Read eten iBirani 11 Bible Online

iBirani 11 - eten bible

iBirani 11

¹ìNang ne itin de so ikyinak nting daa ɛkɔn ne kɛ sit ne irwisɛ, iphɛ so ikyinak nting daa ɛkɔn na ne njwɛɛn i sang yaang.

²Kaa lenɛ ne ìnang ne itin de ninaa ne ile na sɛ idɛp ɛTaanggbey.

³I lenɛ ne ìnang ne itin de, njwɛɛn seng wu ɛTaanggbey ya kɛ ryɔng ɛzay ya nɛ nikɔn na gbik lenɛ ne ibol ɛbhɛ. ɛKɔn na ne i yaang ngo, kɛ ryɔng ɛbhɛ ne ɛkɔn ne i sang yaang.[55]

⁴Kaa lenɛ ne ìnang ne itin de, ɛHabila gha ne nang ɛTaanggbey ye ɛkɔn ne hap itsanga ne ɛ phyin ɛhaa ɛKɛɛnu. Kaa ne lenɛ ne ìnang ne itin ɛbhɛ de, ɛTaanggbey ya say ɛbhɛ wu ɛ so icik daa ɛli ne ɛTaanggbey ka say ɛkɔn na ne ɛ kɛ nang ngo. ɛHabila gha kaa ku, ìnang ne itin ɛbhɛ kɛ ne te ɛ tɔɔ bol.[56]

⁵Kaa lenɛ ne ìnang ne itin de ne i bo ɛNɔk ghe ɛken nɛ, te ɛ sang yaang iku. Sɔng ne tang sɛ ɛbhɛ nang, daa ɛli ne ɛTaanggbey ya kaa bo ɛbhɛ ɛ hyel lɛ. ɛWee ne ibol ɛTaanggbey yo i bo wu ɛTaanggbey ya kaa phok iyɛnɛng ɛNɔk ge nten de ne kaa tang bo ɛbhɛ wo.

⁶Wɛlɛng ɛnyi ne aa te ɛTaanggbey yegha phok iyɛnɛng tang ɛ kɛ nang ne itin nɛ. Daa ɛli ne gbik ɛnyi gha ne ɛ yaaso ɛlɔ ɛTaanggbey ya, iphɛ so nggbinggbing ɛ nang ne itin nɛ wu ɛTaanggbey ya sonɛ. Wu ɛ mɔn ninyi na nɛ nibhɛ tɔk ɛbhɛ wo iyɛnɛng.

⁷Kaa lenɛ ne ìnang ne itin ɛNuhu de ne ɛ roos ibol ne ɛTaanggbey kɛ mɔng ɛbhɛ daa nikɔn ne hame i yaang. Ɛ kaa lɔl ɛgyirigyi te ɛ phɔt ijwee ɛbhɛ. Kaa ne lenɛ ne ìnang ne itin ɛbhɛ de ne i hyɛ ɛzay ya ɛshara ne ku, ɛbhɛ ɛ ji say ɛwɛng ne icik ne i lenɛ ne ìnang itin de.[57]

⁸Kaa ne lenɛ ne ìnang ne itin de ɛBaraying roos ibol ɛTaanggbey nten de ne kaa yel-le ɛbhɛ, te ɛ phɛ ne ivel ne kaa yɔng aa teye isha ɛbhɛ. Sɔng ɛ kaa ne i yɛɛ ɛlɔ gha ne ɛ phɛɛs nang, gbik ne iphɛ ɛlɛy ne ɛ phɛ.[58]

⁹Kaa lenɛ ne ìnang ne itin de, ne ɛbhɛ shɛɛ ne ivel da ne ɛTaanggbey ya kɛ ku rop aa nang ɛbhɛ wo te ɛhaa ne kpoo. Ɛ kaa bhɛ shɛɛ ne ifo, ɛlɛy ne ɛShaaku, ne ɛYakub kaa ne ma shɛɛ ne ifo da, nibhɛ kaa ne re isha ne ibol de ne kɛ rop ne ɛBaraying nga.[59]

¹⁰ɛBaraying nga kaa shɛɛ ishwɛɛ yɛdaa nggyɛ wo daa ɛli ne ɛ kaa sit irwisɛ ɛ hyep ɛgarang nga ne ɛTaanggbey ɛbhɛ kɛ ryɔng tum mɛ ɛ lɔl.

¹¹Kaa lenɛ ne ìnang ne itin de, ɛBaraying nga ne yɛk ɛngɔn. Ɛ kaa ne yɛk ɛngɔn na nten de ne ɛ kaa helem, ɛSaratu gha ma soye ɛkuru. Ɛ kaa ne nang ne itin nɛ wu ɛTaanggbey ya so i sɛ say ibol ɛbhɛ ne ɛ kɛ ku rop.[60]

¹²iPhɛ ɛlɛy, kaa ne lenɛ ne ɛnyi ɛdaan kɛgha nggyɛ wo, ne ɛ kaa helem ɛ so te ɛ kɛ ku wo, ne i yɛk ihywee de gbom tɛ niyuyɔrɔ ɛdaa ne irywa, te imumu ne ihywel ne hame sɛɛ yɛɛ ne tɔng ngɛ.[61]

¹³Gbik ninyi yɛnaa wo kaa ne kus ndɔ ne ìnang ne itin nibhɛ de. Sɔng nibhɛ kaa say nikɔn na ne ɛTaanggbey ya kaa rop nɛ nibhɛ wo nang. Nibhɛ kaa yang yaang nikɔn nɛ kyakyak. Nibhɛ ne phok yɛnɛng ngɛ, nibhɛ ne nang ishɛɛda yɛ wɛsɛrɛk wu nibhɛ soye ninaa ne ikpoo ndɔ ɛzay ya, sɔng ninaa ne ivel lɛ nang.[62]

¹⁴Ninyi na nɛ nibhɛ bol ihywee ne ivol lɛdaa wo, iphɛ kɛ ne tɔɔrek ncɛncɛng wu nibhɛ tɔk ɛgarang ne ito nibhɛ.

¹⁵Sɛɛ yɔng nibhɛ tas ɛgarang nga nɛ nibhɛ kɛ tek ko, nibhɛ ne bok ɛnkiinɛ ne bhɛ kyii yɛ.

¹⁶Nibhɛ kaa ne yang ku wɛɛ ɛgarang nga ne ɛ phyin ne ɛ so ɛgarang ɛdaa ne irywa gha. iPhɛ ɛlɛy, sɔng ɛTaanggbey ya bok ncwa ne yaa yaak nibhɛ wu nibhɛ soye ninyi ɛTaanggbey ya nang, daa ɛli ne ɛ kɛ ku ryɔng nibhɛ ɛgarang ngɛ.

¹⁷Kaa lenɛ ne ìnang ne itin de, ɛBaraying nga ne nang ɛngɔn ɛdaan ɛbhɛ te hap ɛTaanggbey ye ne itsanga, nten de ne kaa tɛɛsek ɛbhɛ ɛBaraying nge gha. ɛBaraying nga ɛ kaa say ibol ne ɛTaanggbey kɛ rop ne ɛbhɛ, gbik ne iphɛ ɛlɛy, ne ɛ jung yɛk ne iyɔk kɛ aa nang ɛngɔn ɛbhɛ gha.[63]

¹⁸ɛTaanggbey ya kaa ku yaak ɛBaraying nge gha, “Sɛ lenɛ ne ɛShaaku gha ne see ihywee mo ne nggɛ ku sim-mɛ nɛ wo.”[64]

¹⁹ɛBaraying nga kaa tas, ne ɛ seng ntsɛntsɛng wu ɛTaanggbey ya sɛ yɛɛ ne yiisik ɛnyi gha tsik ndɔ ne ikpuu da. iPhɛ ne ma ku so te kɛ bhɛ kyii ɛBaraying ngegha ne ɛShaaku gha ndɔ ne ikpuu da.

²⁰Kaa lenɛ ne ìnang ne itin de ɛShaaku gha ne sit ɛYakub bhe ne ɛSuwa ne ɛwɛng nɛ nibhɛ sɛ́ sɛ̀ gɔɔ ɛyisɛ.[65]

²¹Kaa lenɛ ne ìnang ne itin de ɛYakub, ndɔ ne itselem ɛbhɛ ne ɛ yungaa ku, ne ɛ phyik ghe ne ɛnggbong, ɛ re ɛTaanggbey ye ntsong ɛ sit ɛrɔngɔ ndɔ ninɔn ɛYisifu ne ɛwɛng.[66]

²²Kaa lenɛ ne ìnang ne itin de, ɛYisifu ndɔ ne itselem ɛbhɛ ne ɛ yungaa ku, ne ɛ mɔng ibol ne iwuru niSɛrɛla ne ivel ne iMasad, ɛ mɔng nibhɛ ɛkɔn na nɛ nibhɛ sɛ mɔn ne ikpup ɛbhɛ.[67]

²³Kaa ne lenɛ ne ìnang ne itin de, nikyɛɛ ɛMuusaa na rɛɛ ɛbhɛ iphɛl itat ɛtsim mɛ ne kɛ yɛk ɛbhɛ. Nibhɛ kaa mɔn ɛlɛ wo daa ɛli nɛ nibhɛ kaa yaang ɛ kɛ jam, sɔng nibhɛ ne phok ɛnik ne ikpii ɛgɔm ma nang.[68]

²⁴Kaa ne lenɛ ne ìnang ne itin de, ɛMuusaa gha ne mbaray tang i yaak ɛbhɛ ɛ so ɛngɔn ɛlap ɛHyiridus ne kɛ sɛ ɛ kɛ hɔn.[69]

²⁵Ɛ kaa kasa aa sɔ nggbang nɛ ninyi ɛTaanggbey ya ne aa phok ɛnggɔnggɔɔt ne ɛfɔt to ndɔ ne nten ncɛt de.

²⁶Ɛ kaa kasa ncwa da ne aa sɔ ɛlɔ ɛKiriti gha phyin iryat ne iMasad de ne iyɛnɛng gbom, daa ɛli ne ɛ kaa sit irwisɛ ɛbhɛ ne iyɛnɛng ngge ne sɛ bhɛ mɔn ɛbhɛ nɛ gɔɔ ɛyisɛ gha.

²⁷Kaa ne lenɛ ne ìnang ne itin de, ne ɛ tek ivel ne iMasad da tang ɛ sap njenjek ɛgɔm be. Ɛ kaa kyinak ne irway nviit da daa ɛli ne ɛ kaa yaang ɛkɔn na ne hame i yaang ne irwisɛ.[70]

²⁸Kaa lenɛ ne ìnang ne itin de ɛMuusaa gha ne see iDira ne Tes iDee Tsak, ɛ yɛk ngɛ i phyimɛ neyi na ninu ne iduk ka ɛlɔ ne ɛmalɛka ne phobho ninɔn nikɔɔn na yaa yung phobho ninɔn nikɔɔn niSɛrɛla na.[71]

²⁹Kaa lenɛ ne ìnang ne itin de, niSɛrɛla na ne bere ne iHywel Nding te ivel howo, ne sɛ ninyi ne iMasad ta i bo wu n yaa ma bere inɛn da ne wɔlɔs nibhɛ.

³⁰Kaa lenɛ ne ìnang ne itin de, iwabha ɛgarang ne iYɛriko wo ne ho ɛtsim mɛ nɛ niSɛrɛla na kɛ tes ifɛ gyɔɔ nituk ɛniitaa.[72]

³¹Kaa lenɛ ne ìnang ne itin de, ɛRahaba ne ɛ kaa so ɛkuk ne re shwaa ne sɛ iphɔrɔt. Sɔng ne phoo ɛbhɛ nang, daa ɛli ne ɛ kaa say ninaa ne ta ɛduk ne ivel la tɛ nitaay.[73]

³²Naa ne ji ta yɔng ɛli daa mɛɛ? Sɔng nten ji ta some nɛ ne naa tɔng ibol ɛGyidiyɔn, ne idee ɛBarak, ne idee ɛSamson, ne idee ɛYɛfta, ne idee ɛDoda, ne idee ɛSamɛl gbik ne idee ninabawa de nang.[74]

³³Kaa lenɛ ne ìnang ne itin nibhɛ de, nibhɛ ne re nigɔm ne itsom, nibhɛ bol ɛshara ntin, nibhɛ ne say ɛkɔn na ne ɛTaanggbey kɛ ku sim-mɛ, nibhɛ cwamas ninu nikuramanza.[75]

³⁴Nibhɛ ne te ɛgbaang ne igboo wo te tang ihwet ɛlɔ nibhɛ, nibhɛ ne phɔrɔt ɛlɔ ninyi nɛ nibhɛ sim nibhɛ yaa tɛm nibhɛ ne ihywa. Kaa hyere ikyɔkyɔt nibhɛ de iphɛ kyii teye ihwet. Nibhɛ kaa ne yɛk ihwet ne ta itsom, nibhɛ roos nisooja nigarang nga kang-ka-kang.[76]

³⁵Kaa ne lenɛ ne ìnang ne itin de nikuk ka nɛ ninyi nibhɛ na kaa ku kus so ne kyii nibhɛ niken nɛ. Ne baasek nidɛng nggbang, nibhɛ ne mbaray tang i biri nibhɛ ndɔ ne nggbang ngga, daa ɛli nɛ nibhɛ i sim te sɛ bhɛ mɔn nibhɛ iyɛnɛng ɛtuk ne yilitsik ne ikpuu gha.[77]

³⁶Kaa ne bɛɛs nidɛng i hal nibhɛ, ne ta robhos nidɛng, i bhɛ cwaasek nibhɛ ne ijwee ne nyang.[78]

³⁷Kaa ne ta phengɛ nidɛng ne ikpɛɛ nibhɛ kus, ne hyɛghɛ nidɛng ne izoroto i hosope nibhɛ ɛphaa, ne hyɛghɛ nidɛng nɛ ihywa i phobho. Nibhɛ kaa sɔ iyɔm gbom, nibhɛ ne i yaak ghe ne ihuhu ntsabhak ne ᐩigyol. Nibhɛ kaa sɔ nggbang ne ɛmpyep.[79]

³⁸Sɔng ɛzay yeghaa wo kaa so te ɛ soye ɛhaa nibhɛ nang. Nibhɛ ne i kaan nihay, ne ibarang, nibhɛ shɛɛ ne itak, ne ivong ndɔ ne ivel.

³⁹Gbik ninyi yɛnaa wo, ɛTaanggbey ya kaa ne phok iyɛnɛng nibhɛ lenɛ ne ìnang ne itin nibhɛ de, gbik ne iphɛ ɛlɛy sɔng ɛdɛ ɛbhɛ kaa ne sɛ ɛkɔn na ne ɛTaanggbey ya kɛ ku sim-mɛ wo nang,

⁴⁰daa ɛli ne ɛTaanggbey ya kɛ ku ryɔng njwɛɛn ɛdɛ ɛkɔn ɛyɛnɛng nga, te njwɛɛn no nɛ nibhɛ wo sɛ te hyɔrɔ nten idaan nɛ.