Read eten iBirani 1 Bible Online

iBirani 1 - eten bible

iBirani 1

¹Ne ile de ɛTaanggbey ya kaa bol nɛ nikyɛɛ-nikyɛɛ njwɛɛn na ndɔ ne nkpiinɛ da ihywee-ihywee ne nten de kang-ka-kang lenɛ nɛ ninabawa na.

²ɛLyilyɛghaa, ndɔ nituk ɛtsim mɛnaa wo, ɛTaanggbey ya i ne bol ne njwɛɛn lenɛ ne ɛNgɔn ɛbhɛ ne kɛ lenɛ ne ɛbhɛ i ryɔng ɛzay ya. Ɛbhɛ ne ɛTaanggbey ya kɛ ta kasa ɛbhɛ ɛ tek ɛbhɛ nɛ nikɔn na gbik.

³ɛNgɔn na ɛbhɛ so iwɛwɛy ne ndiinday ɛTaanggbey de, ɛɛ ne ta tɔɔsel ɛli ne ɛTaanggbey ya so. Ne ɛ ta so kancɛng ne ɛTaanggbey ya. Ɛ kɛ ne wum nikɔn na kyus lenɛ ne ibol ɛbhɛ ne iphɛ bok ihwet. ɛTsim mɛ ne ɛ kɛ phaal ɛnkiinɛ ne kuus ɛfɔt to, ne ɛ ji soos ɛcuruu ne igbɔm ne iwɔ ne irwye ɛTaanggbey ɛHaa ne Ndiinday gbik.

⁴iPhɛ kɛ tɔɔrek wu ɛNgɔn na bok ndiinday ne iphɛ phyin idee nimalɛka gbik, te ɛli irywɛɛk ko ne kɛ nang ɛbhɛ wo ma phyin ihoo nibhɛ wo.

⁵Daa ɛli ne hame ɛTaanggbey ya kɛ ku yaak ɛdɛ ɛmalɛka gha, “Ɛ soyɛ ɛngɔn nge, izenge wo nggɛ te me ɛkyɛɛ mo.” Sɔng ɛ kɛ ku boote daa ɛdɛng, ɛ yɔngɔ, “Naa te me ɛkyɛɛ ɛbhɛ, ˆaa ne teye ɛngɔn nge” mang.

⁶Kaa ne sɛ ɛTaanggbey ya yaa tom ɛNgɔn ɛkɔɔn ɛbhɛ gha ndɔ ɛzay ya, ne ɛ yɔngɔ, “Nggbinggbing nimalɛka na gbik re ɛbhɛ ntsong.”[1]

⁷Daa nimalɛka na nang ɛTaanggbey ya kɛ ne boote ɛ yɔngɔ, “ɛTaanggbey ya i yɛk ngɛ nimalɛka na tes te igbil. Ne ɛ yɛk nikpuru ɛbhɛ na tes te[2] ilem ne igboo.”[3]

⁸Daa ɛNgɔn na nang, ɛ kɛ ne yɔngɔ, “iGyɛ ne ɛTaanggbey yo, igbɔm mo da so ivaa ne inat! ɛNtsɛng ne igbɔm mo da, ne ku so icik.

⁹Ɛɛ sim icik ne ɛ mbaray yɛ ibebhe! iPhɛ iphɛ kɛ te ɛTaanggbey ya, ne ɛ so ɛTaanggbey mo gha, kɛ tul lɛ kang, ɛ sit tɛ ne nɔɔy ne irway ihwala. Ɛ nang ngɛ ne ndiinday ne iphɛ phyin idee nitɛɛrɛk mo.”

¹⁰Ɛ kɛ ne ta yɔngɔ, “ɛDaray, ne ile ne ɛtum mɛ, igyɛ ɛ kɛ see ɛtum ɛzay yo, ne ibɔ mo dɔng, ɛ kɛ ne ryɔng irywa wo.

¹¹Nikɔn nɛnaa wo sɛ phebhe, igyɛ wo ɛ sɛ ne shɛɛ. Gbik nibhɛ wo sɛ heesem te itsura.

¹²ˆƐ sɛ harap nibhɛ te ibɛbhɛt ne ɛtura, sɛ́ ne sunu nibhɛ te itsura. iGyɛ wo nang sɔng ˆɛ sɛ ne sunu yɛ nang, ishay mo de sang ɛgak.”

¹³Sɔng ɛdɛng sonɛ ndɔ nimalɛka na ne ɛTaanggbey ya kɛ ku yaak ɛbhɛ, “Soos ne iwɔ ne irwye nge, te n yɛk ninaa ne iphup mo na nɛ nibhɛ teye ɛkɔn ne tek ita mo nang.”[4]

¹⁴ɛTsak, gbik nimalɛka na soye ikpabyik ne ifɛ mɔn ɛTaanggbey ye ɛtomɛ, ɛTaanggbey ya ne tomos nibhɛ tɛ nibhɛ phyik ninaa nɛ nibhɛ aa say iphɔrɔt da.