Read eten iKɔlɔsi 3 Bible Online

iKɔlɔsi 3 - eten bible

iKɔlɔsi 3

¹Kɛ yiisik nyini ne ikpuu da ne ɛKiriti gha, iphɛ ɛlɛy ne ˆɛ kyii ɛn ne ihywɛɛ mon daa nikɔn nɛ nibhɛ so daa ne irywa, ɛlɔ gha ne ɛKiriti gha kɛ soos nɛ ne iwɔ ne irwye ɛTaanggbey yo.[10]

²Kyii ɛn ne ihywɛɛ mon daa nikɔn ɛdaa ne irywa, sɔng nikɔn ɛzay yɛnaa wo nang.

³Daa ɛli ne ˆɛ kɛ ku ku ɛn, kɛ ne rɛɛ iken mon de ne ɛKiriti gha ndɔ ɛTaanggbey.

⁴Sɛ ne sɛ ɛKiriti gha ne ɛbhɛ ɛ soye iken mon de kɛ tɔɔl le, ˆɛ sɛ ne ma tɔɔl nyini ne ɛbhɛ ndɔ ne ito-ndiinday ɛbhɛ de.

⁵iPhɛ ɛlɛy, ne ˆɛ phoo ɛn ihyop nikɔn ɛzay de nɛ nibhɛ so ndɔ ne irway mon da. Phoo ɛn ihyop ne nzangas de, ne ihyop nikɔn ne iyɔm ncwa da, ne icwas ivebhe da, ne irisɛ de ne iphɛ soye re igunkyi de ntsong ngga.

⁶Daa ɛli nɛ nikɔn nɛ naa wo bhɛ yaa te njenjek ɛTaanggbey de yɛɛs daa ninyi na nibhɛ nɛ nibhɛ i sang roos ibol ɛbhɛ de.

⁷ˆƐ kaa tsa so ɛn ndɔ ne ihywee ne ishwɛɛ yɛdaa wo nten de ne icwas mon da kaa ma so daa nibhɛ.

⁸ɛLyilyɛghaa wo, iphɛ ne so ngbingbing ɛ hosop ɛn nyini ne ihywee ne ishwɛɛ yɛdaa wo. Hosop ɛn nyini ne njenjek, ne ɛndok, ne rop ɛnyi ne irway, ne ibees irywɛɛk, gbik ne ivol ikpɛɛ ɛnu mon na.

⁹Sɔng ˆɛ wul ɛn irywɛɛk ndɔ mon nang, daa ɛli ne ˆɛ kɛ ku tek ɛn nikɔn nitɛl la gbik ne ɛtomɛ nibhɛ gha.[11]

¹⁰ˆƐ kɛ bo ɛn ishwɛɛ ifas. iShwɛɛ yɛdaa wo ne ɛTaanggbey ya ne ɛbhɛ kɛ ryɔng ngo i ne hanas ne tes ifɛ ifas ndɔ mon no ne ˆɛ so ɛn izazurum ɛbhɛ de te ˆɛ hɔn ɛn ndɔ ne seng ɛbhɛ.[12]

¹¹Ɛli ne ˆɛ kɛ bo ɛn ishwɛɛ ifas da, sɔng ihosop ne ta tɔ nɛ ndɔ mon no nang. niYahodawa nɛ ninaa ne hame nibhɛ soye niYahodawa, ɛhaa ne kɛ hyɛ ɛbhɛ itee ne ɛhaa ne hame kɛ hyɛ itee, ɛnyi ne ito iben, ne ɛhaa ɛhay nang, ne ɛkpuru ne ɛngɔn ne ijwee nang. Nibhɛ so ɛkɔn ɛdaan nɛ daa ɛli ne ɛKiriti gha ɛbhɛ bok nikɔn na gbik, ɛbhɛ ɛ ta so ndɔ njwɛɛn gbik.

¹²ɛTaanggbey ya kɛ kasa nyini te ˆɛ te ɛn nyini ninyi ɛbhɛ ne kɛ tul kang, ninaa ne ɛ sim gbom. iPhɛ ɛlɛy, ne ˆɛ yɛk ɛn irway ne san iyɔm nigwaa, ˆɛ mɔn ɛn nikɔn niyɛnɛng, ˆɛ te ɛn lyaak, ˆɛ laasek ɛn ito, ˆɛ bo ɛn ɛbɔk.

¹³Boos ɛn ɛbɔk nɛ nigwaa na. Wu ɛdɛng ndɔ mon no kɛ ne bees ɛdɛng ngɛ, hana ɛn ɛbhɛ nɛ. Te ɛli ne ɛDaray ya kɛ hana nyini nɛ ɛfɔt mon no ne ˆɛ ma i han ɛn nyini nɛ.[13]

¹⁴Hante ɛn ne ishwim daa nikɔn nɛnaa wo. iShwim ba ifɛ kɛ byingis nikɔn na ɛlɔ ɛdaan nibhɛ te hyɔrɔ.

¹⁵Te irway ne laal ɛKiriti da hyel ne nyinɛn ndɔ nikɔn na ne ˆaa mɔn ɛn gbik, daa ɛli ne kɛ lenɛ ne irway ne laal lɛdaa wo ɛTaanggbey ya yel-le nyini ndɔ ne ibek idaan. Te ɛ te ɛn nyini ninaa ne tɔɔsel ɛTaanggbey yegha irway ihwala.

¹⁶Te ibol ɛKiriti de shɛɛ ndɔ ne irway mon da gbom. Mɛmɛ ɛn ne nigwaa nɛ, te ˆɛ kpɛng ɛn nyini ndɔ ne ntsɛntsɛng, ˆɛ yaak ɛn ne ighel ne ɛWee ne iBol ɛTaanggbey, ne ighel ne dɛp ɛTaanggbey ye, ne idee ne iKabyik kɛ nang, ˆɛ tɔɔsel ɛn ɛTaanggbey yegha irway ihwala ndɔ ne irway mon.

¹⁷Gbik ɛkɔn na ne ˆɛ mɔn ɛn, hang ivol yɔɔ, hang ɛtomɛ yɔɔ, mɔn ɛn ndɔ ne irywɛɛk ɛDaray ɛYɛso, ˆɛɛ tɔɔsel ɛn ɛTaanggbey ye ne ɛ so ɛTaa irway ihwala lenɛ ne ɛYɛso gha.

¹⁸Nyinɛn nikuk ne ˆɛ bok ɛn niras, roos ɛn ibol niras mon de ɛli ne iphɛ kɛ jam mɛ ndɔ ɛDaray ya.[14]

¹⁹Nyinɛn niras ne ˆɛ bok ɛn nikuk, sim ɛn nikuk mon na, sɔng ˆɛ boos ɛn nibhɛ ne izok ge nang.

²⁰Nyinɛn ninɔn, roos ɛn ibol nikyɛɛ mon de ndɔ nikɔn na gbik, daa ɛli ne iphɛ i nang ɛTaanggbey yegha irway ihwala.[15]

²¹Nyinɛn nikyɛɛ, sɔng ˆɛ te ɛn ninɔn mon na te njenjek nang, ɛlɔ nɛ nibhɛ yaa yung tul irway.[16]

²²Nyinɛn nikpuru, roos ɛn ibol nikyɛɛ ne ijwee mon ɛzay de ndɔ nikɔn na gbik. Sɔng ˆɛ mɔn ɛn ɛtomɛ gha nten de nɛ nibhɛ sonɛ nibhɛ wɛɛ nyini tɛ nibhɛ ji phok iyɛnɛng mon de nang, yang mɔn ɛn ɛtomɛ gha ne irway ijwaan te ˆɛ tel ɛn ɛnik ɛDaray.

²³Gbik ɛkɔn na ne ˆaa mɔn ɛn, mɔn ɛn ɛbhɛ ne irway mon gbik te ɛtomɛ ɛDaray ne ˆɛ mɔn ɛn, sɔng ɛhaa ɛnyi nang.

²⁴Daa ɛli ne ˆɛ yɛɛ ɛn ɛDaray ya bok isha ne iphɛ so iyɛnɛng mon ne ɛ sɛ́ nang nyini, ɛlɔ ne ɛDaray ɛKiriti gha ne ˆɛ mɔn ɛn ɛbhɛ ɛtomɛ gha.

²⁵ɛHaa ne mɔn ibebhe de sɛ ne bhɛ say ibebhe ɛbhɛ de, wɛlɛng i sim ito.[17]