Read eten 2 iTasɔlɔnika 3 Bible Online

2 iTasɔlɔnika 3 - eten bible

2 iTasɔlɔnika 3

¹ɛTsim mɛ gbik nigwaa en, bol ne ɛTaanggbey daa mos, te ibol ɛDaray de sɛ iphɛ shwalat gbom i ta nang iphɛ ne ndiinday te ɛli ne iphɛ kaa so ndɔ mon no.

²Ne ɛ ta bol ɛn ne ɛTaanggbey ya te ɛ phɔt njwii ndɔ ne iwɔ ninyi nibebhe na nɛ nibhɛ mɔn ibebhe de, daa ɛli ne sɔng gbik ninyi na nibhɛ bok ìnang ne itin de nang.

³ɛDaray ne so sɛ kyinak daa ne ibol ɛbhɛ. Aa nang nyini ihwet, ɛ ta kyɛngɛse nyini ɛlɔ ɛShɛtan na, ɛBebhe gha.

⁴Njwi kɛ tek irway mos tɔrɔk ndɔ ɛDaray ɛYɛso gha ne ˆɛ mɔn ɛn nikɔn na ne njwi kɛ tɔng nyini wo, ˆaa ne re ɛn ɛnu ɛyisɛ ne mon ɛn ɛlɛy.

⁵Te ɛDaray ya yɛk ngɛ te irway mon da seng ishwim ɛTaanggbey da ne irop iku de ne ɛ le ɛlɔ ɛKiriti gha.

⁶Nigwaa en njwii bol ne nyinɛn ndɔ irywɛɛk ɛDaray njwɛɛn ɛYɛso ɛKiriti wu te ɛ shɛɛ ɛn kyaam ne gbik ɛhiha ɛgwaa ne ɛ bok itek ge ɛ ta sang shɛɛ ihywee ne imɛmɛ da ne ˆɛ kɛ say ɛn ɛlɔ mos sa.

⁷Ɛ yɛɛ ɛn, nyinɛn no ne ito mon ɛli ne iphɛ kɛ jam mɛ ˆɛ mɛmɛ ɛn ne ɛkɔn daa mos so. Sɔng njwi kaa so ninaa ne itek nten de ne njwi kaa so ɛlɔ mon na nang.

⁸Sɔng njwi kaa ne re ire ɛnyi tang njwi tal ɛbhɛ nang. Njwi kaa yang i mɔn ɛtomɛ gha ne igbey ne ɛtuk gbik, njwii kyangase ne ɛtomɛ gha, njwii tabha ne ilong, ɛlɔ ne njwi yaa yung nang ɛdɛ mon irighitik.

⁹Njwi bok igbɔm mɛ ne njwi sɛ yɛk ngɛ ɛ re ɛn ne njwit, sɔng njwi kɛ ne mɔn ɛlɛy nang te njwi teye ɛkɔn ne mɛmɛ nɛ ɛlɔ mon na, ɛ roos ɛn ngkɔɔl mos.

¹⁰ɛTsak, ɛli ne njwi kaa sonɛ nyinɛn no, njwi kaa ne i bol ne nyinɛn, njwii bo, “Gbik ɛnyi gha ne ɛ mbaray tang mɔn ɛtomɛ gha, sɔng ne nang ɛbhɛ ire nang.”

¹¹Njwii phok wu nidɛng sonɛ ndɔ mon no nɛ nibhɛ bok itek. Sɔng nibhɛ mɔn ɛtomɛ nang, nibhɛ kaan tsik zɔng, nibhɛ cwaasek ninu ndɔ ne ivol ne ifɛ sang so ivaa nibhɛ.

¹²iHywee nyini yɛdee nggyɛ wo, njwii nep nibhɛ, njwii sin nibhɛ itoro ndɔ ne irywɛɛk ɛDaray ɛYɛso ɛKiriti, njwi bo wu tɛ nibhɛ kyinak ne ihywɛɛ nibhɛ ɛlɔ ɛdaan, nibhɛ mɔn ɛtomɛ ne aa re nɛ nibhɛ.

¹³Nyinɛn no nigwaa en, sɔng ne ˆɛ te ɛn kpos ne mɔn iyɛnɛng ngge nang.

¹⁴Wu ɛdɛ ɛnyi gha kɛ mbaray tang roos ibol de ne njwi kɛ haa nyini nɛ ndɔ ne ɛwee yɛwoo wo, ne ˆɛ wɛɛ ɛn ɛbhɛ yɛnɛng. Sɔng ˆɛ byinki ɛn ito ne ɛbhɛ nang te ɛ sɔ ncwa.

¹⁵Gbik ne iphɛ ɛlɛy, sɔng ne ˆɛ bo ɛn ɛbhɛ te ɛhaa ne iphup mon nang, yang bol ɛn ne ɛbhɛ te ɛgwaa.

¹⁶Te ɛDaray ya ne ito ɛbhɛ, ne ɛ soye ɛhaa ne irway ne laal la nang nyini irway ne laal cɛcɛɛy ndɔ ne nikɔn na gbik. Te ɛDaray ya shɛɛ ne nyinɛn gbik.

¹⁷Mee ɛBulus, ne ito nge nzi haa nyini ikyiisi yɛdaa wo ne iwɔ nge. iKyiisi yɛdaa wo iphɛ iphɛ so ishɛɛda ne iwee nge da gbik. ɛLɛy ne nzi ku haa.

¹⁸Te izɛɛng ɛDaray njwɛɛn ɛYɛso ɛKiriti de shɛɛ ne nyinɛn gbik. Ɛɛy.