Read eten 1 ɛTimɔti 3 Bible Online

1 ɛTimɔti 3 - eten bible

1 ɛTimɔti 3

¹iBol lɛdee wo so itin nɛ sɛ kyinak daa ne iphɛ, gbik ɛnyi gha ne ɛ bok irway ne teye ɛndiinday ne idira ninaa ne roos sa, ne ɛ bok irway ne mɔn ɛgbaang ɛtomɛ.

²iPhɛ ne so nggbinggbing ɛndiinday ne idira ninaa ne roos sa so wɛlɛng ɛkɔn ne tok, ɛ bok ɛkuk ɛdaan. Ɛ so ihywɛɛ, ɛ kɛ wum ito ɛbhɛ, ɛ so lyaak, ɛɛ say ninaa ne kpoo, ɛɛ yɛɛ ne mɛmɛ ninyi nɛ yɛnɛng.

³Sɔng ɛkpuru ne iguut nang, sɔng ɛhaa ne tɔk irywen nang. Ɛ so yak, ɛɛ sim ishwɛɛ ncaang. Sɔng ɛhaa ne sim ijam gbom nang.

⁴iPhɛ so nggbinggbing ɛ so ɛnyi ne ɛ yɛɛ ne boos ijwee ɛbhɛ yɛnɛng, ɛ te ninɔn ɛbhɛ roos ibol ɛbhɛ nibhɛ nang ɛbhɛ ne ndiinday.

⁵Wu ɛnyi gha i doo ne boos ijwee ɛbhɛ wo, aa ne mɔn ɛlii ɛ yɛɛ ne wɛɛ idira ninaa ne roos ɛTaanggbey yedee?

⁶Sɔng ɛ soye ɛnyi ne ɛ tɔ le ne san ɛbɔk nang, aa yung yaa tɔɔsek ito ɛ ho ndɔ ne ihywee ɛshara de ne kɛ ku hyɛ ɛShɛtan neghaa nɛ wo.

⁷Kang nɛ nikɔn nɛnaa wo, iphɛ so nggbinggbing ɛndiinday ya soye ɛnyi ne ɛ bok ishɛɛda iyɛnɛng ndɔ ninyi, daa ɛli ne aa yung ɛ ho ndɔ ne irwa ɛShɛtan ɛ teye ɛkɔn ncwa.[7]

⁸ɛLɛy nɛ ninaa ne phyighis ne ɛtomɛ gha ndɔ ne idira ninaa ne roos de, iphɛ so nggbinggbing nibhɛ so ihywɛɛ, sɔng ninaa ninu ifaa nang, sɔng nikpuru ne sɔ inɛn ɛnap nang, sɔng ninaa ne tek iryat ɛbuu nang.

⁹iPhɛ so nggbinggbing nibhɛ wum ìnang ne itin de ne kɛ phaal lo nɛ itin nɛ nibhɛ tenes izɔlɔs ne irway iywɛnɛng.

¹⁰Te ne kyi tsa i tɛɛsek nibhɛ nyɛɛn; wu kɛ sang sɛ nibhɛ ne ɛkɔn ne tok, tɛ nibhɛ ne ji wum ɛtomɛ ne phyighis idira ninaa ne roos sa.

¹¹ɛLɛy nɛ nikuk ne mɔn ɛtomɛ ne idira ninaa ne roos ne mang, tɛ nibhɛ so ihywɛɛ, sɔng ninaa ne bol ivol ne bees irywɛɛk nang. Tɛ nibhɛ so lyaak, ninaa ne sɛ kyinak daa ne ibol nibhɛ ndɔ nikɔn na gbik.

¹²iPhɛ so nggbinggbing ɛhaa ne phyik ne ɛtomɛ gha ndɔ ne idira ninaa ne roos de so ɛnyi ne ɛ bok ɛkuk ɛdaan, ɛnyi ne ɛ yɛɛ ne boos ninɔn ɛbhɛ ne ijwee ɛbhɛ byirik.

¹³Ninaa ne phyighis ne ɛtomɛ gha ndɔ ne idira ninaa ne roos de, nɛ nibhɛ kɛ mɔn ɛtomɛ nibhɛ gha yɛnɛng ngo i sɛ irywɛɛk iywɛnɛng, nibhɛ ne ta so tɔrɔk wɛlɛng ito ndɔ ne ìnang ne itin nibhɛ de ne ɛYɛso ɛKiriti gha.

¹⁴ɛLi ne nzi haa yɛ ɛwee yɛwoo wo, n bok icwas ne yɛɛs ɛlɔ mo gha, sɔng ne bees nten nang.

¹⁵Wu kɛ ne bees me nten, ɛwee yɛwoo wo yaa ne teyɛ ɛ seng ihywee ne ishwɛɛ da ne njwɛɛn yaa shɛɛ ndɔ ne ijwee ɛTaanggbey yo, ne iphɛ so idira ninaa ne roos ɛTaanggbey ne iKen na, ɛkangashi gha gbik ne ɛtum ne itin de.

¹⁶Sɔng ito irway sonɛ nang, ɛduk ne ìnang ne itin njwɛɛn na ne ɛTaanggbey ya kɛ phaal lo so kyukyum. Kɛ tɔɔrek ɛKiriti yegha ndɔ ne ibek[8] Kɛ tɔɔrek ɛ soye ne itin lenɛ ne iKabyik. Kɛ yaang ɛbhɛ lenɛ nɛ niMalɛka, kɛ tɔng ibol ɛbhɛ ndɔ ne igbagha, Kɛ nang ne itin nɛ ne ɛbhɛ ɛzay ya gbik, kɛ bo ɛbhɛ ndɔ ne ndiinday.