Read eten iKɔlɔsi 2 Bible Online

iKɔlɔsi 2 - eten bible

iKɔlɔsi 2

¹Nzi sim te ˆɛ sɛ seng ɛn ihywee ɛtomɛ de ne nzi kyangas me nɛ ɛlɔ mon na, nɛ ninyi ne iLɔdakiya na, gbik nɛ ninyi na ne hame nibhɛ kɛ ku yaang me wo.

²Nzi mɔn ɛkɔn nɛghaa wo tɛ nibhɛ te itsɔngɔl gɛgɛy, nibhɛ teye nidaan nɛ ndɔ ne ishwim. Tɛ nibhɛ seng ɛTaanggbey yegha hyɔrɔ wɛlɛng ito irway. Nibhɛ sɛ ishweng ne ihywɛ soye iryat ne ihywɛ shɛs gbik. iShweng ngɛdaa wo yaa ne phyik nibhɛ, nibhɛ seng ɛkyukyum ne ibol igying ɛTaanggbey de ne kaa ku rɛɛ wo, kaabi ɛKiriti gha.

³Ndɔ ɛbhɛ ne kɛ rɛɛ ne iyɛnɛng ne ntsɛntsɛng ge ne ishweng ga gbik.

⁴Nzi tɔng nyini ibol lɛdee wo, ɛlɔ ne ɛdɛ ɛnyi yaa yung luk nyini ne ɛnu ɛbel.

⁵Gbik ɛli ne n sang so ne nyinɛn ndɔ ne ibek ge, icwas nge ne so daa mon. Ne n bok irway ihwala gbom ɛli ne nzi phok ɛ kɛ kyinak ɛn ne ihwet da, ɛ yɛk ɛn irway nviit da ndɔ ne ìnang ne itin mon de ne ɛKiriti gha.

⁶ɛLi ne ˆɛ kɛ ku say ɛn ɛYɛso ɛKiriti yegha wu ɛ soye ɛDaray mon na, ne ˆɛ re ɛn ɛnu ɛyisɛ ne shɛɛ ndɔ ɛbhɛ.

⁷ˆƐ see ɛn iling ˆɛ lɔl ɛn nyini ndɔ ɛbhɛ te ìnang ne itin mon de yɛk ihwet ɛli ne njwi kɛ ku mɛmɛ nyini nɛ wo, irway ihwala mon da yɛɛnɛ njɛnjɛt ɛbyin nɛ loghɛt.

⁸Wɛɛ ɛn nyini yɛnɛng, ɛlɔ ne ɛdɛ ɛnyi yaa yung kpuru ihywɛɛ mon, lenɛ ne iluk ne ishweng ɛzay yɛdaa wo ne ifɛ so ishweng ɛbuu da. iShweng ngga ne ifɛ le ɛlɔ ne ikpii ɛten ɛsii gha, ivaa ne ikpabyik ɛzay yɛdaa wo, ne ifɛ sang le ɛlɔ ɛKiriti gha.

⁹Daa ɛli ne ibek ɛKiriti de ne ɛTaanggbey ya i shɛɛ nɛ hyɔrɔ ndɔ iTaanggbey ɛbhɛ.

¹⁰ˆƐ kɛ ne ma te ɛn hyɔrɔ ndɔ ɛKiriti gha ne ɛbhɛ ɛ soye ɛndiinday ne ikpabyik ga gbik ne igbɔm ba.

¹¹Ndɔ ɛbhɛ dɔng ne kɛ ne hyɛ nyini ne itee de. Sɔng ne so ihywee ne idee ne i hyɛ ne iwɔ nang, yang so idee ne ɛKiriti gha kɛ hyɛ nyini nɛ lenɛ ne ɛ kɛ tul nyini ndɔ ne ishwɛɛ ne ibek ne iphɛ so ishwɛɛ ɛten ɛsii.

¹²ɛLi ne kaa yɛk nyini ne ibatisima de, iphɛ ne so te kɛ rɛɛ nyini ne ɛKiriti gha. Kaa ne ta lenɛ ne ibatisima de, ne yiisik nyini ne ɛbhɛ lenɛ ne ìnang ne itin mon daa ne ihwet ɛTaanggbey da ne ɛ kɛ yiisik ɛbhɛ ndɔ ne ikpuu da.[5]

¹³ˆƐ kaa so ɛn nyini ikpom ɛlɔ ne ɛfɔt mon no gbik ne iyɔm ne hyɛ itee ne tul nyini ndɔ ne ishwɛɛ ne ibek ge, ɛTaanggbey ya ne yiisik nyini niken nɛ ndɔ ɛKiriti gha, ɛtsim mɛ ne ɛ kɛ hana njwɛɛn ne ɛfɔt njwɛɛn no.[6]

¹⁴ɛTaanggbey ya kɛ bunga nikɔn na nɛ nibhɛ i naas ishɛɛda de wu njwɛɛn kɛ ben iMɛmɛ ɛMuusaa da. Ɛ kɛ bo nibhɛ ɛ yɛk ndɔ ne ɛKiriti gha ɛbhɛ gangat daa ne ihon ne gangat.[7]

¹⁵ɛKiriti gha kaa phɔt nikɔn ne itsom ninaa ne re igbɔm ba gbik nɛ ninaa ne ikpabyik ga. Ɛ kɛ bak nibhɛ ncwa kpas lenɛ ne ɛ kɛ re ɛwɛng nɛ nibhɛ daa ne ihon ne gangat to.

¹⁶iPhɛ ɛlɛy, sɔng ne ˆɛ sim ɛn ɛnyi yɔngɔ wu ˆɛ kɛ ben ɛn daa ɛkɔn na ne ˆaa re ɛn, ne ɛkɔn na ne ˆaa sɔ ɛn nang. Sɔng ɛnyi ne yɔng ˆɛ kɛ ben ɛn daa ne idɛ idira de nang, hang idira ne wɛɛ ifɛl ifas yɔɔ, hang idira ɛtuk ne iwɛsɛ yɔɔ.[8]

¹⁷Nikɔn nɛnaa wo soye izazurum nikɔn na nɛ nibhɛ yaaso. ɛKiriti gha ɛbhɛ ne ɛ soye ɛkɔn nɛ ririk kɛ.

¹⁸iPhɛ ɛlɛy sɔng ne ˆɛ tek ɛn ɛdɛ ɛnyi gha hosop nyini ne ɛwɛng nga ne ɛ kɛ re ɛn daa nikɔn nɛnaa wo nang. Sɔng ɛ hosop nyini nɛ lenɛ ne ɛ kyangase ne ring ito ɛbhɛ ne phok yɛnɛng te ɛ sɛ ɛkɔn ne yaa tal ɛbhɛ nang. Sɔng ne ɛ hosop nyini nɛ lenɛ ne ɛ mɛmɛ nyini nɛ wu iphɛ so nggbinggbing i re nimalɛka ntsong nang. Sɔng ne ɛ hosop nyini nɛ lenɛ ne ɛ hal ɛgyɛy wu kɛ phaal le iyuwa ɛ ta i tɔɔsek ito ɛbuu nang. iRway ne ihywee ninyi yɛdee nggyɛ wo soye ishwɛɛ ɛten ɛsii ne ifɛ i te nibhɛ mɔn ɛlɛ wo.

¹⁹iHywee ɛnyi yɛdee nggyɛ wo kɛ ne ku hosop bhe ne ɛKiriti gha ne ɛbhɛ so ito ne idira ninaa ne roos de. ɛHaa ne ɛbhɛ bok idira ninaa ne roos de ɛlɔ ɛdaan na, kaabi ibek ɛbhɛ de, ne i lenɛ ne itsibhi de nilɔ yɛ byingis se iphɛ raras ihywee ne raras da ne ɛTaanggbey ya ɛbhɛ ɛ yɛk ngɛ wo.[9]

²⁰ˆƐ kɛ ku ɛn ne ɛKiriti gha, kɛ ne phɔt nyini ndɔ ne ihwet ne ikpabyik ɛzay yɛdaa wo. iKyee iphɛ kɛ ne te ˆɛ shɛɛ ɛn te ˆɛ tɔɔ ɛn nyini ninaa ɛzay yaa? iKyee iphɛ kɛ te ˆɛ kɛ nang ɛn itso mon da daa ne ikpii ɛzay yɛdaa woo?

²¹Te ikpii da ne ifɛ bo, “Sɔng ˆɛ wum ɛn nang, sɔng ˆɛ phɔwɔ ɛn nang, sɔng ɛ dat ɛn nang ngoo?”

²²Gbik nikɔn nɛnaa wo so ninaa nɛ nibhɛ sɛ sa, daa ɛli ne kɛ see nibhɛ lenɛ ne ikpii ɛten ɛsii gbik ne imɛmɛ ɛbhɛ.

²³iHywee ne ikpii yɛdaa wo yang so te ifɛ bok ntsɛntsɛng, ɛli ne ifɛ i hante ne cwacwat ne roos ikpii da nɛ ninyi na i yɛɛset nɛ, nibhɛ ring itso nibhɛ ne phok iyɛnɛng ngge, nibhɛ ta i baasek ibek ɛbhɛ de nggbang ngga te tal nibhɛ wo. Sɔng ikpii yɛdaa wo ne bok ihwet ne ring ne ihyop ne ibek ge nang.