Read eten iFisus 6 Bible Online

iFisus 6 - eten bible

iFisus 6

¹Nyinɛn ninɔn no, roos ɛn ibol nikyɛɛ mon de daa ɛli ne ɛ so ɛn ninaa ɛDaray ya. iPhɛ phɛ kɛ jam mɛ.[24]

²iKpii ɛyisɛ da ne kɛ rop ifɛ ne ihak ibol de i bo, “Nang ɛkyɛɛ mo ne ɛgyinɛ mo ne ndiinday.

³tɛ ˆɛ shɛɛ ncaang, ˆɛ ta phyɔngɔle ndɔ ɛzay ya.”[25]

⁴Nyinɛn nikyɛɛ wo nang, sɔng ˆɛ bak ɛn ninɔn mon na njenjek nang. Yang gbaat ɛn nibhɛ ndɔ ne ihywɛɛ, te ˆɛ boos ɛn nibhɛ ndɔ ne imɛmɛ ɛDaray da.[26]

⁵Nyinɛn nikpuru wo, roos ɛn ibol nikyɛɛ ne ijwee mon ɛzay yɛghaa wo. Nang ɛn nibhɛ ne ndiinday te ˆɛ phok ɛn ɛnik nibhɛ ndɔ nikɔn na gbik ne irway ijwaan ɛli ne ɛ roos ɛn ɛKiriti yegha.

⁶Sɔng ˆɛ mon ɛn ɛtomɛ gha nten de nɛ nibhɛ sonɛ wo, wu tɛ nibhɛ ji ton nyini wo nang. Yang mɔn ɛn ɛkɔn na ne ɛTaanggbey i sim ne irway mon ijwaan daa ɛli ne ˆɛ so ɛn nikpuru ɛKiriti na.

⁷Mɔn ɛn ɛtomɛ mon na ne icwas iywɛnɛng te ɛDaray ne ˆɛ mɔn ɛn ɛbhɛ nɛ, sɔng ɛten ɛsii nang.

⁸Daa ɛli ne ˆɛ yɛɛ ɛn, gbik iyɛnɛng ngge ne ɛrɔngɔ kɛ mɔn, hang ɛkpuru yɔɔ, hang ɛngɔn ne ijwee yɔɔ, ɛ sɛ́ bhɛ say iphɛ ɛlɔ ɛDaray ya.[27]

⁹Nyinɛn nikyɛɛ ne ijwee na, ne ˆɛ mɔn ɛn nikpuru mon ɛlɛy, sɔng ˆɛ baasek nibhɛ ɛnik ko nang. Daa ɛli ne nyinɛn no nɛ nibhɛ wo gbik ˆɛ bok ɛKyɛɛ ne ijwee ɛdaan nɛ daa ne irywa, sɔng ne ɛ bok sim ito nang.[28]

¹⁰ɛTsim mɛ gbik, yɛk ɛn ihwet ndɔ ɛDaray ya. Yɛk ɛn ihwet da daa ne igbom ɛbhɛ ne ndiinday ɛbhɛ.

¹¹Yɛk ɛn nɛ igbum ba ne ɛTaanggbey ya kɛ nang ngo gbik, te ˆɛ yɛɛ ne kyinak ɛn gɛgɛy daa ne ntsɛntsɛng igywebhe ɛShɛtan de.

¹²Daa ɛli ne sɔng njwɛɛn cwaasek en nɛ niten ne sii nang. Njwɛɛn i yang cwaasek en ne ikpabyik ivebhe ɛdaa ne irywa, nɛ nigɔm ne ikpabyik ivebhe da nɛ nibhɛ bok igbɔm ɛzay yɛdaa wo, gbik ne ikpabyik ivebhe ne ifɛ i hyel daa ne igbil.

¹³iPhɛ ɛlɛy, ne ˆɛ yɛk ɛn nɛ igbum ba ne ɛTaanggbey ya kɛ nang ngo gbik, te sɛ́ ne sɛ ɛtuk ɛbebhe gha kɛ yɛɛs, ne ˆɛ yɛɛ ne kyinak ɛn gɛgɛy. Te ne sɛ ɛtsim mɛ ne ˆɛ kɛ taal ɛn gbik, ne ˆɛ jung kyinak ɛn nting.

¹⁴iPhɛ ɛlɛy, kyinak ɛn nting, te itin de teye ɛgagha mon, te ihywel icik ga teye ɛtura ne igyɔs ne ta itsom mon.[29]

¹⁵Te icwas ne sanga iBol iYɛnɛng ne nang irway ne laal da ne te nyini te ikpikpangat ne ˆɛ bok ɛn ne ita mon.[30]

¹⁶Kang ne iphɛ ɛlɛy, te ìnang ne itin mon da ne teye igum mon ne ˆaa phoo ɛn nɛ nibara ne igboo ɛBebhe gha.

¹⁷Bo ɛn iphɔrɔt da te ɛkɔn ne ito ne igyɔs, te ɛ bo ɛn iBol ɛTaanggbey de te ɛWal ne iKabyik ne kɛ nang nyini wo.[31]

¹⁸Te nɛ i bol ɛn ne ɛTaanggbey cɛcɛɛy ɛli ne iKabyik ge i hyel ne nyinɛn. Bol ɛn ɛTaanggbey ya daa nikɔn na gbik ne ɛ sim ɛn. Shɛɛ ɛn ɛkanang te ˆɛ nang ɛn ihwet mon daa ne bol ne ɛTaanggbey ya daa ninyi ɛbhɛ.

¹⁹Ne ˆɛ ma bol ɛn ne ɛTaanggbey ya daa mee te ɛ nang me ibol de ne naa bol wɛlɛng ɛnik, te n tɔng ninyi na ɛduk ne iBol iYɛnɛng nga ne iphɛ so gying ngo.

²⁰ɛTomɛ ne iBol iYɛnɛng ngɛghaa wo ɛbhɛ kɛ te nzo me ɛhaa ne nzi bol daa ne ncwincway ɛTaanggbey da, gbik ɛli ne n jung so ne nyang ngge. Bol ɛn ne ɛTaanggbey ya daa mee te yaa ne sɛ nzi sanga ibol ɛbhɛ de, ne n sanga ne irway nviit, ɛli ne iphɛ kɛ jam mɛ.

²¹Naa ne tom ɛTikyikus se, ɛgwaa mos ne njwii sim, ne ɛ mɔn ɛtomɛ ɛbhɛ gha ndɔ ɛDaray ɛli ne sɛ kyinak daa ne ibol ɛbhɛ. Aa ne tɔng nyini nikɔn na gbik, tɛ ne ˆɛ ma seng ɛn ncaang nge gbik ɛli ne nzo.[32]

²²ɛKɔn nɛghaa wo bhɛ kɛ te n tom ɛbhɛ ɛlɔ mon na, nggɛ tom ɛbhɛ te ˆɛ seng ɛn ɛli ne njwi so, ɛ ta te nyini itsɔngɔl gɛgɛy.[33]

²³Te ɛTaanggbey ya ne ɛ so ɛTaa gha, ne ɛDaray ɛYɛso ɛKiriti nang nigwaa na nɛ nibhɛ soye ninaa ne roos sa irway ne laal ne ishwim gbik ne ìnang ne itin.

²⁴Te izɛɛng ɛTaanggbey de shɛɛ daa ninyi gbik nɛ nibhɛ i sim ɛDaray ɛYɛso ɛKiriti yegha ne ishwim ba ne ifɛ sang ɛgak ko. Ɛɛy.