Read eten ɛTitus 3 Bible Online

ɛTitus 3 - eten bible

ɛTitus 3

¹Taate ninyi mo na nɛ wu tɛ nibhɛ laasek nindiinday ne ivel la nɛ gbik nɛ nigɔm ma. Tɛ nibhɛ roos ibol nibhɛ, nibhɛ ryɔng en ɛli nɛ nibhɛ yaa i mɔn nikɔn niyɛnɛng gbik.

²Sɔng nibhɛ bol ivol ikpɛɛ daa ɛnyi nang. Tɛ nibhɛ bok irway ne laal, nibhɛ shɛɛ hywɛɛ, nibhɛ laasek itso nibhɛ ɛlɔ ninyi na gbik.

³Njwɛɛn kaa ma tsa soye niwamang nɛ nisang-phok, ihyop nikɔn ɛzay de luk njwɛɛn, i teye nikpuru nibhɛ. Njwɛɛn ne yaa shɛɛ ishwɛɛ ne boos en ne irway ne ɛnkyis, ninyi i mbaray njwɛɛn, njwɛɛn ne ma i mbaray nibhɛ.

⁴Kaa ne sɛ izɛɛng ngge gbik ne ishwim ɛTaanggbey da ne ɛ soye ɛHaa ne Phɔt njwɛɛn na kɛ tɔɔl le,

⁵ɛTaanggbey ya ne phɔt njwɛɛn, sɔng daa nikɔn nicik ne njwɛɛn kɛ mɔn nang. Kɛ yang lenɛ ne isan iyɔm ɛbhɛ ɛ phɔt njwɛɛn no lenɛ ne ikabyik ɛTaanggbey de ne iphɛ kɛ kuus njwɛɛn, iphɛ nang njwɛɛn iyɛk ifas, iphɛ ta i tes njwɛɛn niphas sɛ.

⁶iKabyik ɛTaanggbey yɛdee wo ne kɛ sit njwɛɛn nɛ gbom lenɛ ne ɛYɛso ɛKiriti ne ɛ soye ɛHaa ne Phɔt njwɛɛn.

⁷Ɛ kɛ mɔn ɛlɛ wo te lenɛ ne izɛɛng ɛbhɛ de njwɛɛn teye ɛkɔn ne say wu hang i bok ɛfɔt ɛnu ɛyisɛ ɛTaanggbey ya, i ta teye ninaa ne re isha ne iken ne inat de ne njwɛɛn kɛ yɛk ne irway da.

⁸iBol lɛdee wo so sɛ kyinak nɛ. Nzi ne sim te ɛ sɛ tiil ninyi na nikɔn nɛnaa wo gbik. Tɛ ninyi na nɛ nibhɛ kɛ nang ne itin nɛ ne ɛTaanggbey ya ne nang ihwet nibhɛ gbik ɛlɔ ne mɔn nikɔn niyɛnɛng. Nikɔn nɛnaa wo kɛ jam gbom, nibhɛ ne bok iphyik daa ninyi na gbik.

⁹Tel lɛ ishamas ɛbuu de gbik ne ibol ne wɛɛ irɛɛk ne itaang ngge, ne izok ge, ne ishisim daa ne ibol iMɛmɛ ɛMuusaa da. Daa ɛli ne sɔng nikɔn nɛnaa wo bok iphyik nang, sɔng nibhɛ kɛ ne ta jam nang.

¹⁰ɛNyi gha ne ɛ sim te aa yɛɛs ne ihosop bhe da, te ɛbhɛ ne idaan, tɛ nɛ ɛ hante ɛbhɛ nɛ. ɛTsim mɛ ɛlɛy, tel lɛ ɛbhɛ.

¹¹Nzi sim te ɛ sɛ seng wu ihywee ɛnyi yɛdee nggyɛ wo kɛ ku birit, ɛ kɛ ku hyɛ ito ɛbhɛ ɛshara ne iku lenɛ ne ɛfɔt ɛbhɛ wo.

¹²Ya sɛ nggɛ tom ɛTimas segha, hang ɛTikyikus sa ɛlɔ mo gha, te ɛ ne ˆɛ tukit, ˆɛ yɛɛs ˆɛ sɛ me ne iNikafolis ne ivel iGiris, daa ɛli ne nzi sim te nzɛ re ikos ɛnggyɛ wo.

¹³Tukit te ˆɛ phyik ɛZenas segha ne ɛ so ɛhaa ne wɛɛ ɛshara gha gbik ne ɛPolos sa tɛ nibhɛ bo nikɔn. Wɛɛ te ˆɛ seng sɔng nibhɛ kɛ wɔs ɛkɔn nɛ nibhɛ sim nang.

¹⁴iPhɛ so nggbinggbing ninyi njwɛɛn na mɛmɛ ne nang ito nibhɛ ne mɔn iyɛnɛng tɛ nibhɛ yɛɛ ne phyik nɛ nikɔn nɛ nibhɛ so ninyi na nggbinggbing. Sɔng nibhɛ shɛɛ ishwɛɛ ɛbuu da nang.

¹⁵Gbik ninyi na ne mee wo nɛ nibhɛ wo i kyiisi yɛ. Kyili ninyi na nɛ nibhɛ sim njwɛɛn no, ninaa ne njwɛɛn sonɛ nibhɛ ndɔ ne ìnang ne itin de. Te izɛɛng ɛTaanggbey de shɛɛ ne nyinɛn gbik. Ɛɛy.