Read eten ɛTitus 2 Bible Online

ɛTitus 2 - eten bible

ɛTitus 2

¹iGyɛ wo, iphɛ so nggbinggbing ˆɛ mɛmɛ ninyi na nɛ ɛli nɛ nibhɛ yaa shɛɛ ishwɛɛ da ne ifɛ so kancɛng ne imɛmɛ ne itin da.

²Mɛmɛ nihelem niras sa nɛ tɛ nibhɛ shɛɛ ihywɛɛ, nibhɛ wum ito nibhɛ, tɛ nibhɛ gbaat ito nibhɛ, tɛ nibhɛ kyinak gɛgɛy ndɔ ne ìnang ne itin de, ne ishwim gbik ne irop iku.

³Nɛ ma mɛmɛ nikuk nihelem ma nɛ tɛ nibhɛ shɛɛ ishwɛɛ da ne ifɛ yaa nang ɛTaanggbey ye ne ndiinday, ne ifɛ so kancɛng nɛ nikuk ninaa ne roos sa. Sɔng nibhɛ teye ninaa ne bees ivol nang, sɔng nibhɛ teye nikpuru ne isɔ igbuut nang. Tɛ nibhɛ yang mɛmɛ ninyi na nɛ nikɔn niyɛnɛng.

⁴ɛLɛ wo nɛ nibhɛ yaa ne gbaat nikuk niphas sa tɛ nibhɛ sim niras nibhɛ nɛ ninɔn nibhɛ.

⁵Tɛ nibhɛ shɛɛ hywɛɛ, nibhɛ shɛɛ iwɛwɛy, nibhɛ yɛɛ ne wɛɛ idee nibhɛ. Tɛ nibhɛ teye nikuk nɛ nibhɛ bok irway ne phyik, nibhɛ roos ibol niras nibhɛ ɛlɔ ne yaa yung bɛɛs ibol ɛTaanggbey de.

⁶ɛLɛy ne mang, te ninɔn niphas sa itsɔngɔl gɛgɛy tɛ nibhɛ shɛɛ hywɛɛ.

⁷Ndɔ nikɔn na gbik teyɛ ɛkɔn ne mɛmɛ nɛ ɛlɔ nibhɛ gha daa ne mɔn nikɔn niyɛnɛng. Ndɔ ne imɛmɛ mo da tɔɔrek itin nɛ, sɔng ˆɛ ra ne ijɔwɔ nang.

⁸Mɔn ɛtomɛ ne ivol iywɛnɛng ne yaa sang sɛ yɛ ne ɛkɔn ne tok. Tɛ ninaa ne iphup mo na sɔ ncwa, ɛli ne hame nibhɛ yaa sɛ ɛkɔn ɛkpɛɛ nɛ nibhɛ yaa bol da ne ito njwɛɛn de.

⁹Mɛmɛ nikpuru na nɛ tɛ nibhɛ roos ibol nikyɛɛ ne idee nibhɛ na ndɔ nikɔn na gbik. Tɛ nibhɛ mɔn nikɔn na nɛ nikyɛɛ ne idee nibhɛ na yaa phok iyɛnɛng ngɛ. Sɔng nibhɛ kyisi nibhɛ ne ivol nang.

¹⁰Sɔng nibhɛ hyel nikyɛɛ ne idee nibhɛ na ɛyi nang. Tɛ nibhɛ yang tɔɔrek wu nibhɛ so ninyi niyɛnɛng ne sɛ kyinak daa ne ibol nibhɛ. Te ne lenɛ ɛlɛ wo i yaang ndiinday ne imɛmɛ yɛdaa wo ne iphɛ so idee ɛTaanggbey ne phɔt njwɛɛn de.

¹¹Daa ɛli ne ɛTaanggbey ya kɛ tɔɔrek izɛɛng ɛbhɛ de tɛ ninyi na gbik sɛ iphɔrɔt.

¹²iZɛɛng ngɛdee wo i mɛmɛ njwɛɛn nɛ te njwɛɛn mbaray ishwɛɛ da ne ifɛ sang tɔɔsel ɛli ne ɛTaanggbey ya so wo, gbik ne ihyop nikɔn ɛzay de, te njwɛɛn te hywɛɛ byirik, i hyel cik, i shɛɛ ɛli ne ɛTaanggbey ya so ɛzay yɛghaa wo.

¹³Njwɛɛn i shɛɛ ɛlɛ wo i hyep ɛtuk ɛwɛng nga ne njwɛɛn kɛ yɛk ne irway da. Nten de ne ito-ndiinday ɛTaanggbey ne nindiinday ɛHaa ne Phɔt njwɛɛn ɛYɛso ɛKiriti gha sɛ tɔɔl le wo.

¹⁴ɛYɛso ɛKiriti gha ɛbhɛ kɛ nang ito ɛbhɛ te ɛ phɔt njwɛɛn ndɔ ne ibebhe de, te ɛ kɛ ne kuus njwɛɛn, te njwɛɛn teye ninyi ɛbhɛ zɔng, niwɛwɛy yɛ, njwɛɛn has irway ne mɔn nikɔn niyɛnɛng.[3]

¹⁵Mɛmɛ nibhɛ nɛ nikɔn nɛnaa wo, mɔn ɛtomɛ ne igbɔm mo da gbik ˆɛ te ninaa ne tenes sɛ na itsɔngɔl gɛgɛy ˆɛ ta nep nibhɛ. Sɔng ɛ sim ɛnyi bɛɛs sɛ nang.