Read eten iFilibi 2 Bible Online

iFilibi 2 - eten bible

iFilibi 2

¹iShwɛɛ mon ndɔ ɛKiriti gha i tes nyini itsɔngɔl gɛgɛy yee? iShwim ɛbhɛ da i laasek nyini irway yee? ˆƐ so ɛn ndɔ ne ìtsɛm ne iKabyik gee? ˆƐ sim ɛn nyini ˆɛ ta i san ɛn iyɔm ne itso mon ne i?

²Wu iphɛ so ɛlɛy, ne ˆɛ te ɛn irway ihwala nge da te hyɔrɔ lenɛ ne ˆɛ kɛ byinki ɛn ito ndɔ ne ishwim ne ikabyik idaan gbik ne icwas ijwaan.

³Sɔng ˆɛ mɔn ɛn ɛdɛ ɛkɔn na ndɔ ne sim ito gbik ne tɔɔk ɛn ito nang. Yang laasek ɛn ito mon de, te ɛ ɛrɔngɔ bo ito ɛbhɛ te ɛgwaa ɛbhɛ phyin ɛbhɛ.

⁴Sɔng ɛ wɛɛ ɛn ito mon de zɔng ngo nang, ma wɛɛ ɛn nidɛng ne mang.

⁵Te icwas mon da ma so ihywee ne icwas ɛYɛso ɛKiriti da.

⁶Gbik ɛli ne ɛ so ɛTaanggbey ya, sɔng ɛ kɛ ne bo iTaanggbey ɛbhɛ de te ɛkɔn ne aa wum gɛgɛy nang.

⁷Ɛ kɛ yang kyii ne ito ɛbhɛ de te ɛkɔn ɛbuu. Ɛ kyii ne ito ɛbhɛ te ɛkpuru, ndɔ ne ibek ɛten ɛsii ne kɛ yɛk ɛbhɛ nɛ, ɛ yɛɛs te ɛten ɛsii.

⁸Ndɔ ne ibek ɛten ɛsii de, ɛ kɛ laasek ito ɛbhɛ, ɛ roos ɛTaanggbey yegha nɛ. iRoos sɛ phyii bhɛ hɔn ɛbhɛ iku, iku ɛdaa ne ihon ne gangat.

⁹iPhɛ ɛlɛy ɛTaanggbey ya ne nang ɛbhɛ ndiinday ne phɛ phyin gbik, ɛ ta nang ɛbhɛ ne irywɛɛk ko ne ifɛ phyin irɛɛk ge gbik.

¹⁰Tɛ nikɔn na ne kɛ ryɔng ngo te nɛ ɛkuum daa ne irywɛɛk ɛYɛso wo. Nikɔn ɛdaa ne irywa na, nɛ ninaa ɛzay ya, nɛ ninaa ndɔ ɛta ne ivel.

¹¹Tɛ ilwem ba gbik nang ishɛɛda wu, ɛYɛso ɛKiriti gha ɛbhɛ ɛ soye ɛDaray ya. Te ne nang ɛTaanggbey ye ne ɛ soye ɛTaa ne ndiinday.[4]

¹²iPhɛ ɛlɛy, nyinɛn no ne nzi sim mo, ɛli ne ɛ ku roos ɛn ibol nge de ne i sɛ nzo nɛ nyinɛn no, nzi ne roro nɛ nyinɛn ɛlyilyɛghaa wo ne n sang sonɛ nɛ nyinɛn no, hante ɛn ne roos sɛ. Mɔn ɛn ɛtomɛ ne irway mon gbik ɛli ne iphɔrɔt mon da yaa tɔɔl le kpas. Mɔn ɛn ndɔ ne kparat ne ɛnik ɛTaanggbey.

¹³Daa ɛli ne ɛTaanggbey ya ɛbhɛ ɛ mɔn ɛtomɛ ne irway mon da. Ɛbhɛ ɛ ne yɛk ngɛ ˆɛ sim ɛn ɛkɔn na ɛ sim, ˆɛ ta mɔn ɛn ɛbhɛ.

¹⁴Mɔn ɛn nikɔn na gbik wɛlɛng ivol mumuk gbik ne ishamas.

¹⁵Te ˆɛ te ɛn kang wɛlɛng ɛkɔn ne tok, ninɔn ɛTaanggbey wɛlɛng inyuu, ndɔ ɛzay ɛnggyuk ɛbebhe yɛghaa wo, ɛzay ya ne ˆɛ tol ɛn nɛ tɛ niyuyɔrɔ na,[5]

¹⁶ˆɛɛ ta naas ɛn nibhɛ ibol ne nang iken de. iPhɛ sɛ te n hal ɛgyɛy ne nyinɛn ɛtuk ka ne ɛYɛso ɛKiriti gha sɛ bhɛ kyii wo, te iphɛ tɔɔrek wu hang nggbang nge da ne ilong nge kɛ te buu.

¹⁷ìNang ne itin mon de gbik ne ɛtomɛ mon na ndɔ ɛDaray ya so te hap itsanga ɛlɔ ɛbhɛ gha. Sɛ ne kyi yɔng yaa lok neyi nge na daa ne hap itsanga yɛdee wo, nzɛ ne phok iyɛnɛng, n da bok irway ihwala nɛ nyinɛn no gbik.

¹⁸ɛLɛy ne nyinɛn no ne ˆɛ sɛ́ ma phok ɛn iyɛnɛng gbik ne irway ihwala da ne mee wo.

¹⁹Wu ɛDaray ɛYɛso gha kɛ sim, nggɛ yɛk ne irway nzi tas te nzɛ tom ɛTimɔti ye ɛlɔ mon na ndɔ ne nituk kɛnaa wo, te ibol mon de hante ne te me itsɔngɔl gɛgɛy.

²⁰Sɔng n bok ɛdɛ ɛnyi gha te ɛTimɔti gha ne icwas ɛbhɛ so daa mon no nang.

²¹ɛByin ninyi na ku tas nikɔn nɛ nibhɛ yaa phyik nibhɛ zɔng, sɔng ninaa nɛ nibhɛ soye ninaa ɛYɛso ɛKiriti nang.

²²ˆƐ yɛɛ ɛn ɛTimɔti yegha ɛli ne ɛ so, daa ɛli ne njwi kɛ mɔn ɛtomɛ ne sanga ibol iyɛnɛng ngge ne ɛbhɛ wo te ɛngɔn ne ɛkyɛɛ.

²³iPhɛ ɛlɛy, nzi tas naa tom ɛbhɛ ɛtsim mɛ ne nggɛ seng ɛkɔn na ne aa te ne mee.

²⁴Wu ɛDaray ya kɛ sim, mee wo ne ito nge naa ne yɛɛs ɛlɔ mon na sɔng ne bees nten nang.

²⁵Nzi ne yaang iphɛ kɛ jam mɛ nggyi tom nyini ne ɛBafaratus se ne ɛ so ɛgwaa nge, ɛtaay ɛtomɛ nge, ɛsooja te me ne ˆɛ kɛ tom ɛn ɛbhɛ te ɛ phyik me wo.

²⁶ɛBafaratus sa i has irway te sɛ yɔng aa yaang nyini, ibol lɛ i ma yung tak ɛbhɛ iyɔm gbom daa ɛli ne ˆɛ kɛ phok ɛn ɛli ne ɛ so shwa wo.

²⁷ɛTsak ɛBafaratus sa kaa so sha te aa ku. ɛTaanggbey ya kaa ne san iyɔm ɛbhɛ. Sɔng ne so iyɔm ɛbhɛ zɔng ne ɛTaanggbey ya kɛ sang nang, ɛ kɛ ma san iyɔm nge. Daa ɛli ne sɔng ɛTaanggbey ya kɛ sim aa hante me ne irway ishwii daa ne irway ishwii nang.

²⁸iPhɛ ɛlɛy ne nggɛ ne ku yɛk ne iyɔk kɛnaa tom nyini ne ɛbhɛ. Ya sɛ ˆɛ kɛ yaang ɛn ɛbhɛ wo dɔng, ˆaa ne yɛk ɛn irway ihwala. Mee wo ne ma n ji sɛ iphyonka.

²⁹Say ɛn ɛbhɛ ne irway ihwala te ɛgwaa ndɔ ɛDaray ya. Nang ɛn ihywee ninyi yɛdee nggyɛ wo ne ndiinday ɛli ne iphɛ kɛ jam mɛ.

³⁰Daa ɛli ne ɛ kɛ phyii ne ku ɛlɔ ɛtomɛ ɛKiriti gha. Ɛ kɛ ne ta nang ito ɛbhɛ te ɛ phyik me ne ɛkɔn na ne hame ˆɛ kɛ yɛɛ ne phyik ɛn mɛɛn nɛ.