ne ɛras sa bhɛ soye ito ɛkuk ɛbhɛ de, ɛli ne ɛKiriti gha bhɛ soye ito ne idira ninaa ne roos de, kaabi ibek ɛbhɛ de. ɛKiriti gha ne ito ɛbhɛ, ɛhaa ne phɔt ibek ge.

²⁴ɛLi ne idira ninaa ne roos de kɛ nang ito nibhɛ de daa ɛKiriti gha, ɛlɛy nɛ nikuk ka yaa ne ma nang ito nibhɛ daa niras nibhɛ na ndɔ nikɔn na gbik.

²⁵Nyinɛn niras so sim ɛn nikuk mon na ɛli ne ɛKiriti gha kɛ sim idira ninaa ne roos de ɛ phyii nang ito ɛbhɛ de ɛlɔ nibhɛ wo.[22]

²⁶ɛKiriti gha kɛ mɔn ɛlɛ wo te ɛ tul ɛTaanggbey ye idira ninaa ne roos de kang lenɛ ne ibol ɛbhɛ, ɛtsim mɛ ne ɛ kɛ kuus nibhɛ ne inɛn.

²⁷Te sɛ́ ne sɛ aa nang ito ɛbhɛ idira ninaa ne roos de, tɛ nibhɛ ne so ɛkɔn ne ɛ kɛ jam byirik, wɛlɛng irwirwik, ne ɛkɔn ɛkpɛɛ. Tɛ nibhɛ so kang wɛlɛng ɛkɔn ne tok.

²⁸ɛLɛy ne iphɛ kɛ ne jam mɛ niras sa sim nikuk nibhɛ na tɛ ɛli nɛ nibhɛ i sim ibek nibhɛ. Gbik ɛras sa ne ɛ sim ɛkuk ɛbhɛ gha, ɛɛ sim ito ɛbhɛ.

²⁹Wɛlɛng ɛnyi gha ne ɛ kɛ ku mbaray ibek ɛbhɛ de. ɛNyi gha i yang sal ibek ɛbhɛ de, ɛ ryɔng iphɛ yɛnɛng ɛli ne ɛKiriti gha i ryɔng idira ninaa ne roos de.

³⁰Daa ɛli njwɛɛn soye ibap ne ibek ɛbhɛ.

³¹ɛKɔn nɛghaa wo ɛbhɛ kɛ te kɛ haa ndɔ ne ɛWee ne iBol ɛTaanggbey yo i bo, “ɛNyi gha yaa tek ɛgyinɛ ne ɛkyɛɛ, ɛ byinki ito ɛbhɛ ne ɛkuk ɛbhɛ, nibhɛ ifaa da ne teye ibek ɛdaan.”[23]

³²iBol lɛdee wo so gying, iphɛ so kyukyum gbom, nggɛ ne bo iphɛ daa ne ibol ne ìtsɛm ne ɛKiriti bok ne idira ninaa ne roos.

³³Gbik ne iphɛ ɛlɛy, te ɛrɔngɔ sim ɛkuk ɛbhɛ ɛli ne ɛ sim ito ɛbhɛ. Te ɛkuk ka ne ma nang ɛras ne ndiinday ne mang.