Read eten iFilibi 3 Bible Online

iFilibi 3 - eten bible

iFilibi 3

¹ɛTsim mɛ gbik nigwaa nge ne nzi sim, yɛk ɛn irway ihwala daa ɛli ne ˆɛ so ɛn ndɔ ɛDaray ya. Sɔng iphɛ some ɛkɔn ne tak iyɔm nggyi ta haa nyini nikɔn nɛnaa wo nang. Nikɔn nɛnaa wo yang so tɛ nibhɛ phyik nyini.

²Wɛɛ ɛn nyini yɛnɛng ɛlɔ ninyi nibebhe yɛnaa nggyɛ wo, ninyi na nɛ nibhɛ so tɛ nibabu na. Ninyi na nɛ nibhɛ bo wu iphɛ so nggbinggbing i hyɛ ɛhaa ne ɛ kɛ nang ne itin nɛ ne ɛDaray ya itee de.

³Njwɛɛn, njwɛɛn yang soye ninaa ne kɛ hyɛghɛ njwɛɛn icwee ne itin da. Njwɛɛn no ne njwɛɛn i re ɛTaanggbey yegha ntsong ngga lenɛ ne iKabyik Ɛbhɛ de. Njwɛɛn no ne njwɛɛn i hal ɛggyɛy ya ne ɛYɛso ɛKiriti gha. Njwɛɛn no ne njwɛɛn i sang hal ɛggyɛy ya daa ne ikpii ɛten ɛsii da ne i yaang ne irwisɛ da.

⁴Nzɛ yɛɛ ne hal ɛggyɛy ya daa ne ikpii ɛten ɛsii da ne i yaang ne irwisɛ da. Wu ɛdɛ ɛnyi gha ma yung sonɛ ne aa hal ɛggyɛy ya daa ne ikpii ɛten ɛsii da ne i yaang ne irwisɛ da, ne n phyin ɛbhɛ nɛ.

⁵Kaa hyɛ me itee de ɛtuk ɛnaras sɛ ɛtsim mɛ ne kɛ yɛk me. Ne nzo iyɛk niSɛrɛla, icwaang ɛBinyami, ɛHyiburu ririk. Nzo me ɛFarasii, nggɛ roos ikpii ne iMɛmɛ ɛMuusaa da gbyak.[6]

⁶Nggɛ has irway gbom daa ne ibol ne roos ikpii ne re ntsong niYahodawa na, gbik ne baasek idira ninaa ne roos ɛKiriti yede nggbang ngga. Nggɛ ne roos ikpii ne iMɛmɛ ɛMuusaa da gbyak, sɔng nggɛ ben idɛng nang.[7]

⁷Gbik nikɔn nɛnaa wo ne nggaa i yaang tɛ nibhɛ soye iryat de ɛlɔ nge gha, nzi ne yaang nibhɛ so buu ɛlyilyɛghaa wo lenɛ ne ɛKiriti gha.

⁸Nggɛ bo nikɔn na gbik te isusɔng lenɛ ne nggɛ seng ɛDaray nge ɛYɛso ɛKiriti yegha. iSeng ngga ne nggɛ seng ɛKiriti yegha phyin nikɔn na gbik. Kɛ lenɛ ne ɛbhɛ nggɛ ne wɔs nikɔn na gbik, nggɛ bo nibhɛ te isusɔng te nzɛ iryat ɛKiriti de,

⁹n shɛɛ ndɔ ɛbhɛ. Sɔng yaa ne lenɛ ne icik nge ne nggɛ roos iMɛmɛ ɛMuusaa da gbyak ko nang, yaa yang lenɛ ne icik ge ne iphɛ le ne ìnang ne itin ne ɛKiriti. Kaabi icik ge ne i sɛ iphɛ ɛlɔ ɛTaanggbey lenɛ ne ìnang ne itin de.

¹⁰Nzi sim te nzɛ seng ɛKiriti yegha yɛnɛng gbik ne ihwet da ne ifɛ kɛ yiisik ɛbhɛ ne ikpuu da. Nzi sim te nzɛ sɔ ihywee ne nggbang ngga ne ɛ kɛ sɔ wo, ne ihywee ne iku de ne ɛ kɛ ku wo.

¹¹Te ma n yɛk ne irway i sɛ ma yiisik me ne ikpuu da.

¹²Sɔng nggɛ ku shɛɛ bhɛ tuu ɛlɔ gha ne nzi sim na bhɛ tuu wo nang. Sɔng nggɛ ku shii te hyɔrɔ nang. Kwa! Nzi yang kyangas me nɛ te nzɛ ɛwɛng nga, daa ɛli ne ɛYɛso ɛKiriti gha kɛ ku hyere me nggɛ teme ɛhaa ɛbhɛ.

¹³Nigwaa en, sɔng nzi bo nggɛ ku shɛɛ bhɛ tuu nang. ɛKɔn na ne nzi mɔn no ɛbhɛ gha lɛ: nzi tes bap ne ɛkɔn na ne ɛ kɛ ku phee, nzi ne kyangas me ne ɛhaa ne ɛ so gɔɔ ɛyisɛ.

¹⁴Nzi kyangas me nɛ te mbɛ sɛ ɛwɛng ɛdaa ne irywa gha. ɛWɛng nga ne ɛTaanggbey ya kɛ yel-le me nɛ wo lenɛ ne ɛYɛso ɛKiriti gha.

¹⁵iPhɛ ɛlɛy, gbik njwɛɛn no ne kɛ hɔn ndɔ ne ikabyik ge, te njwɛɛn roos icwas sɛdaa wo. Wu ɛbyin mon ne bok idɛ icwas da kang, ɛTaanggbey yaa ne te ˆɛ seng ɛn ibol lɛ wɛsɛrɛk.

¹⁶ɛGbaang ɛkɔn nɛ so, ɛlɔ gha ne njwɛɛn kɛ bhɛ tuu te re ɛnu ɛyisɛ ne nɛ ɛlɔ yɛ.

¹⁷Nigwaa en, nzi sim te ˆɛ sɛ roos ɛn ngkɔɔl nge, tɛ ne ˆɛ ta mɛmɛ ɛn nɛ, nɛ ninyi na nibhɛ kɛ roos ɛkɔn na ne njwi kɛ mɛmɛ nyini nɛ wo.[8]

¹⁸Nidɛng ninyi na sonɛ ne nggɛ ku tɔng nyini ibol nibhɛ, nzi ne ta tɔng nyini ɛlyilyɛghaa wo nɛ niyilis wu nibhɛ kɛ teye ninaa ne iphup ne iku ɛKiriti de daa ne ihon ne gangat to.

¹⁹ɛGyeng nibhɛ so ibees se, ɛtaanggbey nibhɛ so iphul. Nibhɛ i hal ɛgyɛy ne iyɔm ne ncwa nibhɛ de, irway nibhɛ so daa nikɔn ɛzay.

²⁰Njwɛɛn ne soye ninaa ne igbɔm ɛdaa ne irywa. Njwɛɛn i ne hyep ɛHaa ne Phɔt njwɛɛn ɛDaray ɛYɛso ɛKiriti yegha ne aa le daa ne irywa wo.

²¹Ɛbhɛ ɛ bok ihwet ne kyii nɛ nikɔn na gbik ndɔ ne igbɔm ɛbhɛ. Sɛ ne lenɛ ne ihwet ɛbhɛ yɛdaa nggyɛ wo, ɛ hyere ibek ne taasek njwɛɛn nɛdee wo iphɛ teye idee ne ito-ndiinday te idee ɛbhɛ.