Read eten 1 iTasɔlɔnika 2 Bible Online

1 iTasɔlɔnika 2 - eten bible

1 iTasɔlɔnika 2

¹Nyinɛn nigwaa en no ˆɛ yɛɛ ɛn, sɔng iyɛɛs mos da ɛlɔ mon na kɛ te buu nang.

²Nyinɛn no ˆɛ yɛɛ ɛn ihywee ne nggbang ngga ne kɛ baasek njwii, ne ihywee ne towos da ne kɛ towos njwi ndɔ ne iFilibi nyɛɛn njwi kyi yɛɛs ɛlɔ mon na ne iTasɔlɔnika. Kaa baasek njwii nggbang, i bees njwi irway, gbik ne iphɛ ɛlɛy ɛTaanggbey mos sa ne phyik njwii, njwi ne te irway nviit njwi tɔng nyini iBol iYɛnɛng ngge ne iphɛ le ɛlɔ ɛbhɛ gha.[3]

³Daa ɛli ne sɔng iben, ne iluk, ne icwas ivebhe so ndɔ ne ibol de ne njwii tɔng nyini wo nang.

⁴Njwii yang bol ɛli ne ɛTaanggbey i sim njwii ɛ kɛ nang njwii ɛtomɛ ne sanga iBol iYɛnɛng ngge. Sɔng njwii sim te ɛten ɛsii bhɛ sɛ phok iyɛnɛng mos nang, te ɛTaanggbey ɛbhɛ phok iyɛnɛng mos de daa ɛli ne ɛbhɛ ɛɛ tɛrɛk icwas ne irway mos da.

⁵Nyinɛn no ɛ yɛɛ ɛn, sɔng njwi kɛ ku bol nɛ nyinɛn ne ɛnu ɛbel nang. Sɔng njwi kɛ ne yɛɛs ndɔ ne iluk kaabi njwi bok irisɛ nang. ɛTaanggbey ɛbhɛ ɛ so ɛshɛɛda mos.

⁶Sɔng njwii tɔk te ɛten ɛsii bhɛ sɛ ton njwii nang. Hang nyinɛn yɔɔ, hang nihak ninyi yɔɔ, sɔng njwii sim nang. Sɛɛ yɔng njwii tɔk ko, njwi sɛɛ ne mɔn ɛtomɛ ne ihwet mos, ne njwi soye ninɔn ne tom ɛDaray ya njwi yɛk nyini nɛ ɛ phyik ɛn njwii.

⁷Njwi kɛ boos nyini ihywɛɛ ɛli ne nikuk i boos ninɔn nishesheng nibhɛ.

⁸Daa ɛli ne njwi sim nyini gbom mo, sɔng njwi kɛ ne sim te njwi sɛɛ nang nyini iBol iYɛnɛng ngge ne iphɛ le ɛlɔ ɛTaanggbey ya zɔng nang, njwi kɛ ne ta phok yɛnɛng ne nang ikpen mos ɛlɔ mon. ˆƐ so ɛn ne irway mos gbom.

⁹Nigwaa en, ɛtsak, nyinɛn no ˆɛ yɛɛ ɛn nggbang ngga ne ɛbung nga ne njwi kɛ sɔ wo. Njwi kɛ mɔn ɛtomɛ gha ne ɛtuk ne igbey gbik daa ɛli ne njwi yaa yung nang nyini irighitik nten de ne njwii sanga iBol iYɛnɛng ngge ne iphɛ le ɛlɔ ɛTaanggbey ya.

¹⁰Nyinɛn ˆɛ so ɛn nishɛɛda mos, ɛTaanggbey ne ma soye nɛ daa ne ihywee ne ishwɛɛ da ne njwi kɛ shɛɛ ndɔ mon no ne ɛ kɛ nang ɛn ne itin nɛ wo. Njwi kɛ shɛɛ wɛwɛy, cik, wɛlɛng ɛkɔn ne tok.

¹¹Nyinɛn no ˆɛ ne yɛɛ ɛn, njwi kɛ boos ɛrɔngɔ ɛli ne ɛKyɛɛ i boos ninɔn ɛbhɛ.

¹²Njwi kɛ bol nɛ nyinɛn, njwi tes nyini itsɔngɔl gɛgɛy, njwi roro nyini te ˆɛ shɛɛ ɛn ishwɛɛ da ne ifɛ kɛ jam mɛ ne yel-le da ne ɛTaanggbey ya kɛ yel-le nyini nɛ ndɔ ne igbɔm ɛbhɛ da ne ndiinday ɛbhɛ de.

¹³ɛKɔn nɛghaa wo ɛbhɛ kɛ te njwi ne tɔɔsel ɛTaanggbey yegha irway ihwala da cɛcɛɛy yo. Daa ɛli ne nten de ne njwi kaa nang nyini ibol ɛTaanggbey de, sɔng ˆɛ kaa ne say ɛn iphɛ te ibol ɛten ɛsii nang, ˆɛ kaa yang say ɛn iphɛ, iphɛ soye ibol ɛTaanggbey ne iphɛ mɔn ɛtomɛ ndɔ mon. Nyinɛn no ne ˆɛ kɛ nang ɛn ne itin nɛ wo.

¹⁴Nyinɛn no nigwaa en, ˆɛ kɛ mɛmɛ ɛn ne ɛkɔn ɛlɔ ne ijwira ninaa ne roos ɛTaanggbey ye ndɔ ɛYɛso ɛKiriti gha nɛ nibhɛ so ne ivel ne iYahudiya de. ˆƐ kɛ sɔ ɛn nggbang ɛlɔ ninyi ɛgarang mon na ɛli nɛ nibhɛ kɛ ma sɔ ɛlɔ niYahodawa na.[4]

¹⁵niYahodawa na bhɛ kaa phoo ɛDaray ɛYɛso yegha nɛ ninabawa ne ile na nibhɛ ta baasek njwii nggbang ngga. Nibhɛ kɛ bees ɛTaanggbey ye irway gbom, nibhɛ ne bok iphup be nɛ ninyi na gbik.[5]

¹⁶Nibhɛ ring njwi ne tɔng ninyi na ne hame nibhɛ soye niYahodawa na ibol iyɛnɛng ngge, ɛlɔ nɛ nibhɛ aa ma yung sɛ iphɔrɔt da. Ɛlɛ wo nɛ nibhɛ ne hanas ne shwaasek ɛgyuuru ne ɛfɔt nibhɛ gha hyɔrɔ. iPhɛ dee njenjek ɛTaanggbey de kɛ ne tɔm daa nibhɛ.

¹⁷Nigwaa en, nten de ne kaa hobhose njwii nɛ nyinɛn no, ihobhose da ne ifɛ so ivaa ne ibek ga ifɛ sang so ivaa ne irway da, njwii ne has irway, njwi bok iyɔk kɛ te njwi sɛɛ yaang nyini ɛyisɛ ne ɛyisɛ.

¹⁸Njwi kɛ sim te njwi sɛɛ yɛɛs ɛlɔ mon na. Mee ɛBulus sa nggɛ sim, te sɛɛ yɔng ngge yɛɛs nten de kang-ka-kang, ɛShɛtan na kɛ ne kyɛngɛ njwii.

¹⁹iKyee iphɛ ne so ɛkɔn ne sit irwisɛ mos, ne irway ihwala mos, ne ɛkɔn ne ito ne igbɔm mos, ne ɛkɔn ne hal ɛgyɛy mos ɛnu ɛyisɛ ɛDaray njwɛɛn ɛYɛso gha ɛtuk ne yɛɛs ɛbhɛ gha kang ne nyinɛn noo?

²⁰ɛTsak, nyinɛn, ˆɛ so ɛn nyini ɛkɔn ne hal ɛgyɛy mos gbik ne irway ihwala mos.