Read eten 2 ɛTimɔti 2 Bible Online

2 ɛTimɔti 2 - eten bible

2 ɛTimɔti 2

¹iGyɛ ne ɛngɔn nge wo, kyinak gɛgɛy ndɔ ne izɛɛng ngge ne ɛTaanggbey ya kɛ nang ngɛ ndɔ ɛYɛso ɛKiriti gha.

²Gbik nɛ nikɔn na ne ˆɛ kɛ phok nzi bol ɛnu ɛyisɛ nishɛɛda ne gbom ma, te ˆɛ nang nikɔn nɛnaa wo ndɔ ne iwɔ ninaa nɛ nibhɛ so sɛ kyinak daa ne ibol nibhɛ de tɛ nibhɛ ma bhɛ mɛmɛ nidɛng ngɛ ne mang.

³Rop iku ndɔ ne nggbang ne njwit to te ɛsooja ɛyɛnɛng ɛYɛso ɛKiriti.

⁴ɛSooja gha ne ɛ so ɛnu ɛtomɛ ɛbhɛ gha i sim te ɛ sɛ mon ɛkɔn na ne aa nang ɛndiinday ɛbhɛ irway ihwala. iPhɛ ɛlɛy, sɔng aa ne byinki ito ɛbhɛ ne ihywel ɛhaa ne ɛ sang so ɛsooja gha nang.

⁵ɛLɛy ne ɛhaa ne mat nggbiy da, sɔng i tal ɛbhɛ tang ɛ kɛ roos ikpii ne nggbiy da nang.

⁶ɛHaa ne hap ihwap ririk ka, iphɛ kɛ jam mɛ ɛbhɛ ɛ sɛ tsa ɛ phɔwɔ ire ne ihwap ɛbhɛ de.

⁷Tas daa ɛkɔn na ne nggɛ tɔng ngɛ wo, daa ɛli ne ɛDaray ya yaa nang ngɛ ishweng ngga ne ˆaa seng gbik.

⁸Taate ne ɛYɛso ɛKiriti gha ne kɛ yiisik ɛbhɛ ne ikpuu da. Ɛbhɛ wo ne ɛ le ne icwaang ɛDoda wo ɛli ne kɛ mɛmɛ nɛ ndɔ iBol iYɛnɛng ngge ne nzi tɔng ngo.

⁹Daa ɛli ne nzi tɔng iBol iYɛnɛng ngge, nzi ne sɔ nggbang gbom, kɛ phyii rop me te ɛnyi ɛbebhe. Gbik ne iphɛ ɛlɛy, sɔng yaa ne yɛɛ ne rop ibol ɛTaanggbey de nang.

¹⁰iPhɛ ɛlɛy, nggɛ ne tɔɔk nggbang nikɔn da gbik, ɛlɔ ninaa ne kɛ kasa nibhɛ wo, tɛ nibhɛ sɛ iphɔrɔt da ne ifɛ so ndɔ ɛYɛso ɛKiriti gha, nibhɛ ne ta sɛ ndiinday ne inat de.

¹¹iBol lɛdee wo so sɛ kyinak daa ne iphɛ, iphɛ i bo, Wu njwɛɛn kɛ ku ne ɛYɛso gha, njwɛɛn sɛ ne shɛɛ niken ne ɛbhɛ.

¹²Wu njwɛɛn kɛ ne rop iku, njwɛɛn sɛ ne re igbɔm ne ɛbhɛ. Wu njwɛɛn kɛ ne yɔng wu hang i yɛɛ ɛbhɛ, ɛ sɛ ne ma yɔng wu hang i yɛɛ njwɛɛn.[5]

¹³Wu njwɛɛn sang ìnang ne itin, aa ne jung bok ìnang ne itin de, daa ɛli ne sɔng aa mbaray ito ɛbhɛ nang.

¹⁴Ku i tas nibhɛ nɛ nikɔn nɛnaa wo. Kpɛng nibhɛ ɛnu ɛyisɛ ɛTaanggbey wu hang nibhɛ re ishamas daa ne ivol da. Sɔng ishamas de bok iphyik nang, ihywɛ yang bees ninyi na nɛ nibhɛ tenes so.

¹⁵Mɔn ɛkɔn na ne ˆaa yɛɛ ne mɔn nɛ, te ˆɛ tɔɔrek ito mo ɛnu ɛyisɛ ɛTaanggbey ya te ɛnyi ne ɛTaanggbey ya yaa yɔng ɛtomɛ ɛbhɛ kɛ jam. Teye ɛhaa ɛtomɛ gha ne ɛ sang ncwa daa ɛtomɛ ɛbhɛ gha, ɛhaa ne mɛmɛ ne ibol ne itin de byirik.

¹⁶Tel ivol ɛbuu ne bɛɛs ɛTaanggbey yegha, daa ɛli ne ifɛ hanas ninyi na ne shɛɛ ishwɛɛ ne ifɛ sang so ivaa ɛTaanggbey.

¹⁷iVol ne nibhɛ da so te ɛkporon ne ɛbhɛ i re inwam ne ibek. ɛHyimaniyus ne ɛFilɛtus so nidɛng ndɔ ninaa ne tɔng ivol lɛdaa wo.

¹⁸Nibhɛ kɛ lap en, nibhɛ kɛ tek itin de. Nibhɛ bo wu yilitsik ne ikpuu da kɛ ku phee, nibhɛ bees ìnang ne itin ɛbyin ninyi de.

¹⁹Gbik ne iphɛ ɛlɛy, ibol ɛTaanggbey de kɛ ne ku see ye te ikɛɛ ɛtum ne ijwee gɛgɛy. Kɛ ku baa ne icwɛɛm, i haa ne ibol de ne iphɛ bo, “ɛTaanggbey ya i ku yɛɛ ninaa ɛbhɛ na.” Gbik ne “ɛNyi gha ne ɛ bo wu i soye ɛhaa ɛDaray ya, te ɛ shɛɛ kyakyak ne ɛtomɛ ɛbebhe gha.”[6]

²⁰Ndɔ ne ɛgbaang ne ijwee wo, sɔng nikɔn ne izinariya ne ɛzurufa nibhɛ sonɛ zɔng nang. Ninaa ne itson gbik ne ives ma ta sonɛ. Nidɛng so ninaa ne i mɔn ne ɛtomɛ ɛgbaang ɛtuk, nidɛng ne so ninaa ne i mɔn ne ɛtomɛ izenge ne ihwɛlɛ.

²¹ɛLɛy ne iphɛ ne sonɛ ninyi na ne mang. Wu ɛnyi gha kɛ kuus ito ɛbhɛ ndɔ ne ibebhe de, ne ɛ so tɛ nikɔn na ne i mɔn ne ɛtomɛ ɛgbaang ɛtuk ka. Ɛ kɛ tul le kang ɛ teye ɛnyi ne aa mɔn ɛkyɛɛ ne ijwee ɛbhɛ gha ɛtomɛ, ɛ kɛ ne ryɔng te ɛ mɔn gbik ɛtomɛ ɛyɛnɛng nga ne ɛ kɛ jam.

²²Tel lɛ ihyop igywebhe ne ifas da te ɛ see ito ne roos icik, ne ìnang ne itin, ne ishwim gbik ne irway ne laal. Mɔn ɛlɛ wo nɛ ninaa nibhɛ yeres daa ne irywɛɛk ɛDaray yo ne irway iwɛwɛy.

²³Tel lɛ ivol ne iwamang ngga ne ishamas ɛbuu de, daa ɛli ne ihywɛ yɛɛs ne izok zɔng.

²⁴Sɔng ɛhaa ne mɔn ɛtomɛ ɛDaray ya teye ɛhaa ne boos izok ge nang; te ɛ yang teye ɛnyi ɛyɛnɛng ɛlɔ ninyi na gbik, ɛhaa ne yɛɛ ne mɛmɛ ninyi nɛ ne ɛhaa ɛbɔk.

²⁵Te ɛ mɛmɛ ninaa ne iphup ne imɛmɛ ɛbhɛ da nɛ ndɔ ne ihywɛɛ, yaa rɔk lenɛ ɛlɛ wo ɛTaanggbey ya nang nibhɛ ɛnkiinɛ nibhɛ san ɛbɔk, nibhɛ seng itin de.

²⁶ɛLɛ wo ne irwisɛ nibhɛ yaa ne phaal le nibhɛ ne wuru ndɔ ne irwa ɛShɛtan da ne ɛ kɛ wum nibhɛ nɛ ɛ yɛk nibhɛ nɛ nibhɛ roos ibol ɛbhɛ de.