Read eten 1 ɛTimɔti 2 Bible Online

1 ɛTimɔti 2 - eten bible

1 ɛTimɔti 2

¹Naa tsa n yaak nyini, te roro ne ɛTaanggbey, i bol ne ɛbhɛ, i phomos ɛbhɛ nikɔn, i tɔɔsel ɛbhɛ irway ihwala ɛlɔ ninyi na gbik.

²Te bol ne ɛTaanggbey ya ɛlɔ nigɔm gbik nɛ ninaa nibhɛ bok igbɔm ba, te njwɛɛn shɛɛ ncaang, ne irway ne laal, njwɛɛn nang ɛTaanggbey yegha ne ndiinday ndɔ ne nkpiinɛ da gbik ne ishwɛɛ ne ifɛ so kancɛng ne ishwɛɛ ninaa ne roos.

³ɛKɔn nɛghaa wo kɛ jam mɛ, iphɛ ne ma ta nang ɛTaanggbey ne Phɔt njwɛɛn na irway ihwala,

⁴ɛTaanggbey ya ne ɛ sim te gbik ninyi na sɛɛ sɛ iphɔrɔt da, nibhɛ ta seng itin de.

⁵Daa ɛli ne ɛTaanggbey ya so ɛdaan, ɛhaa ne ɛ so ɛceree ninyi na ne ɛTaanggbey ya ne ma so ɛdaan, kaabi ɛnyi yɛghaa wo, ɛbhɛ ɛYɛso ɛKiriti gha.

⁶Ɛbhɛ ɛ kɛ nang ito ɛbhɛ te ɛ say ninyi na gbik. ɛNggyɛ wo bhɛ ne soye ishɛɛda ne kaa tɔɔl cɛcɛɛy nten de ne ɛTaanggbey ya i sim tɛ sɛ phɔt ninyi na gbik ko.

⁷ɛKɔn nɛghaa bhɛ kɛ ne te kaa tom me te ɛngɔn ne tom ma, ne ɛhaa ne mɛmɛ ninaa nɛ nibhɛ sang so niYahodawa na ibol ne ìnang ne itin de gbik ne itin de. Sɔng nzi wul irywɛɛk nang, itin nɛ ne nzi tɔng![3]

⁸Ndɔ ne ijwira ninaa ne roos da, nzi ne sim tɛ niras sa sɛ i bol ne ɛTaanggbey, iphɛ ne so nggbinggbing niras sɛ soye ninaa ne ishwɛɛ nibhɛ kɛ jam ɛTaanggbey yegha. Yaa ne sɛ nibhɛ kɛ tɔɔk ibɔ de nibhɛ yaa bol ne ɛTaanggbey ya, tɛ nibhɛ ne mɔn ɛlɛy wɛlɛng njenjek ne ishamas.

⁹Nzi ne ma ta sim tɛ nikuk ka sɛ wɛɛ en yɛnɛng daa ne igyura nibhɛ. Te nibhɛ yaak en ne itsura da ne ifɛ kɛ jam mɛ, sɔng nibhɛ kyangase ne izel ne ban ito, ne izinariya, nɛ nikɔn ne nggyɛmɛng-nggyɛmɛng, ne itsura ne ijam gbom nang,[4]

¹⁰tɛ nibhɛ yang mɔn nitomɛ niyɛnɛng ninaa nɛ nibhɛ yaa tɔɔrek ishɛɛda ne roos nibhɛ.

¹¹Te ɛkuk ka laasek ito ɛbhɛ te ɛ mɛmɛ nɛ ndɔ ne ihywee.

¹²Sɔng nggɛ sim tɛ nikuk ka mɛmɛ niras nɛ nang. Sɔng nggɛ ne sim nibhɛ sɛ ta bok igbɔm daa niras sa nang, te ɛkuk ka shɛɛ nggbyak.

¹³Daa ɛli ne ɛDɛmu ne kaa tsa ryɔng nyɛɛn i kyi ryɔng ɛWaawu yegha.[5]

¹⁴Sɔng ɛDɛmu gha ne kaa ne ta luk ɛbhɛ nang, ɛkuk ka ne kaa yang luk ɛbhɛ, ɛ teye ɛhaa ne ɛfɔt.[6]

¹⁵Gbik ne iphɛ ɛlɛy, nikuk ka sɛ ne sɛ iphɔrɔt da lenɛ nɛ ninɔn nɛ nibhɛ yaak, wu nibhɛ kɛ re ɛnu ɛyisɛ ndɔ ne ìnang ne itin ne ishwim ne itul le kang, gbik ne wum ito.