Read eten 2 ɛTimɔti 1 Bible Online

2 ɛTimɔti 1 - eten bible

2 ɛTimɔti 1

¹ɛWee yɛwoo wo le ɛlɔ ɛBulus, ɛngɔn ne tom ɛYɛso ɛKiriti lenɛ ne icwas ɛTaanggbey. Kɛ tom me te n tɔng ninyi ibol ne iken ne ɛYɛso ɛKiriti kɛ sim-mɛ ndɔ ne ìtsɛm ne ɛbhɛ.

²ɛbhɛ phɛɛs ɛlɔ ɛTimɔti ne ɛ soye ɛngɔn nge ne nzi sim. Te izɛɛng, ne san iyɔm, ne irway ne laal ne ifɛ le ɛlɔ ɛTaanggbey ne ɛ soye ɛTaa, ne ɛDaray njwɛɛn ɛYɛso ɛKiriti shɛɛ ne igyɛ.[1]

³N bok irway ihwala ne ɛTaanggbey ɛhaa ne nzi mɔn ɛbhɛ ɛtomɛ gha ɛli nɛ nikyɛɛ-nikyɛɛ nge kɛ mɔn, izɔlɔs ne irway nge ne so tɔrɔk. Nzi tas ne igyɛ ne igbey ne ɛtuk gbik nten de ne nzi bol ne ɛTaanggbey ya.

⁴I sɛ nggɛ taate nɛ niyilis mo na, ne n yaa sim te sɛ yɔng nggɛ yaang ngɛ, te n te hyɔrɔ ne irway ihwala.

⁵Nggɛ taate ne ìnang ne itin mo da ne iphɛ so idee ne itin nɛ wo, ne iphɛ kaa tsa iphɛ so ndɔ ɛgyinɛ-ɛgyinɛ mo ɛLoos sa, ɛgyinɛ mo ɛYunis sa ta bok ko. Ngge ne nang ne itin nɛ ˆɛ ma bok iphɛ ɛlyilyɛghaa wo.[2]

⁶iPhɛ phɛ kɛ te nzi tas sɛ nɛ, nzi bo te ɛ shɔke ne igboo ne ìnang ngga ne ɛTaanggbey ya kaa nang ngɛ lenɛ ne nggɛ yɛk kɛ ne iwɔ ɛwɛng ngo.

⁷Daa ɛli ne sɔng ɛTaanggbey ya kɛ nang njwɛɛn ikabyik ne iphɛ i nang njwɛɛn ɛnik nang, ɛ kɛ yang nang njwɛɛn ikabyik ne ihwet, ne ishwim gbik ne wum ito.

⁸iPhɛ ɛlɛy, sɔng ne ˆɛ phok ncwa ne tɔng ibol ɛDaray ɛYɛso njwɛɛn de ne ncwa nge ne nzo ne inyang ngge ɛlɔ ɛDaray ɛYɛso gha nang. Yang byinki ito ne mee ndɔ ne nggbang ɛlɔ ne sanga ibol iyɛnɛng ngge, te ɛTaanggbey ya nang njwii ihwet tɛ.

⁹Ɛbhɛ kɛ phɔt njwii, ɛ ji yel-le njwii te njwi shɛɛ ɛbhɛ kang. Sɔng yel-le yɛdaa wo ne le daa ɛkɔn ne njwi kɛ mɔn nang, iphɛ yang lenɛ ne yɔngɔ ɛbhɛ ne izɛɛng ɛbhɛ ne ɛ bok daa mos. Kaa ne nang njwii izɛɛng ngɛdee wo lenɛ ne ɛYɛso ɛKiriti ne ile ne tang tum ɛzay.

¹⁰ɛLyilyɛghaa wo, kɛ ne ji phaal iphɛ lenɛ ne yɛɛs ɛHaa ne Phɔt njwɛɛn, ɛYɛso ɛKiriti. Ɛbhɛ kɛ ba iku de, kɛ ne ta lenɛ ne sanga ibol iyɛnɛng ngge ne phaal njwɛɛn ishwɛɛ ne iken ne iphɛ i sang ku wɛsɛrɛk.

¹¹ɛTaanggbey kɛ ne kasa me te n te me ɛngɔn ne tom, ne ɛkyɛɛ ne icwam gbik ne ɛhaa ne sanga iBol iYɛnɛng ngɛdee wo.[3]

¹²ɛKɔn nɛghaa wo ɛbhɛ kɛ te nzi sɔ nggbang ngga ne nzi sɔ wo. Gbik ne iphɛ ɛlɛy, sɔng ne n bok ncwa yɛ nang, daa ɛli ne nzi yɛɛ ɛhaa ne nggɛ nang ne itin nɛ ne ɛbhɛ, nzi ne yɛɛ ncɛncɛng aa yɛɛ ne hyep ɛkɔn na ne ɛ kɛ tek me nɛ ne iwɔ wo[4] ɛTuk ɛDaray ya phyii tuu.

¹³Boos imɛmɛ ne itin nɛdee wo ne ɛ kɛ phok ɛlɔ nge gha, te ˆɛ mɛmɛ nɛ ne iphɛ. Shɛɛ ndɔ ne ìnang ne itin gbik ne ishwim ne ifɛ soye ivaa njwɛɛn ndɔ ɛYɛso ɛKiriti gha.

¹⁴Boos imɛmɛ ne itin nɛdaa wo ne kɛ tek kɛ nɛ ne iwɔ wo yɛnɛng. Boos iphɛ lenɛ ne iphyik ne iKabyik ɛTaanggbey de ne iphɛ i shɛɛ ndɔ mos so.

¹⁵ˆƐ yɛɛ ɛli ne gbik ninaa ne ivel ne iSiya na kɛ hyere me ɛtsim ma, ndɔ nibhɛ wo, ɛFijelus gbik ne ɛHamɛjɛnɛs sonɛ.

¹⁶Te ɛTaanggbey ya sit ninaa ne ijwee ɛNisipharus sa ne ɛwɛng. Ɛbhɛ kɛ i phyighis me cɛcɛɛy, sɔng ɛ kɛ ne ta kyii phok ncwa ne inyang ngge ne nzo nɛ wo nang.

¹⁷Kaa sɛ ɛli ne ɛ kɛ yɛɛs ne iRooma de, ne ɛ tak iyɔm ɛ phɛl ɛlɔ nge ɛ sɛ me.

¹⁸Te ɛDaray yɛk ngɛ ɛNisipharus sa sɛ isan iyɔm ɛTuk ɛDaray ya. iGyɛ wo ˆɛ yɛɛ ihywee ne phyik ga ne ɛ kɛ phyik me ne iFisus de.